Tim Seifert: ಟಿಮ್ ಸೀಫರ್ಟ್​ ಬಿರುಗಾಳಿ ಬ್ಯಾಟಿಂಗ್: ಖಲಂದರ್ಸ್​ಗೆ ಭರ್ಜರಿ ಜಯ

Zim Afro T10 2023: ಹರಾರೆಯ ಸ್ಪೋರ್ಟ್ಸ್​ ಕ್ಲಬ್ ಮೈದಾನದಲ್ಲಿ ನಡೆದ ಝಿಮ್ ಆಫ್ರೊ ಟಿ10 ಲೀಗ್​ನಲ್ಲಿ ನ್ಯೂಝಿಲೆಂಡ್ ಆಟಗಾರ ಟಿಮ್ ಸೀಫರ್ಟ್ ಪ್ರಚಂಡ ಬ್ಯಾಟಿಂಗ್ ಪ್ರದರ್ಶಿಸಿದ್ದಾರೆ. ಡರ್ಬನ್ ಖಲಂದರ್ಸ್ ವಿರುದ್ಧದ ಈ ಪಂದ್ಯದಲ್ಲಿ ಟಾಸ್ ಜಯಿಸಿದ ಬುಲವಾಯೊ ಬ್ರೇವ್ಸ್ ತಂಡದ ನಾಯಕ ಸಿಕಂದರ್ ರಾಝ ಬೌಲಿಂಗ್ ಆಯ್ದುಕೊಂಡಿದ್ದರು. ಆದರೆ ಆರಂಭಿಕ ಆಟಗಾರ ಟಿಮ್ ಸೀಫರ್ಟ್ ಅಬ್ಬರದೊಂದಿಗೆ ರಾಝ ಅವರ ನಿರ್ಧಾರ ತಪ್ಪು ಎಂಬುದು ಸಾಬೀತಾಗಿತ್ತು. ಏಕೆಂದರೆ ಮೊದಲ ಓವರ್​ನಿಂದಲೇ ಸಿಕ್ಸ್​ ಸುರಿಮಳೆ ಆರಂಭಿಸಿದ ಸೀಫರ್ಟ್​ ಬುಲವಾಯೊ ಬ್ರೇವ್ಸ್ ಬೌಲರ್​ಗಳ ಬೆವರಿಳಿಸಿದರು.

ಅಷ್ಟೇ ಅಲ್ಲದೆ ಕೇವಲ 14 ಎಸೆತಗಳಲ್ಲಿ 4 ಭರ್ಜರಿ ಸಿಕ್ಸ್ ಹಾಗೂ 4 ಫೋರ್​ಗಳನ್ನು ಸಿಡಿಸಿದ ಸೀಫರ್ಟ್​ 44 ರನ್​ ಬಾರಿಸಿ ಟೈಮಲ್ ಮಿಲ್ಸ್​ಗೆ ವಿಕೆಟ್ ಒಪ್ಪಿಸಿದ್ದರು. ಅಷ್ಟರಲ್ಲಾಗಲೇ ಡರ್ಬನ್ ಖಲಂದರ್ಸ್ ತಂಡದ ಮೊತ್ತ 3.5 ಓವರ್​ಗಳಲ್ಲಿ 60 ಕ್ಕೆ ಬಂದು ನಿಂತಿತ್ತು.

ಇನ್ನು 3ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಆಂಡ್ರೆ ಫ್ಲೆಚರ್ 15 ಎಸೆತಗಳಲ್ಲಿ 4 ಫೋರ್​ ಹಾಗೂ 1 ಸಿಕ್ಸ್​ನೊಂದಿಗೆ 34 ರನ್ ಬಾರಿಸಿದರು. ಹಾಗೆಯೇ ಹಝರತುಲ್ಲಾ ಝಝೈ 21 ರನ್​ಗಳ ಕೊಡುಗೆ ನೀಡಿದರು. ಇದರೊಂದಿಗೆ ನಿಗದಿತ 10 ಓವರ್​ಗಳಲ್ಲಿ ಡರ್ಬನ್ ಖಲಂದರ್ಸ್ ತಂಡವು 6 ವಿಕೆಟ್​ ನಷ್ಟಕ್ಕೆ 122 ರನ್ ಪೇರಿಸಿತು.

123 ರನ್​ಗಳ ಕಠಿಣ ಗುರಿ ಬೆನ್ನತ್ತಿದ ಬುಲವಾಯೊ ಬ್ರೇವ್ಸ್ ಪರ ಆಷ್ಟನ್ ಟರ್ನರ್ 23 ಎಸೆತಗಳಲ್ಲಿ 32 ರನ್ ಬಾರಿಸಿದರೆ, ಸಿಕಂದರ್ ರಾಝ (11) ಹಾಗೂ ರಿಯಾನ್ ಬರ್ಲ್ 11 ರನ್​ಗಳಿಸಿದರು. ಇತ್ತ ಬ್ರಾಡ್ ಇವಾನ್ಸ್​ 3 ವಿಕೆಟ್ ಕಬಳಿಸಿ ಬುಲವಾಯೊ ಬ್ರೇವ್ಸ್ ತಂಡದ ರನ್​ ಗತಿಯನ್ನು ನಿಯಂತ್ರಿಸಿದರು.

ಅಂತಿಮವಾಗಿ ಬುಲವಾಯೊ ಬ್ರೇವ್ಸ್ 10 ಓವರ್​ಗಳಲ್ಲಿ 7 ವಿಕೆಟ್ ಕಳೆದುಕೊಂಡು 97 ರನ್​ಗಳಿಸಲಷ್ಟೇ ಶಕ್ತರಾದರು. ಈ ಮೂಲಕ ಡರ್ಬನ್ ಖಲಂದರ್ಸ್ ತಂಡವು 25 ರನ್​ಗಳ ಭರ್ಜರಿ ಜಯ ತನ್ನದಾಗಿಸಿಕೊಂಡಿತು.

ಬುಲವಾಯೊ ಬ್ರೇವ್ಸ್ ಪ್ಲೇಯಿಂಗ್ 11: ಬೆನ್ ಮೆಕ್‌ಡರ್ಮಾಟ್ (ವಿಕೆಟ್ ಕೀಪರ್) , ಕೋಬ್ ಹರ್ಫ್ಟ್ , ಆಷ್ಟನ್ ಟರ್ನರ್ , ಸಿಕಂದರ್ ರಾಝ (ನಾಯಕ) , ರಿಯಾನ್ ಬರ್ಲ್ , ಟಿಮಿಸೆನ್ ಮರುಮಾ , ಬ್ಯೂ ವೆಬ್‌ಸ್ಟರ್ , ಪ್ಯಾಟ್ರಿಕ್ ಡೂಲಿ , ತನಕಾ ಚಿವಂಗಾ , ಟೈಮಲ್ ಮಿಲ್ಸ್ , ಫರಾಜ್ ಅಕ್ರಮ್.

ಇದನ್ನೂ ಓದಿ: Team India: 13 ಸೋಲು…ನಾಕೌಟ್​ನಲ್ಲಿ ಮುಗ್ಗರಿಸುವ ಟೀಮ್ ಇಂಡಿಯಾ

ಡರ್ಬನ್ ಖಲಂದರ್ಸ್​ ಪ್ಲೇಯಿಂಗ್ 11: ಟಿಮ್ ಸೀಫರ್ಟ್ (ವಿಕೆಟ್ ಕೀಪರ್) , ಹಝರತುಲ್ಲಾ ಝಝೈ, ಕ್ರೇಗ್ ಎರ್ವಿನ್ (ನಾಯಕ) , ಆಂಡ್ರೆ ಫ್ಲೆಚರ್ , ನಿಕ್ ವೆಲ್ಚ್ , ಆಸಿಫ್ ಅಲಿ , ಜಾರ್ಜ್ ಲಿಂಡೆ , ಬ್ರಾಡ್ ಇವಾನ್ಸ್ , ಓವನ್ ಮುಜೊಂಡೋ , ಡೇರಿನ್ ಡುಪಾವಿಲ್ಲನ್ , ಮೊಹಮ್ಮದ್ ಅಮೀರ್.