Paris Olympics 2024: ಒಲಿಂಪಿಕ್ಸ್ನಲ್ಲಿಂದು ಭಾರತೀಯರಿಬ್ಬರ ಮುಖಾಮುಖಿ
Paris Olympics 2024: ಜೊನಾಥನ್ ಕ್ರಿಸ್ಟಿ ವಿರುದ್ಧ 21-18, 21-12 ರಿಂದ ಅಭೂತಪೂರ್ವ ಗೆಲುವು ಸಾಧಿಸಿ ಪ್ರೀ ಕ್ವಾರ್ಟರ್ ಫೈನಲ್ಗೆ ಪ್ರವೇಶಿಸಿರುವ ಲಕ್ಷ್ಯ ಸೇನ್ಗೆ ಎದುರಾಳಿಯಾಗಿ ಸಿಕ್ಕಿದ್ದು, ಭಾರತದ ಹೆಚ್ಎಸ್ ಪ್ರಣಯ್. ಪ್ಯಾರಿಸ್ ಅಂಗಳದಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿರುವ ಭಾರತೀಯರಿಬ್ಬರು ಮುಖಾಮುಖಿಯಾಗುತ್ತಿರುವುದು ವಿಶೇಷ.
ಪ್ಯಾರಿಸ್ ಒಲಿಂಪಿಕ್ಸ್ನ ಬ್ಯಾಡ್ಮಿಂಟನ್ ಪುರುಷರ ಸಿಂಗಲ್ಸ್ನಲ್ಲಿ ಇಂದು ಭಾರತೀಯ ಷಟ್ಲರ್ಗಳಾದ ಲಕ್ಷ್ಯ ಸೇನ್ ಹಾಗೂ ಹೆಚ್ಎಸ್ ಪ್ರಣಯ್ ಮುಖಾಮುಖಿಯಾಗಲಿದ್ದಾರೆ. ಅಚ್ಚರಿ ಎಂದರೆ ಈ ಪಂದ್ಯದಲ್ಲಿ ಗೆದ್ದವರು ಮುಂದಿನ ಹಂತಕ್ಕೇರಿದರೆ, ಸೋತವರು ಒಲಿಂಪಿಕ್ಸ್ನಿಂದ ಹೊರಬೀಳಲಿದ್ದಾರೆ. ಅಂದರೆ ಗೆದ್ದರು, ಸೋತರೂ ಭಾರತಕ್ಕೆ ಲಾಭ-ನಷ್ಟವಾಗುವುದು ಖಚಿತ. ಏಕೆಂದರೆ ಈ ಪಂದ್ಯದೊಂದಿಗೆ ಬ್ಯಾಡ್ಮಿಂಟನ್ನಲ್ಲಿ ಭಾರತೀಯರೊಬ್ಬರ ಅಭಿಯಾನ ಅಂತ್ಯವಾಗಲಿದೆ.
ಬುಧವಾರ ನಡೆದ ಸ್ಪರ್ಧೆಯಲ್ಲಿ ಶ್ರೇಯಾಂಕ ರಹಿತ ಲಕ್ಷ್ಯ ಸೇನ್ ಮೂರನೇ ಶ್ರೇಯಾಂಕದ ಜೊನಾಟನ್ ಕ್ರಿಸ್ಟಿ ವಿರುದ್ಧ 21-18, 21-12 ರಿಂದ ಅಭೂತಪೂರ್ವ ಗೆಲುವು ಸಾಧಿಸಿ ಪ್ರೀ ಕ್ವಾರ್ಟರ್ ಸುತ್ತಿಗೆ ಪ್ರವೇಶಿಸಿದ್ದಾರೆ.
ಇದನ್ನೂ ಓದಿ: ಒಲಿಂಪಿಕ್ಸ್ನಲ್ಲಿ ಹೊಸ ಇತಿಹಾಸ ನಿರ್ಮಿಸಿದ ಮನು ಭಾಕರ್
ಮತ್ತೊಂದೆಡೆ, ನಿನ್ನೆ ನಡೆದ ಸ್ಪರ್ಧೆಯಲ್ಲಿ ಹೆಚ್ಎಸ್ ಪ್ರಣಯ್ ವಿಯೆಟ್ನಾಂನ ಲೆ ಡಕ್ ಫಾಟ್ ವಿರುದ್ಧ ಕಣಕ್ಕಿಳಿದಿದ್ದರು. ಈ ಪಂದ್ಯದಲ್ಲಿ ವಿಯೆಟ್ನಾಂ ಷಟ್ಲರ್ ವಿರುದ್ಧ 16-21, 21-11, 21-12 ಅಂತರದಿಂದ ಗೆಲ್ಲುವಲ್ಲಿ ಪ್ರಣಯ್ ಯಶಸ್ವಿಯಾಗಿದ್ದಾರೆ. ಅದರಂತೆ ಇದೀಗ ಪ್ರಿ ಕ್ವಾರ್ಟರ್ ಫೈನಲ್ನಲ್ಲಿ ಭಾರತೀಯ ತಾರೆಗಳು ಮುಖಾಮುಖಿಯಾಗುತ್ತಿರುವುದು ವಿಶೇಷ.
ಭಾರತೀಯರಿಬ್ಬರ ಮುಖಾಮುಖಿ ಏಕೆ?
ಪ್ಯಾರಿಸ್ ಒಲಿಂಪಿಕ್ಸ್ನಲ್ಲಿ ಪುರುಷ ಬ್ಯಾಡ್ಮಿಂಟನ್ನಲ್ಲಿ ಭಾರತದಿಂದ ಲಕ್ಷ್ಯ ಸೇನ್ ಹಾಗೂ ಹೆಚ್ ಎಸ್ ಪ್ರಣಯ್ ಅರ್ಹತೆ ಪಡೆದುಕೊಂಡಿದ್ದರು. ಅದರಂತೆ ಈ ಬಾರಿಯ ಕ್ರೀಡಾಕೂಟದ ಮೊದಲ ಸುತ್ತಿನಲ್ಲಿ ಪ್ರಣಯ್ K ಗ್ರೂಪ್ನಲ್ಲಿ ಕಣಕ್ಕಿಳಿದರೆ, ಲಕ್ಷ್ಯ ಸೇನ್ L ಗ್ರೂಪ್ನಲ್ಲಿ ಆಡಿದ್ದರು. ಇದೀಗ ಗ್ರೂಪ್ ಹಂತ ಮುಗಿದು ಪಂದ್ಯವು ರೌಂಡ್-16 ಗೆ ತಲುಪಿದೆ.
ಈ ಸುತ್ತಿನಲ್ಲಿ ಆಯಾ ಗ್ರೂಪ್ನಿಂದ ಅರ್ಹತೆ ಪಡೆದ ಆಟಗಾರರು ಪರಸ್ಪರ ಮುಖಾಮುಖಿಯಾಗುತ್ತಾರೆ. ಅದರಂತೆ ಇದೀಗ ಪ್ರಿ ಕ್ವಾರ್ಟರ್ ಫೈನಲ್ನಲ್ಲಿ ಭಾರತದ ಲಕ್ಷ್ಯ ಸೇನ್ ಹಾಗೂ ಹೆಚ್ ಎಸ್ ಪ್ರಣಯ್ ಎದುರು ಬದುರಾಗಿದ್ದಾರೆ. ಈ ಪಂದ್ಯದಲ್ಲಿ ಗೆಲ್ಲುವವರು ಕ್ವಾರ್ಟರ್ ಫೈನಲ್ಗೆ ಪ್ರವೇಶಿಸಿದರೆ, ಸೋತವರ ಅಭಿಯಾನ ಅಂತ್ಯವಾಗಲಿದೆ.
ಹೆಡ್ ಡು ಹೆಡ್:
ಲಕ್ಷ್ಯ ಸೇನ್ ಹಾಗೂ ಪ್ರಣಯ್ ಈವರೆಗೆ 7 ಬಾರಿ ಮುಖಾಮುಖಿಯಾಗಿದ್ದಾರೆ. ಈ ವೇಳೆ ಪ್ರಣಯ್ 3 ಬಾರಿ ಜಯ ಸಾಧಿಸಿದರೆ, ಉಳಿದ ಪಂದ್ಯಗಳಲ್ಲಿ ಲಕ್ಷ್ಯ ಸೇನ್ ಗೆಲುವಿನ ನಗೆ ಬೀರಿದ್ದಾರೆ. ಇಬ್ಬರ ನಡುವಣ ಮುಖಾಮುಖಿಯ ಫಲಿತಾಂಶ ಈ ಕೆಳಗಿನಂತಿದೆ…
ದಿನಾಂಕ | ಪಂದ್ಯಾವಳಿ | ಆಟಗಾರ 1 | ಆಟಗಾರ 2 | ಸ್ಕೋರ್ | ವಿಜೇತ |
1/17/2023 | ಇಂಡಿಯಾ ಓಪನ್ 2023 | ಪ್ರಣಯ್ | ಲಕ್ಷ್ಯ ಸೇನ್ | 14-21 15-21 | ಲಕ್ಷ್ಯ ಸೇನ್ |
1/11/2023 | ಮಲೇಷ್ಯಾ ಓಪನ್ 2023 | ಪ್ರಣಯ್ | ಲಕ್ಷ್ಯ ಸೇನ್ | 22-24 21-12 21-18 | ಪ್ರಣಯ್ |
10/20/2022 | ಡೆನ್ಮಾರ್ಕ್ ಓಪನ್ 2022 | ಪ್ರಣಯ್ | ಲಕ್ಷ್ಯ ಸೇನ್ | 9-21 18-21 | ಲಕ್ಷ್ಯ ಸೇನ್ |
8/25/2022 | ವಿಶ್ವ ಚಾಂಪಿಯನ್ಶಿಪ್ 2022 | ಪ್ರಣಯ್ | ಲಕ್ಷ್ಯ ಸೇನ್ | 17-21 21-16 21-17 | ಪ್ರಣಯ್ |
6/15/2022 | ಇಂಡೋನೇಷ್ಯಾ ಓಪನ್ 2022 | ಪ್ರಣಯ್ | ಲಕ್ಷ್ಯ ಸೇನ್ | 21-10 21-9 | ಪ್ರಣಯ್ |
3/11/2022 | ಜರ್ಮನ್ ಓಪನ್ 2022 | ಪ್ರಣಯ್ | ಲಕ್ಷ್ಯ ಸೇನ್ | 15-21 16-21 | ಲಕ್ಷ್ಯ ಸೇನ್ |
1/14/2022 | ಇಂಡಿಯಾ ಓಪನ್ | ಪ್ರಣಯ್ | ಲಕ್ಷ್ಯ ಸೇನ್ | 21-14 9-21 14-21 | ಲಕ್ಷ್ಯ ಸೇನ್ |
ಎಷ್ಟು ಗಂಟಗೆ ಪಂದ್ಯ ಶುರು?
ಬ್ಯಾಡ್ಮಿಂಟನ್ನಲ್ಲಿ ಇಂದು ಭಾರತದ ನಾಲ್ವರು ಕಣಕ್ಕಿಳಿಯಲಿದ್ದಾರೆ. ಇಲ್ಲಿ ಪುರುಷರ ಡಬಲ್ಸ್ನಲ್ಲಿ ಸಾತ್ವಿಕ್-ಚಿರಾಗ್ ಆಡಿದರೆ, ಪುರುಷರ ಸಿಂಗಲ್ಸ್ನಲ್ಲಿ ಲಕ್ಷ್ಯ ಸೇನ್ ಹಾಗೂ ಪ್ರಣಯ್ ಮುಖಾಮುಖಿಯಾಗಲಿದ್ದಾರೆ. ಹಾಗೆಯೇ ಮಹಿಳಾ ಸಿಂಗಲ್ಸ್ನಲ್ಲಿ ಪಿವಿ ಸಿಂಧು ಕೂಡ ಕಣಕ್ಕಿಳಿಯುತ್ತಿದ್ದಾರೆ. ಈ ಪಂದ್ಯಗಳ ಸಮಯ ಈ ಕೆಳಗಿನಂತಿದೆ…
- 4:30 PM IST- ಪುರುಷರ ಡಬಲ್ಸ್ ಕ್ವಾರ್ಟರ್ ಫೈನಲ್: ಸಾತ್ವಿಕ್ ಸಾಯಿರಾಜ್ ರಂಕಿರೆಡ್ಡಿ ಮತ್ತು ಚಿರಾಗ್ ಶೆಟ್ಟಿ vs ಆರೋನ್ ಚಿಯಾ ಮತ್ತು ಸೊಹ್ ವೂಯಿ ಯಿಕ್ (ಮಲೇಷ್ಯಾ)
- 5:40 PM IST – ಪುರುಷರ ಸಿಂಗಲ್ಸ್: ಲಕ್ಷ್ಯ ಸೇನ್ vs ಹೆಚ್ಎಸ್ ಪ್ರಣಯ್
- 10 PM ರಿಂದ – ಮಹಿಳೆಯರ ಸಿಂಗಲ್ಸ್: ಪಿವಿ ಸಿಂಧು vs ಹೆ ಬಿಂಗ್ ಜಿಯಾವೊ
Published On - 9:49 am, Thu, 1 August 24