BWF World Championship: ಶುಭಾರಂಭ ಮಾಡಿದ ಪಿವಿ ಸಿಂಧು! ಕ್ವಾರ್ಟರ್‌ಫೈನಲ್​ನಲ್ಲಿ ಪ್ರಬಲ ಎದುರಾಳಿ

ಗುರುವಾರ ನಡೆದ ಬಿಡಬ್ಲ್ಯುಎಫ್ ವಿಶ್ವ ಚಾಂಪಿಯನ್‌ಶಿಪ್ ಬ್ಯಾಡ್ಮಿಂಟನ್ ಟೂರ್ನಿಯ ಮಹಿಳೆಯರ ಸಿಂಗಲ್ಸ್ ವಿಭಾಗದಲ್ಲಿ ಹಾಲಿ ಚಾಂಪಿಯನ್ ಪಿವಿ ಸಿಂಧು ಅವರು ಥಾಯ್ಲೆಂಡ್‌ನ ಪೋರ್ನ್‌ಪಾವೀ ಚೊಚುವಾಂಗ್ ಅವರನ್ನು ನೇರ ಗೇಮ್‌ಗಳಲ್ಲಿ ಸೋಲಿಸಿ ಕ್ವಾರ್ಟರ್ ಫೈನಲ್‌ ಪ್ರವೇಶಿಸಿದ್ದಾರೆ. ವಿಶ್ವದ 7ನೇ ಶ್ರೇಯಾಂಕದ ಭಾರತೀಯ ಆಟಗಾರ್ತಿ 48 ನಿಮಿಷಗಳ ಕಾಲ ನಡೆದ ಪ್ರೀ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ 10ನೇ ಶ್ರೇಯಾಂಕದ ಥಾಯ್ಲೆಂಡ್ ಆಟಗಾರ್ತಿಯನ್ನು 21-14 21-18 ಅಂತರದಿಂದ ಸೋಲಿಸಿದರು. ಇದು ಪೋರ್ನ್‌ಪಾವಿ ವಿರುದ್ಧದ ಎಂಟು ಪಂದ್ಯಗಳಲ್ಲಿ ಆರನೇ ಶ್ರೇಯಾಂಕದ ಸಿಂಧು ಅವರ ಐದನೇ ಜಯವಾಗಿದೆ, ಆದರೆ ಅವರು ಮೂರು ಬಾರಿ ಸೋತಿದ್ದಾರೆ. ಇದರೊಂದಿಗೆ ಸಿಂಧು ಪ್ರಸಕ್ತ ಋತುವಿನಲ್ಲಿ ಪೋರ್ನ್‌ಪಾವೀ ವಿರುದ್ಧದ ಎರಡು ಸೋಲಿಗೆ ಸೇಡು ತೀರಿಸಿಕೊಂಡಿದ್ದಾರೆ. ಈ ತಿಂಗಳ ಆರಂಭದಲ್ಲಿ, BWF ವರ್ಲ್ಡ್ ಟೂರ್ ಫೈನಲ್ಸ್‌ನ ಗುಂಪು ಪಂದ್ಯದಲ್ಲಿ ಸಿಂಧುವನ್ನು ಸೋಲಿಸುವ ಮೊದಲು ಪೋರ್ನ್‌ಪಾವೀ ಮಾರ್ಚ್‌ನಲ್ಲಿ ಆಲ್ ಇಂಗ್ಲೆಂಡ್ ಚಾಂಪಿಯನ್‌ಶಿಪ್‌ನಲ್ಲಿ ಸಿಂಧುವನ್ನು ಸೋಲಿಸಿದ್ದರು.

ಎರಡು ಬಾರಿ ಒಲಿಂಪಿಕ್ ಪದಕ ವಿಜೇತೆ ಸಿಂಧು ಕ್ವಾರ್ಟರ್ ಫೈನಲ್‌ನಲ್ಲಿ ಅಗ್ರ ಶ್ರೇಯಾಂಕದ ಮತ್ತು ವಿಶ್ವದ ಅಗ್ರ ಶ್ರೇಯಾಂಕದ ಚೈನೀಸ್ ತೈಪೆಯ ತೈ ಚು ಯಿಂಗ್ ಅವರನ್ನು ಎದುರಿಸಲಿದ್ದಾರೆ. ಅವರು ಸ್ಕಾಟ್ಲೆಂಡ್‌ನ ಕ್ರಿಸ್ಟಿ ಗಿಲ್ಮೋರ್ ಅವರನ್ನು 21-10 19-21 21-11 ಅಂತರದಿಂದ ಸೋಲಿಸಿ ಕ್ವಾರ್ಟರ್ ಫೈನಲ್ಗೆ ಲಗ್ಗೆ ಇಟ್ಟಿದ್ದಾರೆ. ಯಿಂಗ್ ಮತ್ತು ಸಿಂಧು ಸ್ಪರ್ಧೆಗಾಗಿ ಎಲ್ಲರೂ ಕಾಯುತ್ತಿದ್ದಾರೆ. ಇಬ್ಬರೂ ಅತ್ಯುತ್ತಮ ಆಟಗಾರ್ತಿಯರು ಎಂಬುದು ಈಗಾಗಲೇ ರುಜುವಾತಾಗಿದೆ. ಆದರೆ ಯಿಂಗ್ ಅನ್ನು ಎದುರಿಸುವುದು ಸಿಂಧುಗೆ ಯಾವುದೇ ರೀತಿಯಿಂದಲೂ ಸುಲಭವಲ್ಲ. ಟೋಕಿಯೊ ಒಲಿಂಪಿಕ್ಸ್‌ನ ಸೆಮಿಫೈನಲ್‌ನಲ್ಲಿ ಯಿಂಗ್, ಸಿಂಧು ಅವರನ್ನು ಸೋಲಿಸಿ ಚಿನ್ನ ಗೆಲ್ಲುವ ಕನಸನ್ನು ಮುರಿದಿದ್ದರು.

ಪಂದ್ಯ ಹೀಗಿತ್ತು ಸಿಂಧು ಉತ್ತಮ ಆರಂಭವನ್ನು ಮಾಡಿದರು ಮತ್ತು ಶೀಘ್ರದಲ್ಲೇ 5-1 ಮುನ್ನಡೆ ಸಾಧಿಸಿದರು. ಆದರೆ ಪೋರ್ನ್‌ಪಾವಿ ಸ್ಕೋರ್ ಅನ್ನು 4-5 ಗೆ ತಗ್ಗಿಸಿದರು. ನಂತರ 15-10 ಮತ್ತು ನಂತರ 19-11 ರಿಂದ ಉತ್ತಮ ಆಟ ಪ್ರದರ್ಶಿಸಿದ ಸಿಂಧು ಮೊದಲ ಗೇಮ್ ಅನ್ನು ಸುಲಭವಾಗಿ ಗೆದ್ದರು. ಎರಡನೇ ಗೇಮ್ ಕಠಿಣ ಹೋರಾಟ ಕಂಡಿತು ಆದರೆ ಸಿಂಧು 3-0 ಮುನ್ನಡೆ ಸಾಧಿಸಲು ಚೆನ್ನಾಗಿ ಆರಂಭಿಸಿದರು ಮತ್ತು ವಿರಾಮದ ತನಕ 11-6 ರಿಂದ ಮುಂದಿದ್ದರು.

ಸಿಂಧು 16-10 ಮುನ್ನಡೆಯಲ್ಲಿದ್ದರು ಆದರೆ ಪೋರ್ನ್‌ಪಾವಿ ಸ್ಕೋರ್ ಅನ್ನು 18-19 ಗೆ ತಂದು ನಿಲ್ಲಿಸಿದರು. ಸುದೀರ್ಘ ಪೈಪೋಟಿಯ ಬಳಿಕ ಪಾಯಿಂಟ್ಸ್ ಕಲೆಹಾಕಿದ ಸಿಂಧು 20-18 ಅಂಕ ಗಳಿಸಿ ಮುಂದಿನ ಪಾಯಿಂಟ್ ಗೆದ್ದು ಗೇಮ್ ಹಾಗೂ ಪಂದ್ಯವನ್ನು ಗೆದ್ದುಕೊಂಡರು. ಮೊದಲ ಸುತ್ತಿನಲ್ಲಿ ಬೈ ಪಡೆದ ಸಿಂಧು ಮಂಗಳವಾರ ನಡೆದ ಎರಡನೇ ಸುತ್ತಿನಲ್ಲಿ ಸ್ಲೋವಾಕಿಯಾದ ಮಾರ್ಟಿನಾ ರೆಪಿಸ್ಕಾ ಅವರನ್ನು 21-7 21-9 ಸೆಟ್‌ಗಳಿಂದ ಸೋಲಿಸಿದರು.

ಟೋಕಿಯೊ ನಂತರ ಮೊದಲ ಪ್ರಶಸ್ತಿಗಾಗಿ ಕಾದಾಟ ಸಿಂಧು ಟೋಕಿಯೊ ಒಲಿಂಪಿಕ್ಸ್‌ನಲ್ಲಿ ಕಂಚಿನ ಪದಕ ಗೆದ್ದಿದ್ದರು, ಆದರೆ ನಂತರ ಒಂದೇ ಒಂದು ಪಂದ್ಯಾವಳಿಯನ್ನು ಗೆಲ್ಲಲು ಸಾಧ್ಯವಾಗಲಿಲ್ಲ. ಈ ಟೂರ್ನಮೆಂಟ್‌ಗೂ ಮುನ್ನ ಅವರು ವರ್ಲ್ಡ್ ಟೂರ್ ಫೈನಲ್‌ನಲ್ಲಿ ಚಾಂಪಿಯನ್ ಆಗಲು ಸಾಧ್ಯವಾಗಲಿಲ್ಲ. ಫೈನಲ್‌ನಲ್ಲಿ ಅವರು ಕೊರಿಯಾದ ಆಟಗಾರ್ತಿ ಆನ್ ಸೆಯುಂಗ್ ಅವರ ಎದುರು ಸೋಲನುಭವಿಸಬೇಕಾಯ್ತು. ಇದಕ್ಕೂ ಮುನ್ನ ಇಂಡೋನೇಷ್ಯಾ ಓಪನ್‌ನ ಸೆಮಿಫೈನಲ್‌ನಲ್ಲಿ ಸಿಂಧು ಸೋತಿದ್ದರು. ಇಂಡೋನೇಷ್ಯಾ ಮಾಸ್ಟರ್ಸ್‌ನಲ್ಲೂ ಅವರಿಗೆ ಗೆಲುವು ಸಿಗಲಿಲ್ಲ. ಫ್ರೆಂಚ್ ಓಪನ್‌ನಲ್ಲೂ ಆಕೆಗೆ ಸೆಮಿಫೈನಲ್‌ ದಾಟಲು ಸಾಧ್ಯವಾಗಲಿಲ್ಲ. ಅವರು ಡೆನ್ಮಾರ್ಕ್ ಓಪನ್‌ನಲ್ಲಿ ಕ್ವಾರ್ಟರ್ ಫೈನಲ್‌ನಲ್ಲಿ ಸೋತರು.

Published On - 4:40 pm, Thu, 16 December 21