FIFA Suspends AIFF: ಫಿಫಾ ಅಮಾನತು, ಭಾರತೀಯ ಫುಟ್ಬಾಲ್ ಮೇಲೆ ಹೇಗೆ ಪ್ರಭಾವ ಬೀರಲಿದೆ?
FIFA Suspends AIFF: ಇಂಡಿಯನ್ ಫುಟ್ಬಾಲ್ ಕ್ಲಬ್ಗಳಿಗೆ ವಿದೇಶಿ ಕ್ಲಬ್ಗಳ ಜೊತೆ ಆಡಲು ಅವಕಾಶ ಇರಲ್ಲ. ಇನ್ನು ಫಿಫಾ ಪ್ರತಿ ದೇಶದಿಂದ ಒಂದಷ್ಟು ಯುವ ಪ್ರತಿಭೆಗಳನ್ನು ಆಯ್ಕೆ ಮಾಡಿ ಅವರಿಗೆ ಅತ್ಯುತ್ತಮ ತರಬೇತಿ ನೀಡುತ್ತದೆ.
Updated on:Aug 16, 2022 | 12:33 PM
ಅಂತಾರಾಷ್ಟ್ರೀಯ ಫುಟ್ ಬಾಲ್ನ ಜಾಗತಿಕ ಮಂಡಳಿ (FIFA) ಅಖಿಲ ಭಾರತ ಫುಟ್ಬಾಲ್ ಫೆಡರೇಶನ್ (AIFF) ಅನ್ನು ಅಮಾನತುಗೊಳಿಸಿದೆ. ಎಐಎಫ್‌ಎಫ್‌ನ ವ್ಯವಹಾರಗಳಲ್ಲಿ “ಮೂರನೇ ವ್ಯಕ್ತಿಯ ಹಸ್ತಕ್ಷೇಪ” ದಿಂದಾಗಿ ಈ ಕ್ರಮಕೈಗೊಳ್ಳಲಾಗಿದೆ ಎಂದು ಫಿಫಾ ತಿಳಿಸಿದೆ. ಬ್ಯೂರೊ ಆಫ್ ಫಿಫಾ (FIFA) ಕೌನ್ಸಿಲ್‍ನಲ್ಲಿ ಈ ಸಂಬಂಧ ಒಮ್ಮತದ ನಿರ್ಣಯ ಕೈಗೊಳ್ಳಲಾಗಿದ್ದು, ಅದರಂತೆ ಅಖಿಲ ಭಾರತ ಫುಟ್ಬಾಲ್ ಫೆಡರೇಶನ್ ಅನ್ನು ತಕ್ಷಣ ಜಾರಿಗೆ ಬರುವಂತೆ ಅಮಾನತುಗೊಳಿಸಲಾಗಿದೆ. ಈ ಅಮಾನತಿನೊಂದಿಗೆ FIFA U-17 ಮಹಿಳಾ ವಿಶ್ವಕಪ್ 2022 ಆಯೋಜಿಸುವ ಭಾರತದ ಕನಸು ಕೂಡ ಕಮರಿದೆ.
ಫಿಫಾ ತೆಗೆದುಕೊಂಡಿರುವ ಈ ಮಹತ್ವದ ನಿರ್ಧಾರಗಳಿಂದ ಭಾರತೀಯ ಫುಟ್ಬಾಲ್ ಮೇಲೆ ನೇರ ಪರಿಣಾಮ ಬೀರಲಿದೆ. ಅದರಲ್ಲೂ ಉದೋನ್ಮುಖ ಫುಟ್ಬಾಲ್ ತಾರೆಯರು ಆಟದಿಂದ ವಿಮುಖರಾಗುವ ಸಾಧ್ಯತೆ ಹೆಚ್ಚು. ಹಾಗಿದ್ರೆ ಫಿಫಾ ಕ್ರಮ ಕೈಗೊಳ್ಳಲು ಕಾರಣವೇನು? ಇದರಿಂದ ಭಾರತದ ಫುಟ್ಬಾಲ್ ಮೇಲೆ ಬೀರುವ ಪ್ರಭಾವಗಳೇನು ನೋಡೋಣ…
ಅಮಾನತು ಮಾಡಲು ಮುಖ್ಯ ಕಾರಣವೇನು?
ಫಿಫಾ ಇಡೀ ವಿಶ್ವದ ಫುಟ್ಬಾಲ್ ಮಂಡಳಿಗಳನ್ನು ನಿಯಂತ್ರಿಸುವ ಸಂಸ್ಥೆ. ಪ್ರತಿ ಮಂಡಳಿಗಳೂ ಫುಟ್ಬಾಲ್ ಬಗ್ಗೆ ತೆಗೆದುಕೊಳ್ಳುವ ನಿರ್ಧಾರಗಳನ್ನು ಫಿಫಾ ಗಮನಕ್ಕೆ ತರಬೇಕಾಗುತ್ತದೆ. ಉದಾಹರಣೆಗೆ ಭಾರತದಲ್ಲಿ ಆಯೋಜಿಸಲಾಗುತ್ತಿರುವ ಫುಟ್ಬಾಲ್ ಟೂರ್ನಿ ಭಾರತೀಯ ಸೂಪರ್ ಲೀಗ್ಗೂ ಫಿಫಾದಿಂದ ಅನುಮತಿ ಪಡೆಯಬೇಕು. ಇನ್ನು ಫಿಫಾ ಆಯೋಜಿಸುವ ಪ್ರಮುಖ ಟೂರ್ನಿಗಳಲ್ಲಿ ಆಯಾ ದೇಶಗಳ ಫುಟ್ಬಾಲ್ ಮಂಡಳಿಗೆ ತಮ್ಮ ಸಲಹೆಗಳನ್ನು ಮುಂದಿಡುವ ಅವಕಾಶವಿದ್ದರೂ, ಅಸೋಷಿಯೇಶನ್ನ ಹೊರಗಿರುವ ವ್ಯಕ್ತಿಗಳು ಹಸ್ತಕ್ಷೇಪ ಮಾಡುವಂತಿಲ್ಲ.
ಇದೀಗ ಭಾರತ ಅಂಡರ್ 17 ಮಹಿಳಾ ವಿಶ್ವಕಪ್ ಆಯೋಜಿಸುವ ಹೊಸ್ತಿಲಲ್ಲಿ ಫಿಫಾ ಭಾರತೀಯ ಫುಟ್ಬಾಲ್ ಫೆಡರೇಷನ್ನ್ನು ಅಮಾನತುಗೊಳಿಸಿದೆ. ಇಲ್ಲಿ ಉಲ್ಲೇಖಿಸಿರುವ ಪ್ರಮುಖ ಅಂಶವೆಂದರೆ ಮೂರನೇ ವ್ಯಕ್ತಿಗಳ ಹಸ್ತಕ್ಷೇಪ. ಅಂದರೆ ಎಐಎಫ್‌ಎಫ್‌ನ ವ್ಯವಹಾರಗಳಲ್ಲಿ ಹೊರಗಿನ ವ್ಯಕ್ತಿಗಳ ಅಥವಾ ಇನ್ನಿತರ ಅಧಿಕಾರಿಗಳ ನೇರ ಹಸ್ತಕ್ಷೇಪ ಕಂಡು ಬಂದಿದೆ. ಅದರಲ್ಲೂ ಫಿಫಾ ಚುನಾವಣಾ ವಿಷಯ ಸುಪ್ರೀಂ ಕೋರ್ಟ್ನಲ್ಲಿದೆ. ಈ ವಿಚಾರವಾಗಿ ಭಾರತೀಯ ಫುಟ್ಬಾಲ್ ಸಂಸ್ಥೆಯನ್ನು ನಿಯಂತ್ರಿಸಲು ನ್ಯಾಯಾಲಯ ಆಡಳಿತಗಾರರ ಸಮಿತಿ ರಚಿಸಿದೆ. ಈ ಎಲ್ಲಾ ಕಾರಣಗಳಿಂದ ಫಿಫಾ ಭಾರತೀಯ ಫುಟ್ಬಾಲ್ ಫೆಡರೇಶನ್ ಅನ್ನು ಅಮಾನತು ಮಾಡುವ ನಿರ್ಧಾರಕ್ಕೆ ಬಂದಿದೆ.
ಕೈ ತಪ್ಪಿದ ಅಂಡರ್ 17 ವಿಶ್ವಕಪ್:
ಭಾರತ ಇನ್ನೂ ಕೂಡ ಹಿರಿಯರ ಫಿಫಾ ವಿಶ್ವಕಪ್ಗೆ ಅರ್ಹತೆಯನ್ನು ಗಿಟ್ಟಿಸಿಕೊಂಡಿಲ್ಲ. ಆದರೆ ಯುವ ಪ್ರತಿಭೆಗಳು ಇತ್ತೀಚಿನ ದಿನಗಳಲ್ಲಿ ಫುಟ್ಬಾಲ್ನಲ್ಲಿ ಪ್ರಗತಿಯನ್ನು ಸಾಧಿಸುತ್ತಿದ್ದಾರೆ. ಅದರಲ್ಲೂ ಭಾರತೀಯ ಸೂಪರ್ ಲೀಗ್ನಂತಹ ಫುಟ್ಬಾಲ್ ಲೀಗ್ ಮೂಲಕ ಅತ್ಯುತ್ತಮ ಆಟಗಾರರು ಹೊರಹೊಮ್ಮುತ್ತಿದ್ದಾರೆ. ಇದೇ ಕಾರಣಗಳಿಂದಾಗಿ ಭಾರತ ಮುಂಬರುವ ದಿನಗಳಲ್ಲಿ ಫಿಫಾ ವಿಶ್ವಕಪ್ ಅರ್ಹತೆ ಗಿಟ್ಟಿಸಿಕೊಳ್ಳಲಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.
ಆದರೆ ಅದಕ್ಕೂ ಮುನ್ನ ವಿಶ್ವದ ಪ್ರಮುಖ ದೇಶಗಳ ತಂಡಗಳ ವಿರುದ್ದ ಆಡಬೇಕಾದ ಅನಿವಾರ್ಯತೆ ಇದೆ. ಇಂತಹ ಟೂರ್ನಿಗಳನ್ನು ಫಿಫಾ ಆಯೋಜಿಸುತ್ತಿದೆ. ಉದಾಹರಣೆಗೆ ಈ ಬಾರಿ ಭಾರತದಲ್ಲೇ FIFA U-17 ಮಹಿಳಾ ವಿಶ್ವಕಪ್ 2022 ನಡೆಯಬೇಕಿತ್ತು. ಇದೀಗ ಅಮಾನತು ಮೂಲಕ ಭಾರತದ ಆತಿಥ್ಯವನ್ನು ಕಸಿದುಕೊಳ್ಳಲಾಗಿದೆ. ಅಷ್ಟೇ ಅಲ್ಲದೆ ಅಕ್ಟೋಬರ್ನಲ್ಲಿ ನಡೆಯಲಿರುವ ಅಂಡರ್ 17 ವಿಶ್ವಕಪ್ನಲ್ಲಿ ಭಾರತದ ಮಹಿಳಾ ತಂಡಕ್ಕೆ ಅವಕಾಶವನ್ನು ನಿಷೇಧಿಸಲಾಗಿದೆ. ಅಂದರೆ ಇಲ್ಲಿ ವರ್ಷಗಳ ಕಾಲ ಅಭ್ಯಾಸ ನಡೆಸಿದ್ದ ಒಂದು ತಂಡದ ಕನಸುಗಳು ಒಂದೇ ಒಂದು ನಿರ್ಧಾರದಿಂದ ಕಮರಿದೆ ಎನ್ನಬಹುದು. ಮತ್ತೊಂದೆಡೆ ಫಿಫಾದ ಟೂರ್ನಿಗಳಲ್ಲಿ ಆಡುವ ಅವಕಾಶ ಇನ್ಮುಂದೆ ಭಾರತೀಯ ಆಟಗಾರರಿಗೆ ಸಿಗುವುದಿಲ್ಲ.
ಪ್ರಮುಖ ಟೂರ್ನಿಗಳ ಮೇಲೆ ನಿಷೇಧ ಇರಲಿದೆಯಾ?
ಫಿಫಾ ಅಮಾನತು ಅಂದರೆ, ಇಡೀ ಟೂರ್ನಿಗಳ ಮೇಲೆ ನಿಷೇಧ ಎಂದೇ ಹೇಳಬಹುದು. ಏಕೆಂದರೆ ಭಾರತವು ಏಷ್ಯಾನ್ ರಾಷ್ಟ್ರಗಳ ಟೂರ್ನಿಗಳಲ್ಲಿ ಹೆಚ್ಚಾಗಿ ಆಡುತ್ತವೆ. ಅದರೀಗ ವಿಶ್ವ ಫುಟ್ಬಾಲ್ ಅನ್ನು ನಿಯಂತ್ರಿಸುವ ಫಿಫಾ ನಿರ್ಧಾರವನ್ನು ಏಷ್ಯನ್ ಫುಟ್ಬಾಲ್ ಒಕ್ಕೂಟ ಕೂಡ ಅಂಗೀಕರಿಸಲಿದೆ. ಇದರಿಂದ 2023 ರಲ್ಲಿ ನಡೆಯಲಿರುವ ಏಷ್ಯಾಕಪ್ ಫುಟ್ಬಾಲ್ನಿಂದ ಕೂಡ ಭಾರತ ಹೊರಬೀಳಲಿದೆ.
ಭಾರತದ ಫುಟ್ಬಾಲ್ ಮೇಲೆ ಬೀರುವ ಪ್ರಭಾವಗಳೇನು?
ಅಖಿಲ ಭಾರತ ಫುಟ್ಬಾಲ್ ಫೆಡರೇಶನ್ ಮೇಲಿನ ನಿಷೇಧ ಭಾರತೀಯ ಫುಟ್ಬಾಲ್ ಮೇಲೆ ನೇರ ಪ್ರಭಾವ ಬೀರುತ್ತದೆ. ಮುಖ್ಯವಾಗಿ ಫುಟ್ಬಾಲ್ ಲೀಗ್ ಮೇಲೆ ಎನ್ನಬಹುದು. ಏಕೆಂದರೆ ಭಾರತೀಯ ಫುಟ್ಬಾಲ್ ಆಟಗಾರರಿಗೆ ತಮ್ಮ ಸಾಮರ್ಥ್ಯವನ್ನು ತೆರೆದಿಡುವ ಹಾಗೂ ಒಂದಷ್ಟು ಆದಾಯಗಳಿಸುವ ಏಕೈಕ ಮಾರ್ಗವೆಂದರೆ ಇಂಡಿಯನ್ ಸೂಪರ್ ಲೀಗ್. ಆದರೆ ಇದೀಗ ಫಿಫಾ ನಿಷೇಧದಿಂದ ಈ ಫುಟ್ಬಾಲ್ ಲೀಗ್ ಕೂಡ ನಡೆಯುವುದು ಅನುಮಾನ. ಒಂದು ವೇಳೆ ಆಯೋಜಿಸಿದರೂ ಅದಕ್ಕೆ ಅಂತಾರಾಷ್ಟ್ರೀಯ ಮಾನ್ಯತೆ ಇರುವುದಿಲ್ಲ. ಅಂದರೆ ವಿಶ್ವದ ಪ್ರಮುಖ ಆಟಗಾರರು ಈ ಲೀಗ್ನಲ್ಲಿ ಕಾಣಿಸಿಕೊಳ್ಳುವುದಿಲ್ಲ.
ಇತ್ತ ಸೂಪರ್ ಲೀಗ್ನಂತಹ ಅತ್ಯುತ್ತಮ ವೇದಿಕೆಯ ಮೂಲಕ ಅಂತಾರಾಷ್ಟ್ರೀಯ ಫುಟ್ಬಾಲ್ ಕನಸುಗಳನ್ನು ಕಾಣುತ್ತಿರುವ ಯುವ ಪ್ರತಿಭೆಗಳಿಗೆ ಇದು ದೊಡ್ಡ ಹೊಡೆತ ನೀಡಲಿದೆ. ಏಕೆಂದರೆ ಫಿಫಾ ನಿಷೇಧದಿಂದ ಅತ್ತ ರಾಷ್ಟ್ರೀಯ ತಂಡ ಕೂಡ ನಿಷೇಧಕ್ಕೊಳಗಾಗಲಿದೆ. ಇದರಿಂದ ಯಾಕಾಗಿ ಫುಟ್ಬಾಲ್ ಆಡಬೇಕೆಂಬ ಪ್ರಶ್ನೆಯೊಂದು ಮೂಡುತ್ತದೆ. ಅಂದರೆ ಭಾರತವನ್ನು ಪ್ರತಿನಿಧಿಸಬೇಕೆಂಬ ಕನಸಿನೊಂದಿಗೆ ಎಲ್ಲಾ ಆಟಗಾರರು ಮೈದಾನಕ್ಕಿಳಿಯುತ್ತಾರೆ. ಆದರೆ ಇದೀಗ ಬ್ಯಾನ್ನಿಂದ ಭಾರತ ಇನ್ಮುಂದೆ ಅಂತಾರಾಷ್ಟ್ರೀಯ ಫುಟ್ಬಾಲ್ ಆಡಲು ಅವಕಾಶ ಇರುವುದಿಲ್ಲ.
ಹಾಗೆಯೇ ಇಂಡಿಯನ್ ಫುಟ್ಬಾಲ್ ಕ್ಲಬ್ಗಳಿಗೆ ವಿದೇಶಿ ಕ್ಲಬ್ಗಳ ಜೊತೆ ಆಡಲು ಅವಕಾಶ ಇರಲ್ಲ. ಇನ್ನು ಫಿಫಾ ಪ್ರತಿ ದೇಶದಿಂದ ಒಂದಷ್ಟು ಯುವ ಪ್ರತಿಭೆಗಳನ್ನು ಆಯ್ಕೆ ಮಾಡಿ ಅವರಿಗೆ ಅತ್ಯುತ್ತಮ ತರಬೇತಿ ನೀಡುತ್ತದೆ. ಇದರಿಂದ ಕೂಡ ಭಾರತೀಯ ಆಟಗಾರರು ವಂಚಿತರಾಗಲಿದ್ದಾರೆ. ಹೀಗಾಗಿ ಯುವ ಪ್ರತಿಭೆಗಳು ಫುಟ್ಬಾಲ್ನಿಂದ ವಿಮುಖರಾಗುವ ಸಾಧ್ಯತೆ ಹೆಚ್ಚು.
ಫಿಫಾ ಅಮಾನತು ತೆಗೆದುಹಾಕಲು ಸಾಧ್ಯವಿಲ್ಲವಾ?
ಮೊದಲ ಹೇಳಿದಂತೆ ಫಿಫಾ ಅಂತಾರಾಷ್ಟ್ರೀಯ ಫುಟ್ಬಾಲ್ ಮಂಡಳಿಗಳನ್ನು ನಿಯಂತ್ರಿಸುವ ಸಂಸ್ಥೆ. ಭಾರತದಂತಹ ಒಂದು ದೇಶವನ್ನು ಅಮಾನತು ಮಾಡುವುದರಿಂದ ಫಿಫಾಗೆ ಯಾವುದೇ ನಷ್ಟವಿಲ್ಲ. ಇಲ್ಲಿ ನಷ್ಟವಿರುವುದು ಭಾರತೀಯ ಫುಟ್ಬಾಲ್ಗೆ ಎಂಬುದೇ ಸತ್ಯ. ಇದೀಗ ಈ ಅಮಾನತನ್ನು ತೆಗೆದುಹಾಕಲು ಭಾರತ ಮುಂದಿನ ಕ್ರಮಗಳನ್ನು ಕೈಗೊಳ್ಳಬೇಕಿದೆ. ಇಲ್ಲಿ ಮೂರನೇ ವ್ಯಕ್ತಿಗಳ ಅನಗತ್ಯ ಪ್ರಭಾವದಿಂದಾಗಿ ಅಖಿಲ ಭಾರತ ಫುಟ್ಬಾಲ್ ಫೆಡರೇಶನ್ (ಎಐಎಫ್‌ಎಫ್) ಅನ್ನು ತಕ್ಷಣವೇ ಜಾರಿಗೆ ತರಲು ಫಿಫಾ ಕೌನ್ಸಿಲ್‌ನ ಬ್ಯೂರೋ ಸರ್ವಾನುಮತದಿಂದ ನಿರ್ಧರಿಸಿದೆ. ಏಕೆಂದರೆ ಇದು ಫಿಫಾ ಕಾಯಿದೆಗಳ ಗಂಭೀರ ಉಲ್ಲಂಘನೆಯಾಗಿದೆ ಎಂದು ಅಂತಾರಾಷ್ಟ್ರೀಯ ಫುಟ್ ಬಾಲ್ನ ಜಾಗತಿಕ ಮಂಡಳಿ ತಿಳಿಸಿದೆ.
ಇನ್ನು AIFF ಆಡಳಿತವು ದೈನಂದಿನ ವ್ಯವಹಾರಗಳ ಸಂಪೂರ್ಣ ನಿಯಂತ್ರಣವನ್ನು ಮರಳಿ ಪಡೆದ ನಂತರ ಅಮಾನತು ತೆಗೆದುಹಾಕಲಾಗುವುದು ಎಂದು ಫಿಫಾ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ. ಅಂದರೆ ಇದೀಗ AIFF ಚುನಾವಣಾ ವಿಷಯ ಸುಪ್ರೀಂ ಕೋರ್ಟ್ನಲ್ಲಿದೆ. ರಾಷ್ಟ್ರೀಯ ಫೆಡರೇಶನ್‌ನ ವ್ಯವಹಾರಗಳನ್ನು ನಡೆಸುತ್ತಿರುವ ಆಡಳಿತಾಧಿಕಾರಿಗಳ ಸಮಿತಿ (ಸಿಒಎ) ಪ್ರಸ್ತಾಪಿಸಿದ ವೇಳಾಪಟ್ಟಿಯಂತೆ ಚುನಾವಣೆಗಳು ನಡೆಯಬೇಕು ಎಂದು ನ್ಯಾಯಾಲಯ ನಿರ್ದೇಶಿಸಿದೆ. ಇದನ್ನೂ ಕೂಡ ಫಿಫಾ ಮೂರನೇ ವ್ಯಕ್ತಿಯ ಹಸ್ತಕ್ಷೇಪ ಎಂದೇ ಪರಿಗಣಿಸಿದೆ. ಹೀಗಾಗಿ ಈ ಎಲ್ಲಾ ಸಮಸ್ಯೆಗಳು ಬೇಗನೆ ಇತ್ಯರ್ಥವಾದರೆ ಮಾತ್ರ ಅಖಿಲ ಭಾರತ ಫುಟ್ಬಾಲ್ ಫೆಡರೇಶನ್ (ಎಐಎಫ್‌ಎಫ್) ತನ್ನ ಮೇಲಿನ ಅಮಾನತನ್ನು ತೆರವುಗೊಳಿಸಲು ಪ್ರಯತ್ನಿಸಬಹುದು.
Published On - 12:22 pm, Tue, 16 August 22
