Instagram: ಸದ್ದಿಲ್ಲದೇ ಬಳಕೆದಾರರಿಗೆ ಶಾಕ್ ಕೊಟ್ಟ ಇನ್ಸ್ಟಾಗ್ರಾಂ; ತನ್ನದೇ ಎರಡು ಆಪ್ ಡಿಲೀಟ್!
Boomerang | Hyperlapse: ಇನ್ಸ್ಟಾಗ್ರಾಂ ಸದ್ದಿಲ್ಲದೇ ತನ್ನ ಎರಡು ಸ್ವತಂತ್ರ ಆಪ್ಗಳನ್ನು ಆಪ್ ಸ್ಟೋರ್ಗಳಿಂದ ತೆಗೆದಿದೆ. ಬೂಮರಾಂಗ್ ಹಾಗೂ ಹೈಪರ್ಲ್ಯಾಪ್ಸ್ ಆಪ್ಗಳು ಈ ಮೊದಲು ಸ್ವತಂತ್ರವಾಗಿ ಆಪ್ಸ್ಟೋರ್ಗಳಲ್ಲಿ ಲಭ್ಯವಿರುತ್ತಿದ್ದವು. ಇನ್ಸ್ಟಾಗ್ರಾಂನ ಈ ನಿರ್ಧಾರಕ್ಕೆ ಕಾರಣವೇನು? ಮಾಹಿತಿ ಇಲ್ಲಿದೆ.
ಇನ್ಸ್ಟಾಗ್ರಾಂ (Instagram) ಈ ಹಿಂದೆ ಐಜಿಟಿವಿ ಆಪ್ನ ಸೇವೆಯನ್ನು ನಿಲ್ಲಿಸಿತ್ತು. ಇದೀಗ ಸದ್ದಿಲ್ಲದೇ ಮತ್ತೆರಡು ಆಪ್ಗಳ ಸೇವೆಯನ್ನು ನಿಲ್ಲಿಸಿ, ಬಳಕೆದಾರರಿಗೆ ಶಾಕ್ ನೀಡಿದೆ. ಹೌದು. ಬಳಕೆದಾರರಿಗೆ ಪ್ರಿಯವಾಗಿದ್ದ ಬೂಮರಾಂಗ್ ಹಾಗೂ ಹೈಪರ್ಲ್ಯಾಪ್ಸ್ ಸ್ವತಂತ್ರ ಅಪ್ಲಿಕೇಶನ್ಗಳನ್ನು ಆಪಲ್ ಆಪ್ ಸ್ಟೋರ್ ಹಾಗೂ ಗೂಗಲ್ ಪ್ಲೇ ಸ್ಟೋರ್ನಿಂದ ತೆಗೆದು ಹಾಕಲಾಗಿದೆ. ಬೂಮರಾಂಗ್ ಆಪ್ ಸಣ್ಣ ವಿಡಿಯೋ ತುಣುಕುಗಳನ್ನು ಲೂಪ್ ಮಾದರಿಯಲ್ಲಿ ತಯಾರಿಸಲು ಸಹಾಯ ಮಾಡುವ ಆಪ್ ಆಗಿತ್ತು. ಟೈಮ್ ಲ್ಯಾಪ್ಸ್ಗಳನ್ನು ಮಾಡಲು ಅನುಕೂಲವಾಗುವಂತೆ ಹೈಪರ್ಲ್ಯಾಪ್ಸ್ ಆಪ್ಅನ್ನು ಕೂಡ ಇನ್ಸ್ಟಾಗ್ರಾಂ ಪರಿಚಯಿಸಿತ್ತು. ಆದರೆ ಈಗ ಎರಡೂ ಆಪ್ ಸೇವೆಗಳು ಏಕಾಏಕಿ ನಿಲುಗಡೆಯಾಗಿವೆ. ಗೂಗಲ್ ಪ್ಲೇ ಸ್ಟೋರ್ನಲ್ಲಿ ಬೂಮರಾಂಗ್ ಆಪ್ ಜನಪ್ರಿಯ ಆಪ್ಗಳಲ್ಲಿ ಒಂದಾಗಿತ್ತು. ಸುಮಾರು 100 ಮಿಲಿಯನ್ಗೂ ಹೆಚ್ಚು ಬಾರಿ ಅದು ಡೌನ್ಲೋಡ್ ಆಗಿತ್ತು. ಈ ಮೊದಲು ಬೂಮರಾಂಗ್ ಹಾಗೂ ಹೈಪರ್ಲ್ಯಾಪ್ಸ್ ಆಪ್ಗಳು ಸ್ವತಂತ್ರ ಅಪ್ಲಿಕೇಶನ್ಗಳಾಗಿದ್ದವು.
ಪ್ರಸ್ತುತ ಇನ್ಸ್ಟಾಗ್ರಾಂ ನಿರ್ವಹಿಸುತ್ತಿರುವ ಆಪ್ಗಳಲ್ಲಿ ‘ಲೇಔಟ್’ ಆಪ್ ಮಾತ್ರ ಸ್ವತಂತ್ರವಾಗಿ ಹೊರಗೆ ಲಭ್ಯವಿದೆ. ಇದು ಹಲವು ಫೋಟೋಗಳನ್ನು ಸೇರಿಸಿ ಒಂದೇ ಫೋಟೋ ಮಾಡುವ ಆಯ್ಕೆ ಹೊಂದಿದೆ. ಐಜಿಟಿವಿ ಆಪ್ ಸೇವೆ ಇನ್ನುಮುಂದೆ ಲಭ್ಯವಿರುವುದಿಲ್ಲ ಎಂದು ಈ ಹಿಂದೆ ಇನ್ಸ್ಟಾಗ್ರಾಂ ಘೋಷಿಸಿತ್ತು. ಕಂಪನಿ ಈ ಕುರಿತು ಸ್ಪಷ್ಟನೆ ನೀಡುತ್ತಾ, ಐಜಿಟಿವಿಯನ್ನು ಇನ್ಸ್ಟಾಗ್ರಾಂ ವಿಡಿಯೋ ಆಗಿ ರಿಬ್ರಾಂಡ್ ಮಾಡುವುದಾಗಿ ಹೇಳಿತ್ತು. ಸದ್ಯ ಈ ಹೆಸರಿನಿಲ್ಲಿ ಐಜಿಟಿವಿ ಕಾರ್ಯನಿರ್ವಹಿಸುತ್ತಿದೆ.
ಬೂಮರಾಂಗ್ ಹಾಗೂ ಹೈಪರ್ಲ್ಯಾಪ್ಸ್ ಬಳಕೆದಾರರಿಗೆ ಇನ್ನು ಮುಂದೆ ಹೇಗೆ ಲಭ್ಯವಿರಲಿದೆ?
ಪ್ರಸ್ತುತ ಎರಡು ಸ್ವತಂತ್ರ ಆಪ್ಗಳನ್ನು ತೆಗೆದಿರುವ ಬಗ್ಗೆ ಇನ್ಸ್ಟಾಗ್ರಾಂ ಅಧಿಕೃತ ಹೇಳಿಕೆ ನೀಡಿಲ್ಲ. ಆದರೆ ಇನ್ಸ್ಟಾಗ್ರಾಂ ಮೂಲ ಆಪ್ಗೆ ಬೂಮರಾಂಗ್ ಹಾಗೂ ಹೈಪರ್ಲ್ಯಾಪ್ಸ್ ಸೇವೆ ಸೇರಿಸುವ ಮೂಲಕ ಬಳಕೆದಾರರಿಗೆ ಎಲ್ಲಾ ಸೇವೆಗಳನ್ನು ಒಂದೇ ವೇದಿಕೆಯಲ್ಲಿ ನೀಡಲು ಇನ್ಸ್ಟಾಗ್ರಾಂ ಮುಂದಾಗಿದೆ ಎನ್ನಲಾಗಿದೆ.
ಇನ್ಸ್ಟಾಗ್ರಾಂ 2010ರಲ್ಲಿ ಫೋಟೋ ಹಾಗೂ ವಿಡಿಯೋ ಹಂಚಿಕೊಳ್ಳುವ ಕಾರಣದಿಂದ ಸೃಷ್ಟಿಯಾಗಿದ್ದ ಜಾಲತಾಣವಾಗಿದೆ. ಇದನ್ನು ಕೆವಿನ್ ಸಿಸ್ಟ್ರೋಮ್ ಹಾಗೂ ಮೈಕ್ ಕ್ರೈಗರ್ ತಯಾರಿಸಿದ್ದರು. 2012ರಲ್ಲಿ ಫೇಸ್ಬುಕ್ 1 ಬಿಲಿಯನ್ ಡಾಲರ್ ನೀಡಿ ಇನ್ಸ್ಟಾಗ್ರಾಂಅನ್ನು ಖರೀದಿಸಿತು. ಭಾರತದಲ್ಲಿ ಟಿಕ್ಟಾಕ್ ಬ್ಯಾನ್ ಆದ ನಂತರ ಇನ್ಸ್ಟಾಗ್ರಾಂ ರೀಲ್ಸ್ ಪರಿಚಯಿಸಿತು. ಇದರ ಮೂಲಕ ಇನ್ಸ್ಟಾಗ್ರಾಂ ಮತ್ತಷ್ಟು ಜನಪ್ರಿಯವಾಯಿತು.
ಪ್ರಸ್ತುತ ಇನ್ಸ್ಟಾಗ್ರಾಂನಲ್ಲಿ ವಿಡಿಯೋಗಳನ್ನು ಹಂಚಿಕೊಳ್ಳಲು ಹಲವು ರೀತಿಯ ಆಯ್ಕೆಗಳಿವೆ. ಸಣ್ಣ ತುಣುಕುಗಳು, ದೀರ್ಘ ಕಾಲಾವಧಿಯ ವಿಡಿಯೋಗಳು, ಲೈವ್ ಸ್ಟ್ರೀಮ್ಗಳನ್ನು ಮಾಡಲು ಪ್ರತ್ಯೇಕ ಆಯ್ಕೆಗಳಿವೆ. ಇದರೊಂದಿಗೆ ಫೋಟೋ ಹಂಚಿಕೊಳ್ಳುವ ಆಯ್ಕೆ ಕೂಡ ಜನಪ್ರಿಯವಾಗಿದೆ. ರೀಲ್ಸ್ ಸೃಷ್ಟಿಸುವವರಿಗೆ ಹಣ ಗಳಿಸುವ ಆಯ್ಕೆ ನೀಡುವ ಬಗ್ಗೆಯೂ ಇನ್ಸ್ಟಾಗ್ರಾಂ ಪ್ರಸ್ತುತ ಕಾರ್ಯನಿರ್ವಹಿಸುತ್ತಿದೆ.
ಇದನ್ನೂ ಓದಿ:
ಮೊಬೈಲ್ ಅನ್ನು ಸದಾ ಹಿಡಿದಿರುವ ಅಭ್ಯಾಸ ಇದೆಯೇ? ಅಪಾಯದ ಬಗ್ಗೆ ಇರಲಿ ಎಚ್ಚರ
ಪ್ರಶಾಂತ್ ನೀಲ್ ನಿರ್ದೇಶನದ ‘ಸಲಾರ್’ ಚಿತ್ರಕ್ಕೆ ವಿಲನ್ ಆದ ಪೃಥ್ವಿರಾಜ್; ವಿಷಯ ಲೀಕ್ ಮಾಡಿದ ಪ್ರಭಾಸ್
