Explainer: ಹಲವು ಟ್ವಿಟರ್ ಖಾತೆಗಳ ಫಾಲೊವರ್ಸ್ ಸಂಖ್ಯೆ ಇಳಿಯುತ್ತಿದೆ ಏಕೆ?
ನಿಯಮಿತವಾಗಿ ಅಕೌಂಟ್ಗಳನ್ನು ಪರಿಶೀಲಿಸುವಾಗ ಅಗತ್ಯ ಷರತ್ತುಗಳನ್ನು ಪೂರೈಸದ ಹಲವು ಅಕೌಂಟ್ಗಳನ್ನು ಅಮಾನತು ಮಾಡಲಾಗಿದೆ ಎಂದು ಟ್ವಿಟರ್ ಹೇಳಿದೆ. ಈ ಹಿಂದೆಯೂ ಇಂಥದ್ದೇ ಬೆಳವಣಿಗೆ ನಡೆದಿತ್ತು ಎಂಬುದನ್ನು ನಾವು ನೆನಪಿಸಿಕೊಳ್ಳಬಹುದು.
Updated on:Jun 13, 2021 | 9:50 PM
ಖ್ಯಾತ ಚಿತ್ರನಟ ಅನುಪಮ್ ಖೇರ್ ಸೇರಿದಂತೆ ಹಲವು ಟ್ವಿಟರ್ ಬಳಕೆದಾರರು ಫಾಲೊವರ್ಸ್ ಸಂಖ್ಯೆ ಕಡಿಮೆಯಾಗುತ್ತಿರುವ ಬಗ್ಗೆ ಈಚೆಗೆ ಅಳಲು ತೋಡಿಕೊಂಡಿದ್ದರು. ನಿಯಮಿತವಾಗಿ ಅಕೌಂಟ್ಗಳನ್ನು ಪರಿಶೀಲಿಸುವಾಗ ಅಗತ್ಯ ಷರತ್ತುಗಳನ್ನು ಪೂರೈಸದ ಹಲವು ಅಕೌಂಟ್ಗಳನ್ನು ಅಮಾನತು ಮಾಡಲಾಗಿದೆ ಎಂದು ಟ್ವಿಟರ್ ಹೇಳಿದೆ. ಈ ಹಿಂದೆಯೂ ಇಂಥದ್ದೇ ಬೆಳವಣಿಗೆ ನಡೆದಿತ್ತು ಎಂಬುದನ್ನು ನಾವು ನೆನಪಿಸಿಕೊಳ್ಳಬಹುದು.
ಪಾಸ್ವರ್ಡ್ ಅಥವಾ ಫೋನ್ ನಂಬರ್ ನಮೂದಿಸುವಂತೆ ಆಗಾಗ ನಮ್ಮ ಬಳಕೆದಾರರನ್ನು ಕೇಳುತ್ತೇವೆ. ಇಂಥ ಸಂದರ್ಭದಲ್ಲಿ ಅನುಮಾನ ಬಂದರೆ ಅಕೌಂಟ್ ಬಳಸಲು ಹೆಚ್ಚುವರಿ ಮಾಹಿತಿ ಒದಗಿಸಲು ಕೇಳುತ್ತೇವೆ. ಒಂದು ಅಕೌಂಟ್ ಇಂಥ ಮಾಹಿತಿ ಕೊಡಲು ವಿಫಲವಾದರೆ ಅದನ್ನು ನಿರ್ಬಂಧಿಸುತ್ತೇವೆ. ಇಂಥ ಅಕೌಂಟ್ಗಳನ್ನು ಫಾಲೊವರ್ಸ್ ಸಂಖ್ಯೆಗೆ ಪರಿಗಣಿಸುವುದಿಲ್ಲ ಎಂದು ಟ್ವಿಟರ್ ವಕ್ತಾರರು ಹೇಳಿದ್ದಾರೆ. ಹಲವರ ಫಾಲೊವರ್ಸ್ ಸಂಖ್ಯೆ ಕುಸಿಯಲು ಇದು ಮುಖ್ಯ ಕಾರಣವಾಗಿರಬಹುದು ಎಂದು ವಿಶ್ಲೇಷಿಸಲಾಗಿದೆ.
ಪ್ಲಾಟ್ಫಾರ್ಮ್ ದುರ್ಬಳಕೆಯನ್ನು ಟ್ವಿಟರ್ ಹೇಗೆ ವಿವರಿಸುತ್ತದೆ? ಟ್ವಿಟರ್ ಪ್ರಕಾರ, ಇತರ ಬಳಕೆದಾರರನ್ನು ದಿಕ್ಕುತಪ್ಪಿಸುವ ಯಾವುದೇ ಆಕ್ರಮಣಕಾರಿ ಅಥವಾ ಸಂಶಯಾಸ್ಪದ ಪ್ರಯತ್ನವನ್ನು ತಿರುಚುವುದು (ಮ್ಯಾನಿಪ್ಯುಲೇಶನ್) ಎಂದು ಕರೆಯಲಾಗುತ್ತದೆ. ಇತರರ ಹೆಸರುಗಳಲ್ಲಿ ನಕಲಿ ಖಾತೆಗಳನ್ನು ಹೊಂದುವುದು ಸಹ ಟ್ವಿಟರ್ನ ನೀತಿಗಳ ಉಲ್ಲಂಘನೆ ಎನಿಸಿಕೊಳ್ಳುತ್ತದೆ. ತಮ್ಮ ಅಕೌಂಟ್ಗಳಲ್ಲಿ ತಪ್ಪು ಮಾಹಿತಿ ಹಂಚಿಕೊಳ್ಳುವುದನ್ನು ಸಹ ತಿರುಚುವುದು ಎಂದೇ ಪರಿಗಣಿಸಲಾಗುತ್ತದೆ. ಕದ್ದ ಅಥವಾ ಇತರರ ಚಿತ್ರಗಳನ್ನು ಬಳಸುವುದು, ಉದ್ಯೋಗ ಮಾಹಿತಿಯನ್ನು ತಪ್ಪಾಗಿ ಕೊಡುವುದು, ಉದ್ದೇಶಪೂರ್ವಕಾಗಿ ತಪ್ಪು ಮಾಹಿತಿ ಕೊಡುವುದರ ಜೊತೆಗೆ ತಪ್ಪು ಪ್ರಾದೇಶಿಕ ವಿವರ ಕೊಡುವುದು ಸಹ ಟ್ವಿಟರ್ ನೀತಿಗಳ ಉಲ್ಲಂಘನೆ ಎನಿಸಿಕೊಳ್ಳುತ್ತದೆ.
ಯಾವುದೇ ಟ್ವಿಟರ್ ಅಕೌಂಟ್ ನಿರ್ದಿಷ್ಟವಾಗಿ ಇಂಥ ವ್ಯಕ್ತಿ ಅಥವಾ ಸಂಸ್ಥೆಗೆ ಸೇರಿದ್ದು ಎಂದು ದೃಢಪಡಿಸದಿದ್ದರೆ ಅಂಥವನ್ನು ಟ್ವಿಟರ್ ನಿರ್ಬಂಧಿಸುತ್ತದೆ. ಜನಪ್ರಿಯ ನಟರು ಅಥವಾ ರಾಜಕಾರಿಣಿಗಳ ಹೆಸರಿನಲ್ಲಿ ಒಂದೇ ಡಿಸ್ಪ್ಲೇ ಪಿಕ್ಚರ್ ಮತ್ತು ಹೆಸರು ಹೊಂದಿರುವ ನೂರಾರು ಟ್ವಿಟರ್ ಅಕೌಂಟ್ಗಳು ಕಾಣಸಿಗುತ್ತವೆ. ಇಂಥ ಅಕೌಂಟ್ಗಳನ್ನು ಟ್ವಿಟರ್ ಪರಿಶೀಲನೆಗೆ ಒಳಪಡಿಸಿ, ತಪ್ಪು ಮಾಹಿತಿ ಇರುವುದನ್ನು ಗುರುತಿಸಿ ಬ್ಲಾಕ್ ಮಾಡುತ್ತದೆ.
ಕೃತಕವಾಗಿ ಫಾಲೊವರ್ಸ್ ಸಂಖ್ಯೆ ಹೆಚ್ಚಿಸಿಕೊಳ್ಳುವುದನ್ನು ಟ್ವಿಟರ್ ಒಪ್ಪುವುದಿಲ್ಲ. ಇದರಲ್ಲಿ ಫಾಲೊವರ್ಸ್ಗಳನ್ನು ಖರೀದಿಸುವುದು ಅಥವಾ ಮಾರುವ ಕ್ರಮವೂ ಸೇರಿರುತ್ತದೆ. ನಿಮ್ಮ ಅಕೌಂಟ್ಗೆ ಬಂದ ಎಂಗೇಜ್ಮೆಂಟ್ ಅವಧಿಯನ್ನು ನೀವು ಮಾರಲೂ ಅವಕಾಶ ಇರುವುದಿಲ್ಲ. ರಿಟ್ವೀಟ್, ಲೈಕ್, ನಮೂದು (ಮೆನ್ಷನ್), ಟ್ವಿಟರ್ ಪೋಲ್ ಸಹ ಇದರಲ್ಲಿ ಸೇರುತ್ತದೆ. ಯಾವುದೇ ಆ್ಯಪ್ ಅಥವಾ ಥರ್ಡ್ ಪಾರ್ಟಿ ಸೇವೆಗಳು ನಿಮಗೆ ಟ್ವಿಟರ್ನಲ್ಲಿ ಫಾಲೋವರ್ಸ್ ಸಂಖ್ಯೆ ಹೆಚ್ಚಿಸುವುದಾಗಿ ಭರವಸೆ ನೀಡಿದರೆ ಅದನ್ನೂ ಸಹ ಮ್ಯಾನಿಪ್ಯುಲೇಷನ್ ಎಂದೇ ಪರಿಗಣಿಸಲಾಗುತ್ತದೆ..
ಇಂಥ ನಡವಳಿಕೆಗಳನ್ನು ಟ್ವಿಟರ್ ಹೇಗೆ ಗುರುತಿಸುತ್ತದೆ? ಯಾವುದೇ ಅಕೌಂಟ್ ಬಗ್ಗೆ ಅನುಮಾನ ಬಂದರೆ ಟ್ವಿಟರ್ ಅಂಥ ಅಕೌಂಟ್ಗಳಿಗೆ ಆ್ಯಂಟಿ ಸ್ಪಾಮ್ ಚಾಲೆಂಜ್ಗಳನ್ನು (ನಿರ್ದಿಷ್ಟ ಪ್ರಶ್ನೆ ಅಥವಾ ಆಯ್ಕೆಗಳು) ಕಳಿಸಲಾಗುತ್ತದೆ. ಈ ಹಂತದಲ್ಲಿ ಅನುಮಾನ ಪರಿಹಾರವಾಗದಿದ್ದರೆ ಫೋನ್ ನಂಬರ್ ವೆರಿಫಿಕೇಶನ್, reCAPTCHA ಪ್ರಶ್ನೆಗಳನ್ನು ಮುಂದಿಡಲಾಗುತ್ತದೆ. ಇತ್ತೀಚಿನ ದಿನದಲ್ಲಿ ಸಾಕಷ್ಟು ಅಕೌಂಟ್ಗಳು ಇಂಥ ಪರಿಶೀಲನೆಗೆ ಒಳಪಟ್ಟವು. ಅವು ಟ್ವಿಟರ್ ಚಾಲೆಂಜ್ ದಾಟಿ ಮುಂದಕ್ಕೆ ಹೋಗದಿದ್ದರೆ ಅಂಥ ಅಕೌಂಟ್ಗಳನ್ನು ಲಾಕ್ ಮಾಡಲಾಗುತ್ತದೆ.
ಟ್ವಿಟರ್ ಪ್ರಕಾರ ಇಂಥ ಅಕೌಂಟ್ಗಳಲ್ಲಿರುವ ಟ್ವೀಟ್ ಡಿಲೀಟ್ ಮಾಡುವುದರಿಂದ ಹಿಡಿದು ಅಕೌಂಟ್ಗಳನ್ನು ಲಾಕ್ ಮಾಡುವವರೆಗೆ ಹಲವು ರೀತಿಯ ಕ್ರಮಗಳನ್ನು ಟ್ವಿಟರ್ ತೆಗೆದುಕೊಳ್ಳುತ್ತದೆ. ಪ್ಲಾಟ್ಫಾರ್ಮ್ ಮ್ಯಾನಿಪ್ಯುಲೇಟ್ ಮಾಡುವ ಇಂಥ ಇತರ ಅಪರಾಧಗಳು ಅಕೌಂಟ್ ಅನ್ನು ಶಾಶ್ವತವಾಗಿ ಅಮಾನತಿನಲ್ಲಿಡುವ ಕ್ರಮಕ್ಕೆ ಕಾರಣವಾಗಬಹುದು ಎಂದು ಟ್ವಿಟರ್ ಎಚ್ಚರಿಸುತ್ತದೆ.
ಯಾವುದೇ ಅಕೌಂಟ್ನಲ್ಲಿ ಅನುಮಾನಾಸ್ಪದ ಚಟುವಟಿಕೆ ನಡೆಯುತ್ತಿದೆ ಎಂದು ಕಂಡುಬಂದರೆ ಸರ್ಕಾರ ನೀಡಿರುವ ಯಾವುದಾದರೂ ಗುರುತಿನ ಪುರಾವೆಯನ್ನು ಟ್ವಿಟರ್ ಕೇಳಬಹುದು. ತಮ್ಮ ಅಕೌಂಟ್ ಅನ್ನು ತಪ್ಪು ಕಾರಣಗಳಿಗಾಗಿ ಲಾಕ್ ಅಥವಾ ಅಮಾನತು ಮಾಡಲಾಗಿದೆ ಎಂದು ಅನ್ನಿಸಿದರೆ, ಯಾವುದೇ ಯೂಸರ್ ಇದನ್ನು ಟ್ವಿಟರ್ ಸಂಸ್ಥೆಯ ಗಮನಕ್ಕೆ ತರಬಹುದಾಗಿದೆ.
(Many Twitter handles keep losing followers This is the Reason for This Development)
ಇದನ್ನೂ ಓದಿ: ತುಳು ಭಾಷೆಗೆ ಸೂಕ್ತ ಸ್ಥಾನಮಾನ; ಟ್ವಿಟರ್ನಲ್ಲಿ ಜೋರಾಯ್ತು ತುಳು ಭಾಷಿಕರ ಹೋರಾಟ
ಇದನ್ನೂ ಓದಿ: #BJPFailedKarnataka: ಟ್ವಿಟರ್ನಲ್ಲಿ ಟ್ರೆಂಡ್ ಆಗ್ತಿದೆ ಕರ್ನಾಟಕ ಸರ್ಕಾರದ ವೈಫಲ್ಯ
Published On - 9:45 pm, Sun, 13 June 21
