WhatsApp privacy policy 2021: ವಾಟ್ಸಾಪ್ ಖಾಸಗಿತನ ನೀತಿ ಹೆಸರಲ್ಲಿ ನಕಲಿ ಸಂದೇಶ; ಸುಳ್ಳು ಹಬ್ಬಿಸಬೇಡಿ ಎಂದ ಕಂಪೆನಿ
ವಾಟ್ಸಾಪ್ನ ಹೊಸ ಖಾಸಗಿತನ ನೀತಿ 2021ಕ್ಕೆ ನೀವೇನಾದರೂ ಒಪ್ಪಿಗೆ ಕೊಟ್ಟುಬಿಟ್ಟರೆ ನಿಮ್ಮ ವೈಯಕ್ತಿಕ ಮಾಹಿತಿಯನ್ನು ಸ್ವಂತ ಲಾಭಕ್ಕೆ ಬಳಸಿಕೊಳ್ಳಲಾಗುತ್ತದೆ ಎಂಬ ನಕಲಿ ಸಂದೇಶವೊಂದು ಹರಿದಾಡುತ್ತಿದೆ ಎಂಬ ಬಗ್ಗೆ ಎಚ್ಚರಿಸಲಾಗಿದೆ.
Updated on: May 21, 2021 | 3:55 PM
ಮತ್ತೊಂದು ಫೇಕ್ (ನಕಲಿ) ಸಂದೇಶ ವಾಟ್ಸಾಪ್ನಲ್ಲಿ ಹರಿದಾಡುತ್ತಿದೆ. ವಾಟ್ಸಾಪ್ನ ಹೊಸ ಖಾಸಗಿ ನೀತಿಯ ಬಗ್ಗೆ ಸುಳ್ಳನ್ನು ಹಬ್ಬಿಸುವ ಭಾಗವಾಗಿ ಇದನ್ನು ಹರಿಬಿಡಲಾಗುತ್ತದೆ. ವಾಟ್ಸಾಪ್, ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಮ್ನಿಂದ ನಿಮ್ಮ ಫೋಟೋಗಳು, ಸಂದೇಶಗಳು, ಫೈಲ್ಗಳು ಮತ್ತು ಇತರ ಮಾಹಿತಿಗಳನ್ನು ತಮ್ಮ ಲಾಭಕ್ಕೆ ಬಳಸಿಕೊಳ್ಳುವುದಕ್ಕೆ ಈ ಹೊಸ ನೀತಿ ಅವಕಾಶ ಮಾಡಿಕೊಡುತ್ತದೆ ಎಂಬ ಒಕ್ಕಣೆಯುಳ್ಳ ನಕಲಿ ಮೆಸೇಜ್ ಅದು. ಅಷ್ಟೇ ಅಲ್ಲ, ಈ ಮಾಹಿತಿಯನ್ನು ಹತ್ತು ಗ್ರೂಪ್ಗಳಿಗೆ ಫಾರ್ವರ್ಡ್ ಮಾಡಿ, ಆ ನಂತರ ನಿಮಗೆ ಗ್ರೀನ್ (ಹಸಿರು) ಟಿಕ್ (ರೈಟ್ ಆಕಾರದ ಚಿಹ್ನೆ) ಬಂದರೆ ನಿಮ್ಮ ಫೋನ್ ಆ ಹೊಸ ನಿಯಮದಿಂದ ಸುರಕ್ಷಿತವಾಗಿದೆ ಎಂದು ತಿಳಿಸಿರಲಾಗಿರುತ್ತದೆ.
ಇದೊಂದು ನಕಲಿ ಸಂದೇಶ ಆಗಿದ್ದು, ವಾಟ್ಸಾಪ್ ಬಳಕೆದಾರರು ಯಾರಿಗೂ ಫಾರ್ವರ್ಡ್ ಮಾಡಬಾರದು ಎಂದು ಸಲಹೆ ನೀಡಲಾಗಿದೆ. ಬ್ಲಾಗ್ ಪೋಸ್ಟ್ವೊಂದರಲ್ಲಿ ವಾಟ್ಸಾಪ್ ತಿಳಿಸಿರುವ ಪ್ರಕಾರ, ಬಳಕೆದಾರರ ಯಾವ ಡೇಟಾವನ್ನೂ ಫೇಸ್ಬುಕ್ ಜತೆಗೆ ಹಂಚಿಕೊಳ್ಳಲ್ಲ. ಈ ಮೆಸೇಜಿಂಗ್ ಆ್ಯಪ್ ಎಂಡ್ ಟು ಎಂಡ್ ಎನ್ಕ್ರಿಪ್ಟೆಡ್. ಆದ್ದರಿಂದ ಕಂಪೆನಿಯು ಚಾಟ್, ಫೋಟೋ, ವೈಯಕ್ತಿಕ ಫೈಲ್ಗಳು ಮತ್ತು ಇತರ ಯಾವುದೇ ಖಾಸಗಿ ಮಾಹಿತಿಯಾಗಲೀ ಪಡೆಯುವುದಕ್ಕೆ ಸಾಧ್ಯವಿಲ್ಲ. ನಿಮ್ಮ ಕರೆಯನ್ನು ಸಹ ಟ್ರ್ಯಾಕ್ ಮಾಡುವುದಿಲ್ಲ ಎಂದು ತಿಳಿಸಿದೆ.
ಎಂಡ್ ಟು ಎಂಡ್ ಎನ್ಕ್ರಿಪ್ಷನ್ ಎಂಬ ಪದವನ್ನು ನೀವೂ ಕೇಳಿರುತ್ತೀರಿ. ಹೀಗಂದರೆ, ನಿಮ್ಮ ಸಂದೇಶಗಳು ಲಾಕ್ನೊಂದಿಗೆ ಸುರಕ್ಷಿತವಾಗಿದೆ. ಸಂದೇಶ ಕಳುಹಿಸುವವರು ಮತ್ತು ಪಡೆಯುವವರು ಮಾತ್ರ ವಿಶೇಷ ಕೀ ಜತೆ ಅದನ್ನು ಅನ್ಲಾಕ್ ಮಾಡುವುದಕ್ಕೆ ಹಾಗೂ ಓದುವುದಕ್ಕೆ ಸಾಧ್ಯ. ಈ ವರ್ಷದ ಶುರುವಿನಿಂದ ವಾಟ್ಸಾಪ್ ಸುದ್ದಿಯಾಗುತ್ತಲೇ ಇದೆ. ಅದರ ಖಾಸಗಿತನದ ನೀತಿಯ ಬಗ್ಗೆ ತಿಳಿಸಿತ್ತು. ಈ ಮೂಲಕ ವಾಟ್ಸಾಪ್ ಬಳಕೆದಾರರ ಮಾಹಿತಿಯನ್ನು ಮಾರ್ಕೆಟಿಂಗ್ ಉದ್ದೇಶಕ್ಕೆ ಬಳಸಲಾಗುತ್ತದೆ ಎಂಬ ಗುಮಾನಿ ಹಲವರಲ್ಲಿದೆ. ಖಾಸಗಿತನದ ಬಗ್ಗೆ ಆತಂಕ ಇರುವ ಹಲವರು ಬೇರೆ ಮೆಸೇಜಿಂಗ್ ಆ್ಯಪ್ಗೆ ಬದಲಾಗುತ್ತಿದ್ದಾರೆ.
ಇನ್ನು ವಾಟ್ಸಾಪ್ನಿಂದಲೂ ಸ್ಪಷ್ಟನೆ ಸಿಕ್ಕಿದ್ದು, ವೈಯಕ್ತಿಕ ಮಾತುಕತೆಗಳಲ್ಲಿ ಎಂಡ್ ಟು ಎಂಡ್ ಎನ್ಕ್ರಿಪ್ಷನ್ ಮುಂದುವರಿಯುತ್ತದೆ. ಆದರೆ ಬಿಜಿನೆಸ್ ಮಾತುಕತೆಗಳು ಮಾತ್ರ ಓದುವ ಹಾಗೆ ಮಾಡಬಹುದು. ಅದನ್ನು ಜಾಹೀರಾತು ಉದ್ದೇಶದಿಂದ ಹೀಗೆ ಮಾಡಲಾಗುತ್ತದೆ. ವ್ಯವಹಾರದ ಜತೆ ಮೆಸೇಜಿಂಗ್ ಎಂಬುದು ಸ್ನೇಹಿತರು ಅಥವಾ ಸಂಬಂಧಿಕರ ಜತೆಗಿನ ಮೆಸೇಜಿಂಗ್ಗಿಂತ ಭಿನ್ನ ಮತ್ತು ಕೆಲವು ದೊಡ್ಡ ಉದ್ಯಮಗಳು ತಮ್ಮ ಸಂವಹನದ ನಿರ್ವಹಣೆಗೆ ಹೋಸ್ಟಿಂಗ್ ಸರ್ವೀಸ್ ಬಳಸಿಕೊಳ್ಳಬೇಕಿದೆ ಎಂದು ವಾಟ್ಸಾಪ್ ಹೇಳಿದೆ. ಇನ್ನು ವಾಟ್ಸಾಪ್ ಹೇಳಿರುವಂತೆ, ಹೊಸ ಖಾಸಗಿ ನೀತಿಯನ್ನು ಅರ್ಥ ಮಾಡಿಕೊಳ್ಳುವುದಕ್ಕೆ ಕೆಲ ಸಮಯವನ್ನು ಕೂಡ ನೀಡಲಾಗಿದೆ.
ಒಂದು ವೇಳೆ 2021ರ ಖಾಸಗಿತನ ನೀತಿಯನ್ನು ಸಮ್ಮತಿಸುವುದಕ್ಕೆ ಬಯಸದಿದ್ದಲ್ಲಿ ಮೆಸೇಜಿಂಗ್ ಆ್ಯಪ್ ಬಳಸುವುದನ್ನು ನಿಲ್ಲಿಸಬಹುದು ಎಂದು ವಾಟ್ಸಾಪ್ ಹೇಳಿದೆ. ಒಂದು ವೇಳೆ ಹೊಸ ಖಾಸಗಿತನ ನೀತಿಯನ್ನು ಸಮ್ಮತಿಸದೆಯೇ ಬಳಕೆ ಮುಂದುವರಿಸುವುದಾದರೆ ಕ್ರಮೇಣ ವಾಟ್ಸಾಪ್ನ ಒಂದೊಂದೇ ಫೀಚರ್ಗಳು ದೊರೆಯುವುದಿಲ್ಲ. ಆದ್ದರಿಂದ ಒಂದೋ ಪಾಲಿಸಿಯನ್ನು ಒಪ್ಪಬೇಕು ಅಥವಾ ಬೇರೆ ಆ್ಯಪ್ಗೆ ಬದಲಾಗಬೇಕು.
ಇದನ್ನೂ ಓದಿ: WhatsApp privacy policy: ವಾಟ್ಸಾಪ್ ಖಾಸಗಿತನ ನೀತಿ ಯುರೋಪ್ನಲ್ಲೊಂದು ಭಾರತದಲ್ಲೊಂದು ಏಕೆ ಎಂದ ಸರ್ಕಾರ
ಇದನ್ನೂ ಓದಿ: WhatsApp Privacy Policy: ವಾಟ್ಸಾಪ್ ಖಾಸಗಿತನ ನೀತಿ 2021 ಒಪ್ಪಿಕೊಳ್ಳಲು ಮೇ 15 ಕೊನೆ ದಿನ; ಸಮ್ಮತಿಸದವರ ಖಾತೆ ಏನಾಗುತ್ತೆ?
(Messaging app WhatsApp warned it’s users about fake message circulating about new privacy policy 2021)
