Trending : ತನ್ನ ರೆಸ್ಯೂಮ್ ಅನ್ನು ಕೇಕ್ ಮೇಲೆ ಮುದ್ರಿಸಿ ‘ನೈಕ್’ಗೆ ಕಳಿಸಿದ ಯುವತಿ
Resume on the cake : ಈ ಕೇಕ್ ಮೂಲಕವಾದರೂ ನಾನ್ಯಾರೆಂಬುದನ್ನು ಈ ಕಂಪೆನಿಯವರು ಪತ್ತೆ ಹಚ್ಚಲಿ. ಇನ್ನು ಈ ಕಂಪೆನಿಯಲ್ಲಿ ಕೆಲಸ ಗಿಟ್ಟಿಸಬೇಕೆಂದೇ ನಾನು ಈ ಸೃಜನಶೀಲ ಉಪಾಯವನ್ನು ಹೂಡಿದ್ದು ಎಂದಿದ್ದಾಳೆ ಯುವತಿ.
Updated on: Sep 26, 2022 | 1:26 PM
Trending : ಸಾಕಷ್ಟು ಅಂಕ ಗಳಿಸಿಬಿಟ್ಟರೆ ಕೆಲಸ ಸಿಗುತ್ತದೆ ಎಂಬ ಕಾಲ ಇದಲ್ಲ. ಈಗೇನಿದ್ದರೂ ಕೌಶಲದ ಕಾಲ. ಪ್ರತಿಭೆ, ಅಂಕಪಟ್ಟಿ, ಪದವಿಗಳ ಜೊತೆಗೆ ಕಂಪೆನಿಯ ಉತ್ಪಾದಕತೆಯ ನಿರೀಕ್ಷೆಗೆ ತಕ್ಕಂತೆ ನಿಮ್ಮಲ್ಲಿರುವ ಕೌಶಲಗಳು ಪೂರಕವಾಗಿವೆಯೇ ಎಂಬುದು ಮುಖ್ಯ. ಕೆಲಸ ಗಿಟ್ಟಿಸಬೇಕೆಂದರೆ ಮೊದಲ ಹಂತದಲ್ಲಿ ರೆಸ್ಯೂಮ್ ತಯಾರಿ ಮಾಡಿಕೊಂಡಿರಬೇಕು. ಈ ರೆಸ್ಯೂಮ್ನಿಂದಲೇ ಕಂಪೆನಿಯವರ ಗಮನ ಸೆಳೆಯಬೇಕಿರುವುದು. ಸಾವಿರಾರು ರೆಸ್ಯೂಮ್ ಮಾದರಿಗಳು ಅಂತರ್ಜಾಲದಲ್ಲಿ ಲಭ್ಯ. ಆದರೂ ಇವ್ಯಾವೂ ಕೂಡ ಉತ್ತರ ಕೆರೋಲಿನಾದ ಯುವತಿಗೆ ಹಿಡಿಸಲಿಲ್ಲವೆನ್ನಿಸುತ್ತದೆ. ತಾನು ನೈಕ್ ಕಂಪೆನಿಯಲ್ಲಿ ಕೆಲಸ ಗಿಟ್ಟಿಸಲೇಬೇಕು ಎಂಬ ಛಲದಿಂದ ಆಕೆ ತನ್ನ ರೆಸ್ಯೂಮ್ ಅನ್ನು ಕಂಪೆನಿಗೆ ಕಳುಹಿಸಲು ಅದ್ಭುತ ಆಲೋಚನೆ ಮಾಡಿದ್ದಾಳೆ.
ತಾನು ಇತರರಿಗಿಂತ ಭಿನ್ನ ಎಂದು ಗಮನಸೆಳೆಯಲು ಉತ್ತರ ಕೆರೋಲಿನಾದ ಯುವತಿ ಕಾರ್ಲಿ ಪಾವ್ಲಿನಾಕ್ ಬ್ಲ್ಯಾಕ್ಬರ್ನ್ ಹೀಗೊಂದು ಈ ಉಪಾಯ ಕಂಡುಕೊಂಡಿದ್ದಾರೆ. ಲಿಂಕ್ಡಿನ್ನ ತನ್ನ ಖಾತೆಯಲ್ಲಿ ಈಕೆ ಪೋಸ್ಟ್ ಹಾಕುತ್ತಿದ್ದಂತೆ ವೈರಲ್ ಆಗಿದೆ. ರೆಸ್ಯೂಮ್ ಅನ್ನು ಇ ಮೇಲ್ನಲ್ಲಿ ಕಳಿಸುವುದು ಸಾಮಾನ್ಯವಾದ ವಿಧಾನ. ಆದರೆ ಈಕೆ ತನ್ನ ರೆಸ್ಯೂಮ್ ಅನ್ನು ಕೇಕ್ ಮೇಲೆ ಮುದ್ರಿಸಿ ಕಂಪೆನಿಗೆ ಕಳಿಸಿದ್ಧಾರೆ. ತಾನೇಕೆ ಹೀಗೆ ಅಸಾಂಪ್ರದಾಯಿಕವಾದ ನಡೆಯನ್ನು ಆಯ್ದುಕೊಂಡಿದ್ದೇನೆ? ಎನ್ನುವುದನ್ನು ಪೋಸ್ಟ್ನಲ್ಲಿ ವಿವರಿಸಿದ್ದಾಳೆ.
‘ಈ ಕಂಪೆನಿಯ ತಂಡವೊಂದು ಸದ್ಯ ಯಾವುದೇ ಸ್ಥಾನಗಳನ್ನು ಭರ್ತಿ ಮಾಡಿಕೊಳ್ಳುತ್ತಿಲ್ಲ. ಹಾಗಾಗಿ ಈ ಕೇಕ್ ಮೂಲಕವಾದರೂ ನಾನು ಯಾರೆಂದು ಅವರು ಪತ್ತೆ ಹಚ್ಚುವಂತಾಗಲಿ. ಅಷ್ಟೊಂದು ದೊಡ್ಡ ಪಾರ್ಟಿಗೆ ನಾನು ಕಳಿಸುತ್ತಿರುವ ಈ ಕೇಕ್ ಸೂಕ್ತವಾಗಿದೆ ಎನ್ನಿಸಿತು ಮತ್ತು ಈ ಕೇಕ್ ಐಡಿಯಾಗಿಂತ ಒಳ್ಳೆಯ ಉಪಾಯ ಬೇರೊಂದಿಲ್ಲ ಎನ್ನಿಸಿತು.’ ಎಂದಿದ್ದಾಳೆ.
ನೈಕ್ ಕಂಪೆನಿಯಲ್ಲಿ ಕೆಲಸ ಗಿಟ್ಟಿಸಬೇಕೆಂದೇ ಈ ಸೃಜನಶೀಲ ಉಪಾಯವನ್ನು ಹೂಡಿರುವುದಾಗಿ ಹೇಳಿಕೊಂಡಿದ್ದಾಳೆ. ‘ನನ್ನ ಸ್ನೇಹಿತನೊಬ್ಬ ಈ ಕಂಪೆನಿಯ ತಂಡಕ್ಕೆ ತನ್ನನ್ನು ಶಿಫಾರಸು ಮಾಡಿದ್ದ. ಎಲ್ಲರಂತೆ ಇ ಮೇಲ್ ಕಳಿಸುವ ಬದಲಾಗಿ ತಾನು ಕೇಕ್ ಮೇಲೆ ರೆಸ್ಯೂಮ್ ಮುದ್ರಿಸಿದ್ದೆನಷ್ಟೇ.’ ಎಂದಿದ್ದಾಳೆ.
ಕಂಪೆನಿಯ ಕಾರ್ಪೊರೇಟ್ ಮುಖ್ಯ ಕಚೇರಿಯಲ್ಲಿ ಯಾವಾಗ ಪಾರ್ಟಿ ನಡೆಯುತ್ತದೆ ಎಂಬುದನ್ನು ತಿಳಿದುಕೊಂಡೇ ಈಕೆ ಈ ಉಪಾಯಕ್ಕೆ ತೆರೆದುಕೊಂಡಿದ್ದಾಳೆ. ಈಕೆಯ ಈ ಉಪಾಯಕ್ಕೆ ನೆಟ್ಟಿಗರು ಮಿಶ್ರ ಪ್ರತಿಕ್ರಿಯೆ ವ್ಯಕ್ತಪಡಿಸಿದ್ದಾರೆ.
ಇದೊಂದು ಅತ್ಯಂತ ಅದ್ಭುತ ಐಡಿಯಾ, ಸೃಜನಶೀಲ ಆಲೋಚನೆ, ಈ ಪರಿಕಲ್ಪನೆ ಬಹಳ ಸುಂದರವಾಗಿದೆ ಎಂದು ಕೆಲವರು ಶ್ಲಾಘಿಸಿದರೆ, ಇನ್ನೂ ಕೆಲವರು, ಇದೆಲ್ಲಾ ಗಿಮಿಕ್ ಎಂದಿದ್ದಾರೆ.
ಈಕೆಯನ್ನು ಸಂದರ್ಶನಕ್ಕೆ ಕರೆದರೆ ಸಂದರ್ಶಕರು ಏನೆಲ್ಲಾ ಪ್ರಶ್ನೆಗಳನ್ನು ಕೇಳಬಹುದು? ಕೇಕ್ ಯಾವುದರಿಂದ ಮಾಡಲ್ಪಟ್ಟಿದೆ ಎಂಬುದೇ ಮೊದಲ ಪ್ರಶ್ನೆಯಾಗಿರುತ್ತದೆ ಎಂದು ಮತ್ತೊಬ್ಬರು ತಮಾಷೆ ಮಾಡಿದ್ದಾರೆ.
ರೆಸ್ಯೂಮ್ ಕಳಿಸುವ ಈ ಕೌಶಲ ನಿಮಗೆ ಮೆಚ್ಚುಗೆಯಾಯಿತೆ? ನಿಮ್ಮ ತಲೆಯಲ್ಲಿ ಈಗ ಏನೆಲ್ಲಾ ಐಡಿಯಾ ಹೊಳೆಯುತ್ತಿರಬಹುದು. ಏನೇ ಆಗಲಿ ಸೃಜನಶೀಲತೆ ನಿಮ್ಮಲ್ಲಿ ಹರಿಯುತ್ತಿರಲಿ.
ಮತ್ತಷ್ಟು ಟ್ರೆಂಡಿಂಗ್ ನ್ಯೂಸ್ಗಾಗಿ ಕ್ಲಿಕ್ ಮಾಡಿ
