ಕೈ ನಡಿಗೆಯಿಂದ 20 ಮೀಟರ್ ದೂರವನ್ನು ಕೇವಲ 4.78 ಸೆಕೆಂಡ್ನಲ್ಲಿ ತಲುಪಿದ ವಿಶೇಷ ಚೇತನ ಯುವಕ; ಗಿನ್ನೆಸ್ ದಾಖಲೆಗೆ ಸೇರ್ಪಡೆ
Guinness World Records: ಅಮೇರಿಕಾದ ಈ ಉತ್ಸಾಹಿ ಯುವಕ ಅಪರೂಪದ ಸಾಧನೆ ಮಾಡಿದ್ದಾನೆ. ಆ ಮೂಲಕ ಗಿನ್ನೆಸ್ ವರ್ಲ್ಡ್ ರೆಕಾರ್ಡ್ನಲ್ಲಿ ಆತನ ಹೆಸರು ಸೇರ್ಪಡೆಗೊಂಡಿದೆ. ಆ ಸಾಧನೆ ಯಾವುದು? ಯುವಕನ ಮುಂದಿನ ಕನಸುಗಳೇನು? ಇಲ್ಲಿದೆ ಮಾಹಿತಿ.
Updated on:Sep 26, 2021 | 2:36 PM
ವಿಶ್ವದಾದ್ಯಂತ ವಿಶೇಷ ಚೇತನರು ತಮ್ಮ ವೈವಿಧ್ಯಮಯ ಪ್ರತಿಭೆಯಿಂದ ಸಾಧಕರ ಸಾಲಿನಲ್ಲಿ ಗುರುತಿಸಿಕೊಂಡಿದ್ದಾರೆ. ಈ ಸಾಲಿಗೆ ಕನಸು ಕಂಗಳ ಯುವಕನೊಬ್ಬನ ಪ್ರವೇಶವಾಗಿದೆ. ಇನ್ಸ್ಟಾಗ್ರಾಂನಲ್ಲಿ ಗಿನ್ನೆಸ್ ವರ್ಲ್ಡ್ ರೆಕಾರ್ಡ್(GWR) ಪೇಜ್ನಲ್ಲಿ ಒಂದು ಅಪರೂಪದ ದಾಖಲೆಯ ದೃಶ್ಯವನ್ನು ಹಂಚಿಕೊಳ್ಳಲಾಗಿದ್ದು, ವೀಕ್ಷಕರಿಗೆ ಸ್ಫೂರ್ತಿ ತುಂಬುವಂತಿದೆ. ವಿಶೇಷ ಚೇತನ ಯುವಕ ಜಿಯಾನ್ ಕ್ಲಾರ್ಕ್, ತಮ್ಮ ಕೈಗಳ ಮುಖಾಂತರ ನಡೆದು ದಾಖಲೆ ಸೃಷ್ಟಿಸಿದ್ದಾರೆ. ಕೈಗಳ ಮುಖಾಂತರ ನಡೆಯುವುದರಲ್ಲಿ ಏನು ವಿಶೇಷ ದಾಖಲೆ ಅಂತೀರಾ? ಇಲ್ಲಿದೆ ಓದಿ.
ಅಮೇರಿಕಾದ ಜಿಯಾನ್ ಕ್ಲಾರ್ಕ್ ಅವರಿಗೆ ಕಾಲುಗಳಿಲ್ಲ. ಅವರು ತಮ್ಮ ಕೈಗಳಿಂದ ನಡೆಯುತ್ತಾರೆ. ಅವರು ಬರೀ ನಡೆಯುವುದಲ್ಲ, ತಮ್ಮ ವೇಗಕ್ಕೆ, ಪ್ರತಿಭೆಗೆ ಗಿನ್ನಿಸ್ ದಾಖಲೆಯ ಪುಟ ಸೇರಿದ್ದಾರೆ. 20 ಮೀಟರ್ ದೂರವನ್ನು ಕೇವಲ 4.78 ಸೆಕೆಂಡ್ಸ್ಗಳಲ್ಲಿ ಕೈಗಳ ಮುಖಾಂತರ ಕ್ರಮಿಸಿರುವ ಅವರು, ಎಲ್ಲರ ಹುಬ್ಬೇರಿಸಿದ್ದಾರೆ. ಈ ದಾಖಲೆಯು 2021ರ ಫೆಬ್ರವರಿಯಲ್ಲಿ ನಿರ್ಮಾಣವಾಗಿದೆ.
ಅಮೆರಿಕಾದ ಓಹಿಯೋ ನಗರದ ಜಿಯಾನ್ ಕ್ಲಾರ್ಕ್ ಅವರಿಗೆ ಹುಟ್ಟುವಾಗಿನಿಂದ ಕಾಡಲ್ ರಿಗ್ರೆಷನ್ ಸಿಂಡ್ರೋಮ್ ಇತ್ತು. ಇದರಿಂದಾಗಿ ದೇಹದ ಕೆಳಗಿನ ಭಾಗಗಳು ಬೆಳವಣಿಗೆಯಾಗದ ಕಾರಣ, ಅವರಿಗೆ ನಡೆಯಲು ಸಾಧ್ಯವಾಗುತ್ತಿರಲಿಲ್ಲ. ಆದರೆ ಕುಸ್ತಿ, ವೀಲ್ ಚೇರ್ ರೇಸಿಂಗ್ ಸೇರಿದಂತೆ ವಿವಿಧ ಆಟಗಳಲ್ಲಿ ಛಲದಿಂದ ಪರಿಣತಿ ಹೊಂದಿರುವ ಅವರು, ಇದೀಗ ಕೈಗಳ ಮುಖಾಂತರ ನಡಿಗೆಯಿಂದ ಗಿನ್ನೆಸ್ ದಾಖಲೆಯ ಪಟ್ಟಿ ಸೇರಿದ್ದಾರೆ. ಅವರ ಕನಸೇನು ಎಂಬುದನ್ನೂ, ಇನ್ಸ್ಟಾಗ್ರಾಂನಲ್ಲಿ ಹಂಚಿಕೊಳ್ಳಲಾಗಿದೆ. 2024ರಲ್ಲಿ ನಡೆಯುವ ಪ್ಯಾರಾಲಿಂಪಿಕ್ಸ್ನಲ್ಲಿ ಕುಸ್ತಿ, ವೀಲ್ ಚೇರ್ ರೇಸಿಂಗ್ನಲ್ಲಿ ಅಮೇರಿಕಾವನ್ನು ಪ್ರತಿನಿಧಿಸುವುದು ಅವರ ಗುರಿಯಾಗಿದೆ. ಆ ಕನಸಿಗೆ ನಾವೂ ಶುಭ ಹಾರೈಸೋಣ.
ಇನ್ಸ್ಟಾಗ್ರಾಂನಲ್ಲಿ ಹಂಚಿಕೊಳ್ಳಲಾದ ಅವರ ದಾಖಲೆಯ ವಿಡಿಯೊ:
View this post on Instagram
ಜಿಯಾನ್ ಅವರ ಗಿನ್ನೆಸ್ ದಾಖಲೆಯ ವಿಡಿಯೊಗೆ ಸದ್ಯ ವೈರಲ್ ಆಗಿದ್ದು, ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿದೆ. ಅತ್ಯಂತ ಅಪರೂಪದ ಪ್ರತಿಭೆ ಎಂದು ಓರ್ವರು ಕಾಮೆಂಟ್ ಮಾಡಿದ್ದರೆ, ಮತ್ತೊಬ್ಬರು- ‘ನಿಮ್ಮ ಛಲಕ್ಕೆ ನಮನ’ ಎಂದು ಬರೆದಿದ್ದಾರೆ.
ಕುಸ್ತಿಯಲ್ಲಿ ಜಿಯಾನ್:
View this post on Instagram
ಗಿನ್ನೆಸ್ ದಾಖಲೆಯನ್ನು ಸಾಧಿಸಿರುವ ಕುರಿತು ಪ್ರತಿಕ್ರಿಯಿಸಿರುವ ಜಿಯಾನ್, ‘‘ನನಗೆ ತಿಳಿಯುವುದಕ್ಕೆ ಮೊದಲೇ, ಗುರಿಯನ್ನು ತಲುಪಿದ್ದೆ. ಅವರು 4.78 ಸೆಕೆಂಡ್ಸ್ನಲ್ಲಿ ಗುರಿ ತಲುಪಿದ್ದೆ ಎಂದಾಗ ರೋಮಾಂಚನವಾಯಿತು. ಆ ಆನಂದವನ್ನು ವಿವರಿಸುವುದಕ್ಕೆ ಸಾಧ್ಯವಿಲ್ಲ’’ ಎಂದಿದ್ದಾರೆ.
ಇದನ್ನೂ ಓದಿ:
Viral Video: ಅಳಿಲಿಗೆ ಆಟ, ಬೆಕ್ಕಿಗೆ ಸಂಕಟ!; ಇದೇನಿದು ಹೊಸ ಗಾದೆ? ತಮಾಷೆಯ ಈ ವಿಡಿಯೊ ನೋಡಿ
Viral Video: ಸಫಾರಿ ಮಾಡುತ್ತಿರುವ ಜೀಪ್ ಒಳಗೆ ನುಗ್ಗಿದ ಸಿಂಹಿಣಿ; ನಂತರ ಏನಾಯ್ತು? ಅಚ್ಚರಿಯ ವಿಡಿಯೊ ಇಲ್ಲಿದೆ
(Zion Clark made a record in 20m hand walk here is the video and his inspiration story)
Published On - 2:26 pm, Sun, 26 September 21
