‘ಕೆಂಡ’ ಸಿನಿಮಾಗೆ ಜಯಂತ್ ಕಾಯ್ಕಿಣಿ ಪುತ್ರ ರಿತ್ವಿಕ್​ ಸಂಗೀತ ನಿರ್ದೇಶನ

ಸಹದೇವ ಕೆಲವಡಿ ಅವರು ನಿರ್ದೇಶನ ಮಾಡಿರುವ ‘ಕೆಂಡ’ (Kenda) ಸಿನಿಮಾಗೆ ರಿತ್ವಿಕ್​ ಕಾಯ್ಕಿಣಿ (Ritwik Kaikini) ಅವರು ಸಂಗೀತ ನೀಡಿದ್ದಾರೆ. ಈ ಮೂಲಕ ಮ್ಯೂಸಿಕ್​ ಡೈರೆಕ್ಟರ್​ ಆಗಿ ಅವರು ಸ್ಯಾಂಡಲ್​ವುಡ್​ಗೆ ಪರಿಚಿತರಾಗುತ್ತಿದ್ದಾರೆ. ಈ ಸಿನಿಮಾದ ‘ತಾಜಾ ಸುದ್ದಿ..’ ಹಾಡು ಬಿಡುಗಡೆ ಆಗಿದೆ. ಜಯಂತ್​ ಕಾಯ್ಕಿಣಿ (Jayanth Kaikini) ಬರೆದ ಈ ಹಾಡಿಗೆ ಅನನ್ಯಾ ಭಗತ್​ ಹಾಗೂ ರಿತ್ವಿಕ್​ ಕಾಯ್ಕಿಣಿ ಧ್ವನಿ ನೀಡಿದ್ದಾರೆ. ‘ಡಿ-ಬೀಟ್ಸ್​’ ಮೂಲಕ ಈ ಸಾಂಗ್​ ರಿಲೀಸ್​ ಆಗಿದೆ. ನಿರ್ದೇಶಕ ಯೋಗರಾಜ್​ ಭಟ್​, ಸಂಗೀತ ನಿರ್ದೇಶಕ ಹರಿಕೃಷ್ಣ, ಶೈಲಜಾ ನಾಗ್​ ಅವರು ಹಾಡಿನ ಬಿಡುಗಡೆ ಕಾರ್ಯಕ್ರಮಕ್ಕೆ ಬಂದು ಶುಭ ಹಾರೈಸಿದ್ದಾರೆ. ‘ಅಮೆಯುಕ್ತಿ ಸ್ಟುಡಿಯೋಸ್​’ ಮೂಲಕ ರೂಪಾ ರಾವ್​ ಮತ್ತು ಸಹದೇವ್​ ಕೆಲವಡಿ ಅವರು ‘ಕೆಂಡ’ ಸಿನಿಮಾಗೆ ಬಂಡವಾಳ ಹೂಡಿದ್ದಾರೆ. ಬಿ.ವಿ. ಭರತ್​, ಪ್ರಣವ್​ ಶ್ರೀಧರ್​, ವಿನೋದ್​, ಗೋಪಾಲಕೃಷ್ಣ ದೇಶಪಾಂಡೆ ಮುಂತಾದವರು ಈ ಸಿನಿಮಾದಲ್ಲಿ ನಟಿಸಿದ್ದಾರೆ.

‘ನಾನು ಸಾಹಿತಿಯಾಗಿ ಮಾತನಾಡಬಹುದು. ಆದರೆ ತಂದೆಯಾಗಿ ಮಾತನಾಡಿದರೆ ಮನೆಗೆ ಹೋದಮೇಲೆ ನಾನೇ ಪೆಟ್ಟು ತಿನ್ನಬೇಕಾಗುತ್ತದೆ. ಇದು ನನಗೆ ತುಂಬಾ ಕೌಟುಂಬಿಕವಾದ ಕ್ಷಣ. ಎಷ್ಟೋ ವರ್ಷಗಳ ಹಿಂದೆ ಇದೇ ರೀತಿಯ ಬಾಂಧವ್ಯ ಶೈಲಜಾ ನಾಗ್​, ಬಿ. ಸುರೇಶ ಹಾಗೂ ಯೋಗರಾಜ್​ ಭಟ್​ ಅವರ ನಡುವೆ ಮೂಡಿತ್ತು. ಈಗ ರಿತ್ವಿಕ್​ ಹಾಗೂ ಸಹದೇವ್​ ಅವರ ಪಯಣ ಶುರುವಾಗಿದೆ. ರಿತ್ವಿಕ್​ ಬಗ್ಗೆ ನನಗೆ ಖುಷಿಯಾಗುತ್ತದೆ. ಅವನಿಗೆ ಇಷ್ಟವಾದ ಕೆಲಸ ಮಾಡುತ್ತಿದ್ದಾನೆ. ಅದಕ್ಕೆ ಉತ್ತಮವಾದ ಸಹಯೋಗ ಸಿಕ್ಕಿದೆ’ ಎಂದು ಜಯಂತ್​ ಕಾಯ್ಕಿಣಿ ಹೇಳಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.