Kho Kho World Cup 2025: ಚಾಂಪಿಯನ್ ಕಿರೀಟವನ್ನು ಮುಡಿಗೇರಿಸಿಕೊಂಡ ಭಾರತ ವನಿತಾ ಪಡೆ

ದೆಹಲಿಯಲ್ಲಿ ನಡೆದ ಮೊದಲ ಆವೃತ್ತಿಯ ಖೋ- ಖೋ ವಿಶ್ವಕಪ್​ನಲ್ಲಿ ಭಾರತದ ಎರಡೂ ತಂಡಗಳ ಪಾರುಪತ್ಯ ಮುಂದುವರೆದಿದೆ. ಇಡೀ ಟೂರ್ನಿಯಲ್ಲಿ ಒಂದೇ ಒಂದು ಪಂದ್ಯವನ್ನು ಸೋಲದೆ ಫೈನಲ್ ಪ್ರವೇಶಿಸಿದ್ದ ಭಾರತ ಮಹಿಳಾ ತಂಡ ಇದೀಗ ಇಂದು ನಡೆದ ಫೈನಲ್ ಪಂದ್ಯದಲ್ಲಿ ನೇಪಾಳ ತಂಡವನ್ನು ಏಕಪಕ್ಷೀಯವಾಗಿ ಸೋಲಿಸಿ ಚೊಚ್ಚಲ ಆವೃತ್ತಿಯ ಚಾಂಪಿಯನ್ ಆಗಿ ಹೊರಹೊಮ್ಮಿದೆ. ಭಾರತ ಮಹಿಳಾ ತಂಡವೇ ಗೆಲುವು ಸಾಧಿಸುತ್ತದೆ ಎಂದು ಈ ಮೊದಲೇ ಊಹಿಸಲಾಗಿತ್ತು. ಏಕೆಂದರೆ ಇಡೀ ಟೂರ್ನಿಯಲ್ಲಿ ಭಾರತದ ಸಿಂಹಿಣಿಯರು ತೋರಿದ ಪ್ರದರ್ಶನ ಹಾಗಿತ್ತು. ಒಂದೇ ಒಂದು ಪಂದ್ಯದಲ್ಲೂ ಭಾರತ ತಂಡಕ್ಕೆ ಯಾವ ಎದುರಾಳಿಗೂ ಪೈಪೋಟಿ ನೀಡಲು ಸಾಧ್ಯವಾಗಲಿಲ್ಲ. ಹೀಗಾಗಿ ಪ್ರತಿ ಪಂದ್ಯದಲ್ಲೂ ಭಾರತ ಬೃಹತ್ ಅಂತರದ ಗೆಲುವು ಸಾಧಿಸಿತ್ತು. ನಿರೀಕ್ಷೆಯಂತೆ ಇಂದು ನಡೆದ ಫೈನಲ್ ಪಂದ್ಯದಲೂ ನೇಪಾಳವನ್ನು 78-40 ಅಂಕಗಳ ಅಂತರದಿಂದ ಸೋಲಿಸಿ ಭಾರತ ತಂಡ ಚಾಂಪಿಯನ್‌ ಆಗಿ ಹೊರಹೊಮ್ಮಿದೆ.

ಮೊದಲಿನಿಂದಲೂ ಭಾರತದ ಪ್ರಾಬಲ್ಯ

ಖೋ- ಖೋ ವಿಶ್ವಕಪ್​ನಲ್ಲಿ ಭಾರತಕ್ಕೆ ಕೊಂಚ ಸವಾಲೊಡ್ಡಬಲ್ಲ ತಂಡವೆಂದರೆ ಅದು ನೇಪಾಳ ಮಾತ್ರ. ಹೀಗಾಗಿ ಫೈನಲ್ ಪಂದ್ಯದ ಮೇಲೆ ಎಲ್ಲರ ನಿರೀಕ್ಷೆ ಹೆಚ್ಚಿತ್ತು.ಆದರೆ ಮೊದಲ ಟರ್ನ್​ನಿಂದಲೇ ಭಾರತೀಯ ಮಹಿಳೆಯರು ಪಾರುಪತ್ಯ ಮೆರೆದರು. ಟರ್ನ್-1ರಲ್ಲಿ ದಾಳಿಗಿಳಿದ ಭಾರತ ತಂಡ ರಕ್ಷಣಾ ವಿಭಾಗದಲ್ಲಿ ನೇಪಾಳದ ಆಟಗಾರ್ತಿಯರು ಮಾಡಿದ ತಪ್ಪುಗಳ ಸಂಪೂರ್ಣ ಲಾಭ ಪಡೆದು 34-0 ಅಂತರದ ಬೃಹತ್ ಮುನ್ನಡೆಯೊಂದಿಗೆ ಪಂದ್ಯ ಆರಂಭಿಸಿತು. ಎರಡನೇ ಟರ್ನ್​ನಲ್ಲಿ ನೇಪಾಳ ತಂಡ ಪ್ರತಿರೋಧ ನೀಡಿತ್ತಾದರೂ ಭಾರತದ ಡಿಫೆಂಡರ್‌ಗಳು ಸುಲಭವಾಗಿ ಅಂಕ ಗಳಿಸಲು ಅವಕಾಶ ನೀಡಲಿಲ್ಲ. ಹೀಗಾಗಿ ಎರಡನೇ ಟರ್ನ್ ನಂತರ ಸ್ಕೋರ್ 35-24 ಆಗಿತ್ತು.

3ನೇ ಟರ್ನ್​ನಲ್ಲಿ ಭಾರತಕ್ಕೆ ನಿರ್ಣಾಯಕ ಮುನ್ನಡೆ

ಮೂರನೇ ಟರ್ನ್​ನಲ್ಲಿ ಮತ್ತೊಮ್ಮೆ ದಾಳಿಗಿಳಿದ ಟೀಂ ಇಂಡಿಯಾ ಭಾರಿ ಮುನ್ನಡೆ ಪಡೆದುಕೊಳ್ಳುವಲ್ಲಿ ಯಶಸ್ವಿಯಾಯಿತು. ಈ ಬಾರಿ ಆರಂಭ ಕೊಂಚ ಮಂದಗತಿಯಲ್ಲಿ ಸಾಗಿದರೂ, ಅರ್ಧದ ನಂತರ ಭಾರತದ ಆಟಗಾರ್ತಿಯರು ದಾಳಿಯ ವೇಗ ಹೆಚ್ಚಿಸಿದ್ದರಿಂದ ಸ್ಕೋರ್ ನೇರವಾಗಿ 73-24ಕ್ಕೆ ತಲುಪಿತು. ನೇಪಾಳಕ್ಕೆ ಇಲ್ಲಿಂದ ಹಿಂತಿರುಗುವುದು ಬಹುತೇಕ ಅಸಾಧ್ಯವಾಗಿತ್ತು. ಇತ್ತ 4ನೇ ಟರ್ನ್​ನಲ್ಲಿಯೂ ನೇಪಾಳಕ್ಕೆ ಹೆಚ್ಚಿನ ಅಂಕಗಳನ್ನು ಗಳಿಸಲು ಸಾಧ್ಯವಾಗಲಿಲ್ಲ. ಅಂತಿಮವಾಗಿ ಭಾರತ ಮಹಿಳಾ ತಂಡ 78-40 ಅಂಕಗಳ ಅಂತರದಿಂದ ನೇಪಾಳವನ್ನು ಮಣಿಸಿ ಪ್ರಶಸ್ತಿಗೆ ಮುತ್ತಿಕ್ಕಿತು.

ಮತ್ತಷ್ಟು ಕ್ರೀಡಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ