ಬೆಂಗಳೂರು ಕಸ ತೆರವಿಗೆ ಮಧ್ಯಪ್ರದೇಶದ ‘ಸ್ಟಾರ್’ ಯುವಕ ಎಂಟ್ರಿ: ತುರಹಳ್ಳಿ ಅರಣ್ಯ ಕ್ಲೀನ್ ಮಾಡಿ ಸಿಟಿ ಜನರಿಗೆ ಜಾಗೃತಿ ಮೂಡಿಸಿದ ತಬಾಹಿ ಬಿಟ್ಟು

ಬೆಂಗಳೂರು, ಸೆ.16: ವಿಶ್ವದಾದ್ಯಂತ ತಮ್ಮ ಸ್ವಚ್ಛತಾ ಕಾರ್ಯಗಳ ಮೂಲಕ ಗಮನ ಸೆಳೆದಿರುವ ಮಧ್ಯಪ್ರದೇಶದ ಯುವಕ ತಬಾಹಿ ಬಿಟ್ಟು ಇದೀಗ ಬೆಂಗಳೂರಿನಲ್ಲಿ ಸುದ್ದಿಯಾಗಿದ್ದಾರೆ. ಬನಶಂಕರಿಯ 6ನೇ ಹಂತದಲ್ಲಿರುವ ತುರಹಳ್ಳಿ ಅರಣ್ಯ ಪ್ರದೇಶದ ಸುತ್ತಮುತ್ತ ಸುರಿದಿದ್ದ ತ್ಯಾಜ್ಯವನ್ನು ಸ್ವಚ್ಛಗೊಳಿಸುವ “ತುರಹಳ್ಳಿ ಕ್ಲೀನಪ್” ಅಭಿಯಾನದಲ್ಲಿ ಅವರು ಭಾಗವಹಿಸಿದ್ದರು. ಕೇವಲ 21 ವರ್ಷ ವಯಸ್ಸಿನ ತಬಾಹಿ ಬಿಟ್ಟು, ಈ ಹಿಂದೆ ಮಧ್ಯಪ್ರದೇಶದ ರಾಜಗರ್‌ನಲ್ಲಿರುವ ಕಲುಷಿತ ಅಜ್ಞಾನ್ ನದಿಯನ್ನು ಏಕಾಂಗಿಯಾಗಿ ಸ್ವಚ್ಛಗೊಳಿಸಿ ಖ್ಯಾತಿ ಗಳಿಸಿದ್ದರು. ಅವರ ಈ ಕಾರ್ಯವನ್ನು ಮುಖ್ಯಮಂತ್ರಿಗಳೂ ಕೂಡ ಅಭಿನಂದಿಸಿದ್ದರು. ಬೆಂಗಳೂರಿನ ತುರಹಳ್ಳಿ ಅರಣ್ಯದ ಪರಿಸ್ಥಿತಿ ನೋಡಿ ತಮಗೆ ಆಘಾತವಾಯಿತು ಎಂದು ತಬಾಹಿ ಬಿಟ್ಟು ಹೇಳಿದ್ದಾರೆ. ಐಟಿ-ಬಿಟಿ ನಗರದಲ್ಲಿ ಇಷ್ಟೊಂದು ಕಸ ಇರುವುದನ್ನು ನೋಡಿ ಅವರು ಅಚ್ಚರಿಗೊಂಡಿದ್ದಾರೆ. ಮನೆಯ ತ್ಯಾಜ್ಯ, ನಿರ್ಮಾಣ ತ್ಯಾಜ್ಯ ಮತ್ತು ಸತ್ತ ಪ್ರಾಣಿಗಳನ್ನು ಸಹ ಇಲ್ಲಿ ಎಸೆಯಲಾಗಿದೆ. ಈ ಅಭಿಯಾನಕ್ಕೆ ಹಿರಿಯ ಪರಿಸರವಾದಿ ಎಲ್ಲಪ್ಪ ರೆಡ್ಡಿ ಚಾಲನೆ ನೀಡಿದ್ದು, ಎರಡು ಖಾಸಗಿ ಕಂಪನಿಗಳು ಆಯೋಜಿಸಿದ್ದವು. 150ಕ್ಕೂ ಹೆಚ್ಚು ಸ್ವಯಂಸೇವಕರು ಭಾಗವಹಿಸಿದ್ದರು. ತಬಾಹಿ ಬಿಟ್ಟು ಸ್ವತಃ ಈ ಸ್ವಚ್ಛತಾ ಕಾರ್ಯದಲ್ಲಿ ಸಕ್ರಿಯವಾಗಿ ಪಾಲ್ಗೊಂಡರು. ಮಧ್ಯಪ್ರದೇಶದ ಯುವಕ ಬೆಂಗಳೂರಿನ ಕಸವನ್ನು ಸ್ವಚ್ಛಗೊಳಿಸಲು ಬರಬೇಕಾಗಿರುವುದು ನಾಗರಿಕರಿಗೆ ನಾಚಿಕೆಯ ಸಂಗತಿ ಎಂದು ಟಿವಿ9 ವರದಿ ಮಾಡಿದೆ. ಬೆಂಗಳೂರಿನ ಜನರು ತಮ್ಮ ತ್ಯಾಜ್ಯವನ್ನು ಪ್ರತಿದಿನ ಬರುವ ಪೌರಕಾರ್ಮಿಕರಿಗೆ ನೀಡುವಂತೆ ಟಿವಿ9 ಮನವಿ ಮಾಡಿದೆ.

ವಿಡಿಯೋ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ