ಅಮೇರಿಕಾದ ಉಟಾಹ್ ರಾಜ್ಯದಲ್ಲಿ ಎದ್ದ ಮರಳು ಬಿರುಗಾಳಿಯಿಂದ ಸರಣಿ ಆಪಘಾತ, 8 ಬಲಿ

ಮರಳುಗಾಡಿನಲ್ಲಿ ಏಳುವ ಬಿರುಗಾಳಿ ಅನಾಹುತಗಳನ್ನು ಸೃಷ್ಟಿಸುವುದು ನಮಗೆ ಗೊತ್ತು. ಕೊಲ್ಲಿ ರಾಷ್ಟ್ರಗಳಲ್ಲಿ ಇಂಥ ಬಿರುಗಾಳಿಗಳು ಸಾಮಾನ್ಯ. ಕೊಲ್ಲಿ ರಾಷ್ಟ್ರಗಳೇ ಅಂತಲ್ಲ, ಮರಳುಗಾಡು ಇರುವ ಭೂಭಾಗಗಳಲ್ಲಿ ಸ್ಯಾಂಡ್​ಸ್ಟಾರ್ಮ್​ಗಳು ಬೀಸುತ್ತವೆ ಮತ್ತು ಸುತ್ತಮುತ್ತಲಿನ ಪ್ರದೇಶಗಳಲ್ಲಿ ಹಾನಿಯನ್ನುಂಟು ಮಾಡುತ್ತವೆ. ರವಿವಾರದಂದು, ಅಮೇರಿಕಾದ ಉಟಾಹ್ ರಾಜ್ಯದ ಕಾನೋಶ್ ಹೆಸರಿನ ಪಟ್ಟಣದಲ್ಲಿ ಉಂಟಾದ ಮರಳು ಬಿರುಗಾಳಿಗೆ ಸರಣಿ ಅಪಘಾತ ಸಂಭವಿಸಿ 4 ಮಕ್ಕಳೂ ಸೇರಿದಂತೆ 8 ಜನರು ಬಲಿಯಾಗಿದ್ದಾರೆ. ರಸ್ತೆ ಮೇಲೆ ಹೋಗುತ್ತಿದ್ದ ವಾಹನಗಳು ಬಿರುಗಾಳಿಗೆ ಸಿಕ್ಕ ಕಾರಣ ಸರಣಿ ಆಪಘಾತ ನಡೆದಿದೆ ಎಂದು ಉಟಾಹ್ ಹೆದ್ದಾರಿ ಪೊಲೀಸ್​ ಅಧಿಕಾರಿಗಳು ಹೇಳಿದ್ದಾರೆ. ಅಪಘಾತಕ್ಕೀಡಾದ ವಾಹನಗಳು ಹೆದ್ದಾರಿ ಮೇಲೆ ಜಮಾಗೊಂಡಿದ್ದರಿಂದ ಕಾನೋಶ್​ ಪಟ್ಟಣದ ಮೂಲಕ ಹಾದುಹೋಗುವ ಹೆದ್ದಾರಿಯಲ್ಲಿ ಬಹಳ ಸಮಯದವರೆಗೆ ರಸ್ತೆ ಸಂಚಾರ ಅಸ್ತವ್ಯಸ್ತಗೊಂಡಿತ್ತು.

ಪೊಲೀಸ್ ಮೂಲಗಳ ಪ್ರಕಾರ ಈ ಘಟನೆಯಲ್ಲಿ 10 ಜನ ಗಾಯಗೊಂಡಿದ್ದು ಅವರಲ್ಲಿ ಮೂವರ ಸ್ಥಿತಿ ಚಿಂತಾಜನಕವಾಗಿದೆ. ರಸ್ತೆ ಮತ್ತು ಏರ್ ಅಂಬ್ಯುಲೆನ್ಸ್​ಗಳ ಮೂಲಕ ಗಾಯಗೊಂಡವರನ್ನು ಆಸ್ಪತ್ರೆಗಳಿಗೆ ಸ್ಥಳಾಂತರಿಸಲಾಗಿದೆ.
ಉಟಾಹ್ ರಾಜ್ಯದ ಗವರ್ನರ್ ಸ್ಪೆನ್ಸರ್ ಜೆ ಕೌ ಅವರು ಘಟನೆ ಬಗ್ಗೆ ದಿಗ್ಭ್ರಮೆ ವ್ಯಕ್ತಪಡಿಸಿದ್ದಾರೆ.

‘ಮಿಲ್ಲಾರ್ಡ್​ ಕೌಂಟಿ ಬಳಿ ಸಂಭವಿಸಿರುವ ಭಯಂಕರವ ಅಪಘಾತಗಳಿಂದ ನಮಗೆ ಆಘಾತ ಮತ್ತು ದುಃಖವಾಗಿದೆ. ಅಪಘಾತದಲ್ಲಿ ಬಲಿಯಾದವರಿಗೆ ಉಟಾಹ್ ಜನತೆ ಕಂಬನಿ ಮಿಡಿಯುತ್ತಿದೆ. ಗಾಯಗೊಂಡವರನ್ನು ಆಸ್ಪತ್ರೆಗೆ ಸೇರಿಸಲಾಗಿದ್ದು ಚಿಕಿತ್ಸೆ ಮುಂದುವರಿದಿದೆ,’ ಎಂದು ಅವರು ಕೌ ತಮ್ಮ ಟ್ವೀಟ್​ನಲ್ಲಿ ಹೇಳಿದ್ದಾರೆ.

ಇದನ್ನೂ ಓದಿ: Viral Video: ಸೀರೆಯುಟ್ಟು ರೈಲಿನ ಕಿಟಕಿಯಲ್ಲೇ ಒಳನುಗ್ಗಿದ ಮಹಿಳೆ!; ಎಮರ್ಜೆನ್ಸಿ ಎಂಟ್ರಿಯ ವಿಡಿಯೋ ವೈರಲ್