ಡೇಕೇರ್ ಸೆಂಟರ್‌ಗೆ ನುಗ್ಗಿ ಮಕ್ಕಳ ಮೇಲೆ ಗುಂಡು ಹಾರಿಸುತ್ತೇನೆ: ಎಐ ಚಾಟ್‌ಬಾಟ್ ಕ್ಲೌಡ್‌ಗೆ ಬೆದರಿಕೆ ಹಾಕಿದ್ದ ಆಸ್ಟ್ರೇಲಿಯಾದ ವ್ಯಕ್ತಿ ಅರೆಸ್ಟ್
ಎಐ ಚಾಟ್‌ಬಾಟ್ 'ಕ್ಲೌಡ್' ಮೂಲಕ ಡೇಕೇರ್ ಮೇಲೆ ಗುಂಡು ಹಾರಿಸುವ ಬೆದರಿಕೆ ಹಾಕಿದ್ದ ಆಸ್ಟ್ರೇಲಿಯಾದ ವ್ಯಕ್ತಿಯನ್ನು ಇಂಟರ್‌ಪೋಲ್ ಸುಳಿವಿನ ಆಧಾರದ ಮೇಲೆ ಬಂಧಿಸಲಾಗಿದೆ. ಈ ಘಟನೆ ಎಐ ಕಂಪನಿಗಳು ಬಳಕೆದಾರರ ಸಂಭಾಷಣೆಗಳನ್ನು ಹೇಗೆ ನಿಗಾ ವಹಿಸುತ್ತವೆ ಮತ್ತು ಸುರಕ್ಷತಾ ನಿಯಮಗಳನ್ನು ಹೇಗೆ ಅನ್ವಯಿಸುತ್ತವೆ ಎಂಬ ಬಗ್ಗೆ ಚರ್ಚೆಗೆ ಕಾರಣವಾಗಿದೆ. ನ್ಯಾಯಾಲಯ ಜಾಮೀನು ನಿರಾಕರಿಸಿ, ಮಾನಸಿಕ ಆರೋಗ್ಯ ತಪಾಸಣೆಗೆ ಆದೇಶಿಸಿದೆ.
ಸಿಡ್ನಿ, ಅಕ್ಟೋಬರ್ 23: ಆಂಥ್ರೊಪಿಕ್ ಕಂಪನಿಯ ಜನಪ್ರಿಯ ಕೃತಕ ಬುದ್ಧಿಮತ್ತೆ (AI) ಚಾಟ್‌ಬಾಟ್ ‘ಕ್ಲೌಡ್’ ಜೊತೆಗಿನ ಧ್ವನಿ ಸಂಭಾಷಣೆಯಲ್ಲಿ, ಮಕ್ಕಳ ಆರೈಕೆ ಕೇಂದ್ರದ ಮೇಲೆ ಸಾಮೂಹಿಕ ಗುಂಡಿನ ದಾಳಿ ನಡೆಸುವುದಾಗಿ ಬೆದರಿಕೆ ಹಾಕಿದ್ದ 29 ವರ್ಷದ ಡೇವಿಡ್ ಲ್ಯಾನ್ ಠಾಕ್ರೆ ಎಂಬಾತನನ್ನು ಆಸ್ಟ್ರೇಲಿಯಾ ಪೊಲೀಸರು ಬಂಧಿಸಿದ್ದಾರೆ. ಜಾಗತಿಕ ತನಿಖಾ ಸಂಸ್ಥೆ ಇಂಟರ್‌ಪೋಲ್ ನೀಡಿದ ಮಹತ್ವದ ಸುಳಿವಿನ ಆಧಾರದ ಮೇಲೆ ಸಿಡ್ನಿ ಪೊಲೀಸರು ಅಕ್ಟೋಬರ್ 18 ರಂದು ಆರೋಪಿಯನ್ನು ಬಂಧಿಸಿದ್ದು, ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದಾರೆ. ಈ ಘಟನೆಯು ಎಐ ಕಂಪನಿಗಳು ಬಳಕೆದಾರರ ಖಾಸಗಿ ಸಂಭಾಷಣೆಗಳನ್ನು ಹೇಗೆ ನಿಗಾ ವಹಿಸುತ್ತವೆ ಮತ್ತು ಸುರಕ್ಷತೆಯ ನಿಯಮಗಳು ಹೇಗೆ ಕಾರ್ಯನಿರ್ವಹಿಸುತ್ತವೆ ಎಂಬ ಬಗ್ಗೆ ಹೊಸ ಚರ್ಚೆಯನ್ನು ಹುಟ್ಟುಹಾಕಿದೆ.
ಆರೋಪಿ ಚಾಟ್‌ಬಾಟ್‌ಗೆ ಹೇಳಿದ್ದೇನು?
ನ್ಯಾಯಾಲಯಕ್ಕೆ ಸಲ್ಲಿಸಲಾದ ಪೊಲೀಸ್ ದಾಖಲೆಗಳ ಪ್ರಕಾರ, ಆರೋಪಿ ಠಾಕ್ರೆ ಕ್ಲೌಡ್‌ನ ‘ವಾಯ್ಸ್ ಮೋಡ್’ ಮೂಲಕ ಮಾತನಾಡುತ್ತಿದ್ದಾಗ ಈ ಬೆದರಿಕೆ ಹಾಕಿದ್ದಾನೆ. “ನಾನು ಈಗಲೇ ವೆಸ್ಟ್‌ಫೀಲ್ಡ್ ಶಾಪಿಂಗ್ ಮಾಲ್ ಬಳಿ ಹೋಗಿ, ಸಮೀಪದ ಡೇಕೇರ್ ಕೇಂದ್ರದಲ್ಲಿರುವ ಮಕ್ಕಳ ಮೇಲೆ ಗುಂಡಿನ ದಾಳಿ ನಡೆಸುತ್ತೇನೆ” ಎಂದು ಆತ ಹೇಳಿದ್ದ ಎನ್ನಲಾಗಿದೆ.
ಆತ ದಕ್ಷಿಣ ಸಿಡ್ನಿಯ ಹರ್ಸ್ಟ್‌ವಿಲ್ಲೆಯಲ್ಲಿರುವ ತನ್ನ ಮನೆಯ ಸಮೀಪದ ಮಕ್ಕಳ ಕೇಂದ್ರವನ್ನು ಗುರಿಯಾಗಿಸಿಕೊಂಡಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ. ಅಪರಾಧ ಅಥವಾ ಗಂಭೀರ ಬೆದರಿಕೆ ಹಾಕಲು ಸಂವಹನ ಸೇವೆಯನ್ನು ದುರುಪಯೋಗಪಡಿಸಿಕೊಂಡ ಆರೋಪವನ್ನು ಆತನ ಮೇಲೆ ಹೊರಿಸಲಾಗಿದೆ.
ನ್ಯಾಯಾಲಯದಲ್ಲಿ ನಡೆದ ವಾದ-ಪ್ರತಿವಾದ
“ಒಂದು ವೇಳೆ ಆರೋಪಿಗೆ ಜಾಮೀನು ನೀಡಿದರೆ ಸಾರ್ವಜನಿಕ ಸುರಕ್ಷತೆಗೆ ಗಂಭೀರ ಅಪಾಯವಿದೆ. ಆತ ಮಕ್ಕಳ ಕೇಂದ್ರದ ಮೇಲೆ ದಾಳಿ ನಡೆಸಿದರೆ ಅದರ ಪರಿಣಾಮ ಅತ್ಯಂತ ಭೀಕರ ಹಾಗೂ ವಿನಾಶಕಾರಿಯಾಗಿರುತ್ತದೆ” ಎಂದು ಸರ್ಕಾರಿ ಪರ ವಕೀಲರು ಜಾಮೀನಿಗೆ ಪ್ರಬಲ ವಿರೋಧ ವ್ಯಕ್ತಪಡಿಸಿದರು.
ಠಾಕ್ರೆ ಅವರ ಪರ ವಕೀಲ ಡ್ಯಾನಿಲೊ ರಾಜ್‌ಕೋವಿಕ್ ವಾದಿಸಿ, “ತಮ್ಮ ಕಕ್ಷಿದಾರರಿಗೆ ಕಿವಿಯ ಸೋಂಕಿನ ಸಮಸ್ಯೆ ಇತ್ತು. ಅದಕ್ಕೆ ಪರಿಹಾರ ಕೇಳಲು ಕ್ಲೌಡ್ ಜೊತೆ ಮಾತನಾಡುತ್ತಿದ್ದಾಗ ಸರಿಯಾದ ಉತ್ತರ ಸಿಗದೆ ತೀವ್ರ ಹತಾಶೆಯಿಂದ ಈ ಮಾತುಗಳನ್ನು ಆಡಿದ್ದಾರೆಯೇ ಹೊರತು, ನಿಜವಾಗಿ ಯಾವುದೇ ದುರುದ್ದೇಶ ಇರಲಿಲ್ಲ” ಎಂದು ಸಮರ್ಥಿಸಿಕೊಂಡರು. ನ್ಯಾಯಾಲಯವು ಆರೋಪಿಗೆ ಜಾಮೀನು ನೀಡಲು ನಿರಾಕರಿಸಿದ್ದು, ಆತನ ಮಾನಸಿಕ ಆರೋಗ್ಯ ತಪಾಸಣೆ ಮುಗಿಯುವವರೆಗೆ ನ್ಯಾಯಾಂಗ ಬಂಧನದಲ್ಲಿಡಲು ಆದೇಶಿಸಿದೆ.
ಇದನ್ನೂ ಓದಿ:
ವಿಧಾನಸೌಧ ಸ್ಫೋಟದ ಎಐ ರೀಲ್ಸ್ ಸೃಷ್ಟಿಸಿದ್ದ ಬಿಹಾರ ಮೂಲದ ಹಜರತ್ ಅಲಿ ಬಂಧನ
ಎಐ ಗೌಪ್ಯತೆ ಮತ್ತು ಇಂಟರ್‌ಪೋಲ್ ತನಿಖೆಯ ಚರ್ಚೆ
ಆಂಥ್ರೊಪಿಕ್ ಸೇರಿದಂತೆ ಪ್ರಮುಖ ಎಐ ಕಂಪನಿಗಳು ಭಯೋತ್ಪಾದನೆ, ಸಾಮೂಹಿಕ ಹತ್ಯೆ ಅಥವಾ ಮಕ್ಕಳ ಮೇಲಿನ ದೌರ್ಜನ್ಯದಂತಹ ಮಾತುಕತೆಗಳನ್ನು ತಕ್ಷಣವೇ ಪತ್ತೆಹಚ್ಚುವ ಸ್ವಯಂಚಾಲಿತ ‘ಟ್ರಿಗ್ಗರ್’ ವ್ಯವಸ್ಥೆಯನ್ನು ಹೊಂದಿವೆ. ಸಾರ್ವಜನಿಕ ಜೀವಕ್ಕೆ ಅಪಾಯವಿರುವ ತುರ್ತು ಸಂದರ್ಭಗಳಲ್ಲಿ ಕಾನೂನು ಜಾರಿ ಸಂಸ್ಥೆಗಳೊಂದಿಗೆ ಮಾಹಿತಿ ಹಂಚಿಕೊಳ್ಳಲು ಅವುಗಳ ಗೌಪ್ಯತಾ ನೀತಿಯಲ್ಲಿ ಅವಕಾಶವಿದೆ.
ಕ್ಲೌಡ್‌ನಲ್ಲಿ ನಡೆದ ಈ ಸಂಭಾಷಣೆಯನ್ನು ಸ್ವತಃ ಆಂಥ್ರೊಪಿಕ್ ಸಂಸ್ಥೆಯೇ ಪತ್ತೆಹಚ್ಚಿ ಇಂಟರ್‌ಪೋಲ್‌ಗೆ ವರ್ಗಾಯಿಸಿತೇ ಅಥವಾ ಭದ್ರತಾ ಏಜೆನ್ಸಿಗಳು ಈ ಮಾಹಿತಿಯನ್ನು ಹೇಗೆ ಮೊದಲೇ ಪಡೆದುಕೊಂಡವು ಎಂಬುದು ಸದ್ಯಕ್ಕೆ ಅಧಿಕೃತವಾಗಿ ಸ್ಪಷ್ಟವಾಗಿಲ್ಲ. ಘಟನೆಯ ಬೆನ್ನಲ್ಲೇ ಆರೋಪಿಯ ಕ್ಲೌಡ್ ಖಾತೆಯನ್ನು ಆಂಥ್ರೊಪಿಕ್ ಅಮಾನತುಗೊಳಿಸಿದೆ.
ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ