ಭಾರತ ರಷ್ಯಾದಿಂದ ತೈಲ ಖರೀದಿ ನಿಲ್ಲಿಸಿದರೆ ಅಮೆರಿಕ, ಭಾರತ ಸಂಬಂಧ ಇನ್ನೂ ಉತ್ತಮವಾಗುತ್ತೆ:ಸೆರ್ಗಿಯೊ ಗೋರ್

ವಾಷಿಂಗ್ಟನ್, ಸೆಪ್ಟೆಂಬರ್ 12: ಇತ್ತೀಚಿನ ಸುಂಕ(Tariff) ವಿವಾದ ಹಾಗೂ ರಷ್ಯಾದ ತೈಲ ಖರೀದಿಯ ಬಗ್ಗೆ ಭಿನ್ನಾಭಿಪ್ರಾಯಗಳ ಹೊರತಾಗಿಯೂ, ಅಮೆರಿಕ ಮತ್ತು ಭಾರತದ ನಡುವಿನ ಸಂಬಂಧಗಳು ಉತ್ತಮವಾಗಿವೆ ಎಂದು ಭಾರತದ ರಾಯಭಾರಿ ಹುದ್ದೆಗೆ ನಾಮನಿರ್ದೇಶನಗೊಂಡಿರುವ ಸೆರ್ಗಿಯೊ ಗೋರ್ ಹೇಳಿದ್ದಾರೆ. ಸುಂಕಗಳಿಗೆ ಸಂಬಂಧಿಸಿದಂತೆ ಅಮೆರಿಕ ಮತ್ತು ಭಾರತದ ನಡುವೆ ಹೆಚ್ಚಿನ ಭಿನ್ನಾಭಿಪ್ರಾಯಗಳಿಲ್ಲ, ಎರಡೂ ದೇಶಗಳ ನಡುವಿನ ವ್ಯಾಪಾರ ಸಂಬಂಧಿತ ಸಮಸ್ಯೆಗಳನ್ನು ಮುಂಬರುವ ದಿನಗಳಲ್ಲಿ ಪರಿಹರಿಸಬಹುದು.

ಆದರೆ ಭಾರತ ರಷ್ಯಾದ ತೈಲ ಖರೀದಿಸುವುದನ್ನು ನಿಲ್ಲಿಸಬೇಕಾಗುತ್ತದೆ ಎಂದು ಟ್ರಂಪ್ ಸ್ಪಷ್ಟಪಡಿಸಿದ್ದಾರೆ ಎಂದು ಸೆರ್ಗಿಯೊ ಗೋರ್ ಹೇಳಿದರು. ಬ್ರಿಕ್ಸ್‌ನೊಳಗಿನ ವಿವಿಧ ವಿಷಯಗಳಲ್ಲಿ ಭಾರತ ನಮ್ಮ ಪರವಾಗಿ ನಿಂತಿದೆ ಎಂದರು.

ಕಾರ್ಯದರ್ಶಿ ಮಾರ್ಕೊ ರೂಬಿಯೊ ಅವರು ಸೆನೆಟ್ ಸಮಿತಿಯ ಮುಂದೆ ಸೆರ್ಗಿಯೊ ಗೋರ್ ಅವರನ್ನು ಪರಿಚಯಿಸಿದರು. ಭಾರತ ಮತ್ತು ಅಮೆರಿಕದ ನಡುವಿನ ಸಂಬಂಧಗಳು ಮುಖ್ಯವಾಗಿವೆ, ಅದು ಭವಿಷ್ಯದಲ್ಲಿ ವಿಶ್ವದ ನಕ್ಷೆಯನ್ನು ನಿರ್ಧರಿಸುತ್ತದೆ ಎಂದು ರೂಬಿಯೊ ಹೇಳಿದರು.

ಸೆರ್ಗಿಯೊ ಗೋರ್ ಅವರನ್ನು ಭಾರತಕ್ಕೆ ಮುಂದಿನ ಅಮೆರಿಕದ ರಾಯಭಾರಿಯಾಗಿ ನಾಮನಿರ್ದೇಶನ ಮಾಡಲಾಗಿದೆ ಎಂದು ರೂಬಿಯೊ ಹೇಳಿದರು.

ಮತ್ತಷ್ಟು ಓದಿ:

ಭಾರತ ಅಮೆರಿಕದ ಕ್ಷಮೆ ಯಾಚಿಸಲಿದೆ ಎಂದ ವಾಣಿಜ್ಯ ಕಾರ್ಯದರ್ಶಿ! ಸುಂಕ ತಪ್ಪಿಸಿಕೊಳ್ಳಲು ಭಾರತಕ್ಕೆ 3 ಷರತ್ತು

ಅಮೆರಿಕ-ಭಾರತ ಸಂಬಂಧಗಳ ಮಹತ್ವದ ಬಗ್ಗೆ ಅವರು ವಿಶೇಷ ಒತ್ತು ನೀಡಿದರು ಮತ್ತು ಇದು ಪ್ರಸ್ತುತ ಅಮೆರಿಕಕ್ಕೆ ಅತ್ಯಂತ ಪ್ರಮುಖವಾದ ದ್ವಿಪಕ್ಷೀಯ ಸಂಬಂಧಗಳಲ್ಲಿ ಒಂದಾಗಿದೆ ಎಂದು ಹೇಳಿದರು.ಅಧ್ಯಕ್ಷ ಟ್ರಂಪ್ ನಾಯಕರ ಶೃಂಗಸಭೆಗಾಗಿ ಭಾರತಕ್ಕೆ ಭೇಟಿ ನೀಡಬಹುದು ಎಂದು ಹೇಳಿದ್ದಾರೆ.

ಬ್ರಿಕ್ಸ್ ಗುಂಪಿನಲ್ಲಿ ಭಾರತ ಯಾವಾಗಲೂ ನಮ್ಮೊಂದಿಗಿದೆ, ಅನೇಕ ಬ್ರಿಕ್ಸ್ ದೇಶಗಳು ದೀರ್ಘಕಾಲದವರೆಗೆ ಯುಎಸ್ ಡಾಲರ್‌ನಿಂದ ದೂರವಿರಲು ಪ್ರಯತ್ನಿಸುತ್ತಿವೆ, ಆದರೆ ಭಾರತ ಇದನ್ನು ತಡೆಯಲು ಕೆಲಸ ಮಾಡಿದೆ. ಬ್ರಿಕ್ಸ್‌ನ ಉಳಿದ ದೇಶಗಳಿಗಿಂತ ಭಾರತ ನಮ್ಮೊಂದಿಗೆ ಮಾತನಾಡಲು ಮತ್ತು ಸಂಪರ್ಕ ಸಾಧಿಸಲು ಹೆಚ್ಚು ಸಿದ್ಧವಾಗಿದೆ ಎಂದು ಗೋರ್ ಹೇಳಿದ್ದಾರೆ.

ವಾಸ್ತವವಾಗಿ ಎರಡೂ ಕಡೆಯವರು ಇದರ ಸೂಕ್ಷ್ಮ ಅಂಶಗಳನ್ನು ಚರ್ಚಿಸುತ್ತಿದ್ದಾರೆ. ಇತರ ದೇಶಗಳಿಗಿಂತ ಭಾರತದಿಂದ ನಮಗೆ ಹೆಚ್ಚಿನ ನಿರೀಕ್ಷೆಗಳಿವೆ. ಮುಂಬರುವ ವಾರಗಳಲ್ಲಿ ಈ ಸಮಸ್ಯೆ ಬಗೆಹರಿಯುತ್ತದೆ ಎಂದು ನಾನು ಭಾವಿಸುತ್ತೇನೆ. ಸೆರ್ಗಿಯೊ ಗೋರ್ ಭಾರತವನ್ನು ಅಮೆರಿಕದ ಕಾರ್ಯತಂತ್ರದ ಪಾಲುದಾರ ಎಂದು ಬಣ್ಣಿಸಿದರು ಮತ್ತು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಬಲವಾದ ನಾಯಕತ್ವದಲ್ಲಿ, ಅವರು ಭಾರತದೊಂದಿಗೆ ಸಂಬಂಧವನ್ನು ಮತ್ತಷ್ಟು ಅಭಿವೃದ್ಧಿಪಡಿಸಲು ಬದ್ಧರಾಗಿದ್ದಾರೆ ಎಂದು ತಿಳಿಸಿದ್ದಾರೆ.

BREAKING: “US and India will resolve their tensions over the next few weeks,” declares Sergio Gor, Trump’s nominee as Ambassador to India pic.twitter.com/lIOBIz41xQ

— Shashank Mattoo (@MattooShashank) September 11, 2025

ಭಾರತದ ಮೇಲೆ ಅಮೆರಿಕ ಒಟ್ಟು ಶೇ.50 ರಷ್ಟು ಸುಂಕ ವಿಧಿಸಿದೆ. ಟ್ರಂಪ್ ಆಡಳಿತ ಮೊದಲು ಶೇ.25 ರಷ್ಟು ಸುಂಕವನ್ನು ಘೋಷಿಸಿದ್ದರೂ, ನಂತರ ಅದನ್ನು ಶೇ.50 ಕ್ಕೆ ಹೆಚ್ಚಿಸಿತು, ಇದು ಆಗಸ್ಟ್ 27 ರಿಂದ ಜಾರಿಗೆ ಬಂದಿತು. ಭಾರತವು ರಷ್ಯಾದ ತೈಲವನ್ನು ಖರೀದಿಸಿರುವುದನ್ನು ಹೆಚ್ಚುವರಿ ಶೇ.25 ರಷ್ಟು ಸುಂಕ ವಿಧಿಸಲು ಕಾರಣವೆಂದು ಅಮೆರಿಕ ಉಲ್ಲೇಖಿಸಿತ್ತು.

ಸೆನೆಟ್ ಭಾರತದ ರಾಯಭಾರಿಯಾಗಿ ಸೆರ್ಗಿಯೊ ಗೋರ್ ಅವರ ನೇಮಕವನ್ನು ಅನುಮೋದಿಸಿದರೆ, ಅವರು ಅಮೆರಿಕದ ಅತ್ಯಂತ ಕಿರಿಯ ರಾಯಭಾರಿಯಾಗಲಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ಮತ್ತು ಅಧ್ಯಕ್ಷ ಟ್ರಂಪ್ ನಡುವಿನ ಸಂಬಂಧವನ್ನು ಅದ್ಭುತ ಎಂದು ಗೋರ್ ಬಣ್ಣಿಸಿದ್ದಾರೆ.

ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ