ಟಿಬೆಟ್ ಪ್ರಸ್ಥಭೂಮಿಯಲ್ಲಿ ಚೀನಾ ಸೇನೆಯ ತಾಲೀಮು: ಉದ್ದೇಶದ ಬಗ್ಗೆ ಮೂಡಿವೆ ಹಲವು ಪ್ರಶ್ನೆಗಳು

ಬೀಚಿಂಗ್: ಚೀನಾದ ಪೀಪಲ್ಸ್​ ಲಿಬರೇಶನ್ ಆರ್ಮಿಯ (People’s Liberation Army – PLA) ಟಿಬಿಟ್ ಮಿಲಿಟರಿ ಕಮಾಂಡ್ ಇತ್ತೀಚೆಗೆ ದೊಡ್ಡಮಟ್ಟ ಜಂಟಿ ಕಾರ್ಯಾಚರಣೆಯನ್ನು ಟಿಬೆಟ್ ಪ್ರಸ್ಥಭೂಮಿಯಲ್ಲಿ ನಡೆಸಿದೆ. ಬಹುಆಯಾಮದ ಯುದ್ಧತಂತ್ರಗಳ ಜೊತೆಗೆ ನಿರ್ದಿಷ್ಟ ಗುರಿಯನ್ನು ಧ್ವಂಸ ಮಾಡುವ ಕಾರ್ಯಾಚರಣೆಗಳನ್ನೂ ಚೀನಾ ಸೇನೆಯು ಈ ತಾಲೀಮಿನ ವೇಳೆ ಅಭ್ಯಾಸ ಮಾಡಿತು. ಸ್ನೋಫೀಲ್ಡ್​ ಡ್ಯೂಟಿ-2021 ಗೂಢನಾಮದ ಈ ಸೇನಾ ತಾಲೀಮು ಸಮುದ್ರಮಟ್ಟದಿಂದ 4,500 ಮೀಟರ್​ ಎತ್ತರದಲ್ಲಿ ನಡೆದಿದೆ ಎನ್ನುವುದು ವಿಶೇಷ.

ಪಿಎಲ್​ಎ ಟಿಬೆಟ್ ಕಮಾಂಡ್​ನ ಕನಿಷ್ಠ 10 ಬ್ರಿಗೇಡ್​ಗಳು ಅಂದರೆ ಸುಮಾರು 50,000 ಯೋಧರು ತಾಲೀಮಿನಲ್ಲಿ ಪಾಲ್ಗೊಂಡಿದ್ದರು. ಅತ್ಯಾಧುನಿಕ ಶಸ್ತ್ರಾಸ್ತ್ರಗಳು ಮತ್ತು ಯುದ್ಧೋಪರಣಗಳನ್ನು ತಾಲೀಮಿನಲ್ಲಿ ಬಳಸಲಾಯಿತು. ಲಡಾಖ್​ಗೆ ಹೊಂದಿಕೊಂಡಂತೆ ಇರುವ ಟಿಬೆಟ್​ ಗಡಿಯಲ್ಲಿ ಮಿಲಿಟರಿ ತಾಲೀಮು ನಡೆಸಿರುವ ಉದ್ದೇಶದ ಬಗ್ಗೆ ಭಾರತದಲ್ಲಿ ಹಲವು ಬಗೆಯ ವಿಶ್ಲೇಷಣೆಗಳು ಚಾಲ್ತಿಯಲ್ಲಿವೆ.

ಎತ್ತರದ ಗುಡ್ಡಗಾಡು ಪ್ರದೇಶಗಳಲ್ಲಿ ಕತ್ತಲಿನಲ್ಲಿ ಕಾರ್ಯಾಚರಣೆ ನಡೆಸುವ ತಾಲೀಮನ್ನು ಪಿಎಲ್​ಎ ನಡೆಸಿತು. ಮುಂಚೂಣಿ ದಾಳಿಯ ಕಾರ್ಯಾಚರಣೆ ಮಧ್ಯರಾತ್ರಿಯಲ್ಲಿ ನಡೆಯಿತು. ಆರ್ಟಿಲರಿ ಫಿರಂಗಿಗಳು ಮತ್ತು ರಾಕೆಟ್​ ಲಾಂಚರ್​ಗಳನ್ನು ತಾಲೀಮಿನಲ್ಲಿ ಬಳಸಲಾಯಿತು. ಸಂವಹನ ಕೇಂದ್ರ, ಹೆಲಿಕಾಪ್ಟರ್​ ಪ್ಯಾಡ್​ಗಳನ್ನು ಧ್ವಂಸಗೊಳಿಸುವ ಕಾರ್ಯಾಚರಣೆಯನ್ನೂ ಪಿಎಲ್​ಎ ಅಭ್ಯಾಸ ಮಾಡಿತು ಎಂದು ಚೀನಾದ ದೈನಿಕ ಗ್ಲೋಬಲ್ ಟೈಮ್ಸ್​ ವರದಿ ಮಾಡಿದೆ.

ಇಂಥ ತಾಲೀಮುಗಳನ್ನು ಈ ಹಿಂದೆಯೂ ನಡೆಸಲಾಗಿದೆ. ಸಾಮಾನ್ಯವಾಗಿ ಹಗಲು ಬೆಳಕಿನಲ್ಲಿ ಇಂಥ ಅಭ್ಯಾಸಗಳನ್ನು ಸೇನೆ ಮಾಡಿಕೊಳ್ಳುತ್ತಿತ್ತು. ಈ ಹಿಂದೆ ಒಮ್ಮೆ 6,100 ಮೀಟರ್​ ಎತ್ತರದಲ್ಲಿಯೂ ಇಂಥ ತಾಲೀಮು ನಡೆದಿದೆ ಎಂದು ವರದಿಯು ತಿಳಿಸಿದೆ.

ಈ ಬಾರಿ ನಡೆದ ತಾಲೀಮಿನಲ್ಲಿ ಪಿಎಲ್​ಎ ವಿಮಾನ ನಿರೋಧಕ ಕ್ಷಿಪಣಿಗಳು, ಟ್ಯಾಂಕ್​ಗಳು, ಭೂಸೇನೆಯ ಸಶಸ್ತ್ರ ದಾಳಿ ವಾಹನಗಳು, ದಾಳಿ ಹೆಲಿಕಾಪ್ಟರ್​ಗಳನ್ನು ಬಳಸಲಾಗಿತ್ತು. ಸೇನೆಯ ಸಂಚಾರಕ್ಕೆ ಇರುವ ಅಡೆತಡೆಗಳನ್ನು ತೆರವುಗೊಳಿಸುವ ಮತ್ತು ಸ್ಫೋಟಕಗಳನ್ನು ನಿಷ್ಕ್ರಿಯಗೊಳಿಸುವ ಅಭ್ಯಾಸವನ್ನೂ ಚೀನಾ ಸೇನೆ ನಡೆಸಿತು. ತಾಲೀಮಿನ ವೇಳೆ ಟೈಪ್ 15 ಲಘು ಟ್ಯಾಂಕ್​ಗಳನ್ನು ಚೀನಾ ಸೇನೆ ಬಳಸಿದೆ ಎಂದು ವರದಿಯು ಹೇಳಿದೆ.

(China People Liberation Army Conducts large scale military drills in Tibet plateau)