ಅಮೆರಿಕ ಇತಿಹಾಸದಲ್ಲೇ ಅತಿದೊಡ್ಡ ಉಕ್ಕಿನ ಸ್ಥಾವರ: ಭಾರತದ ಎಸ್ಸಾರ್ ಗ್ರೂಪ್‌ನಿಂದ 1.5 ಲಕ್ಷ ಕೋಟಿ ರೂ. ಬೃಹತ್ ಹೂಡಿಕೆ
ಭಾರತದ ಎಸ್ಸಾರ್ ಗ್ರೂಪ್ ಅಮೆರಿಕದ ಇತಿಹಾಸದಲ್ಲೇ ಅತಿದೊಡ್ಡ 1.5 ಲಕ್ಷ ಕೋಟಿ ರೂ. (18 ಬಿಲಿಯನ್ USD) ಉಕ್ಕಿನ ಸ್ಥಾವರವನ್ನು ಅಯೋವಾದಲ್ಲಿ ಸ್ಥಾಪಿಸುತ್ತಿದೆ. ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಘೋಷಿಸಿದ ಈ ಯೋಜನೆಯು ವಾರ್ಷಿಕ 10 ಮಿಲಿಯನ್ ಟನ್ ಉಕ್ಕು ಉತ್ಪಾದಿಸಿ, 8,000ಕ್ಕೂ ಹೆಚ್ಚು ಉದ್ಯೋಗಗಳನ್ನು ಸೃಷ್ಟಿಸಲಿದೆ. 'ಮೇಡ್ ಇನ್ ಯುಎಸ್‌ಎ' ಉಪಕ್ರಮಕ್ಕೆ ಬಲ ನೀಡುವ ಈ ಹೂಡಿಕೆಯು ಅಮೆರಿಕದ ಆರ್ಥಿಕತೆಗೆ ಭಾರಿ ಕೊಡುಗೆ ನೀಡಲಿದೆ.
ವಾಷಿಂಗ್ಟನ್, ಸೆಪ್ಟೆಂಬರ್ 29: ಭಾರತದ ಪ್ರಮುಖ ಬಹುರಾಷ್ಟ್ರೀಯ ಕೈಗಾರಿಕಾ ಸಮೂಹವಾದ ಎಸ್ಸಾರ್ ಗ್ರೂಪ್ , ಅಮೆರಿಕದ ಇತಿಹಾಸದಲ್ಲೇ ಅತ್ಯಂತ ದೊಡ್ಡದಾದ ಉಕ್ಕಿನ ಸ್ಥಾವರವನ್ನು ನಿರ್ಮಿಸಲು ಸಜ್ಜಾಗಿದೆ. ತನ್ನ ಯುಎಸ್ ಅಂಗಸಂಸ್ಥೆಯಾದ ಮೆಸಾಬಿ ಮೆಟಾಲಿಕ್ಸ್ ಮೂಲಕ ಅಯೋವಾ (Iowa) ರಾಜ್ಯದಲ್ಲಿ ಬರೋಬ್ಬರಿ 18 ಬಿಲಿಯನ್ ಯುಎಸ್ ಡಾಲರ್ ಹೂಡಿಕೆ ಮಾಡುವುದಾಗಿ ಪ್ರಕಟಿಸಿದೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಶ್ವೇತಭವನದ ಓವಲ್ ಕಚೇರಿಯಲ್ಲಿ ಕಂಪನಿಯ ಉನ್ನತ ಅಧಿಕಾರಿಗಳ ಸಮ್ಮುಖದಲ್ಲಿ ಈ ಮಹತ್ವದ ಯೋಜನೆಯನ್ನು ಅಧಿಕೃತವಾಗಿ ಘೋಷಿಸಿದರು.
ಶ್ವೇತಭವನದಲ್ಲಿ ಡೊನಾಲ್ಡ್ ಟ್ರಂಪ್ ಹೇಳಿದ್ದೇನು?
ಯೋಜನೆಯನ್ನು ಘೋಷಿಸಿ ಹರ್ಷ ವ್ಯಕ್ತಪಡಿಸಿದ ಅಧ್ಯಕ್ಷ ಟ್ರಂಪ್, ಇದನ್ನು ಅಮೆರಿಕದ ಕೈಗಾರಿಕಾ ಮರುಹುಟ್ಟಿನ ಹೆಗ್ಗುರುತು ಎಂದು ಬಣ್ಣಿಸಿದರು. ಅಮೆರಿಕದ ಅತಿದೊಡ್ಡ ಸಿಂಗಲ್-ಸೈಟ್ ಸ್ಥಾವರ, ಈ ಯೋಜನೆಯು ಅಮೆರಿಕದ ಇತಿಹಾಸದಲ್ಲೇ ಅತ್ಯಂತ ದೊಡ್ಡ ಸಿಂಗಲ್-ಸೈಟ್ ಉಕ್ಕಿನ ಗಿರಣಿಯಾಗಲಿದ್ದು, ವಾರ್ಷಿಕವಾಗಿ 10 ಮಿಲಿಯನ್ ಟನ್ (10 MT) ಅತ್ಯುನ್ನತ ಗುಣಮಟ್ಟದ ಉಕ್ಕನ್ನು ಉತ್ಪಾದಿಸುವ ಗುರಿ ಹೊಂದಿದೆ.
ಬೃಹತ್ ಉದ್ಯೋಗಾವಕಾಶ: ನಿರ್ಮಾಣ ಹಂತದಲ್ಲಿ ಸುಮಾರು 6,000 ತಾತ್ಕಾಲಿಕ ಉದ್ಯೋಗಗಳು ಹಾಗೂ ಉತ್ಪಾದನೆ ಮತ್ತು ಗಣಿಗಾರಿಕೆ ವಿಭಾಗಗಳಲ್ಲಿ ಸುಮಾರು 2,000 ಕಾಯಂ ಉದ್ಯೋಗಗಳು ಸೃಷ್ಟಿಯಾಗಲಿವೆ. ಒಟ್ಟಾರೆಯಾಗಿ ಇದು ಅಮೆರಿಕದ ಆರ್ಥಿಕತೆಗೆ ಅಂದಾಜು 95 ಬಿಲಿಯನ್ ಡಾಲರ್ ಮೌಲ್ಯವನ್ನು ಸೇರಿಸಲಿದೆ ಎಂದು ಟ್ರಂಪ್ ತಿಳಿಸಿದರು.
ಸ್ಥಳೀಯ ಉತ್ಪಾದನೆಗೆ ಒತ್ತು: “ಅಮೆರಿಕದಲ್ಲೇ ವಸ್ತುಗಳನ್ನು ತಯಾರಿಸಿ, ಸ್ಥಳೀಯ ಮಾರುಕಟ್ಟೆಗಳಲ್ಲಿ ಬಳಸಿ, ವಿದೇಶಗಳಿಗೂ ರಫ್ತು ಮಾಡುವ ನಮ್ಮ ಕನಸಿಗೆ ಈ ಯೋಜನೆ ದೊಡ್ಡ ಉತ್ತೇಜನ ನೀಡಲಿದೆ” ಎಂದು ಟ್ರಂಪ್ ಶ್ಲಾಘಿಸಿದರು.
ಮತ್ತಷ್ಟು ಓದಿ: ಚೀನಾ ಅಧ್ಯಕ್ಷರಿಗೆ ಸ್ವಾಗತ ಕೋರುವಾಗ ಮುಖ ಸಿಂಡರಿಸಿದ ಡೊನಾಲ್ಡ್ ಟ್ರಂಪ್; ವಿಡಿಯೋ ವೈರಲ್
ಸಂಪೂರ್ಣ ಪೂರೈಕೆ ಸರಪಳಿ
ಮೆಸಾಬಿ ಮೆಟಾಲಿಕ್ಸ್ ಅಧ್ಯಕ್ಷ ರೇವಂತ್ ರುಯಾ ಮಾತನಾಡಿ, ದೇಶೀಯ ಉತ್ಪಾದನೆಗೆ ಮರುಜೀವ ನೀಡಿದ್ದಕ್ಕಾಗಿ ಡೊನಾಲ್ಡ್ ಟ್ರಂಪ್ ಅವರಿಗೆ ಧನ್ಯವಾದ ಅರ್ಪಿಸಿದರು. ಈ ಬೃಹತ್ ಘಟಕಕ್ಕೆ ಅಗತ್ಯವಿರುವ ಕಚ್ಚಾ ಕಬ್ಬಿಣದ ಅದಿರನ್ನು (Iron Ore) ಪಕ್ಕದ ಮಿನ್ನೇಸೋಟದಲ್ಲಿರುವ ಕಂಪನಿಯ ಸ್ವಂತ ಗಣಿಗಳಿಂದಲೇ ಸರಬರಾಜು ಮಾಡಿಕೊಳ್ಳಲಾಗುತ್ತದೆ. ಗಣಿಗಾರಿಕೆಯಿಂದ ಹಿಡಿದು ಸಿದ್ಧ ಉಕ್ಕಿನವರೆಗೆ ಎಲ್ಲವೂ ಒಂದೇ ಅಮೆರಿಕನ್ ಪೂರೈಕೆ ಸರಪಳಿಯಡಿ ರೂಪುಗೊಳ್ಳಲಿದೆ.
ಎಸ್ಸಾರ್ ಗ್ರೂಪ್ ಹಿನ್ನೆಲೆ: ಶಶಿ ರುಯಾ ಮತ್ತು ರವಿ ರುಯಾ ಸಹೋದರರು ಸ್ಥಾಪಿಸಿದ ಎಸ್ಸಾರ್ ಗ್ರೂಪ್ ಐದು ದಶಕಗಳಿಗೂ ಹೆಚ್ಚು ಕಾಲ ಉಕ್ಕು, ಇಂಧನ, ಮೂಲಸೌಕರ್ಯ ಮತ್ತು ಬಂದರು ವಲಯಗಳಲ್ಲಿ ಜಾಗತಿಕ ಹೆಜ್ಜೆಗುರುತು ಹೊಂದಿದೆ. ಗುಜರಾತ್‌ನ ಹಜೀರಾದಲ್ಲಿ 10 ಮಿಲಿಯನ್ ಟನ್ ಸಾಮರ್ಥ್ಯದ ಭಾರತದ ಅತಿದೊಡ್ಡ ಸಿಂಗಲ್-ಸೈಟ್ ಸ್ಟೀಲ್ ಪ್ಲಾಂಟ್ ಮತ್ತು ವಡಿನಾರ್‌ನಲ್ಲಿ ಬೃಹತ್ ತೈಲ ಸಂಸ್ಕರಣಾಗಾರವನ್ನು ನಿರ್ಮಿಸಿದ ಹೆಗ್ಗಳಿಕೆ ಈ ಸಂಸ್ಥೆಗಿದೆ.
ಪೋಸ್ಟ್
ಮಿನ್ನೇಸೋಟದಲ್ಲಿ ಹಳೆಯ ಬೇರುಗಳು: ಎಸ್ಸಾರ್ ಗ್ರೂಪ್ 2007 ರಲ್ಲೇ ಮಿನ್ನೇಸೋಟ ಸ್ಟೀಲ್ ಸಂಸ್ಥೆಯನ್ನು ಸ್ವಾಧೀನಪಡಿಸಿಕೊಳ್ಳುವ ಮೂಲಕ ಅಮೆರಿಕದಲ್ಲಿ 1.4 ಶತಕೋಟಿ ಟನ್‌ಗಳಿಗೂ ಅಧಿಕ ಕಬ್ಬಿಣದ ಅದಿರು ಸಂಪನ್ಮೂಲಗಳ ಮೇಲಿನ ಗಣಿಗಾರಿಕೆ ಹಕ್ಕನ್ನು ಪಡೆದುಕೊಂಡಿತ್ತು. ಈಗ ಅಯೋವಾದಲ್ಲಿ ಸ್ಥಾವರ ಸ್ಥಾಪಿಸುವ ಮೂಲಕ ಆ ಅದಿರನ್ನು ಪೂರ್ಣ ಪ್ರಮಾಣದಲ್ಲಿ ಸದ್ಬಳಕೆ ಮಾಡಿಕೊಳ್ಳುತ್ತಿದೆ.
ಜಾಗತಿಕ ಗ್ರೀನ್ ಸ್ಟೀಲ್ ಯೋಜನೆಗಳು: ಅಮೆರಿಕ ಮಾತ್ರವಲ್ಲದೆ, ಯುಕೆ (UK) ಯಲ್ಲಿ ಶೆಲ್‌ನ ಸ್ಟಾನ್ಲೋ ಸಂಸ್ಕರಣಾಗಾರವನ್ನು ನಿರ್ವಹಿಸುತ್ತಿರುವ ಎಸ್ಸಾರ್, ಸೌದಿ ಅರೇಬಿಯಾದಲ್ಲಿಯೂ ಪರಿಸರಸ್ನೇಹಿ ಹಾಗೂ ಕಡಿಮೆ ಇಂಗಾಲದ ಹೊರಸೂಸುವಿಕೆಯ ಅತ್ಯಾಧುನಿಕ ‘ಗ್ರೀನ್ ಸ್ಟೀಲ್’ ಸ್ಥಾವರ ಸ್ಥಾಪನೆಗೆ ಬೃಹತ್ ಬಂಡವಾಳ ಹೂಡಿಕೆ ಮಾಡುತ್ತಿದೆ.
ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ