Missing: ಕಂಪನಿಯೊಂದರ ಮುಖ್ಯಸ್ಥ ಎವರೆಸ್ಟ್ ಉತ್ತುಂಗಕ್ಕೆ ಏರಿ ನಾಪತ್ತೆ; ಭಾರತೀಯ ಮೂಲದ ಸಿಂಗಾಪುರ ವ್ಯಕ್ತಿಗಾಗಿ ಹುಡುಕಾಟ
Mt. Everest: ಎವರೆಸ್ಟ್ ಶಿಖರದ ತುದಿ ತಲುಪಿ ಕೆಳಗಿಳಿಯುವಾಗ ಮೇ 19ರಂದು ಭಾರತೀಯ ಮೂಲದ ಸಿಂಗಾಪುರ ವ್ಯಕ್ತಿ ನಾಪತ್ತೆಯಾಗಿರುವ ಘಟನೆ ನಡೆದಿದೆ. ಇವರನ್ನು ಹುಡುಕಲು ಸಹಾಯ ಮಾಡುವಂತೆ ಸಂಬಂಧಿತ ದೇಶಗಳಿಗೆ ಮನವಿ ಮಾಡಲಾಗುತ್ತಿದೆ.
Updated on: May 21, 2023 | 4:03 PM
ನವದೆಹಲಿ: ಭಾರತ ಮೂಲದ ಸಿಂಗಾಪುರ ವ್ಯಕ್ತಿಯೊಬ್ಬರು ಎವರೆಸ್ಟ್ ಶಿಖರದ ಉತ್ತುಂಗಕ್ಕೆ (Mount Everest Summit) ಎರಿ ಬಳಿಕ ಕಾಣೆಯಾಗಿದ್ದಾರೆ. ಸಿಂಗಾಪುರದಲ್ಲಿ ರಿಯಲ್ ಎಸ್ಟೇಟ್ ಕಂಪನಿ ಜೋನ್ಸ್ ಲ್ಯಾಂಗ್ ಲಾಸಾಲ್ಲೆಯಲ್ಲಿ (Jones Lang Lasalle) ಎಕ್ಸಿಕ್ಯೂಟಿವ್ ಡೈರೆಕ್ಟರ್ ಆಗಿರುವ 39 ವರ್ಷದ ಶ್ರೀನಿವಾಸ್ ಸೈನಿಸ್ ದತ್ತಾತ್ರೇಯ (Srinivas Sainis Dattatreya) ಅವರು ಮೌಂಟ್ ಎವರೆಸ್ಟ್ನಲ್ಲಿ ಕಾಣೆಯಾಗಿರುವ ವ್ಯಕ್ತಿ. ಶ್ರೀನಿವಾಸ್ ಅವರು ಶಿಖರದ ತುದಿ ತಲುಪಿ ಕೆಳಗಿಳಿಯಬೇಕಾದರೆ 8,000 ಮೀಟರ್ ಎತ್ತರದಲ್ಲಿ ಕೆಳಗೆ ಕುಸಿದು ಇತರ ಪರ್ವತಾರೋಹಿಗಳಿಂದ ಬೇರ್ಪಟ್ಟಿರಬಹುದು ಎಂಬ ಶಂಕೆ ಇದೆ.
ಶ್ರೀನಿವಾಸ್ ಅವರ ಸಂಬಂಧಿ ದಿವ್ಯಾ ಭರತ್ ಎಂಬಾಕೆ ಚೇಂಜ್ ಡಾಟ್ ಆರ್ಗ್ Change.org ಮೂಲಕ ಪೆಟಿಶನ್ ಹೊರಡಿಸಿದ್ದು, ಸಂಬಂಧಿತ ದೇಶಗಳು ಈ ಘಟನೆಯನ್ನು ಕಾಳಜಿಯಿಂದ ಪರಿಗಣಿಸಿ ಈ ದುರ್ಗಮ ಪರ್ವತದಲ್ಲಿ ಶ್ರೀನಿವಾಸ್ ಅವರನ್ನು ಶೋಧಿಸಲು ಸಹಾಯ ಮಾಡುವಂತೆ ಕೋರಿದ್ದಾರೆ. ಈ ಪೆಟಿಶನ್ಗೆ ಸಹಿ ಹಾಕಿ ಅದನ್ನು ಸಂಬಂಧಿತ ದೇಶಗಳ ಗಮನಕ್ಕೆ ತರಲು ದಿವ್ಯಾ ಭರತ್ ಪ್ರಯತ್ನಿಸುತ್ತಿದ್ದಾರೆ.
ಶ್ರೀನಿವಾಸ್ ಅವರಿಗೆ ಫ್ರಾಸ್ಟ್ಬೈಟ್ (ಚಳಿಗೆ ಚರ್ಮ ತೊಂದರೆ) ಮತ್ತು ಅಲ್ಟಿಟ್ಯೂಟ್ ಸಿಕ್ನೆಸ್ ಬಾಧಿಸಿದ್ದಿರಬಹುದು. 8,000 ಮೀಟರ್ ಎತ್ತರದಲ್ಲಿ ಅವರು ಬಿದ್ದಿದ್ದಾರೆ. ಟಿಬೆಟಿಯನ್ ಕಡೆಯ ಭಾಗಕ್ಕೆ ಅವರು ಬಿದ್ದಿರಬಹುದು ಎಂದು ಹೇಳಲಾಗುತ್ತಿದೆ. ಶನಿವಾರ ಶೆರ್ಪಾಗಳ ಒಂದು ತಂಡ ಶ್ರೀನಿವಾಸ್ ಸೈನಿಸ್ ದತ್ತಾತ್ರೇಯ ಅವರಿಗೆ ಶೋಧ ಕಾರ್ಯಾಚರಣೆ ಕೈಗೊಂಡಿತು. ಆದರೆ, ಅದರಿಂದ ಫಲ ಸಿಕ್ಕಿಲ್ಲ.
ಇದನ್ನೂ ಓದಿ: Mount Everest: ಮೌಂಟ್ ಎವರೆಸ್ಟ್ ಏರಲು ತೆರಳಿದ್ದ ಭಾರತೀಯ ಮಹಿಳಾ ಆರೋಹಿ ಸಾವು
ನಾನು ವಾಪಸ್ ಬರೋದು ಕಷ್ಟ ಎಂದು ಪತ್ನಿಗೆ ಮೆಸೇಜ್ ಕಳುಹಿಸಿದ್ದ ದತ್ತಾತ್ರೇಯ
ಶ್ರೀನಿವಾಸ್ ಅವರು ಏಪ್ರಿಲ್ 1ರಂದು ಮೌಂಟ್ ಎವರೆಸ್ಟ್ ಹತ್ತಲು ಆರಂಭಿಸಿದರು. ಜೂನ್ 4ಕ್ಕೆ ಅವರು ವಾಪಸ್ ಬರುವ ನಿರೀಕ್ಷೆ ಇತ್ತು. ಶುಕ್ರವಾರ (ಮೇ 19) ಅವರು ತಮ್ಮ ಪತ್ನಿಗೆ ಮೆಸೇಜ್ ಕಳುಹಿಸಿ, ತಾನು ಮೌಂಟ್ ಎವರೆಸ್ಟ್ ತುದಿ ಮುಟ್ಟಿದ್ದಾಗಿ ಹೇಳಿದ್ದರು. ಆದರೆ, ನಂತರ ಅವರು ತಾನು ಕೆಳಗೆ ಬರಲು ಸಾಧ್ಯವಾಗುವುದಿಲ್ಲ ಎಂದೂ ತಿಳಿಸಿದ್ದರು. ಶುಕ್ರವಾರ ಮಧ್ಯಾಹ್ನ 3:30ಕ್ಕೆ ಅವರ ಸಂಪರ್ಕ ಕೊನೆಯದ್ದಾಗಿತ್ತು ಎಂದು ಶ್ರೀನಿವಾಸ್ ಪತ್ನಿ ಸುಷ್ಮಾ ಸೋಮ ಹೇಳಿದ್ದಾರೆ.
ಶ್ರೀನಿವಾಸ್ ಸೈನಿಸ್ ದತ್ತಾತ್ರೇಯ ಅವರ ಜೊತೆ ಇದ್ದ ಇಬ್ಬರು ಶೆರ್ಪಾಗಳು ಹಾಗೂ ಮತ್ತೊಬ್ಬ ವ್ಯಕ್ತಿ ಶಿಖರದಿಂದ ಯಶಸ್ವಿಯಾಗಿ ಕೆಳಗಿಳಿದಿದ್ದಾರೆ. ಆದರೆ, ತಮ್ಮ ಪತಿ ಮಾತ್ರ ಬರಲಿಲ್ಲ ಎಂದು ಸುಷ್ಮಾ ಆತಂಕ ವ್ಯಕ್ತಪಡಿಸಿದ್ದಾರೆ. ಎವರೆಸ್ಟ್ ಪರ್ವತದ ದುರ್ಗಮ ಜಾಗದಲ್ಲಿ ಹುಡುಕಲು ನಿಷ್ಣಾತರಾದ ತಂಡವನ್ನು ಕಳುಹಿಸಿಕೊಡಬೇಕೆಂದು ಚೇಂಜ್ ಡಾಟ್ ಆರ್ಗ್ನ ಪೆಟಿಶನ್ನಲ್ಲಿ ಮನವಿ ಮಾಡಲಾಗಿದೆ.
