ಯುದ್ಧದಿಂದ ಬಸವಳಿದ ವನ್ಯಜೀವಿಗಳು; ಉಕ್ರೇನ್​ ಬಿಟ್ಟು ಎರಡು ದಿನ ಪ್ರಯಾಣಿಸಿ ಪೋಲ್ಯಾಂಡ್ ಸೇರಿಕೊಂಡ ಸಿಂಹ, ಹುಲಿಗಳು​

ಯುದ್ಧದಿಂದ ಬಸವಳಿದ ವನ್ಯಜೀವಿಗಳು; ಉಕ್ರೇನ್​ ಬಿಟ್ಟು ಎರಡು ದಿನ ಪ್ರಯಾಣಿಸಿ ಪೋಲ್ಯಾಂಡ್ ಸೇರಿಕೊಂಡ ಸಿಂಹ, ಹುಲಿಗಳು​
ಉಕ್ರೇನ್​ ಬಿಟ್ಟು ಪೋಲ್ಯಾಂಡ್ ಸೇರಿಕೊಂಡ ಹುಲಿ, ಸಿಂಹಗಳು

ಕೀವ್​​ನಿಂದ ಪೋಲ್ಯಾಂಡ್​ಗೆ ಬರುವುದು ಅಷ್ಟು ಸುಲಭವಾಗಿರಲಿಲ್ಲ. ಯಾಕೆಂದರೆ ತುಂಬ ದೂರದ ದಾರಿ. ಮೊದಲೊಮ್ಮೆ ಪ್ರಾಣಿಗಳನ್ನು ಹೊತ್ತ ಟ್ರಕ್​​​ನ್ನು​ ಅರ್ಧ ದಾರಿ ಸಾಗಿದ್ದ ಮೇಲೆ ರಷ್ಯಾದ ಯುದ್ಧ ಟ್ಯಾಂಕ್​ಗಳು ತಡೆದಿದ್ದವು.

TV9kannada Web Team

| Edited By: Lakshmi Hegde

Mar 06, 2022 | 2:14 PM

ಯುದ್ಧಭೂಮಿಯಾಗಿರುವ ಉಕ್ರೇನ್​​ನಿಂದ (Ukraine) ಬರೀ ಮನುಷ್ಯರನ್ನಷ್ಟೇ ಅಲ್ಲ, ಪ್ರಾಣಿಗಳನ್ನೂ ಸ್ಥಳಾಂತರ ಮಾಡಲಾಗುತ್ತಿದೆ. ಉಕ್ರೇನ್​ ರಾಜಧಾನಿ, ರಷ್ಯಾದ ತೀವ್ರ ದಾಳಿಗೆ ತುತ್ತಾಗಿರುವ ಕೀವ್​​ನ (Kyiv) ಪೂರ್ವದಲ್ಲಿರುವ  ಒಂದು ಅಭಯಾರಣ್ಯದಿಂದ ಗುರುವಾರ ಆರು ಸಿಂಹಗಳು, ಆರು ಹುಲಿಗಳು, ಒಂದು ಆಫ್ರಿಕನ್ ಕಾಡು ನಾಯಿ, ಎರಡು ಕ್ಯಾರಕಲ್ಸ್​ (ಒಂದು ಜಾತಿಯ ಕಾಡು ಬೆಕ್ಕು)ಗಳನ್ನು  ಒಂದು ಟ್ರಕ್​​ನಲ್ಲಿ ಕರೆದುಕೊಂಡು ಹೋಗಿ ಪೋಲ್ಯಾಂಡ್​ಗೆ ಬಿಡಲಾಗಿದೆ.  ಹೀಗೆ ಕೀವ್​ನಿಂದ ಪೋಲ್ಯಾಂಡ್​ಗೆ ಹೋಗಲು ಟ್ರಕ್​​ಗೆ ಎರಡು ದಿನ ಬೇಕಾಯಿತು ಎಂದೂ ಪೋಲಿಶ್​ ಪ್ರಾಣಿ ಸಂಗ್ರಹಾಲಯದ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ. ರಷ್ಯಾ ಕೀವ್​​ನಲ್ಲಿ ತೀವ್ರವಾಗಿ ದಾಳಿ ನಡೆಸುತ್ತಿದೆ. ಹೀಗಾಗಿ ಕೀವ್​​ನ ಈ ಅಭಯಾರಣ್ಯದ ಮಾಲೀಕರಿಗೆ ಅಲ್ಲಿರುವ ಪ್ರಾಣಿಗಳ ಬಗ್ಗೆ ತೀವ್ರ ಆತಂಕ ಶುರುವಾಗಿತ್ತು. ಅವುಗಳ ರಕ್ಷಣೆಗಾಗಿ ಸಹಾಯ ಮಾಡುವಂತೆ ಮಾಲೀಕರು ಪೋಲ್ಯಾಂಡ್​ನ ಪಶ್ಚಿಮದಲ್ಲಿರುವ ಪೋಜ್ನಾನ್​ ಪ್ರಾಣಿಸಂಗ್ರಹಾಲಯದ ಆಡಳಿತಕ್ಕೆ ಮನವಿ ಮನವಿ ಮಾಡಿದ್ದರು. ಅದರಂತೆ ಈಗ ಪ್ರಾಣಿಗಳನ್ನು ಸಾಗಣೆ ಮಾಡಲಾಗಿದೆ.

ಪ್ರಾಣಿಗಳನ್ನು ಯುದ್ಧ ನಡೆಯುತ್ತಿರುವ ಝೈಟೋಮಿರ್​ ಮತ್ತು ಇತರ ಬಾಂಬ್​ ದಾಳಿಯಾಗುತ್ತಿರುವ ವಲಯಗಳಿಂದ ತಪ್ಪಿಸಲು ಕೀವ್ ಅಭಯಾರಣ್ಯದ ಅಧಿಕಾರಿಗಳು ತುಂಬ ಪ್ರಯತ್ನ ಪಟ್ಟರು. ಸುಮಾರು ದೂರ ಅವುಗಳನ್ನು ಕರೆದುಕೊಂಡು ಹೋದರೂ ಎಲ್ಲ ಕಡೆ ಬಾಂಬ್​, ಶೆಲ್​ ದಾಳಿ ಆಗುತ್ತಿದ್ದರಿಂದ ವಾಪಸ್​ ಬಂದರು. ಯಾವ ದಿಕ್ಕಿನಲ್ಲಿ ಹೋದರೂ ಆ ರಸ್ತೆಗಳಲ್ಲೆಲ್ಲ ಸ್ಫೋಟ, ಗುಂಡಿನ ಶಬ್ದವೇ ಕೇಳುತ್ತಿತ್ತು. ಎಲ್ಲಿ ನೋಡಿದರೂ ರಸ್ತೆ ತಡೆಯಾಗಿದೆ. ಹೀಗಾಗಿ ಬೇರೆ ದಾರಿ ಕಾಣದೆ ನಮ್ಮ ಪ್ರಾಣಿ ಸಂಗ್ರಹಾಲಯಕ್ಕೆ ಕರೆದುಕೊಂಡು ಬಂದು ಬಿಟ್ಟಿದ್ದಾರೆ ಎಂದು ಪೋಜ್ನಾನ್​ ಪ್ರಾಣಿಸಂಗ್ರಹಾಲಯದ ವಕ್ತಾರೆ ಮಾಲ್ಗೊರ್ಜಾಟಾ ಚೊಡಿಲಾ ತಿಳಿಸಿದ್ದಾರೆ.

ಕೀವ್​​ನಿಂದ ಪೋಲ್ಯಾಂಡ್​ಗೆ ಬರುವುದು ಅಷ್ಟು ಸುಲಭವಾಗಿರಲಿಲ್ಲ. ಯಾಕೆಂದರೆ ತುಂಬ ದೂರದ ದಾರಿ. ಮೊದಲೊಮ್ಮೆ ಪ್ರಾಣಿಗಳನ್ನು ಹೊತ್ತ ಟ್ರಕ್​​​ನ್ನು​ ಅರ್ಧ ದಾರಿ ಸಾಗಿದ್ದ ಮೇಲೆ ರಷ್ಯಾದ ಯುದ್ಧ ಟ್ಯಾಂಕ್​ಗಳು ತಡೆದಿದ್ದವು. ಎರಡನೇ ಪ್ರಯತ್ನದಲ್ಲಿ ಬಂದು ತಲುಪಿದ್ದಾರೆ. ಹೀಗೆ ಬಂದ ಪ್ರಾಣಿಗಳಿಗೆ ಪುಟ್ಟ ಮರಿಗಳೂ ಇವೆ. ಎರಡು ದಿನಗಳ ಕಾಲ ಟ್ರಕ್​​ನಲ್ಲೇ ಇದ್ದು ಬದುಕುಳಿದಿದ್ದು ನಿಜಕ್ಕೂ ಸಮಾಧಾನ ತಂದ ಸಂಗತಿ. ಅದರಲ್ಲೂ 17ವರ್ಷದ ಹುಲಿಯೊಂದು ತುಂಬ ಬಸವಳಿದುಬಿಟ್ಟಿದೆ.  ಹೀಗೆ ಇವುಗಳನ್ನು ಈ ಪ್ರಾಣಿ ಸಂಗ್ರಹಾಲಯಕ್ಕೆ ಮುಟ್ಟಿಸಿದ ಮೂವರು ಚಾಲಕರು ಮತ್ತೆ ಕೀವ್​ಗೆ ಮರಳಿದ್ದಾರೆ. ತಮ್ಮ ನಗರವನ್ನು ರಕ್ಷಿಸಿಕೊಳ್ಳಬೇಕು ಎಂದು ಹೇಳುತ್ತಲೇ ಹೋದರು. ಹಾಗೇ, ಈ ಪ್ರಾಣಿಗಳು ನಮ್ಮ ಪ್ರಾಣಿ ಸಂಗ್ರಹಾಲಯದಲ್ಲೇ ಉಳಿಯುವುದಿಲ್ಲ. ಇಲ್ಲಿ ಸ್ವಲ್ಪ ದಿನ ಇದ್ದು, ಇಲ್ಲಿಂದ ಪಶ್ಚಿಮಕ್ಕೆ ಇರುವ ಒಂದು ಅಭಯಾರಣ್ಯಕ್ಕೆ ಹೋಗಲಿವೆ ಎಂದು  ಚೊಡಿಲಾ ತಿಳಿಸಿದ್ದಾರೆ.

ಇದನ್ನೂ ಓದಿ: ಭಾರತ- ಬಾಂಗ್ಲಾದ ಗಡಿಯಲ್ಲಿ ಗಡಿ ಭದ್ರತಾ ಪಡೆಗಳಿಗೆ ಹೊಸ ತಲೆಬಿಸಿ; ಹೆಚ್ಚಾದ ಮಾನವ ಕೂದಲು ಕಳ್ಳಸಾಗಣೆ!

Follow us on

Related Stories

Most Read Stories

Click on your DTH Provider to Add TV9 Kannada