Monkeypox: ಮಂಕಿಪಾಕ್ಸ್ ಪ್ರಕರಣಗಳಲ್ಲಿ ಹೆಚ್ಚಳ; ಆರೋಗ್ಯ ತುರ್ತುಸ್ಥಿತಿ ಘೋಷಿಸಿದ ಅಮೆರಿಕ

ವಾಷಿಂಗ್​ಟನ್: ಮಂಕಿಪಾಕ್ಸ್ (Monkeypox) ಪ್ರಕರಣಗಳು ಹೆಚ್ಚಾದ ಹಿನ್ನೆಲೆಯಲ್ಲಿ ಅಮೆರಿಕ ಸರ್ಕಾರವು ಗುರುವಾರ ಸಾರ್ವಜನಿಕ ಆರೋಗ್ಯ ತುರ್ತುಸ್ಥಿತಿ (Public Health Emergency) ಘೋಷಿಸಿದೆ. ಅಮೆರಿಕದಲ್ಲಿ ಈವರೆಗೆ 6,600 ಮಂದಿಗೆ ಮಂಕಿಪಾಕ್ಸ್ ಸೋಂಕು ಕಾಣಿಸಿಕೊಂಡಿದೆ. ಇದೀಗ ತುರ್ತುಸ್ಥಿತಿ ಘೋಷಿಸಿರುವುದರಿಂದ ಮಂಕಿಪಾಕ್ಸ್ ವಿರುದ್ಧದ ಸೆಣೆಸಾಟಕ್ಕೆ ಹಣ ಮತ್ತು ಇತರ ಸಂಪನ್ಮೂಲಗಳನ್ನು ಬಳಸಲು ನಿರ್ಬಂಧಗಳು ಸಡಿಲವಾಗಲಿವೆ. ಅಮೆರಿಕ ಆರೋಗ್ಯ ಇಲಾಖೆಯ ಆರೋಗ್ಯ ಮತ್ತು ಮಾನವೀಯ ಸೇವೆಗಳ ವಿಭಾಗದ ಮುಖ್ಯಸ್ಥರಾದ ಕ್ಸೇವಿಯರ್ ಬೆಕೆರಾ ಮಾತನಾಡಿ, ಮಂಕಿಪಾಕ್ಸ್​ ಸೋಂಕು ಹಬ್ಬುವುದನ್ನು ತಡೆಯಲು ಗಂಭೀರ ಪ್ರಯತ್ನ ಮಾಡುತ್ತಿದೆ. ಸೋಂಕು ವ್ಯಾಪಕವಾಗಿ ಹರಡುತ್ತಿರುವುದರಿಂದ ಜನರು ಎಚ್ಚರ ವಹಿಸಬೇಕು ಎಂದು ಸಲಹೆ ಮಾಡಿದ್ದಾರೆ.

ಅಮೆರಿಕದ ರೋಗ ನಿಯಂತ್ರಣ ಮತ್ತು ತಡೆ ಕೇಂದ್ರ (Centers for Disease Control and Prevention) ಹಾಗೂ ಕೆಂದ್ರೀಯ ತುರ್ತು ಪರಿಸ್ಥಿತಿ ನಿರ್ವಹಣೆ ಸಂಸ್ಥೆಯ (Federal Emergency Management Agency) ಉನ್ನತ ಅಧಿಕಾರಿಗಳನ್ನು ಮಂಕಿಪಾಕ್ಸ್ ಸೋಂಕು ನಿಯಂತ್ರಣಕ್ಕಾಗಿ ಅಧ್ಯಕ್ಷರ ಕಚೇರಿಯ ಸಂಯೋಜರು ಎಂದು ಅಮೆರಿಕ ಸರ್ಕಾರ ಹೆಸರಿಸಿದೆ. ಆರೋಗ್ಯ ತುರ್ತು ಪರಿಸ್ಥಿತಿ ಘೋಷಣೆಯಾಗಿರುವುದರಿಂದ ಅಮೆರಿಕ ವಿವಿಧ ಇಲಾಖೆಗಳ ಬಳಿ ಇರುವ ತುರ್ತುನಿಧಿಯನ್ನು ಪಡೆದುಕೊಳ್ಳಲು ಮಾಡಲು, ಹೆಚ್ಚುವರಿ ಸಿಬ್ಬಂದಿ ನೇಮಕ ಹಾಗೂ ಸರ್ಕಾರಿ ನೌಕರರಿಗೆ ಕೆಲಸ ಮರುನಿಯೋಜನೆ ಆದೇಶ ಹೊರಡಿಸಲು ಅವಕಾಶ ಮಾಡಿಕೊಡುತ್ತದೆ ಎಂದು ಎಪಿ ಸುದ್ದಿಸಂಸ್ಥೆ ವರದಿ ಮಾಡಿದೆ. ಮಂಕಿಪಾಕ್ಸ್ ಕಾಯಿಲೆ ಅಮೆರಿಕದಲ್ಲಿ ಉಂಟು ಮಾಡಬಹುದಾದ ಅನಾಹುತಗಳನ್ನು ಸರ್ಕಾರ ಮುಂದಾಗಿಯೇ ಗ್ರಹಿಸಿರುವುದನ್ನೂ ಈ ಘೋಷಣೆ ಸಾರಿ ಹೇಳಿದೆ.

ಕೊವಿಡ್-19ರ ಸಂದರ್ಭದಲ್ಲಿ ಆದಂತೆ ಸಾರ್ವಜನಿಕ ಆರೋಗ್ಯ ತುರ್ತು ಪರಿಸ್ಥಿತಿಯನ್ನು ಕಾಯಿಲೆ ನಿಯಂತ್ರಣಕ್ಕೆ ಬರುವವರೆಗೆ ವಿಸ್ತರಿಸಬಹುದಾಗಿದೆ. ಮಂಕಿಪಾಕ್ಸ್​ ಸೋಂಕಿನ ವಿರುದ್ಧ ಎರಡು ಡೋಸ್​ಗಳ ‘ಜೆನ್ಯೋಸ್’ ಲಸಿಕೆಯನ್ನು ಅಮೆರಿಕ ಬಳಸುತ್ತಿದೆ. ಈ ಲಸಿಕೆಯ ಲಭ್ಯತೆ ಕಡಿಮೆಯಾದ ಹಿನ್ನೆಲೆಯಲ್ಲಿ ಅಮೆರಿಕ ತುರ್ತು ಪರಿಸ್ಥಿತಿ ಘೋಷಿಸುವ ನಿರ್ಧಾರ ತೆಗೆದುಕೊಂಡಿತು. ಈ ಲಸಿಕೆಯ ಡೋಸ್​ಗಳನ್ನು ಶಂಕಿತ ಸೋಂಕಿತರಿಗೆ 28 ದಿನಗಳ ಅಂತರದಲ್ಲಿ ನೀಡಲಾಗುತ್ತದೆ.

ಮತ್ತಷ್ಟು ಅಂತರಾಷ್ಟ್ರೀಯ ಸುದ್ದಿಗಳನ್ನು  ಓದಲು ಇಲ್ಲಿ ಕ್ಲಿಕ್​ ಮಾಡಿ