ಪಕ್ಕದ ದೇಶ ಶ್ರೀಲಂಕಾದಲ್ಲಿ ಕೊರೊನಾ ಇದೆಯೇ? ಇಲ್ಲಿದೆ ವಿವರ

ಕೊಲಂಬೊ: ಕೊರೊನಾ ವೈರಾಣುವಿನ ಎರಡನೇ ಅಲೆಗೆ ಜಗತ್ತಿನ ಹಲವು ದೇಶಗಳು ಕಡು ಕಷ್ಟ ಅನುಭವಿಸುತ್ತಿವೆ. ಈ ದೇಶಗಳ ಪೈಕಿ ಶ್ರೀಲಂಕಾವೂ ಒಂದಾಗಿದ್ದು, ಹಿಂದಿಗಿಂತಲೂ ಹೆಚ್ಚು ಶಕ್ತಿಶಾಲಿಯಾದ ಮತ್ತು ಗಾಳಿಯ ಮೂಲ ಪ್ರಸರಣವಾಗಬಲ್ಲ ವೈರಾಣು ದೇಶದಲ್ಲಿ ಪತ್ತೆಯಾಗಿದೆ ಎಂದು ಅಲ್ಲಿನ ವೈದ್ಯಕೀಯ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಶ್ರೀಲಂಕಾದಲ್ಲಿ ಸದ್ಯ ಪ್ರತಿದಿನ 600 ಹೊಸ ಕೊರೊನಾ ಸೋಂಕಿತರು ಪ್ರತಿದಿನ ಪತ್ತೆಯಾಗುತ್ತಿದ್ದಾರೆ. ಈವರೆಗೆ ಶ್ರೀಲಂಕಾದಲ್ಲಿ 99,691 ಕೊರೊನಾ ಪ್ರಕರಣಗಳು ಪತ್ತೆಯಾಗಿವೆ. 638 ಜನರು ಕೊರೊನಾ ಸೋಂಕಿನಿಂದ ಜೀವ ಕಳೆದುಕೊಂಡಿದ್ದಾರೆ. ಸದ್ಯ ಪತ್ತೆಯಾಗುತ್ತಿರುವ ಹೊಸ ಪ್ರಕರಣಗಳ ಸಂಖ್ಯೆ ಹೆಚ್ಚುತ್ತಿದ್ದರೂ ಅಗತ್ಯ ಪ್ರಮಾಣದ ಐಸಿಯು ಮತ್ತು ಹಾಸಿಗೆಗಳ ವ್ಯವಸ್ಥೆ ಇದೆ ಎಂದು ಉನ್ನತ ಅಧಿಕಾರಿಗಳು ವಿವರಿಸುತ್ತಾರೆ.

ಕಳೆದ ಬಾರಿ ಹರಡುತ್ತಿದ್ದ ವೈರಾಣುವಿಗಿಂತ ಈ ಬಾರಿಯ ಕೊರೊನಾ ವೈರಾಣು ಅತ್ಯಂತ ಪ್ರಬಲವಾಗಿದೆ. ಅಲ್ಲದೇ ಗಾಳಿಯ ಮೂಲಕ ವೇಗವಾಗಿ ಹರಡುವ ಶಕ್ತಿ ಹೊಂದಿದೆ ಎಂದು ಶ್ರೀ ಜಯವರ್ಧನೆಪುರ ವಿಶ್ವವಿದ್ಯಾಲಯದ ರೋಗ ನಿರೋಧಕ ಶಾಸ್ತ್ರ ವಿಭಾಗದ ಮುಖ್ಯಸ್ಥೆ ನೀಲಿಕಾ ಮೆಲವಿಗೆ ಅಭಿಪ್ರಾಯಪಡುತ್ತಾರೆ.

ಸದ್ಯ ದೇಶದಲ್ಲಿ ಹರಡುತ್ತಿರುವ ಕೊರೊನಾ ವೈರಾಣುವಿಗೆ ಹೆಚ್ಚು ಯುವ ಜನರೇ ತುತ್ತಾಗುತ್ತಿದ್ದಾರೆ. ಕಳೆದ ವಾರ ಕೋಲಂಬೋ ನಗರದಲ್ಲಿ ಜರುಗಿದ್ದ ಹೊಸ ವರ್ಷದ ಸಂಭ್ರಮಾಚರಣೆಯಲ್ಲಿ ಪಾಲ್ಗೊಂಡವರಲ್ಲಿ ಹೆಚ್ಚಿನ ಪಾಲು ಯುವಕರೇ ಜಾಸ್ತಿಯಿದ್ದಾರೆ. ಹೀಗಾಗಿ, ಅವರಲ್ಲಿ ಕೊರೊನಾ ಎರಡನೇ ಅಲೆಯ ಸೋಂಕು ಹರಡುವ ಸಾಧ್ಯತೆ ಹೆಚ್ಚಾಗಿದೆ ಎಂದು ಕೋಲಂಬೋ ನಗರದ ವೈದ್ಯಕೀಯ ಇಲಾಕೆಯ ಅಧಿಕಾರಿಗಳು ತಿಳಿಸುತ್ತಾರೆ ಅಲ್ಲದೇ ಈ ವೈರಾಣು ತನ್ನ ಮೂರನೇ ರೂಪವನ್ನು ತಾಳಲು ಹೆಚ್ಚು ಸಮಯ ಪಡೆಯುವುದಿಲ್ಲ. ಕೇವಲ ಎರಡರಿಂದ ಮೂರು ವಾರಗಳಲ್ಲಿ ರೂಪಾಂತರಗೊಳ್ಳುವ ಶಕ್ತಿ ಹೊಂದಿದೆ. ಈ ಅಂಶ ದೇಶದಲ್ಲಿ ಇನ್ನಷ್ಟು ಭೀತಿ ಸೃಷ್ಟಿಸಿದೆ ಎಂದು ಶ್ರೀಲಂಕಾದ ಆರೋಗ್ಯ ಇಲಾಖೆಯ ಅಧಿಕಾರಿಗಳು ವಿವರಿಸುತ್ತಾರೆ.

ಕೊರೊನಾ ಸೋಂಕು ಹರಡುವುದನ್ನು ತಡೆಗಟ್ಟಲು ಕಟ್ಟುನಿಟ್ಟಿನ ಕ್ರಮಗಳನ್ನು ಜಾರಿಗೆ ತಂದಿರುವ ಶ್ರೀಲಂಕಾ ಸರ್ಕಾರ ಎಲ್ಲಾ ಕಚೇರಿಗಳು ಶೇಕಡಾ 50 ಸಿಬ್ಬಂದಿಗಳೊಂದಿಗೆ ಕೆಲಸ ನಿರ್ವಹಿಸಲು ಸೂಚನೆ ನೀಡಿದೆ. ಜತೆಗೆ ಮೆ 31ರವರೆಗೆ ಅನ್ವಯವಾಗುವ ಕೊರೊನಾ ತಡೆಗೆ ನೂತನ ಮಾರ್ಗದರ್ಶಿ ನಿಯಮಗಳನ್ನು ಸಹ ಪ್ರಕಟಿಸಿದೆ.

ಇದನ್ನೂ ಓದಿ: Covid 19 Treatment in Bengaluru: ಬೆಂಗಳೂರಿನಲ್ಲಿ ತುರ್ತು ಕೊರೊನಾ ಆರೋಗ್ಯ ಸೇವೆಗಳಿಗಾಗಿ ಈ ದೂರವಾಣಿ ಸಂಖ್ಯೆಗಳನ್ನು ಸಂಪರ್ಕಿಸಿ

Explainer: ಕೊವಿಡ್ ನಿರ್ವಹಣೆ ಕೈಪಿಡಿ, ನಿಮ್ಮ ಮನೆಯಲ್ಲಿಯೂ ಇರಲಿ ಈ ಆಪ್ತಮಿತ್ರ

(New covid strain detected in sri lanka says immunologist)