ದಿವಾಳಿಯ ಅಂಚಿನಲ್ಲಿ ಪಾಕ್: ವಿಶ್ವಬ್ಯಾಂಕ್ನಿಂದ 3000 ಸಾವಿರ ಕೋಟಿ ರೂ. ನೆರವು, ಅಂತ್ಯಕ್ರಿಯೆಗೂ ಸಾಲ ಮಾಡುವ ಸ್ಥಿತಿ
ಪಾಕಿಸ್ತಾನ ತೀವ್ರ ಆರ್ಥಿಕ ಬಿಕ್ಕಟ್ಟಿನಲ್ಲಿದ್ದು, ವಿಶ್ವಬ್ಯಾಂಕ್ 3,100 ಕೋಟಿ ರೂ. ನೆರವು ನೀಡಿದೆ. ಆದರೂ, ಜನರ ಸ್ಥಿತಿ ಚಿಂತಾಜನಕ. ಹಣದುಬ್ಬರದಿಂದ ದಿನಬಳಕೆ ವಸ್ತುಗಳ ಬೆಲೆ ಗಗನಕ್ಕೇರಿದ್ದು, ಅಂತ್ಯಕ್ರಿಯೆಗೂ ಸಾಲ ಪಡೆಯುವ ಪರಿಸ್ಥಿತಿ ಬಂದಿದೆ. ದೇಶವು ಸಾಲದ ಸುಳಿಯಲ್ಲಿ ಸಿಲುಕಿದ್ದು, ಆರ್ಥಿಕ ಸುಧಾರಣೆಗಳು ಅನಿವಾರ್ಯವಾಗಿವೆ.
Updated on: Jul 10, 2026 | 8:25 AM
ಇಸ್ಲಾಮಾಬಾದ್, ಜುಲೈ 10: ಪಾಕಿಸ್ತಾನ(Pakistan)ದ ಆರ್ಥಿಕ ಪರಿಸ್ಥಿತಿ ದಿನದಿಂದ ದಿನಕ್ಕೆ ಪಾತಾಳಕ್ಕೆ ಕುಸಿಯುತ್ತಿದೆ. ಸಾಲದ ಸುಳಿಯಲ್ಲಿ ಸಿಲುಕಿರುವ ಪಾಕಿಸ್ತಾನಕ್ಕೆ ಜಾಗತಿಕ ಹಣಕಾಸು ಸಂಸ್ಥೆಯಾದ ವಿಶ್ವಬ್ಯಾಂಕ್ ಈಗ 375.9 ಮಿಲಿಯನ್ ಡಾಲರ್ ಅಂದರೆ ಸುಮಾರು ಸುಮಾರು 3,100 ಕೋಟಿಗೂ ಅಧಿಕ ರೂಪಾಯಿಯ ತುರ್ತು ಆರ್ಥಿಕ ನೆರವನ್ನು ಅನುಮೋದಿಸಿದೆ. ದೇಶದ ಆರ್ಥಿಕ ಸ್ಥಿರತೆಯನ್ನು ಕಾಪಾಡಲು ಮತ್ತು ಸಾರ್ವಜನಿಕ ಸೇವೆಗಳನ್ನು ಸುಧಾರಿಸಲು ಈ ಸಾಲ ನೀಡಲಾಗುತ್ತಿದೆ ಎಂದು ವಿಶ್ವಬ್ಯಾಂಕ್ ಹೇಳಿದ್ದರೂ, ಪಾಕಿಸ್ತಾನದ ಸಾಮಾನ್ಯ ಜನಸಾಮಾನ್ಯರ ಬದುಕು ಮಾತ್ರ ನರಕಸದೃಶವಾಗಿದೆ.
ಷರತ್ತುಬದ್ಧ ಸಹಾಯ ನೀಡಿದ ವಿಶ್ವಬ್ಯಾಂಕ್
ವಿಶ್ವಬ್ಯಾಂಕ್ನ ಕಾರ್ಯನಿರ್ವಾಹಕ ನಿರ್ದೇಶಕರ ಮಂಡಳಿಯು ಈ ನಿಧಿಗೆ ಒಪ್ಪಿಗೆ ಸೂಚಿಸಿದೆ. ಆದರೆ, ಈ ಬಾರಿ ಪಾಕಿಸ್ತಾನಕ್ಕೆ ಹಣವನ್ನು ಸುಲಭವಾಗಿ ಬಿಡುಗಡೆ ಮಾಡುತ್ತಿಲ್ಲ. ವಿಶ್ವಬ್ಯಾಂಕ್ ವಿಧಿಸಿರುವ ಕಠಿಣ ಆರ್ಥಿಕ ಸುಧಾರಣಾ ಗುರಿಗಳನ್ನು ಮತ್ತು ಪಾರದರ್ಶಕತೆಯನ್ನು ಪಾಕಿಸ್ತಾನ ಸರ್ಕಾರ ಸಾಬೀತುಪಡಿಸಿದ ನಂತರವಷ್ಟೇ ಹಂತ-ಹಂತವಾಗಿ ಹಣ ಕೈಸೇರಲಿದೆ.
ಈ ಹಣವನ್ನು ಸಾರ್ವಜನಿಕ ಹಣಕಾಸು ವ್ಯವಸ್ಥೆ ಬಲಪಡಿಸಲು, ಉದ್ಯೋಗ ಸೃಷ್ಟಿ ಮತ್ತು ಅಗತ್ಯ ಅಭಿವೃದ್ಧಿ ಯೋಜನೆಗಳಿಗೆ ಮಾತ್ರ ಬಳಸಬೇಕಾಗುತ್ತದೆ.
ಪಾಕಿಸ್ತಾನಿಗಳ ಬಳಿ ಅಂತ್ಯಕ್ರಿಯೆಗೂ ಹಣವಿಲ್ಲ
ವಿಶ್ವಬ್ಯಾಂಕ್ನಿಂದ ಶತಕೋಟಿ ಡಾಲರ್ ಸಾಲ ಪಡೆಯುತ್ತಿದ್ದರೂ, ಪಾಕಿಸ್ತಾನದ ತಳಮಟ್ಟದ ವಾಸ್ತವ ಚಿತ್ರಣ ಅತ್ಯಂತ ಕರುಣಾಜನಕವಾಗಿದೆ.ದೇಶದಲ್ಲಿ ದಿನಬಳಕೆಯ ವಸ್ತುಗಳು, ಗೋಧಿ ಹಿಟ್ಟು, ಹಾಲು ಮತ್ತು ಇಂಧನದ ಬೆಲೆಗಳು ಗಗನಕ್ಕೇರಿವೆ.
ಮತ್ತಷ್ಟು ಓದಿ: 38 ಬೇಡಿಕೆ, 48 ಗಂಟೆಯ ಗಡುವು; ಪಿಒಕೆಯಲ್ಲಿ ಮತ್ತೆ ಸಂಘರ್ಷದ ಭೀತಿ
ಅಂತ್ಯಕ್ರಿಯೆಗೂ ಸಾಲ
ಪಾಕಿಸ್ತಾನದ ಸ್ಥಳೀಯ ಮಾಧ್ಯಮಗಳ ವರದಿಗಳ ಪ್ರಕಾರ, ಅಲ್ಲಿನ ಮಧ್ಯಮ ಮತ್ತು ಬಡ ವರ್ಗದ ಜನರು ತಮ್ಮ ಕುಟುಂಬದ ಸದಸ್ಯರು ಮರಣ ಹೊಂದಿದಾಗ, ಅವರ ಅಂತ್ಯಕ್ರಿಯೆ ನಡೆಸಲು ಸಹ ಹಣವಿಲ್ಲದೇ ಸ್ನೇಹಿತರು ಅಥವಾ ಲೇವಾದೇವಿಗಾರರಿಂದ ಸಾಲ ಪಡೆಯುವ ದುಸ್ಥಿತಿಗೆ ತಲುಪಿದ್ದಾರೆ. ಬದುಕಲು ಮಾತ್ರವಲ್ಲ, ಸಾಯಲೂ ಪಾಕಿಸ್ತಾನದಲ್ಲಿ ಸಾಲ ಮಾಡಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ.
ಪಾಕಿಸ್ತಾನವು ಈಗಾಗಲೇ ಅಂತಾರಾಷ್ಟ್ರೀಯ ಹಣಕಾಸು ನಿಧಿಯಿಂದ 7 ಬಿಲಿಯನ್ ಡಾಲರ್ ಬೇಲ್ಔಟ್ ಪ್ಯಾಕೇಜ್ ಪಡೆದಿದೆ. ಆ ಒಪ್ಪಂದದ ಭಾಗವಾಗಿ ಜನರ ಮೇಲೆ ಭಾರಿ ತೆರಿಗೆ ವಿಧಿಸಿರುವುದರಿಂದ ದೇಶದಲ್ಲಿ ಹಾಹಾಕಾರ ಎದ್ದಿದೆ.
ಪಾಕಿಸ್ತಾನವು ಚೀನಾ ಸೇರಿದಂತೆ ವಿವಿಧ ದೇಶಗಳಿಗೆ ಬಿಲಿಯನ್ ಗಟ್ಟಲೆ ಡಾಲರ್ ಸಾಲ ಬಾಕಿ ಉಳಿಸಿಕೊಂಡಿದೆ. ತನ್ನ ಹಳೆಯ ಸಾಲದ ಬಡ್ಡಿಯನ್ನು ತೀರಿಸಲು ಮತ್ತೊಂದು ಜಾಗತಿಕ ಸಂಸ್ಥೆಯಿಂದ ಹೊಸ ಸಾಲ ಪಡೆಯುವ ಸಾಲದ ಸುಳಿಯಲ್ಲಿ ದೇಶ ಸಂಪೂರ್ಣ ಸಿಲುಕಿದೆ.
ವಿಶ್ವಬ್ಯಾಂಕ್ನ ಈ ಹೊಸ ನೆರವು ಪಾಕಿಸ್ತಾನದ ಆಡಳಿತಕ್ಕೆ ತಾತ್ಕಾಲಿಕ ಉಪಶಮನ ನೀಡಬಹುದಾದರೂ, ದೇಶದ ಆಂತರಿಕ ನೀತಿಗಳು ಮತ್ತು ರಾಜಕೀಯ ಅಸ್ಥಿರತೆ ಬದಲಾಗದ ಹೊರತು ಅಲ್ಲಿನ ಬಡ ಜನರ ಬದುಕು ಹಸನಾಗುವುದು ಕಷ್ಟಸಾಧ್ಯ ಎನ್ನುತ್ತಾರೆ ಆರ್ಥಿಕ ತಜ್ಞರು.
ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
