ಫೈಜರ್ ಕೊವಿಡ್ 19 ಮಾತ್ರೆಗಳು ಒಮಿಕ್ರಾನ್ ವಿರುದ್ಧ ಶೇ.89ರಷ್ಟು ಪರಿಣಾಮಕಾರಿ; ಕಂಪನಿಯಿಂದ ಅಧ್ಯಯನ ವರದಿ
ನಮ್ಮ ಕಂಪನಿ ತಯಾರಿಸಿದ ಕೊವಿಡ್ 19 ಮಾತ್ರೆಗಳು ಒಮಿಕ್ರಾನ್ ಸೋಂಕಿನ ವಿರುದ್ಧವೂ ಪರಿಣಾಮಕಾರಿ ಎಂಬುದು ಪ್ರತ್ಯೇಕವಾಗಿ ನಡೆಸಿದ ಪ್ರಯೋಗದಿಂದ ಸ್ಪಷ್ಟವಾಗಿದೆ ಎಂದು ಫೈಜರ್ ಹೇಳಿದೆ.
ಕೊರೊನಾ ವೈರಸ್ ಹೊಸ ರೂಪಾಂತರವಾದ ಒಮಿಕ್ರಾನ್ ಸೋಂಕಿನ ವಿರುದ್ಧ ತನ್ನ ಪ್ರಾಯೋಗಿಕ ಕೊವಿಡ್ 19 ಮಾತ್ರೆಗಳು ಪರಿಣಾಮಕಾರಿಯಾಗಿವೆ ಎಂದು ಯುಎಸ್ನ ಖ್ಯಾತ ಔಷಧ ಕಂಪನಿ ಫೈಜರ್ ಕಂಪನಿ ಹೇಳಿಕೊಂಡಿದೆ. ಕೊವಿಡ್ 19 ಮಾತ್ರೆಗಳು ಒಮಿಕ್ರಾನ್ ವಿರುದ್ಧ ಪರಿಣಾಮಕಾರಿಯಾ ಎಂಬುದನ್ನು ಪರಿಶೀಲನೆ ನಡೆಸಲು 2250 ಜನರ ಮೇಲೆ ಪರೀಕ್ಷೆ ನಡೆಸಲಾಗಿತ್ತು. ಅದರ ಪ್ರಾಥಮಿಕ ಫಲಿತಾಂಶ ಹೊರಬಿದ್ದಿದೆ. ಕೊವಿಡ್ 19ನ ಒಮಿಕ್ರಾನ್ ರೂಪಾಂತರದ ವಿರುದ್ಧ ಈ ಮಾತ್ರೆಗಳು ಶೇ.89-90ರಷ್ಟು ಪರಿಣಾಮಕಾರಿ ಎಂಬುದು ದೃಢಪಟ್ಟಿದೆ ಎಂದು ಫೈಜರ್ ಹೇಳಿದೆ. ಹಾಗೇ, ವಯಸ್ಕರು ತಮ್ಮಲ್ಲಿ ಕೊವಿಡ್ 19 ಪ್ರಾಥಮಿಕ ಲಕ್ಷಣಗಳು ಕಂಡಕೂಡಲೇ ಈ ಮಾತ್ರೆಗಳನ್ನು ತೆಗೆದುಕೊಳ್ಳುವುದರಿಂದ ಆಸ್ಪತ್ರೆಗೆ ದಾಖಲಾಗುವುದನ್ನು ಮತ್ತು ಸಾವನ್ನು ಶೇ.89ರಷ್ಟು ಇದು ತಡೆಯಬಲ್ಲದು ಎಂದೂ ಫೈಜರ್ ತಿಳಿಸಿದೆ.
ನಮ್ಮ ಕಂಪನಿ ತಯಾರಿಸಿದ ಕೊವಿಡ್ 19 ಮಾತ್ರೆಗಳು ಒಮಿಕ್ರಾನ್ ಸೋಂಕಿನ ವಿರುದ್ಧವೂ ಪರಿಣಾಮಕಾರಿ ಎಂಬುದು ಪ್ರತ್ಯೇಕವಾಗಿ ನಡೆಸಿದ ಪ್ರಯೋಗದಿಂದ ಸ್ಪಷ್ಟವಾಗಿದೆ. ಒಮಿಕ್ರಾನ್ ವೈರಾಣು ತನ್ನನ್ನು ತಾನು ಮಾನವ ದೇಹದಲ್ಲಿ ಉತ್ಪಾದಿಸಿಕೊಳ್ಳಲು ಬಳಸುವ ಪ್ರಮುಖ ಪ್ರೊಟೀನ್ನ್ನು ಮಾನವ ನಿರ್ಮಿತವಾಗಿಯೇ ತಯಾರಿಸಿಕೊಂಡು, ಅದರ ವಿರುದ್ಧ ಆ್ಯಂಟಿ ವೈರಲ್ ಕೊವಿಡ್ 19 ಮಾತ್ರೆಗಳನ್ನು ಪ್ರಯೋಗ ಮಾಡಲಾಗಿತ್ತು. ಈ ವೇಳೆ ಮಾತ್ರೆಗಳು ಪರಿಣಾಮಕಾರಿಯಾಗಿ ಹೋರಾಡುತ್ತವೆ ಎಂಬುದು ಸ್ಪಷ್ಟವಾಗಿದೆ ಎಂದು ಫೈಜರ್ ಮಾಹಿತಿ ನೀಡಿದೆ. ಇದೀಗ ಯುಎಸ್ನಲ್ಲಿ ಮತ್ತೆ ಕೊವಿಡ್ 19 ಕೇಸ್ಗಳು, ಸಾವುಗಳು ಮತ್ತು ಆಸ್ಪತ್ರೆಗೆ ದಾಖಲಾಗುವವರ ಪ್ರಮಾಣ ಹೆಚ್ಚುತ್ತಿದೆ. ಈ ಮಧ್ಯೆ ಒಮಿಕ್ರಾನ್ ರೂಪಾಂತರದ ಭಯವೂ ಕಾಡುತ್ತಿದೆ. ಒಮಿಕ್ರಾನ್ ಕೊವಿಡ್ 19 ಲಸಿಕೆಗಳ ದಕ್ಷತೆಯನ್ನೂ ಕುಂದಿಸುತ್ತದೆ ಎಂದು ತಜ್ಞ ವರದಿಗಳು ಹೇಳಿದ ಬೆನ್ನಲ್ಲೇ, ಫೈಜರ್ ತನ್ನ ಕೊವಿಡ್ 19 ಮಾತ್ರೆಗಳ ಪ್ರಯೋಗ ನಡೆಸಿತ್ತು.
ಇನ್ನು ಅಮೆರಿಕದಲ್ಲಿ ಹೆಚ್ಚುತ್ತಿರುವ ಕೊವಿಡ್ 19 ಸೋಂಕು ನಿಯಂತ್ರಣಕ್ಕಾಗಿ, ಸುಮಾರು 10 ಮಿಲಿಯನ್ ಜನರ ಚಿಕಿತ್ಸೆಗೆ ಅಗತ್ಯವಿರುವಷ್ಟು ಕೊರೊನಾ ಮಾತ್ರೆಗಳನ್ನು ಪೂರೈಸಿ ಎಂದು ಫೈಜರ್ಗೆ ಆರ್ಡರ್ ಕೊಟ್ಟಿದ್ದಾಗಿ ಅಮೆರಿಕ ಅಧ್ಯಕ್ಷ ಜೋ ಬೈಡನ್ ತಿಳಿಸಿದ್ದಾರೆ. ಕೊವಿಡ್ 19 ಸೋಂಕಿನ ತೀವ್ರ ಲಕ್ಷಣಗಳಿಂದ ಬಳಲುತ್ತಿರುವವರಿಗೂ ಈ ಮಾತ್ರೆಗಳು ಉಪಯೋಗವಾಗುತ್ತವೆ ಎಂದು ಅಧ್ಯಯನ ವರದಿಯಿಂದ ಗೊತ್ತಾಗಿದೆ. ಈ ಮಾತ್ರೆಗಳು ಸೋಂಕಿನ ಗಂಭೀರತೆಯನ್ನು ಕಡಿಮೆ ಮಾಡಿ, ಸಾವಿನ ಪ್ರಮಾಣದಲ್ಲಿ ಇಳಿಕೆ ಮಾಡುತ್ತವೆ ಎಂದು ಬೈಡನ್ ಹೇಳಿದ್ದಾರೆ.
Published On - 8:58 am, Wed, 15 December 21