ಅಮೆರಿಕ ಅಧ್ಯಕ್ಷ ಜೋ ಬೈಡೆನ್​ಗೆ ಸ್ವಾತಂತ್ರ್ಯ ದಿನದ ಶುಭ ಕೋರಿದ ಪ್ರಧಾನಿ ನರೇಂದ್ರ ಮೋದಿ

ದೆಹಲಿ: ಅಮೆರಿಕದ 245ನೇ ಸ್ವಾತಂತ್ರ್ಯ ದಿನಾಚರಣೆ ಹಿನ್ನೆಲೆಯಲ್ಲಿ ಅಧ್ಯಕ್ಷ ಜೋ ಬೈಡೆನ್ ಅವರಿಗೆ ಪ್ರಧಾನಿ ನರೇಂದ್ರ ಮೋದಿ ಶುಭ ಕೋರಿದ್ದಾರೆ.

‘ಅಮೆರಿಕದ 245ನೇ ಸ್ವಾತಂತ್ರ್ಯ ದಿನಾಚರಣೆಯ ದಿನದಂದು ಅಧ್ಯಕ್ಷರಿಗೆ ಮತ್ತು ಅಮೆರಿಕದ ಜನರಿಗೆ ಶುಭ ಕೋರುತ್ತೇನೆ. ವಿಶ್ವದ ಎರಡು ಮಹತ್ವದ ಪ್ರಜಾಪ್ರಭುತ್ವ ದೇಶಗಳಾದ ಅಮೆರಿಕ-ಭಾರತ ಸ್ವಾತಂತ್ರ್ಯ ಮತ್ತು ಉದಾರವಾದಿ ಧೋರಣೆಗಳನ್ನು ಹೊಂದಿವೆ. ಜಾಗತಿಕ ಪ್ರಾಮುಖ್ಯತೆಯ ಹಲವು ಮಹತ್ವದ ವಿದ್ಯಮಾನಗಳಲ್ಲಿ ಸಹಭಾಗಿತ್ವ ಹೊಂದಿವೆ ಎಂದು ಮೋದಿ ಟ್ವೀಟ್​ನಲ್ಲಿ ಹೇಳಿದ್ದಾರೆ.

ಅಮೆರಿಕದಲ್ಲಿ ಸ್ವಾತಂತ್ರ್ಯ ದಿನಾಚರಣೆ ಸಂಭ್ರಮ 18ನೇ ಶತಮಾನದಲ್ಲಿ ಬ್ರಿಟನ್​ನ ಆಧಿಪತ್ಯದಿಂದ ಅಮೆರಿಕದ 13 ವಸಾಹತುಗಳು ಸ್ವಾತಂತ್ರ್ಯ ಘೋಷಿಸಿಕೊಂಡ ದಿನವಾದ ಜುಲೈ 4ರಂದು ಅಮೆರಿಕದಲ್ಲಿ ಸ್ವಾತಂತ್ರ್ಯ ದಿನಾಚರಣೆ ನಡೆಯುತ್ತದೆ. ಪಟಾಕಿಗಳನ್ನು ಸಿಡಿಸಿ, ಪರೇಡ್​ಗಳಲ್ಲಿ ಪಾಲ್ಗೊಳ್ಳುವ ಮೂಲಕ ಜನರು ಸ್ವಾತಂತ್ರ್ಯ ದಿನವನ್ನು ಸಂಭ್ರಮಿಸುತ್ತಾರೆ. ಈ ವರ್ಷ ಕೊರೊನಾ ಪಿಡುಗಿನ ಹಿನ್ನೆಲೆಯಲ್ಲಿ ಸ್ವಾತಂತ್ರ್ಯ ದಿನಾಚರಣೆಯ ಸಂಭ್ರಮಕ್ಕೆ ನಿರ್ಬಂಧಗಳ ಕಡಿವಾಣವಿದೆ.

ಜುಲೈ 4, 1776ರಂದು ಅಮೆರಿಕದಲ್ಲಿದ್ದ ಬ್ರಿಟನ್​ನ 13 ವಸಾಹತುಗಳು ಕಾಂಗ್ರೆಸ್​ (ಜನಪ್ರತಿನಿಧಿಗಳ ಸಭೆ) ಅನುಮೋದನೆಯೊಂದಿಗೆ ಬ್ರಿಟನ್ ಹಿಡಿತದಿಂದ ಬಿಡಿಸಿಕೊಂಡವು. ಈ ಕಾರಣಕ್ಕಾಗಿ 1776ರಿಂದಲೂ ಅಮೆರಿಕದಲ್ಲಿ ಜುಲೈ 4ನೇ ತಾರೀಖಿನಿಂದ ಸ್ವಾತಂತ್ರ್ಯ ದಿನ ಆಚರಿಸಲಾಗುತ್ತಿದೆ.

ಸ್ವಾತಂತ್ರ್ಯ ದಿನಾಚರಣೆಯಂದು ಅಮೆರಿಕದ ನಾಯಕರಾದ ಜಾನ್ ಆಡಮ್ಸ್​, ಬೆಂಜಮಿನ್ ಫ್ರಾಕ್ಲಿನ್, ಅಲೆಕ್ಸಾಂಡರ್ ಹ್ಯಾಮಿಲ್​ಟನ್, ಜಾನ್ ಜೇ, ಥಾಮಸ್ ಜೆಫರ್​ಸನ್, ಜೇಮ್ಸ್​ ಮ್ಯಾಡಿಸನ್ ಮತ್ತು ಜಾರ್ಜ್ ವಾಷಿಂಗ್​ಟನ್​ ಅವರ ಕೊಡುಗೆಗಳನ್ನು ನೆನೆಯಲಾಗುತ್ತದೆ.

(PM Narendra Modi greets US President Joe Biden on Americas Independence Day)

Published On - 2:58 pm, Sun, 4 July 21