Big News: ಕ್ಯಾಥೋಲಿಕ್ ಚರ್ಚ್ನಲ್ಲಿ ಲೈಂಗಿಕ ದೌರ್ಜನ್ಯ ತಡೆಯುವುದು ನನ್ನ ಜವಾಬ್ದಾರಿ; ಪೋಪ್ ಫ್ರಾನ್ಸಿಸ್
ಪೋಪ್ ಫ್ರಾನ್ಸಿಸ್ ಅವರು ಕ್ಯಾಥೋಲಿಕ್ ಚರ್ಚ್ ಅನ್ನು ಲೈಂಗಿಕ ಕಿರುಕುಳದಿಂದ ಮುಕ್ತಗೊಳಿಸಲು ತಾವೇ ಜವಾಬ್ದಾರಿ ತೆಗೆದುಕೊಳ್ಳುವುದಾಗಿ ಹೇಳಿದ್ದಾರೆ.
ಲಿಸ್ಬನ್: ಪಾದ್ರಿಗಳು ಲೈಂಗಿಕ ದೌರ್ಜನ್ಯ ನಡೆಸಿದರೆ ಅವರ ವಿಷಯದಲ್ಲಿ ಕ್ಯಾಥೋಲಿಕ್ ಚರ್ಚ್ ಶೂನ್ಯ ಸಹಿಷ್ಣುತೆ ತೋರಿಸಬೇಕು ಎಂದು ಪೋಪ್ ಫ್ರಾನ್ಸಿಸ್ (Pope Francis) ಭಾನುವಾರ ಪೋರ್ಚುಗೀಸ್ ಟೆಲಿವಿಷನ್ ಚಾನೆಲ್‌ಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಹೇಳಿದ್ದಾರೆ. ಲೈಂಗಿಕ ದೌರ್ಜನ್ಯ ನಡೆಸುವುದರ ವಿರುದ್ಧ ಶೂನ್ಯ ಸಹಿಷ್ಣುತೆ ತೋರಬೇಕು ಎಂಬುದು ತುಂಬಾ ಸ್ಪಷ್ಟವಾಗಿದೆ ಎಂದು ಅವರು ಹೇಳಿದ್ದಾರೆ. ಆ ಸಂದರ್ಶನದ ಆಯ್ದ ಅಂಶಗಳು ಇಲ್ಲಿವೆ.
ಪೋಪ್ ಫ್ರಾನ್ಸಿಸ್ ಅವರು ಕ್ಯಾಥೋಲಿಕ್ ಚರ್ಚ್ ಅನ್ನು ಲೈಂಗಿಕ ಕಿರುಕುಳದಿಂದ ಮುಕ್ತಗೊಳಿಸಲು ತಾವೇ ಜವಾಬ್ದಾರಿ ತೆಗೆದುಕೊಳ್ಳುವುದಾಗಿ ಹೇಳಿದ್ದಾರೆ. ಇನ್ನು ಮುಂದೆ ಇಂತಹ ಘಟನೆ ಸಂಭವಿಸದಿರುವಂತೆ ನೋಡಿಕೊಳ್ಳುವ ಜವಾಬ್ದಾರಿ ನನ್ನದು ಎಂದು ಹೇಳಿದ್ದಾರೆ.
2013ರಲ್ಲಿ ಪೋಪ್ ಫ್ರಾನ್ಸಿಸ್ ವಿಶ್ವದ 1.2 ಶತಕೋಟಿ ಕ್ಯಾಥೊಲಿಕರ ನಾಯಕನಾದ ನಂತರ ಹಲವಾರು ದೇಶಗಳ ಲೈಂಗಿಕ ಕಿರುಕುಳ, ವ್ಯವಸ್ಥಿತ ವೈಫಲ್ಯಗಳನ್ನು ವಿವರಿಸುವ ಬಹು ವರದಿಗಳನ್ನು ಬಿಡುಗಡೆ ಮಾಡಲಾಯಿತು. ಅವರ ಕೆಲವು ಕ್ರಮಗಳಿಗಾಗಿ ಅವರು ಟೀಕೆಗೂ ಒಳಗಾದರು. 2019ರಲ್ಲಿ ಅವರು ಲೈಂಗಿಕ ದೌರ್ಜನ್ಯದ ಪ್ರಕರಣಗಳಿಗೆ ವ್ಯಾಟಿಕನ್ ಗೌಪ್ಯತೆಯ ನಿಯಮಗಳನ್ನು ರದ್ದುಗೊಳಿಸಿದರು ಮತ್ತು ಹೊಸ ನಿಯಮಗಳನ್ನು ಜಾರಿಗೆ ತಂದರು.
ಅವರು ಕ್ಯಾಥೋಲಿಕ್ ಚರ್ಚ್ ಕಾನೂನಿಗೆ ದೊಡ್ಡ ಪರಿಷ್ಕರಣೆಯನ್ನು ಹೊರಡಿಸಿದರು. ಅಪ್ರಾಪ್ತ ವಯಸ್ಕರು ಮತ್ತು ದುರ್ಬಲ ವಯಸ್ಕರನ್ನು ನಿಂದಿಸುವ ಧರ್ಮಗುರುಗಳ ವಿರುದ್ಧ ಬಿಷಪ್‌ಗಳು ಕ್ರಮ ತೆಗೆದುಕೊಳ್ಳಬೇಕೆಂದು ಪೋಪ್ ಫ್ರಾನ್ಸಿಸ್ ಒತ್ತಾಯಿಸಿದರು.
“ಪಾದ್ರಿ ಆಕ್ರಮಣಕಾರನಾಗಿದ್ದರೆ ಆತ ಪಾದ್ರಿಯಾಗಿ ಮುಂದುವರಿಯಲು ಸಾಧ್ಯವಿಲ್ಲ. ಆತ ಕ್ರಿಮಿನಲ್ ಆಗಿದ್ದರೆ ಪಾದ್ರಿ ಸ್ಥಾನದಲ್ಲಿ ಮುಂದುವರೆಯುವುದು ಸರಿಯಲ್ಲ. ಚರ್ಚ್ಗಳಲ್ಲಿ ಲೈಂಗಿಕ ದೌರ್ಜನ್ಯ ನಡೆಯುವುದು ಸಣ್ಣ ವಿಷಯವಲ್ಲ. ಏಕೆಂದರೆ ಅದು ಜೀವನವನ್ನೇ ನಾಶಪಡಿಸುತ್ತದೆ” ಎಂದು ಪೋಪ್ ಫ್ರಾನ್ಸಿಸ್ ಹೇಳಿದ್ದಾರೆ.
ಇದನ್ನೂ ಓದಿ: ವ್ಯಾಟಿಕನ್ ಸಿಟಿಯಲ್ಲಿ ಪೋಪ್ ಫ್ರಾನ್ಸಿಸ್ರನ್ನು ಭೇಟಿಯಾದ ಪ್ರಧಾನಿ ಮೋದಿ; ಭಾರತಕ್ಕೆ ಆಹ್ವಾನ
ಪೋರ್ಚುಗಲ್‌ನ ಕ್ಯಾಥೋಲಿಕ್ ಚರ್ಚ್‌ನೊಳಗಿನ ಲೈಂಗಿಕ ದೌರ್ಜನ್ಯದ ತನಿಖೆಯಲ್ಲಿ ಇಲ್ಲಿಯವರೆಗೆ ಸುಮಾರು 400 ಜನರಿಂದ ಸಾಕ್ಷ್ಯವನ್ನು ಸಂಗ್ರಹಿಸಲಾಗಿದೆ ಎಂದು ವಿಚಾರಣೆಯ ನೇತೃತ್ವ ವಹಿಸಿಕೊಂಡಿರುವ ವ್ಯಕ್ತಿಯಾದ ಮಕ್ಕಳ ಮನೋವೈದ್ಯ ಪೆಡ್ರೊ ಸ್ಟ್ರೆಚ್ ಹೇಳಿದ್ದಾರೆ.
ಇದರಿಂದ 17 ಪ್ರಕರಣಗಳು ನ್ಯಾಯಾಂಗದ ಮೊರೆ ಹೋಗಿವೆ. ವಿಚಾರಣೆಯ ಫಲಿತಾಂಶ ಈ ವರ್ಷದ ಕೊನೆಯಲ್ಲಿ ಪ್ರಕಟವಾಗುವ ನಿರೀಕ್ಷೆಯಿದೆ. ಮುಂದಿನ ವರ್ಷ ಆಗಸ್ಟ್‌ನಲ್ಲಿ ಯುವ ಕ್ಯಾಥೋಲಿಕ್‌ರ ಕೂಟವಾದ ವಿಶ್ವ ಯುವ ದಿನಕ್ಕಾಗಿ ಪೋರ್ಚುಗಲ್‌ಗೆ ಭೇಟಿ ನೀಡುವ ಭರವಸೆ ಇದೆ ಎಂದು ಪೋಪ್ ಫ್ರಾನ್ಸಿಸ್ ಹೇಳಿದ್ದಾರೆ.