ಮತ್ತೊಂದು ದೊಡ್ಡ ತಪ್ಪು: ಫಿನ್​ಲೆಂಡ್, ಸ್ವೀಡನ್ ನ್ಯಾಟೊ ಸೇರ್ಪಡೆಗೆ ರಷ್ಯಾ ತೀವ್ರ ವಿರೋಧ

ಮಾಸ್ಕೊ: ಫಿನ್​ಲೆಂಡ್ ಮತ್ತು ಸ್ವೀಡನ್ ದೇಶಗಳ ನ್ಯಾಟೊ ಸೇರ್ಪಡೆ ಪ್ರಸ್ತಾವವನ್ನು ರಷ್ಯಾ ಸೋಮವಾರ ತೀವ್ರವಾಗಿ ಖಂಡಿಸಿದೆ. ದೀರ್ಘಾವಧಿಯಲ್ಲಿ ತೀವ್ರ ಸಂಕಷ್ಟಗಳನ್ನು ತಂದೊಡ್ಡುವ ಈ ತಪ್ಪಿನಿಂದ ಜಗತ್ತಿನಲ್ಲಿ ಶಾಂತಿ ಕದಡಬಹುದು ಎಂದು ಎಚ್ಚರಿಸಿದೆ. ವಿಶ್ವದ ವಿವಿಧ ದೇಶಗಳಲ್ಲಿ ಮಿಲಿಟರಿ ಸಂಘರ್ಷ ಹೆಚ್ಚಾಗಬಹುದು. ಈ ನಡೆಯಿಂದ ಏನಾಗಬಹುದು ಎಂದು ಅಂದಾಜಿಸಲು ಸಾಧ್ಯವಾಗದವರ ಬಗ್ಗೆ ಕನಿಕರ ವ್ಯಕ್ತಪಡಿಸಬೇಕಾಗಿದೆ ಎಂದು ರಷ್ಯಾ ಆಡಳಿತ ವ್ಯಂಗ್ಯವಾಡಿದೆ. ನ್ಯಾಟೊಗೆ ಸೇರುವುದರಿಂದ ಈ ಎರಡೂ ದೇಶಗಳ ಭದ್ರತೆ ಸುಧಾರಿಸುವುದಿಲ್ಲ. ಬದಲಾಗಿ ರಷ್ಯಾಕ್ಕೆ ಪ್ರತೀಕಾರದ ಕ್ರಮ ತೆಗೆದುಕೊಳ್ಳಬೇಕಾದ ಅನಿವಾರ್ಯತೆ ಹೆಚ್ಚಾಗಲಿದೆ. ನಾವು ಸುಮ್ಮನಿರುತ್ತೇವೆ ಎಂಬ ಯಾವುದೇ ಭ್ರಮೆಯನ್ನು ಅವರು ಇರಿಸಿಕೊಳ್ಳಬಾರದು ಎಂದು ಎಚ್ಚರಿಸಿದೆ. ಉಕ್ರೇನ್ ಮೇಲಿನ ರಷ್ಯಾ ದಾಳಿಯಿಂದ ಭೀತಿಗೊಳಗಾಗಿರುವ ಸ್ವೀಡನ್ ಮತ್ತು ಫಿನ್​ಲೆಂಡ್ ತಮ್ಮ ನಿಲುವು ಬದಲಿಸಿವೆ. ನ್ಯಾಟೊ ಅಥವಾ ರಷ್ಯಾ ಪರವಾಗಿ ನಿಲ್ಲುವುದಿಲ್ಲ ಎನ್ನುವ ತಮ್ಮ ಆಲಿಪ್ತ ನಿಲುವಿನಿಂದ ದೂರ ಸರಿದು ಇದೀಗ ರಷ್ಯಾ ವಿರುದ್ಧ ನ್ಯಾಟೊ ಸದಸ್ಯತ್ವ ಪಡೆಯಲು ಮುಂದಾಗಿವೆ.

ಫಿನ್​ಲೆಂಡ್ ಜೊತೆಗೆ ರಷ್ಯಾ 1,300 ಕಿಮೀಯಷ್ಟು ಉದ್ದದ ಗಡಿಯನ್ನು ಹೊಂದಿದೆ. ಫಿನ್​ಲೆಂಡ್ ರಷ್ಯಾಕ್ಕೆ ಸೇರ್ಪಡೆಯಾದರೆ ಅದು ರಷ್ಯಾದ ರಕ್ಷಣೆಗೆ ಧಕ್ಕೆ ಎಂದು ಹೇಳಿದೆ. ಫಿನ್​ಲೆಂಡ್ ಅಧ್ಯಕ್ಷ ಸೌಲಿ ನಿನಿಸ್ಟೊ ಈ ಸಂಬಂಧ ರಷ್ಯಾದ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ ಅವರೊಂದಿಗೆ ಮಾತನಾಡಿ ನ್ಯಾಟೊ ಸದಸ್ಯಕ್ಕೆ ಮನವಿ ಮಾಡುವ ಕುರಿತು ತಮ್ಮ ಅಭಿಪ್ರಾಯ ತಿಳಿಸಿದ್ದಾರೆ. ಈವರೆಗಿನ ಆಲಿಪ್ತ ನೀತಿಯಿಂದ ಹೊರಗೆ ಬರುವ ಫಿನ್​ಲೆಂಡ್ ನಿರ್ಧಾರವನ್ನು ‘ದೊಡ್ಡ ತಪ್ಪು’ ಎಂದು ಪುಟಿನ್ ವ್ಯಾಖ್ಯಾನಿಸಿದ್ದಾರೆ.

ನ್ಯಾಟೊಗೆ ಸೇರುವ ತನ್ನ ಇಂಗಿತವನ್ನು ಫಿನ್​ಲೆಂಡ್ ಭಾನುವಾರ ಸ್ಪಷ್ಟವಾಗಿ ಹೇಳಿತು. ಸ್ವೀಡನ್​ ನ್ಯಾಟೊ ಸೇರ್ಪಡೆಯನ್ನು ಅಲ್ಲಿನ ಆಡಳಿತ ಪಕ್ಷವು ಈಗಾಗಲೇ ಒಪ್ಪಿಕೊಂಡಿದೆ. ಎರಡೂ ದೇಶಗಳು ಜಂಟಿಯಾಗಿ ನ್ಯಾಟೊ ಸದಸ್ಯತ್ವಕ್ಕೆ ಅರ್ಜಿ ಸಲ್ಲಿಸುತ್ತಿವೆ. ನ್ಯಾಟೊ ಸದಸ್ಯ ದೇಶಗಳ ಸಂಸತ್ತುಗಳು ಈ ಅರ್ಜಿಗೆ ಅನುಮೋದನೆ ನೀಡಿದರೆ ಈ ಎರಡೂ ದೇಶಗಳಿಗೆ ಸದಸ್ಯತ್ವ ಸಿಗುತ್ತದೆ. ನ್ಯಾಟೊದ ಯಾವುದೇ ಸದಸ್ಯ ದೇಶದ ಮೇಲೆ ಮತ್ತೊಂದು ದೇಶ ದಾಳಿ ನಡೆಸಿದರೆ, ಉಳಿದೆಲ್ಲ ದೇಶಗಳು ದಾಳಿ ಮಾಡಿದ ದೇಶವನ್ನು ಶತ್ರುವನ್ನು ಪರಿಗಣಿಸುವ ಅಂಶ ಈ ಒಪ್ಪಂದದಲ್ಲಿದೆ. ನ್ಯಾಟೊ ಸದಸ್ಯತ್ವ ದೇಶಗಳ ಮೇಲೆ ರಷ್ಯಾ ದಾಳಿ ನಡೆಸಲು ಹಿಂಜರಿಯುತ್ತದೆ.

ತಾಜಾ ಸುದ್ದಿಗೆ ಲಿಂಕ್ ಕ್ಲಿಕ್ ಮಾಡಿ

Published On - 3:54 pm, Mon, 16 May 22