Israel-Hamas Conflict: ಯಾವ ದೇಶಗಳು ಇಸ್ರೇಲ್​​​ನ್ನು ಮತ್ತು ಯಾವ ದೇಶ ಪ್ಯಾಲೆಸ್ತೀನ್ ಗುಂಪನ್ನು ಬೆಂಬಲಿಸುತ್ತಿವೆ?

ಟೆಲ್ ಅವೀವ್ ಅಕ್ಟೋಬರ್ 09: ಸೋಮವಾರ ಮೂರನೇ ದಿನಕ್ಕೆ ಇಸ್ರೇಲ್ (Israel) ಮತ್ತು ಪ್ಯಾಲೆಸ್ತೀನ್ ಗುಂಪು ಹಮಾಸ್ (Hamas) ನಡುವಿನ ಸಂಘರ್ಷವು ಮುಂದುವರಿದಿದ್ದು , ಪ್ರಪಂಚದಾದ್ಯಂತದ ಹಲವು ದೇಶಗಳು ಇಸ್ರೇಲ್​​ಗೆ ಬೆಂಬಲ ಸೂಚಿಸಿದರೆ ಇನ್ನು ಕೆಲವು ದೇಶಗಳು ಪ್ಯಾಲೆಸ್ತೀನ್ (Palestine) ಸಶಸ್ತ್ರ ಗುಂಪನ್ನು ಬೆಂಬಲಿಸಿದ್ದಾರೆ. ಇಸ್ರೇಲ್‌ನ ವಿದೇಶಾಂಗ ಸಚಿವಾಲಯವು ಹಮಾಸ್ ದಾಳಿಯನ್ನು ಖಂಡಿಸಿದ್ದು, ಇಸ್ರೇಲ್‌ನ ಆತ್ಮರಕ್ಷಣೆಯ ಹಕ್ಕನ್ನು ಬೆಂಬಲಿಸುವ ಇಸ್ರೇಲ್ ಅನ್ನು ಬೆಂಬಲಿಸುವ ಸುಮಾರು 84 ರಾಷ್ಟ್ರಗಳು ಹೇಳಿಕೆಗಳನ್ನು ಬಿಡುಗಡೆ ಮಾಡಿದೆ ಎಂದು ಹೇಳಿಕೊಂಡಿದೆ. ಇಸ್ರೇಲ್‌ನಲ್ಲಿ ಹಲವಾರು ಸಾವುನೋವುಗಳಿಗೆ ಕಾರಣವಾದ ಹಮಾಸ್ ಅನಿರೀಕ್ಷಿತ ದಾಳಿಯನ್ನು ಅನೇಕ ದೇಶಗಳು, ವಿಶೇಷವಾಗಿ ಮಧ್ಯಪ್ರಾಚ್ಯದಲ್ಲಿನ ದೇಶಗಳು ಶ್ಲಾಘಿಸಿವೆ.

ಸಾವಿನ ಸಂಖ್ಯೆ 1,100 ಕ್ಕಿಂತ ಹೆಚ್ಚಾಗುವುದರೊಂದಿಗೆ ಗಡಿ ಪ್ರದೇಶಗಳಿಂದ ಸ್ಥಳಾಂತರಿಸುವಿಕೆಯು ಮುಂದುವರಿದಂತೆ, ಇಸ್ರೇಲ್ ಮತ್ತು ಹಮಾಸ್ ಅನ್ನು ಬೆಂಬಲಿಸುವ ದೇಶಗಳ ಪಟ್ಟಿ ಇಲ್ಲಿದೆ.

ಇಸ್ರೇಲ್ ಅನ್ನು ಬೆಂಬಲಿಸುವ ದೇಶಗಳು

ಅಮೆರಿಕ

ಅಮೆರಿಕ ಅಧ್ಯಕ್ಷ ಜೋ ಬೈಡನ್ ಇಸ್ರೇಲ್​​​​ಗೆ ಯುಎಸ್ ಬೆಂಬಲವು “ಗಟ್ಟಿ ಮತ್ತು ಅಚಲವಾಗಿದೆ” ಎಂದು ಹೇಳಿದ್ದಾರೆ. ಬೆಂಬಲ ನೀಡುವುದಕ್ಕಾಗಿ ಬೈಡನ್ ಯುಎಸ್ ಹಡಗುಗಳು ಮತ್ತು ಯುದ್ಧವಿಮಾನಗಳನ್ನು ಇಸ್ರೇಲ್‌ಗೆ ಹತ್ತಿರವಾಗುವಂತೆ ಆದೇಶಿಸಿದ್ದು ಹೊಸ ಮಿಲಿಟರಿ ಸಹಾಯವನ್ನು ಕಳುಹಿಸಿದ್ದಾರೆ. ಈ ಪ್ರದೇಶದಲ್ಲಿ ಯುದ್ಧ ವಿಮಾನ ಸ್ಕ್ವಾಡ್ರನ್‌ಗಳನ್ನು ಹೆಚ್ಚಿಸುವ ಸಂದರ್ಭದಲ್ಲಿ ವಿಮಾನವಾಹಕ ನೌಕೆ USS ಗೆರಾಲ್ಡ್ R ಫೋರ್ಡ್ ಮತ್ತು ಅದರ ಜೊತೆಗಿನ ಯುದ್ಧನೌಕೆಗಳನ್ನು ಪೂರ್ವ ಮೆಡಿಟರೇನಿಯನ್‌ಗೆ ಕಳುಹಿಸುತ್ತಿರುವುದಾಗಿ ಪೆಂಟಗನ್ ಹೇಳಿದೆ.

ಬೈಡನ್ ಭಾನುವಾರ ಇಸ್ರೇಲಿ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರೊಂದಿಗೆ ಮಾತನಾಡಿದ್ದಾರೆ.”ಇಸ್ರೇಲಿ ರಕ್ಷಣಾ ಪಡೆಗಳಿಗೆ ಹೆಚ್ಚುವರಿ ನೆರವು ಈಗ ಇಸ್ರೇಲ್‌ಗೆ ಹೋಗುತ್ತಿದೆ ಮತ್ತು ಮುಂಬರುವ ದಿನಗಳಲ್ಲಿ ಹೆಚ್ಚಿನದನ್ನು ಮಾಡುತ್ತೇವೆ ” ಎಂದು ಶ್ವೇತಭವನ ತಿಳಿಸಿದೆ.

ಬ್ರಿಟನ್

ಬ್ರಿಟನ್ “ನಿಸ್ಸಂದಿಗ್ಧವಾಗಿ” ಇಸ್ರೇಲ್‌ನೊಂದಿಗೆ ನಿಂತಿದೆ. ಜಗತ್ತು ಒಂದೇ ಧ್ವನಿಯಲ್ಲಿ ಮಾತನಾಡುವುದನ್ನು ಖಚಿತಪಡಿಸಿಕೊಳ್ಳಲು ಕೆಲಸ ಮಾಡುತ್ತಿದೆ ಎಂದು ಯುಕೆ ಪ್ರಧಾನಿ ರಿಷಿ ಸುನಕ್ ಇಸ್ರೇಲ್ ಪ್ರಧಾನಿ ನೆತನ್ಯಾಹುಗೆ ಹೇಳಿದ್ದಾರೆ. ಈ ಭಯೋತ್ಪಾದಕ ಕೃತ್ಯಗಳ ವಿರುದ್ಧ ಯುಕೆ ನಿಸ್ಸಂದಿಗ್ಧವಾಗಿ ಇಸ್ರೇಲ್‌ನೊಂದಿಗೆ ನಿಲ್ಲುತ್ತದೆ ಎಂದು ಸುನಕ್ ಪುನರುಚ್ಚರಿಸಿದರು. ಇಸ್ರೇಲ್‌ಗೆ ಅಗತ್ಯವಿರುವ ಯಾವುದೇ ಬೆಂಬಲವನ್ನು ಪ್ರಧಾನ ಮಂತ್ರಿ ನೆತನ್ಯಾಹುಗೆ ನೀಡುವುದಾಗಿ ಅವರು ಭರವಸೆ ನೀಡಿದ್ದಾರೆ ಎಂದು ಡೌನಿಂಗ್ ಸ್ಟ್ರೀಟ್ ಕಚೇರಿ ಹೇಳಿಕೆಯಲ್ಲಿ ತಿಳಿಸಿದೆ.

ಫ್ರಾನ್ಸ್ 

ಫ್ರೆಂಚ್ ಅಧ್ಯಕ್ಷ ಎಮ್ಯಾನುಯೆಲ್ ಮ್ಯಾಕ್ರನ್ ಅವರು ಇಸ್ರೇಲ್ ಮೇಲೆ ನಡೆಸಿದ ದಾಳಿಯನ್ನು ಖಂಡಿಸಿದ್ದು, ತಮ್ಮ ಬೆಂಬಲವನ್ನು ವ್ಯಕ್ತ ಪಡಿಸಿದ್ದಾರೆ. ಇಸ್ರೇಲ್ ಅಧ್ಯಕ್ಷ ಐಸಾಕ್ ಹೆರ್ಜಾಗ್ ಮತ್ತು ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರೊಂದಿಗೆ ಮ್ಯಾಕ್ರನ್ ಮಾತುಕತೆ ನಡೆಸಿದ್ದಾರೆ.

ನಾನು ಅಧ್ಯಕ್ಷ ಹೆರ್ಜೋಗ್ ಮತ್ತು ಪ್ರಧಾನಿ ನೆತನ್ಯಾಹು ಅವರೊಂದಿಗೆ ಮಾತನಾಡಿದ್ದೇನೆ. ಇಸ್ರೇಲ್, ಅದರ ಸೈನಿಕರು ಮತ್ತು ಅದರ ಜನರ ಮೇಲೆ ಗಾಜಾದಿಂದ ನಡೆಸಿದ ದಾಳಿಯನ್ನು ನಾನು ಖಂಡಿಸುತ್ತೇನೆ. ಫ್ರಾನ್ಸ್ ಇಸ್ರೇಲ್ ಮತ್ತು ಅಲ್ಲಿನ ಜನರೊಂದಿಗೆ ಒಗ್ಗಟ್ಟಿನಿಂದ ನಿಂತಿದೆ. ಅವರ ಭದ್ರತೆ ಮತ್ತು ತಮ್ಮನ್ನು ತಾವು ರಕ್ಷಿಸಿಕೊಳ್ಳುವ ಹಕ್ಕಿಗೆ ಬದ್ಧವಾಗಿದೆ ಎಂದು ಮ್ಯಾಕ್ರನ್ ಎಕ್ಸ್ ನಲ್ಲಿ ಪೋಸ್ಟ್ ಮಾಡಿದ್ದಾರೆ,

ದೇಶವು ಪೂಜಾ ಸ್ಥಳಗಳು ಮತ್ತು ಯಹೂದಿ ಸಂಸ್ಥೆಗಳ ಸುತ್ತಲೂ ಭದ್ರತೆಯನ್ನು ಬಲಪಡಿಸಿದೆ.

ಆಸ್ಟ್ರೇಲಿಯಾ

ಗಾಜಾ ಸಂಘರ್ಷದಲ್ಲಿ ನಾಗರಿಕ ಜೀವಗಳನ್ನು ರಕ್ಷಿಸಲು “ಸಂಯಮ” ವನ್ನು ಪಾಲಿಸಿ ಎಂದು ಆಸ್ಟ್ರೇಲಿಯಾ ಒತ್ತಾಯಿಸಿದೆ. ಇಸ್ರೇಲ್ ಮತ್ತು ತನ್ನನ್ನು ತಾನು ರಕ್ಷಿಸಿಕೊಳ್ಳುವ ಹಕ್ಕನ್ನು ಆಸ್ಟ್ರೇಲಿಯಾ ಬೆಂಬಲಿಸುತ್ತದೆ. ಆಸ್ಟ್ರೇಲಿಯಾದ ಪ್ರಧಾನ ಮಂತ್ರಿ ಆಂಥೋನಿ ಅಲ್ಬನೀಸ್ ಅವರು ಹಿಂಸಾಚಾರಕ್ಕೆ ಹಮಾಸ್ ಅನ್ನು ದೂಷಿಸಿದ್ದು,ನಾಗರಿಕರ ಮೇಲೆ ಹಮಾಸ್ ಮಾಡುತ್ತಿರುವ ಹಿಂಸೆಯನ್ನು ಖಂಡಿಸಿದ್ದಾರೆ. “ಅಪ್ರಚೋದಿತ” ದಾಳಿಯು “ಭಯೋತ್ಪಾದನೆಯನ್ನು ಸೃಷ್ಟಿಸುವ” ಗುರಿಯನ್ನು ಹೊಂದಿದೆ. ಗಾಜಾದಲ್ಲಿ ನೂರಾರು ಜನರ ಸಾವು ಆತಂಕವನ್ನುಂಟು ಮಾಡಿದೆ ಎಂದು ಅವರು ಹೇಳಿದ್ದಾರೆ.

ನಾರ್ವೆ

ಇಸ್ರೇಲಿ ನಾಗರಿಕರ ಮೇಲೆ ಪ್ಯಾಲೆಸ್ತೀನ್‌ನ ಅನಿರೀಕ್ಷಿತ ದಾಳಿಯನ್ನು ನಾರ್ವೆ ಖಂಡಿಸಿದೆ. ವಿದೇಶಾಂಗ ಸಚಿವ ಅನ್ನಿಕೆನ್ ಹುಟ್‌ಫೆಲ್ಡ್, ಇಸ್ರೇಲಿ ನಾಗರಿಕರ ಮೇಲಿನ ದಾಳಿಯನ್ನು ದೇಶ ಖಂಡಿಸುತ್ತದೆ ಎಂದು ಹೇಳಿದರು.  ಇಸ್ರೇಲಿ ನಾಗರಿಕರ ಮೇಲಿನ ದಾಳಿಯನ್ನು ನಾರ್ವೆ ತೀವ್ರವಾಗಿ ಖಂಡಿಸುತ್ತದೆ. ದಾಳಿ ಮತ್ತು ಹಿಂಸಾಚಾರವನ್ನು ತಕ್ಷಣವೇ ನಿಲ್ಲಿಸಲು ಕರೆ ನೀಡುತ್ತದೆ  ಎಂದು ಹುಟ್‌ಫೆಲ್ಡ್ ಹೇಳಿದ್ದಾರೆ.

ನಾರ್ವೆಯ ವಿದೇಶಾಂಗ ಸಚಿವ ಅನ್ನಿಕೆನ್ ಹ್ಯೂಟ್‌ಫೆಲ್ಡ್ ಇಸ್ರೇಲಿ ಮತ್ತು ಪ್ಯಾಲೇಸ್ಟಿನಿಯನ್ ಅಧಿಕಾರಿಗಳನ್ನು ಭೇಟಿಯಾದ ಒಂದು ತಿಂಗಳ ನಂತರ ನಾರ್ವೆಯ ಅಚ್ಚರಿಯ ಬೆಂಬಲವು ಬಂದಿದೆ.

ಇದನ್ನೂ ಓದಿ:  ಇಸ್ರೇಲ್ ಹಮಾಸ್ ಯುದ್ಧದ ಪರಿಣಾಮ; ಕಚ್ಛಾ ತೈಲಬೆಲೆ ಶೇ. 5ರಷ್ಟು ಹೆಚ್ಚಳ; ಪೆಟ್ರೋಲ್ ಡೀಸೆಲ್ ಬೆಲೆ ಏರಿಕೆ ಸಾಧ್ಯತೆ

ಇಸ್ರೇಲ್ ಅನ್ನು ಬೆಂಬಲಿಸುವ ಇತರ ದೇಶಗಳು

ಆಸ್ಟ್ರಿಯಾ, ಜರ್ಮನಿ, ಭಾರತ, ಕೆನಡಾ, ಪೋಲೆಂಡ್, ಸ್ಪೇನ್ ಮತ್ತು ಯುರೋಪಿಯನ್ ಯೂನಿಯನ್ ಸೇರಿದಂತೆ ಹಲವಾರು ದೇಶಗಳು ಇಸ್ರೇಲ್‌ಗೆ ಬೆಂಬಲ ವ್ಯಕ್ತಪಡಿಸಿವೆ. ಜರ್ಮನಿಯ ಚಾನ್ಸೆಲರ್ ಓಲಾಫ್ ಸ್ಕೋಲ್ಜ್ ಭಾನುವಾರ “ಅನಾಗರಿಕ ದಾಳಿ” ಯಿಂದ ತನ್ನನ್ನು ತಾನು ರಕ್ಷಿಸಿಕೊಳ್ಳಲು ಮತ್ತು “ತನ್ನ ನಾಗರಿಕರನ್ನು ರಕ್ಷಿಸಲು ಮತ್ತು ದಾಳಿಕೋರರನ್ನು ಹಿಮ್ಮೆಟ್ಟಿಸಲು” ಇಸ್ರೇಲ್ ಗೆ ಹಕ್ಕಿದೆ ಎಂದು ಹೇಳಿದರು.

ಏತನ್ಮಧ್ಯೆ, ಇಸ್ರೇಲಿ ವಿದೇಶಾಂಗ ಸಚಿವ ಎಲಿ ಕೊಹೆನ್ ಅವರು ಯುರೋಪ್ ರಾಷ್ಟ್ರಗಳ 17 ವಿದೇಶಾಂಗ ಮಂತ್ರಿಗಳೊಂದಿಗೆ ಮಾತನಾಡಿದ್ದಾರೆ, ಏತನ್ಮಧ್ಯೆ, ಇಸ್ರೇಲಿ ರಾಜತಾಂತ್ರಿಕರು ಯುದ್ಧ ಪ್ರಾರಂಭವಾದಾಗಿನಿಂದ ವಿದೇಶಿ ಪತ್ರಿಕೆಗಳೊಂದಿಗೆ 180 ಸಂದರ್ಶನಗಳನ್ನು ನಡೆಸಿದ್ದಾರೆ ಎಂದು ಟೈಮ್ಸ್ ಆಫ್ ಇಸ್ರೇಲ್ ವರದಿ ಮಾಡಿದೆ.

ಪ್ಯಾಲೆಸ್ತೀನಿಯನ್ ಗುಂಪು ಹಮಾಸ್ ಅನ್ನು ಬೆಂಬಲಿಸುವ ದೇಶಗಳು

ಇರಾನ್

ಇರಾನ್ ಐತಿಹಾಸಿಕವಾಗಿ ಪ್ಯಾಲೆಸ್ತೀನ್ ನ್ನು ಬೆಂಬಲಿಸುತ್ತದೆ. ಇರಾನ್ ಬೆಂಬಲಿತ ಗುಂಪು ಹೆಜ್ಬೊಲ್ಲಾ ಪ್ರಸ್ತುತ ಲೆಬನಾನ್ ಗಡಿಯ ಬಳಿ ಇಸ್ರೇಲ್ ದಾಳಿಯ ಸಂಘರ್ಷದಲ್ಲಿ ತೊಡಗಿಸಿಕೊಂಡಿದೆ. ಇರಾನ್‌ನ ಅಧ್ಯಕ್ಷ ಇಬ್ರಾಹಿಂ ರೈಸಿ ಅವರು ಪ್ಯಾಲೇಸ್ಟಿನಿಯನ್ ಉಗ್ರಗಾಮಿ ಗುಂಪುಗಳಾದ ಹಮಾಸ್ ಮತ್ತು ಇಸ್ಲಾಮಿಕ್ ಜಿಹಾದ್ ನಾಯಕರೊಂದಿಗೆ ಮಾತನಾಡಿದ್ದು, ಪ್ಯಾಲೇಸ್ಟಿನಿಯನ್ ದಾಳಿಯನ್ನು “ಹೆಮ್ಮೆಯ ಕಾರ್ಯಾಚರಣೆ” ಮತ್ತು “ಮಹಾನ್ ವಿಜಯ” ಎಂದು ಕರೆದಿದ್ದಾರೆ.

ಝಿಯೋನಿಸ್ಟ್ ಆಡಳಿತದ ಪತನವನ್ನು ಸುಗಮಗೊಳಿಸುವ ಮತ್ತು ವೇಗಗೊಳಿಸುವ ಈ ವಿಜಯದ ಕಾರ್ಯಾಚರಣೆಯು ಝಿಯೋನಿಸ್ಟ್ ಆಡಳಿತದ ಸನ್ನಿಹಿತ ವಿನಾಶದ ಭರವಸೆ ನೀಡುತ್ತದೆ ಎಂದು ಇರಾನ್‌ನ ಸರ್ವೋಚ್ಚ ನಾಯಕ ಅಯತೊಲ್ಲಾ ಅಲಿ ಖಮೇನಿ ಅವರ ಹಿರಿಯ ಸಲಹೆಗಾರ ಅಲಿ ಅಕ್ಬರ್ ವೆಲಯತಿ ಹೇಳಿದರು.

ದಕ್ಷಿಣ ಆಫ್ರಿಕಾ

ಆಡಳಿತಾರೂಢ ಆಫ್ರಿಕನ್ ನ್ಯಾಷನಲ್ ಕಾಂಗ್ರೆಸ್ ಹೇಳಿಕೆಯೊಂದನ್ನು ಬಿಡುಗಡೆ ಮಾಡಿದ್ದು, ವರ್ಣಭೇದ ನೀತಿಯ ದಕ್ಷಿಣ ಆಫ್ರಿಕಾದ ಇತಿಹಾಸವು ಪ್ಯಾಲೆಸ್ಟೈನ್‌ನ ವಾಸ್ತವತೆಯನ್ನು ಆಕ್ರಮಿಸಿಕೊಂಡಿದೆ ಎಂದು ಇನ್ನು ಮುಂದೆ ವಿವಾದ ಮಾಡಲಾಗುವುದಿಲ್ಲ . ಪರಿಣಾಮವಾಗಿ, ವಸಾಹತುಗಾರ ಇಸ್ರೇಲಿ ವರ್ಣಭೇದ ನೀತಿಯ ಆಡಳಿತದ ಕ್ರೂರತೆಗೆ ಪ್ರತಿಕ್ರಿಯಿಸಲು ಪ್ಯಾಲೆಸ್ತೀನಿಯಾದ ನಿರ್ಧಾರವು ಆಶ್ಚರ್ಯಕರವಲ್ಲ” ಎಂದು ಹೇಳಿದೆ. ಕ್ಷೀಣಿಸುತ್ತಿರುವ ಭದ್ರತಾ ಪರಿಸ್ಥಿತಿಯು ಕಾನೂನುಬಾಹಿರ ಇಸ್ರೇಲಿ ಆಕ್ರಮಣಕ್ಕೆ ನೇರವಾಗಿ ಸಂಬಂಧಿಸಿದೆ ಎಂಬುದು ಸ್ಪಷ್ಟವಾಗಿದೆ ಎಂದು ಹೇಳಿಕೆಯಲ್ಲಿ ಸೇರಿಸಲಾಗಿದೆ.

ಯೆಮೆನ್

ಯೆಮೆನ್‌ನಲ್ಲಿ ರಾಜಧಾನಿ ಸನಾವನ್ನು ನಿಯಂತ್ರಿಸುವ ಹುಥಿ ಬಂಡುಕೋರರು ಜಿಹಾದಿ ಕಾರ್ಯಾಚರಣೆಗೆ ತಮ್ಮ ಬೆಂಬಲವನ್ನು ವ್ಯಕ್ತಪಡಿಸಿದರು. ಹುಥಿ-ನಿಯಂತ್ರಿತ SABA ಸುದ್ದಿ ಸಂಸ್ಥೆಯ ವೆಬ್‌ಸೈಟ್‌ನಲ್ಲಿ ಹೇಳಿಕೆಯಲ್ಲಿ, ಇರಾನ್-ಸಂಯೋಜಿತ ಉಗ್ರಗಾಮಿ ಗುಂಪು ಈ ದಾಳಿಯು ಇಸ್ರೇಲ್‌ನ “ದೌರ್ಬಲ್ಯವನ್ನು ಬಹಿರಂಗಪಡಿಸಿದೆ” ಎಂದು ಹೇಳಿದೆ.

ಸೌದಿ ಅರೇಬಿಯಾ

ನಡೆಯುತ್ತಿರುವ ಸಂಘರ್ಷದ ಮಧ್ಯೆ, ಸೌದಿ ಅರೇಬಿಯಾ ಎರಡು-ರಾಜ್ಯ ಪರಿಹಾರಕ್ಕೆ ಕರೆ ನೀಡಿದೆ ಮತ್ತು ತಕ್ಷಣವೇ ಯುದ್ಧವನ್ನು ನಿಲ್ಲಿಸುವಂತೆ ಮನವಿ ಮಾಡಿದೆ. ಕಿಂಗ್ಡಮ್ ತನ್ನ ಜವಾಬ್ದಾರಿಗಳನ್ನು ವಹಿಸಿಕೊಳ್ಳಲು ಅಂತರರಾಷ್ಟ್ರೀಯ ಸಮುದಾಯಕ್ಕೆ ಕರೆ ನೀಡುತ್ತಿದೆ. ಪ್ರದೇಶದಲ್ಲಿ ಭದ್ರತೆ ಮತ್ತು ಶಾಂತಿಯನ್ನು ಸಾಧಿಸಲು ಮತ್ತು ನಾಗರಿಕರನ್ನು ರಕ್ಷಿಸಲು ಎರಡು-ರಾಜ್ಯ ಪರಿಹಾರಕ್ಕೆ ಕಾರಣವಾಗುವ ವಿಶ್ವಾಸಾರ್ಹ ಶಾಂತಿ ಪ್ರಕ್ರಿಯೆಯನ್ನು ಸಕ್ರಿಯಗೊಳಿಸುತ್ತದೆ ಎಂದು ಸೌದಿ ಅರೇಬಿಯಾ ಹೇಳಿಕೆಯಲ್ಲಿ ತಿಳಿಸಿದೆ.

ಇದನ್ನೂ ಓದಿ: ಇಸ್ರೇಲ್-ಪ್ಯಾಲೆಸ್ತೀನ್ ಸಂಘರ್ಷದಲ್ಲಿ ಮೃತಪಟ್ಟವರ ಸಂಖ್ಯೆ 1,100ಕ್ಕೆ ಏರಿಕೆ

ದೀರ್ಘಕಾಲದವರೆಗೆ ಸೌದಿ ಮತ್ತು ಇಸ್ರೇಲ್ ನಡುವಿನ ಮಾತುಕತೆಗಳಲ್ಲಿ ಪ್ಯಾಲೆಸ್ತೀನ್ ಸಂಘರ್ಷವು ವಿವಾದದ ವಿಷಯವಾಗಿದೆ. ಇತ್ತೀಚಿನ ತಿಂಗಳುಗಳಲ್ಲಿ, ಬೈಡೆನ್ ಮತ್ತು ಹಿರಿಯ ಶ್ವೇತಭವನದ ಅಧಿಕಾರಿಗಳು ಸೌದಿ ಅರೇಬಿಯಾದ ಕ್ರೌನ್ ಪ್ರಿನ್ಸ್ ಮೊಹಮ್ಮದ್ ಬಿನ್ ಸಲ್ಮಾನ್ ಮತ್ತು ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರೊಂದಿಗೆ ಸಾಮಾನ್ಯೀಕರಣದ ಒಪ್ಪಂದವನ್ನು ಮಾತುಕತೆ ನಡೆಸಲು ಪ್ರಯತ್ನಿಸಿದ್ದಾರೆ. ಆದಾಗ್ಯೂ, ನಡೆಯುತ್ತಿರುವ ಸಂಘರ್ಷವು ಮಾತುಕತೆಯ ಮೇಲೆ ಪರಿಣಾಮ ಬೀರುವ ಸಾಧ್ಯತೆಯಿದೆ.

ಕತಾರ್

2012 ರಿಂದ ಹಮಾಸ್ ರಾಜಕೀಯ ಕಚೇರಿಯನ್ನು ಆಯೋಜಿಸುತ್ತಿರುವ ಕತಾರ್, ಪ್ಯಾಲೇಸ್ಟಿನಿಯನ್ ಜನರೊಂದಿಗೆ ನಡೆಯುತ್ತಿರುವ ಹಿಂಸಾಚಾರದ ಉಲ್ಬಣಕ್ಕೆ ಇಸ್ರೇಲೇ ಕಾರಣ ಎಂದು ಹೇಳಿದೆ. ಜನರ ಹಕ್ಕುಗಳ ನಿರಂತರ ಉಲ್ಲಂಘನೆಯಿಂದಾಗಿ ಪ್ರಸ್ತುತ ಉಲ್ಬಣಕ್ಕೆ ಇಸ್ರೇಲ್ ಮಾತ್ರ ಹೊಣೆಗಾರಿಕೆಯನ್ನು ಹೊಂದಿದೆ. ಇಸ್ರೇಲಿ ಪೋಲೀಸರ ರಕ್ಷಣೆಯಲ್ಲಿ ಅಲ್-ಅಕ್ಸಾ ಮಸೀದಿಯ ಮೇಲೆ ಪುನರಾವರ್ತಿತ ದಾಳಿಗಳು ಇತ್ತೀಚಿನದು ಎಂದು ಕತಾರ್ ವಿದೇಶಾಂಗ ಸಚಿವಾಲಯ ಹೇಳಿಕೆಯಲ್ಲಿ ತಿಳಿಸಿದೆ.

ಮತ್ತಷ್ಟು ವಿದೇಶ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

Published On - 1:30 pm, Mon, 9 October 23