ದಶಕದ ಬಳಿಕ ಅಮೆರಿಕ ನೆಲಕ್ಕೆ ಷಿ ಜಿನ್ಪಿಂಗ್: ಏರ್‌ಬೇಸ್‌ನಲ್ಲೇ ಅದ್ಧೂರಿಯಾಗಿ ಬರಮಾಡಿಕೊಂಡ ಟ್ರಂಪ್ ದಂಪತಿ
ದಶಕದ ಬಳಿಕ ಷಿ ಜಿನ್ಪಿಂಗ್ ಅಮೆರಿಕಕ್ಕೆ ಭೇಟಿ ನೀಡಿದ್ದು, ಟ್ರಂಪ್ ದಂಪತಿ ಅದ್ದೂರಿ ಸ್ವಾಗತ ನೀಡಿದರು. ಉಭಯ ದೇಶಗಳ ನಡುವಿನ ವ್ಯಾಪಾರ ಸಮರಕ್ಕೆ ತಾತ್ಕಾಲಿಕ ವಿರಾಮ ಘೋಷಿಸಲಾಗಿದ್ದು, ವ್ಯಾಪಾರ ಒಪ್ಪಂದ ವಿಸ್ತರಿಸಲಾಗಿದೆ. ಹಣಕಾಸು ಸೇವೆ, ಕೃಷಿ ಉತ್ಪನ್ನಗಳ ಖರೀದಿಗೆ ಚೀನಾ ಒಪ್ಪಿಗೆ ನೀಡುವ ನಿರೀಕ್ಷೆಯಿದೆ. ಈ ಭೇಟಿ ಜಾಗತಿಕ ಮಾರುಕಟ್ಟೆಗಳಲ್ಲಿ ಸಕಾರಾತ್ಮಕ ಪರಿಣಾಮ ಬೀರಿದೆ.
ವಾಷಿಂಗ್ಟ್, ಸೆಪ್ಟೆಂಬರ್ 24: ಸುಮಾರು ಒಂದು ದಶಕದ ಸುದೀರ್ಘ ಅಂತರದ ನಂತರ ಚೀನಾ ಅಧ್ಯಕ್ಷ ಷಿ ಜಿನ್ಪಿಂಗ್ ಅವರು ಅಮೆರಿಕಕ್ಕೆ ಐತಿಹಾಸಿಕ ಮೂರು ದಿನಗಳ ಅಧಿಕೃತ ಭೇಟಿ ನೀಡಿದ್ದಾರೆ. ಷಿ ವಾಷಿಂಗ್ಟನ್‌ಗೆ ಬಂದಿಳಿಯುತ್ತಿದ್ದಂತೆ, ಜಾಗತಿಕ ಆರ್ಥಿಕತೆಯನ್ನು ನಡುಗಿಸಿದ್ದ ಉಭಯ ದೇಶಗಳ ನಡುವಿನ ವ್ಯಾಪಾರ ಸಮರಕ್ಕೆ ತಾತ್ಕಾಲಿಕ ಕದನ ವಿರಾಮ ಘೋಷಿಸಲಾಗಿದ್ದು, ವ್ಯಾಪಾರ ಒಪ್ಪಂದವನ್ನು ಜನವರಿ 10ರವರೆಗೆ ವಿಸ್ತರಿಸಲಾಗಿದೆ ಎಂದು ಅಮೆರಿಕದ ಖಜಾನೆ ಕಾರ್ಯದರ್ಶಿ ಸ್ಕಾಟ್ ಬೆಸೆಂಟ್ ಅಧಿಕೃತವಾಗಿ ಪ್ರಕಟಿಸಿದ್ದಾರೆ.
ವಿಮಾನ ನಿಲ್ದಾಣದಲ್ಲೇ ಅಭೂತಪೂರ್ವ ಸ್ವಾಗತ:
ಸಾಮಾನ್ಯವಾಗಿ ವಿದೇಶಿ ನಾಯಕರನ್ನು ಶ್ವೇತಭವನದಲ್ಲಿ ಸ್ವಾಗತಿಸುವ ವಾಡಿಕೆಯನ್ನು ಬದಿಗಿಟ್ಟ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮತ್ತು ಪ್ರಥಮ ಮಹಿಳೆ ಮೆಲಾನಿಯಾ ಟ್ರಂಪ್, ವಾಷಿಂಗ್ಟನ್ ಹೊರವಲಯದ ಜಾಯಿಂಟ್ ಬೇಸ್ ಆಂಡ್ರ್ಯೂಸ್‌ನ ರನ್‌ವೇ ಬಳಿಯೇ ಖುದ್ದಾಗಿ ಹಾಜರಿದ್ದು ಷಿ ಜಿನ್ಪಿಂಗ್ ಮತ್ತು ಅವರ ಪತ್ನಿ ಪೆಂಗ್ ಲಿಯುವಾನ್ ಅವರನ್ನು ಹಸ್ತಲಾಘವದೊಂದಿಗೆ ಆತ್ಮೀಯವಾಗಿ ಬರಮಾಡಿಕೊಂಡರು.
ವಿಮಾನದ ಮೆಟ್ಟಿಲ ಬುಡದಿಂದ 100 ಅಡಿ ಉದ್ದದ ಭವ್ಯ ರೆಡ್ ಕಾರ್ಪೆಟ್ ಹಾಸಲಾಗಿತ್ತು. 21 ಸೈನಿಕರ ಗೌರವ ರಕ್ಷಕ ಪಡೆ ಮತ್ತು ಅಮೆರಿಕದ ಎರಡು ಬಿ-1 (B-1) ಬಾಂಬರ್ ಯುದ್ಧ ವಿಮಾನಗಳ ಆಕರ್ಷಕ ಫ್ಲೈಓವರ್ ಮೂಲಕ ಗೌರವ ನಮನ ಸಲ್ಲಿಸಲಾಯಿತು.
ವ್ಯಾಪಾರ ಒಪ್ಪಂದದ ವಿಸ್ತರಣೆ:
ನವೆಂಬರ್ 10 ರಂದು ಕೊನೆಗೊಳ್ಳಬೇಕಿದ್ದ ಸುಂಕ ವಿನಾಯಿತಿ ಮತ್ತು ರಫ್ತು ನಿರ್ಬಂಧಗಳ ಮೇಲಿನ ಒಪ್ಪಂದವನ್ನು ಜನವರಿ 10 ರವರೆಗೆ ಎರಡು ತಿಂಗಳು ವಿಸ್ತರಿಸಲಾಗಿದೆ. ವಾಷಿಂಗ್ಟನ್‌ನ ವಿಶ್ವಬ್ಯಾಂಕ್ ಕಚೇರಿಯಲ್ಲಿ ಅಮೆರಿಕದ ಸ್ಕಾಟ್ ಬೆಸೆಂಟ್ ಮತ್ತು ಚೀನಾದ ಉಪ ಪ್ರಧಾನಿ ಹಿ ಲಿಫೆಂಗ್ ನಡುವೆ ನಡೆದ ಮಾತುಕತೆಯಲ್ಲಿ ಈ ಒಮ್ಮತ ಮೂಡಿದೆ. ನವೆಂಬರ್‌ನಲ್ಲಿ ಚೀನಾದಲ್ಲಿ ಹಾಗೂ ಡಿಸೆಂಬರ್‌ನಲ್ಲಿ ಫ್ಲೋರಿಡಾದಲ್ಲಿ ನಡೆಯಲಿರುವ ಜಾಗತಿಕ ಶೃಂಗಸಭೆಗಳ ವೇಳೆ ಅಂತಿಮ ಒಪ್ಪಂದ ರೂಪಿಸಲು ಎರಡೂ ದೇಶಗಳಿಗೆ ಈ ವಿಸ್ತರಣೆ ಕಾಲಾವಕಾಶ ನೀಡಲಿದೆ. ಈ ಭೇಟಿಯ ವೇಳೆ ಹಣಕಾಸು ಸೇವೆಗಳು ಮತ್ತು ಅಮೆರಿಕದ ಕೃಷಿ ಉತ್ಪನ್ನಗಳ ಬೃಹತ್ ಖರೀದಿಗೆ ಸಂಬಂಧಿಸಿದಂತೆ ಚೀನಾ ಮಹತ್ವದ ಘೋಷಣೆಗಳನ್ನು ಮಾಡುವ ನಿರೀಕ್ಷೆಯಿದೆ.
ಮತ್ತಷ್ಟು ಓದಿ: ಪುಟಿನ್,ಷಿ ಜಿನ್ಪಿಂಗ್ ಕೈ ಹಿಡಿದ ಪ್ರಧಾನಿ ಮೋದಿ: ಇಡೀ ಜಗತ್ತಿಗೆ ಬ್ರಿಕ್ಸ್ ಬಲಿಷ್ಠ ಒಗ್ಗಟ್ಟಿನ ಸಂದೇಶ
‘ನಾವು ಪ್ರತಿಸ್ಪರ್ಧಿಗಳಲ್ಲ, ಪಾಲುದಾರರು’:
ಅಮೆರಿಕಕ್ಕೆ ಆಗಮಿಸಿದ ಬೆನ್ನಲ್ಲೇ ಹೇಳಿಕೆ ಬಿಡುಗಡೆ ಮಾಡಿದ ಷಿ ಜಿನ್ಪಿಂಗ್, “ಬೀಜಿಂಗ್ ಮತ್ತು ವಾಷಿಂಗ್ಟನ್ ಪರಸ್ಪರ ಎದುರಾಳಿಗಳಾಗುವ ಬದಲು ಜಾಗತಿಕ ಪಾಲುದಾರರಾಗಬೇಕು. ಚೀನಾದ ಮಹಾನ್ ಪುನರುಜ್ಜೀವನ ಮತ್ತು ಅಮೆರಿಕವನ್ನು ಮತ್ತೆ ಶ್ರೇಷ್ಠವಾಗಿಸುವ (MAGA) ಗುರಿಗಳು ಒಟ್ಟಿಗೆ ಸಾಗಬಹುದು. ಇದು ಇಡೀ ವಿಶ್ವದ ಶಾಂತಿ ಮತ್ತು ಸಮೃದ್ಧಿಗೆ ಪೂರಕ” ಎಂದು ಕರೆ ನೀಡಿದ್ದಾರೆ. ಟ್ರಂಪ್ ಕೂಡ ಷಿ ಅವರನ್ನು “ಶ್ರೇಷ್ಠ ನಾಯಕ ಮತ್ತು ಆತ್ಮೀಯ ಮಿತ್ರ” ಎಂದು ಬಣ್ಣಿಸಿದ್ದಾರೆ.
ವಿಡಿಯೋ
ಬುಸಾನ್ ಒಪ್ಪಂದದ ಮುಂದುವರಿಕೆ: ಕಳೆದ ಅಕ್ಟೋಬರ್‌ನಲ್ಲಿ ದಕ್ಷಿಣ ಕೊರಿಯಾದ ಬುಸಾನ್‌ನಲ್ಲಿ ನಡೆದ ಎಪಿಸಿ (APEC) ಶೃಂಗಸಭೆಯ ವೇಳೆ ಟ್ರಂಪ್ ಮತ್ತು ಷಿ ಭೇಟಿಯಾಗಿದ್ದರು. ಆ ವೇಳೆ ಜಾಗತಿಕ ತಂತ್ರಜ್ಞಾನ ವಲಯಕ್ಕೆ ಕಂಟಕವಾಗಿದ್ದ ಅಪರೂಪದ ಭೂಖನಿಜಗಳು ಮತ್ತು ಅರೆವಾಹಕಗಳ ಮೇಲಿನ ರಫ್ತು ನಿಷೇಧವನ್ನು ತಾತ್ಕಾಲಿಕವಾಗಿ ಹಿಂತೆಗೆದುಕೊಳ್ಳಲಾಗಿತ್ತು.
ಬಿಕ್ಕಟ್ಟಿನ ಇತರ ಮುಖಗಳು: ವ್ಯಾಪಾರ ಒಪ್ಪಂದದಲ್ಲಿ ಸದ್ಯಕ್ಕೆ ನೆಮ್ಮದಿ ಕಂಡಿದ್ದರೂ, ತೈವಾನ್ ಜಲಸಂಧಿಯಲ್ಲಿ ಚೀನಾದ ಸೇನಾ ಚಟುವಟಿಕೆಗಳು, ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನ ನಿಯಂತ್ರಣ ಹಾಗೂ ಇರಾನ್ ವಿಚಾರದಲ್ಲಿ ಟ್ರಂಪ್ ಅವರ ಕಠಿಣ ನಿಲುವುಗಳ ಕುರಿತು ಶ್ವೇತಭವನದ ದ್ವಿಪಕ್ಷೀಯ ಮಾತುಕತೆಯಲ್ಲಿ ಗಂಭೀರ ಚರ್ಚೆ ನಡೆಯಲಿದೆ.
ಜಾಗತಿಕ ಮಾರುಕಟ್ಟೆ ಮೇಲೆ ಪ್ರಭಾವ: ವಿಶ್ವದ ಎರಡು ಅತಿ ದೊಡ್ಡ ಆರ್ಥಿಕತೆಗಳು ಸುಂಕ ಸಮರವನ್ನು ತಾತ್ಕಾಲಿಕವಾಗಿ ಮುಂದೂಡುತ್ತಿದ್ದಂತೆ ಏಷ್ಯಾ, ಯುರೋಪ್ ಮತ್ತು ಅಮೆರಿಕದ ಷೇರು ಮಾರುಕಟ್ಟೆಗಳಲ್ಲಿ ಧನಾತ್ಮಕ ಚೇತರಿಕೆ ಕಂಡುಬಂದಿದೆ.
ಅಂತಾರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ