Sunny Leone: ಮಾಜಿ ನೀಲಿಚಿತ್ರತಾರೆ ಸನ್ನಿ ಲಿಯೋನೆ ಹೊಸ ಬಿಸಿನೆಸ್; ಚಿಕಲೋಕ ಆರಂಭ
ChicaLoca Restaurant In Uttar Pradesh: ಸನ್ನಿ ಲಿಯೋನೆ ಮತ್ತು ಪತಿ ಡೇನಿಯಲ್ ವೆಬೆರ್ ಅವರು ಉತ್ತರಪ್ರದೇಶದ ನೋಯ್ಡಾದಲ್ಲಿ ಚಿಕಲೋಕ ಎಂಬ ರೆಸ್ಟೋರೆಂಟ್ ಆರಂಭಿಸಿದ್ದಾರೆ. ಸಿಂಗಿಂಗ್ ಬೌಲ್ಸ್ ಹಾಸ್ಪಿಟಾಲಿಟಿ ಎಂಬ ಸಂಸ್ಥೆ ಈ ವ್ಯವಹಾರದಲ್ಲಿ ಸನ್ನಿ ಜೊತೆ ಕೈಜೋಡಿಸಿದೆ. ಚಿತ್ರ ನಟರು ಕೇವಲ ಸಿನಿಮಾ, ಟಿವಿಗಳಿಗೆ ಸೀಮಿತವಾಗದೇ ಹೊಸ ವ್ಯವಹಾರಗಳನ್ನು ನಡೆಸಬೇಕು ಎಂದು ಸನ್ನಿ ಕರೆ ನೀಡಿದ್ದಾರೆ.
ನವದೆಹಲಿ, ಜನವರಿ 26: ನಟಿಯಾಗಿದ್ದು ವಿವಿಧ ವ್ಯವಹಾರಗಳನ್ನೂ ನಿಭಾಯಿಸುವ ಸನ್ನಿ ಲಿಯೋನೆ ಇದೀಗ ಉತ್ತರಪ್ರದೇಶದಲ್ಲಿ ಹೊಸ ರೆಸ್ಟೋರೆಂಟ್ ಆರಂಭಿಸಿದ್ದಾರೆ. ಸನ್ನಿ ಲಿಯೋನೆ ಮತ್ತವರ ಪತಿ ಡೇನಿಯಲ್ ವೆಬೆರ್ (Sunny Leone and Daniel Weber) ನೋಯಿಡಾದಲ್ಲಿ ಚಿಕಲೋಕ (ChicaLoca) ಎಂಬ ಹೆಸರಿನ ರೆಸ್ಟೋರೆಂಟ್ ತೆರೆದಿದ್ದಾರೆ. ಇದು ಈ ದಂಪತಿಯ ಮೊದಲ ರೆಸ್ಟೋರೆಂಟ್ ಬಿಸಿನೆಸ್ ಆಗಿದ್ದು, ಎರಡು ಮಹಡಿಯನ್ನು ಚಿಕಲೋಕಾಗೆಂದು ಬಾಡಿಗೆಗೆ ಪಡೆದಿದ್ದಾರೆ. ಇದರಲ್ಲಿ ಸನ್ನಿ ಲಿಯೋನೆ ಅವರ ಕಲರ್ಫುಲ್ ಬದುಕಿನ ಆಸಕ್ತಿದಾಯಕ ವಿಚಾರಗಳನ್ನು ಅನಾವರಣಗೊಳಿಸುವ ಪೇಂಟಿಂಗ್ ಮತ್ತಿತರ ಕಲೆಗಳು ಒಳಗೊಂಡಿವೆ.
ಸಿಂಗಿಂಗ್ ಬೌಲ್ಸ್ ಹಾಸ್ಪಿಟಾಲಿಟಿ (Singing Bowls Hospitality) ಎಂಬ ಸಂಸ್ಥೆ ಚಿಕಲೋಕ ರೆಸ್ಟೋರೆಂಟ್ ಬಿಸಿನೆಸ್ನಲ್ಲಿ ಸನ್ನಿ ಲಿಯೋನೆ ಜೊತೆ ಸಹಭಾಗಿಯಾಗಿದೆ. ಸನ್ನಿ ಅವರ ಅಮೋಘ ಶಕ್ತಿ ಮತ್ತು ಉಲ್ಲಸಿತ ವ್ಯಕ್ತಿತ್ವವನ್ನು ತೋರ್ಪಡಿಸುವಂತಹ ವಾತಾವರಣವನ್ನು ರೆಸ್ಟೋರೆಂಟ್ನಲ್ಲಿ ಒಳಗೊಳ್ಳುವುದು ಗುರಿಯಾಗಿದೆ ಎಂದು ಸಿಂಗಿಂಗ್ ಬೌಲ್ಸ್ ಹಾಸ್ಪಿಟಾಲಿಟಿಯ ನಿರ್ದೇಶಕ ಸಾಹಿಲ್ ಬವೇಜಾ ಹೇಳುತ್ತಾರೆ.
ಮನರಂಜಿಸುವವರು ಫಿಲಂ, ಟಿವಿ ಶೋಗಳಿಗೆ ಸೀಮಿತವಾಗಬಾರದು ಎನ್ನುವ ಲಿಯೋನೆ
ಬಾಲಿವುಡ್ಗೆ ಪ್ರವೇಶ ಮಾಡುವವರೆಗೂ ನೀಲಿ ಚಿತ್ರಗಳ ಉದ್ಯಮದಲ್ಲಿದ್ದ ಸನ್ನಿ ಲಿಯೋನೆ ಇದೀಗ ಆ ಇಮೇಜ್ನಿಂದ ಸಾಕಷ್ಟು ಹೊರಬಂದಿದ್ದಾರೆ. ಸಿನಿಮಾಗಳಲ್ಲಿ ನಟಿಸುವ ಜೊತೆಗೆ ವಿವಿಧ ರೀತಿಯ ಬಿಸಿನೆಸ್ನಗಳಲ್ಲಿ ತೊಡಗಿಸಿಕೊಳ್ಳಬೇಕೆನ್ನುವುದು ಮತ್ತು ಈ ವಿಶ್ವವನ್ನು ಆವರಿಸುವುದು ಅವರ ಬಯಕೆ.
‘ಮನರಂಜಿಸುವವರು ಕೇವಲ ಚಿತ್ರಗಳು ಹಾಗೂ ಟಿವಿ ಶೋಗಳಿಗೆ ಸೀಮಿತವಾಗಬಾರದು. ಹೊರಗೆ ಇಣುಕಿ ಹೊಸ ಕಾರ್ಯಗಳಿಗೆ ಪ್ರಯತ್ನಿಸುವ ಮೂಲಕ ನಮ್ಮ ಬ್ರ್ಯಾಂಡ್ ಅನ್ನು ಬೇರೆ ಬೇರೆ ರೀತಿಯಲ್ಲಿ ಬೆಳೆಸುವ ಅವಕಾಶ ಇದೆ’ ಎಂದು ಐಎಎನ್ಎನ್ ಸುದ್ದಿಸಂಸ್ಥೆಗೆ ನೀಡಿದ ಸಂದರ್ಶನದಲ್ಲಿ ಹೇಳಿದ್ದಾರೆ.
ಈ ವಿಶ್ವವನ್ನು ಗೆಲ್ಲಬೇಕು ಎಂದು ಹೇಳುವ ಅವರು ವಿವಿಧ ವ್ಯಾವಹಾರಿಕ ಅವಕಾಶಗಳನ್ನು ಅವಲೋಕಿಸಬೇಕು, ಹೊಸ ಐಡಿಯಾಗಳನ್ನು ಸೃಷ್ಟಿಸಬೇಕು ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ