ಬಿನಾನ್ಸ್ ಕ್ರಿಪ್ಟೋ ಕನ್ನ; ಉತ್ತರಕೊರಿಯನ್ ತಂಡದ ಮೇಲೆ ಶಂಕೆ; ಹ್ಯಾಕರ್​ಗಳಿಂದ ಬಹಳ ಸಂಯೋಜಿತ ದಾಳಿ ಸಾಧ್ಯವಾಗಿದ್ದು ಹೀಗೆ…

ನವದೆಹಲಿ, ನವೆಂಬರ್ 1: ಕ್ರಿಪ್ಟೋ ಇತಿಹಾಸದಲ್ಲೇ ಅತಿ ದೊಡ್ಡ ಕಳವು ಪ್ರಕರಣವೆಂದು ಪರಿಗಣಿಸಲ್ಪಟ್ಟಿರುವ ಬಿನಾನ್ಸ್ (Binance) ಹ್ಯಾಕ್ ಘಟನೆಗೆ ಸಂಬಂಧಿಸಿದಂತೆ, ಕಂಪನಿಯು ತನ್ನ ಸ್ವಂತ ನಿಧಿ ಮತ್ತು ಸಂಪನ್ಮೂಲಗಳನ್ನು ಬಳಸಿ ಕಳುವಾದ ಒಟ್ಟು 6.3 ಬಿಲಿಯನ್ ಡಾಲರ್‌ಗಳಲ್ಲಿ (ಸುಮಾರು ₹60,000 ಕೋಟಿ ರೂ) 6 ಬಿಲಿಯನ್ ಡಾಲರ್‌ಗಳನ್ನು ಯಶಸ್ವಿಯಾಗಿ ಭರ್ತಿ ಮಾಡಿದೆ ಎಂದು ಘೋಷಿಸಿದೆ. ಅಂದರೆ, ಕಳುವಾದ ಶೇ. 90ಕ್ಕಿಂತ ಹೆಚ್ಚು ಕ್ರಿಪ್ಟೋ ಆಸ್ತಿಯನ್ನು ಬಿನಾನ್ಸ್ ತನ್ನ ಸ್ವಂತ ಜೇಬಿನಿಂದ ವ್ಯಯಿಸಿ ಖರೀದಿ ಮಾಡಿದೆ.

ಅಮೆರಿಕದ ಫೆಡರಲ್ ಬ್ಯೂರೋ ಆಫ್ ಇನ್ವೆಸ್ಟಿಗೇಷನ್ (FBI) ಈ ಸೈಬರ್ ದಾಳಿಯ ಹಿಂದೆ ಉತ್ತರ ಕೊರಿಯಾದ ‘ಟ್ರೇಡರ್‌ಟ್ರೇಟರ್’ (TraderTraitor) ಎಂಬ ಸರ್ಕಾರಿ ಪ್ರಾಯೋಜಿತ ಹ್ಯಾಕಿಂಗ್ ತಂಡದ ಕೈವಾಡವಿದೆ ಎಂದು ಆರೋಪಿಸಿದೆ. ಬಿನಾನ್ಸ್ ವಿಶ್ವದ ಅತಿದೊಡ್ಡ ಕ್ರಿಪ್ಟೋ ಕರೆನ್ಸಿಗಳ ವಿನಿಮಯ ಕೇಂದ್ರ ಅಥವಾ ಟ್ರೇಡಿಂಗ್ ಕೇಂದ್ರವಾಗಿದೆ. ಇದರ ಮೇಲೆ ಸೈಬರ್ ದಾಳಿಯಾಗಿರುವುದು ಅಕ್ಷರಶಃ ಬೆಚ್ಚಿಬೀಳಿಸುವ ಸಂಗತಿಯಾಗಿದೆ.

ಇದನ್ನೂ ಓದಿ: ಪಿಎನ್​ಬಿ ಬ್ಯಾಂಕ್ ಗ್ರಾಹಕರ ಖಾತೆಗಳಿಂದ 11 ಕೋಟಿ ರೂ ಮಾಯ; 12 ಸಿಬ್ಬಂದಿ ಅಮಾನತು; ಒಬ್ಬ ಮಹಿಳೆ ಮೇಲೆ ಅನುಮಾನ; ತನಿಖೆಗೆ ಆದೇಶ

ಹ್ಯಾಕರ್‌ಗಳು ಕ್ರಿಪ್ಟೋ ಕಳವು ಎಸಗಿದ್ದು ಹೇಗೆ?

ಆರಂಭಿಕ ತನಿಖೆ ಮತ್ತು ಬ್ಲಾಕ್‌ಚೈನ್ ವಿಶ್ಲೇಷಣಾ ಸಂಸ್ಥೆಗಳ (TRM Labs ಮತ್ತು Chainalysis) ವರದಿಗಳ ಪ್ರಕಾರ, ಹ್ಯಾಕರ್‌ಗಳು ಈ ದರೋಡೆಯನ್ನು ಹೇಗೆ ನಡೆಸಿದರು ಎಂಬುದು ನಿಜಕ್ಕೂ ಬೆಚ್ಚಿಬೀಳಿಸುವ ಸಂಗತಿ. ಬ್ಲಾಕ್​ಚೈನ್ ಕ್ರಿಪ್ಟೋಗ್ರಫಿಗೆ ನೇರವಾಗಿ ಕನ್ನ ಹಾಕದೆ, ಬಹಳ ವ್ಯವಸ್ಥಿತವಾಗಿ ಬಹು ಹಂತದ ಸೈಬರ್ ದಾಳಿಯನ್ನು ಹ್ಯಾಕರ್​ಗಳು ಸಂಘಟಿಸಿದರೆನ್ನಲಾಗಿದೆ.

• ನೆಟ್ವರ್ಕ್ ಒಳಗೆ ಪ್ರವೇಶ: ಹ್ಯಾಕರ್‌ಗಳು ಬಿನಾನ್ಸ್‌ನ ಮುಖ್ಯ ಖಾಸಗಿ ಕೀಲಿಗಳನ್ನು (Master Private Keys) ನೇರವಾಗಿ ಮುರಿಯಲಿಲ್ಲ ಅಥವಾ ತಳಪಾಯದ ಎನ್‌ಕ್ರಿಪ್ಶನ್ ಅನ್ನು ಭೇದಿಸಲಿಲ್ಲ. ಬದಲಿಗೆ, ಇಂಜಿನಿಯರ್ ಒಬ್ಬರ ಲ್ಯಾಪ್‌ಟಾಪ್ ಅನ್ನು ಹ್ಯಾಕ್ ಮಾಡುವ ಮೂಲಕ (ಕೊನೆಯ ಹಂತದ ಸಾಧನ ಅಥವಾ endpoint ದೋಷ) ಕಂಪನಿಯ ಆಂತರಿಕ ನೆಟ್‌ವರ್ಕ್ ವ್ಯವಸ್ಥೆಗೆ ನುಸುಳಿದ್ದಾರೆ.
• ಆಟೊಮೇಟೆಡ್ ವಿತ್​ಡ್ರಾಯಲ್ ವ್ಯವಸ್ಥೆಯ ದುರ್ಬಳಕೆ: ಹ್ಯಾಕರ್‌ಗಳು ಆಂತರಿಕ ವ್ಯವಸ್ಥೆಯ ಒಳಗೆ ಪ್ರವೇಶಿಸಿದ ನಂತರ, ತಾವೇ ಅಧಿಕೃತ ಆಂತರಿಕ ಸೇವೆ ಎಂದು ನಟಿಸಿ ಸ್ವಯಂಚಾಲಿತ ಹಿಂಪಡೆಯುವಿಕೆ (Automated Withdrawals) ವಿನಂತಿಗಳನ್ನು ಸಲ್ಲಿಸಿದ್ದಾರೆ.
• ರೆಕಾರ್ಡ್ ಸಮಯದಲ್ಲಿ ಮಿಂಚಿನ ದಾಳಿ: ಅಕ್ಟೋಬರ್ 29ರ ರಾತ್ರಿ ಹ್ಯಾಕರ್‌ಗಳು ಸುಮಾರು 10 ವಿವಿಧ ಬ್ಲಾಕ್‌ಚೈನ್‌ಗಳಲ್ಲಿದ್ದ ಬಿನಾನ್ಸ್‌ನ ಹಾಟ್ ವಾಲೆಟ್‌ಗಳಿಂದ 6.3 ಬಿಲಿಯನ್ ಡಾಲರ್‌ಗಳಿಗೂ ಅಧಿಕ ಕ್ರಿಪ್ಟೋ ಸ್ವತ್ತುಗಳನ್ನು ಬರೀ 20 ನಿಮಿಷಗಳ ಅಂತರದಲ್ಲಿ ಹೊರತೆಗೆದಿದ್ದಾರೆ.
• ಸ್ಮಾರ್ಟ್ ಕಾಂಟ್ರಾಕ್ಟ್ ಆಟೋಮೇಷನ್: ಹ್ಯಾಕರ್‌ಗಳು ಬ್ಲಾಕ್‌ಚೈನ್‌ನಲ್ಲಿ ಪೂರ್ವ-ಸಿದ್ಧಪಡಿಸಿದ ಸೂಚನೆಗಳನ್ನು ಬಳಸಿ ಬಿನಾನ್ಸ್ ವಾಲೆಟ್‌ಗಳನ್ನು “ಸ್ವೀಪರ್” (Sweeper) ಕಾಂಟ್ರಾಕ್ಟ್​ಗಳಾಗಿ ಪರಿವರ್ತಿಸಿದರು. ಇದರಿಂದ ಒಳಬರುವ ಮತ್ತು ಅಸ್ತಿತ್ವದಲ್ಲಿರುವ ನಿಧಿಗಳು ಸೆಕೆಂಡುಗಳಲ್ಲಿ ಬೇರೆಡೆಗೆ ವರ್ಗಾವಣೆಗೊಂಡವು.

ಇದನ್ನೂ ಓದಿ: ಒಂದೇ ದಿನದಲ್ಲಿ ಗೂಗಲ್ ಷೇರು ಪ್ರಪಾತಕ್ಕೆ; ಭಾರತದ ಮೂರು ಅಗ್ರಮಾನ್ಯ ಕಂಪನಿಗಳ ಒಟ್ಟು ಸಂಪತ್ತಿಗೆ ಸಮ ಈ ಕುಸಿತ

ಕ್ರಿಪ್ಟೋ ಕಳುವು ಗೊತ್ತಾಗುತ್ತಲೇ ಎಚ್ಚೆತ್ತುಕೊಂಡು ಕ್ರಮ

ಹ್ಯಾಕರ್​ಗಳಿಂದ ದಾಳಿಯಾಗಿರುವುದು ಗೊತ್ತಾದ ತಕ್ಷಣ ಎಚ್ಚೆತ್ತುಕೊಂಡ ಟೆಥರ್ (Tether) ಮತ್ತು ಸರ್ಕಲ್ (Circle) ಮುಂತಾದ ಸ್ಟೇಬಲ್‌ಕಾಯಿನ್ ಸಂಸ್ಥೆಗಳು (Stablecoins) ಸುಮಾರು 3 ಬಿಲಿಯನ್ ಡಾಲರ್‌ಗೂ ಅಧಿಕ ಮೌಲ್ಯದ ಕಳವು ಸ್ವತ್ತುಗಳನ್ನು ತಕ್ಷಣವೇ ಆನ್-ಚೈನ್‌ನಲ್ಲಿ ಸ್ಥಬ್ದಗೊಳಿಸಿದವು.

ಉಳಿದ ಕೊರತೆಯನ್ನು ಸರಿದೂಗಿಸಲು ಬಿನಾನ್ಸ್ ತನ್ನದೇ ಆದ ನಿಧಿಗಳನ್ನು (SAFU ಮತ್ತು ಕಂಪನಿ ಮೀಸಲು ಹಣ) ಬಳಸಿ ಬದಲಿ ಟೋಕನ್‌ಗಳನ್ನು ಖರೀದಿಸುವ ಮೂಲಕ ಬಳಕೆದಾರರ ನಷ್ಟವನ್ನು ಸಂಪೂರ್ಣವಾಗಿ ಭರ್ತಿ ಮಾಡಿದೆ. ಸದ್ಯ ಶೇ. 10ಕ್ಕಿಂತ ಕಡಿಮೆ ಮೊತ್ತ ಮಾತ್ರ ಬಾಕಿಯಿದ್ದು, ಅವು ಕಡಿಮೆ ದ್ರವ್ಯತೆ (liquidity) ಹೊಂದಿರುವ ಸ್ವತ್ತುಗಳಾಗಿವೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ