ಬಿಎಸ್​​ಎನ್​ಎಲ್ ಜೊತೆ ವೊಡಾಫೋನ್ ಐಡಿಯಾ ವಿಲೀನ? ಒಂದು ವಾರದಿಂದ ಗರಿಗೆದರಿರುವ ವಿಐ ಷೇರುಬೆಲೆ?

ನವದೆಹಲಿ, ಜೂನ್ 29: ಸರ್ಕಾರಿ ಸ್ವಾಮ್ಯದ ಬಿಎಸ್ಸೆನ್ನೆಲ್ ಮತ್ತು ವೊಡಾಫೋನ್ ಐಡಿಯಾ (Vodafone Idea) ಸಂಸ್ಥೆಗಳು ವಿಲೀನಗೊಳ್ಳಬಹುದು ಎನ್ನುವ ಸುದ್ದಿ ಹರಿದಾಡುತ್ತಿದೆ. ವೊಡಾಫೋನ್ ಐಡಿಯಾಗೆ ಎಜಿಆರ್ ಬಾಕಿ ಹಣಯಿಂದ ವಿನಾಯಿತಿ ನೀಡಲು ಸರ್ಕಾರ ಚಿಂತನೆ ನಡೆಸುತ್ತಿದೆ ಎನ್ನುವ ಸುದ್ದಿ ನಡುವೆ ವಿಲೀನ ಸಾಧ್ಯತೆ ಬಗ್ಗೆಯೂ ಸುದ್ದಿಗಳಿವೆ. ಈ ಮಧ್ಯೆ ಕಳೆದ ಕೆಲ ದಿನಗಳಿಂದ ವೊಡಾಫೋನ್ ಐಡಿಯಾದ ಷೇರುಬೆಲೆ ಏರತೊಡಗಿದೆ. ಜೂನ್ 18ರಿಂದೀಚೆ ವಿಐ ಷೇರುಬೆಲೆ ನಿರಂತರವಾಗಿ ಆಗುತ್ತಿದೆ.

ಜೂನ್ 19ರಂದು 6.33 ರೂ ಇದ್ದ ವಿಐ ಷೇರುಬೆಲೆ ಜೂನ್ 27 ಶುಕ್ರವಾರ 7.40 ರೂ ಬೆಲೆಯಲ್ಲಿ ಅಂತ್ಯವಾಗಿತ್ತು. ಕಳೆದ 8-10 ಸೆಷನ್​​ಗಳಲ್ಲಿ ಷೇರುಬೆಲೆ ಶೇ. 12ರಷ್ಟು ಹೆಚ್ಚಾಗಿದೆ. ಹತ್ತು ವರ್ಷದ ಹಿಂದೆ 118.96 ರೂ ಇದ್ದ ಅದರ ಬೆಲೆ ಶೇ. 95ರಷ್ಟು ಕುಸಿತ ಕಂಡಿದೆ. ಆದರೆ, ಕಳೆದ ಕೆಲ ದಿನಗಳಿಂದ ಅದು ಕಂಬ್ಯಾಕ್ ಮಾಡುತ್ತಿರುವುದು ಗಮನಾರ್ಹ. ಇದಕ್ಕೆ ವೊಡಾಫೋನ್​​ನ ಎಜಿಆರ್ ಪಾವತಿಯಿಂದ ವಿನಾಯಿತಿ ಸಿಕ್ಕಿರುವುದು ಒಂದು ಕಾರಣವಾದರೆ, ಬಿಎಸ್ಸೆನ್ನೆಲ್ ಜೊತೆ ಅದು ವಿಲೀನಗೊಳ್ಳಬಹುದು ಎನ್ನುವ ಸುದ್ದಿಯೂ ಇದಕ್ಕೆ ಕಾರಣವಿರಬಹುದು. ವೊಡಾಫೋನ್ ಐಡಿಯಾದಲ್ಲಿ ಸರ್ಕಾರ ಅತಿಹೆಚ್ಚು ಷೇರುಪಾಲು ಹೊಂದಿದೆ. ಹೀಗಾಗಿ, ಎರಡೂ ಕೂಡ ವಿಲೀನಗೊಂಡರೆ ಅಚ್ಚರಿ ಇಲ್ಲ.

ಇದನ್ನೂ ಓದಿ: ಭಾರತದಲ್ಲಿ ಫ್ರಿಡ್ಜ್, ವಾಷಿಂಗ್ ಮೆಷೀನ್ ಬ್ಯುಸಿನೆಸ್ ತೊರೆದ ಪ್ಯಾನಸನಿಕ್; ಏನು ಕಾರಣ? ಈಗಿರುವ ಫ್ರಿಡ್ಜ್​​ಗಳಿಗೆ ಸರ್ವಿಸ್ ನಿಲ್ಲುತ್ತಾ?

ಕಳೆದ ತಿಂಗಳು ವೊಡಾಫೋನ್ ಐಡಿಯಾ ಸಿಇಒ ಅಕ್ಷಯ ಮೂಂದ್ರ (Akshaya Moondra) ಅವರು ಸರ್ಕಾರದ ನೆರವಿನ ಅವಶ್ಯಕತೆ ಬಗ್ಗೆ ಹೇಳಿದ್ದರು. ಸರ್ಕಾರವು ಎಜಿಆರ್ ವಿಷಯದಲ್ಲಿ ಸರಿಯಾದ ಸಮಯಕ್ಕೆ ಬೆಂಬಲ ನೀಡದೇ ಹೋದರೆ ವೊಡಾಫೋನ್ ಐಡಿಯಾ ಸಂಸ್ಥೆ 2025-26ಕ್ಕಿಂತ ಮುಂದೆ ಕಾರ್ಯ ನಿರ್ವಹಿಸಲು ಆಗುವುದಿಲ್ಲ ಎಂದು ಟೆಲಿಕಾಂ ಇಲಾಖೆಗೆ ಬರೆದ ಪತ್ರದಲ್ಲಿ ಸಿಇಒ ಹತಾಶೆ ವ್ಯಕ್ತಪಡಿಸಿದ್ದರು.

ಈ ಹಿನ್ನೆಲೆಯಲ್ಲಿ ಸರ್ಕಾರವು ವೊಡಾಫೋನ್​ಗೆ ಎಜಿಆರ್ ರಿಲೀಫ್ ಕೊಡಲು ಮಾರ್ಗೋಪಾಯ ಹುಡುಕುತ್ತಿರುವ ಸುದ್ದಿ ಇದೆ. ಟೆಲಿಕಾಂ ಇಲಾಖೆಗೆ ವೊಡಾಫೋನ್ ಐಡಿಯಾ 84,000 ಕೋಟಿ ರೂ ಎಜಿಆರ್ ಹಣ ಕೊಡುವುದು ಬಾಕಿ ಇದೆ. ಆರು ವರ್ಷದಲ್ಲಿ ಇದನ್ನು ತೀರಿಸಬೇಕು ಎನ್ನುವ ಅಪ್ಪಣೆ ಇದೆ.

ಇದನ್ನೂ ಓದಿ: ಪೋಸ್ಟ್ ಆಫೀಸ್​​ನ ಕೌಂಟರ್​​ಗಳಲ್ಲಿ ಡಿಜಿಟಪಲ್ ಪೇಮೆಂಟ್ಸ್; ಆಗಸ್ಟ್​​ನಿಂದ ಸೌಲಭ್ಯ ಶುರು

ಸರ್ಕಾರವು ಈ ಗಡುವನ್ನು ಆರು ವರ್ಷದ ಬದಲು 20 ವರ್ಷಕ್ಕೆ ಹೆಚ್ಚಿಸಲು ಆಲೋಚಿಸುತ್ತಿದೆ. ಅಥವಾ ಎಜಿಆರ್ ವಿಷಯ ಪೂರ್ಣವಾಗಿ ಇತ್ಯರ್ಥ ಆಗುವವರೆಗೂ ವರ್ಷಕ್ಕೆ 1,000-1,500 ಕೋಟಿ ರೂ ಹಣವನ್ನು ನೀಡಲು ಅವಕಾಶ ಮಾಡಿಕೊಡುವ ಬಗ್ಗೆಯೂ ಚಿಂತನೆ ನಡೆಸಿದೆ ಎಂದು ಹೇಳಲಾಗುತ್ತಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ