ಭಾರತದ ಈ ವರ್ಷದ ಜಿಡಿಪಿ ದರ ಶೇ. 8.8 ಕೂಡ ಮುಟ್ಟಬಲ್ಲುದು: ಎನ್ಐಪಿಎಫ್ಪಿ ನಿರೀಕ್ಷೆ
NIPFP projects Indian economy to grow 7.4% in 26fy: ದೇಶದ ಜಿಡಿಪಿ ದರ ಈ ಹಣಕಾಸು ವರ್ಷದಲ್ಲಿ ಶೇ. 7.4ರಷ್ಟು ಹೆಚ್ಚಬಹುದು ಎಂದು ಹಣಕಾಸು ಸಚಿವಾಲಯದ ಅಡಿಯ ಸ್ವಾಯತ್ತ ಸಂಸ್ಥೆಯಾದ ಎನ್ಐಪಿಎಫ್ಪಿ ಅಭಿಪ್ರಾಯಪಟ್ಟಿದೆ. ಏಪ್ರಿಲ್ನಲ್ಲಿ ಇದೇ ಸಂಸ್ಥೆಯು ಭಾರತದ ಜಿಡಿಪಿ ಶೇ. 6.6ರಷ್ಟು ಹೆಚ್ಚಬಹುದು ಎಂದು ಅಂದಾಜು ಮಾಡಿತ್ತು. ಹಾಗೆಯೇ, ಈ ವರ್ಷ ಹಣದುಬ್ಬರ ಶೇ. 1.6ರಷ್ಟು ಮಾತ್ರ ಇರಬಹುದು ಎಂದೂ ಈ ಸಂಸ್ಥೆ ಹೇಳಿದೆ.
Updated on:Nov 13, 2025 | 10:07 PM
ನವದೆಹಲಿ, ನವೆಂಬರ್ 13: ಭಾರತದ ಆರ್ಥಿಕತೆ (GDP) ಈ ವರ್ಷ ಉತ್ತಮವಾಗಿ ಬೆಳವಣಿಗೆ ಹೊಂದಬಹುದು ಎಂದು ಹೆಚ್ಚಿನ ಆರ್ಥಿಕ ಸಂಸ್ಥೆಗಳು ಮತ್ತು ಆರ್ಥಿಕ ತಜ್ಞರು ವಿಶ್ಲೇಷಿಸುತ್ತಿದ್ದಾರೆ. 2025-26ರಲ್ಲಿ ಭಾರತದ ಜಿಡಿಪಿ ಶೇ. 6.50ರಿಂದ ಶೇ. 6.8ರವರೆಗೂ ಹೆಚ್ಚಬಹುದು ಎಂದು ಅಂದಾಜಿಸಿದ್ದಾರೆ. ರಾಷ್ಟ್ರೀಯ ಸಾರ್ವಜನಿಕ ಹಣಕಾಸು ಮತ್ತು ನೀತಿ ಸಂಸ್ಥೆ (ಎನ್ಐಪಿಎಫ್ಪಿ) ಒಂದು ಹೆಜ್ಜೆ ಮುಂದೆ ಹೋಗಿ ಆರ್ಥಿಕತೆ ಶೇ. 7.4ರಷ್ಟು ವೃದ್ಧಿಸುವ ಸಾಧ್ಯತೆ ಇದೆ ಎಂದು ಹೇಳಿದೆ. ಅನುಕೂಲ ಪರಿಸ್ಥಿತಿ ಬಂದರೆ ಜಿಡಿಪಿ ಶೇ. 8.8ರಷ್ಟು ಬೆಳೆಯಲೂ ಬಹುದು ಎಂದು ಆಶಿಸಿದೆ.
ಇದೇ ಸಂಸ್ಥೆ ಭಾರತದ ಆರ್ಥಿಕತೆ ಈ ವರ್ಷ ಶೇ. 6.6ರಷ್ಟು ಹೆಚ್ಚಬಹುದು ಎಂದು ಹಿಂದೆ ಮಾಡಿದ ಅಂದಾಜಿನಲ್ಲಿ ಹೇಳಿತ್ತು. ಈಗ ಅದು ಹೆಚ್ಚಿನ ಬೆಳವಣಿಗೆಯನ್ನು ನಿರೀಕ್ಷಿಸುತ್ತಿದೆ. ಜಿಎಸ್ಟಿ ಸಿಸ್ಟಂನಲ್ಲಿ ಸುಧಾರಣೆ, ಗ್ರಾಮೀಣ ಹಾಗೂ ನಗರ ಭಾಗದಲ್ಲಿ ಅನುಭೋಗ ಹೆಚ್ಚುತ್ತಿರುವುದು ಆಂತರಿಕವಾಗಿ ಆರ್ಥಿಕತೆಗೆ ಚುರುಕು ತಂದಿದೆ. ಹಾಗೆಯೇ, ಭಾರತವನ್ನು ಪ್ರಭಾವಿಸುವ ಬಾಹ್ಯ ಅಂಶಗಳಾದ ಅಮೆರಿಕದ ಆರ್ಥಿಕತೆ ಮೊದಲಾದವು ಕೂಡ ಸಕಾರಾತ್ಮಕವಾಗಿರುವುದು ಭಾರತಕ್ಕೆ ಅನುಕೂಲವಾಗಿದೆ ಎಂಬುದು ಎನ್ಐಪಿಎಫ್ಪಿಯ ಅನಿಸಿಕೆ.
ಇದನ್ನೂ ಓದಿ: ಬೆಲೆ ಏರಿಕೆಯಲ್ಲಿ ಭರ್ಜರಿ ಕುಸಿತ; ಅಕ್ಟೋಬರ್ನಲ್ಲಿ ಹಣದುಬ್ಬರ ದರ ಕೇವಲ ಶೇ. 0.25
ಭಾರತದ ಬೆಳವಣಿಗೆ ಮೇಲೆ ಅಮೆರಿಕದ ಆರ್ಥಿಕತೆ ಪರಿಣಾಮ ಎಷ್ಟು?
ಭಾರತದ ಬೆಳವಣಿಗೆಯನ್ನು ಪ್ರಭಾವಿಸುವ ಬಾಹ್ಯ ಅಂಶದ ಬಗ್ಗೆ ಎನ್ಐಪಿಎಫ್ಪಿ ಎರಡು ಸ್ಥಿತಿಗಳನ್ನು ಕಾಣುತ್ತಿದೆ. ಅಮೆರಿಕದ ಆರ್ಥಿಕತೆ ಶೇ. 1ರಷ್ಟು ಅಧಿಕ ಬೆಳವಣಿಗೆ ಕಂಡಲ್ಲಿ ಭಾರತದ ಜಿಡಿಪಿ ಈ ವರ್ಷ ಶೇ. 8.8ರಷ್ಟು ಹೆಚ್ಚಬಹುದು. ಅಕಸ್ಮಾತ್, ಅಮೆರಿಕದ ಜಿಡಿಪಿ ನಿರೀಕ್ಷೆಗಿಂತ ಶೇ. 1 ಕುಸಿತ ಕಂಡರೆ, ಭಾರತದ ಬೆಳವಣಿಗೆ ಶೇ. 6ಕ್ಕೆ ಸೀಮಿತಗೊಳ್ಳಬಹುದು ಎಂದಿದೆ.
ಹಣಕಾಸು ಸಚಿವಾಲಯದ ಅಡಿಯಲ್ಲಿ ಸ್ವಾಯತ್ತ ಸಂಸ್ಥೆಯಾಗಿರುವ ಎಫ್ಐಪಿಎಫ್ಪಿ ದೇಶದ ಹಣದುಬ್ಬರ ಮುಂದಿನ ದಾರಿ ಬಗ್ಗೆಯೂ ಅಂದಾಜು ಮಾಡಿದೆ. ಈ ಹಣಕಾಸು ವರ್ಷದಲ್ಲಿ ರೀಟೇಲ್ ಹಣದುಬ್ಬರ ಶೇ. 1.6 ಇರಬಹುದು ಎಂದು ಹೇಳಿದೆ. ಆರ್ಬಿಐ ಅಂದಾಜು ಮಾಡಿದ್ದ ಶೇ. 2.6ಕ್ಕಿಂತ ಬಹಳ ಕಡಿಮೆ ಹಣದುಬ್ಬರ ಸಾಧ್ಯತೆಯನ್ನು ಇದು ವ್ಯಕ್ತಪಡಿಸಿದೆ.
ಇದನ್ನೂ ಓದಿ: ಮುಂದಿನ ದಿನಗಳಲ್ಲಿ ಭಾರತದ ಜಿಡಿಪಿ, ಹಣದುಬ್ಬರ, ಬಡ್ಡಿದರ ಟ್ರೆಂಡ್ ಹೀಗಿರುತ್ತೆ: ಯುಬಿಎಸ್ ಅಂದಾಜು
ಅಕ್ಟೋಬರ್ ತಿಂಗಳಲ್ಲಿ ಭಾರತದ ಹಣದುಬ್ಬರ ಶೇ 0.25ಕ್ಕೆ ಇಳಿದಿರುವುದು ಗಮನಾರ್ಹ. ಸಿಪಿಐ ಆಧಾರಿತವಾಗಿ ಹಣದುಬ್ಬರ ಲೆಕ್ಕಾಚಾರ ಆರಂಭಗೊಂಡಾಗಿನಿಂದ ಈ ಬೆಲೆ ಏರಿಕೆ ಮಟ್ಟ ಕನಿಷ್ಠಕ್ಕೆ ಇಳಿದಿರುವುದು ಇದೇ ಮೊದಲು. ಆಹಾರವಸ್ತುಗಳ ಬೆಲೆ ಗಣನೀಯವಾಗಿ ಕುಸಿದಿರುವುದು ಹಣದುಬ್ಬರ ಇಳಿಕೆಗೆ ಕಾರಣವಾಗಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 10:07 pm, Thu, 13 November 25
