2024ರಲ್ಲಿ ಅತಿಹೆಚ್ಚು ರೆಮಿಟೆನ್ಸ್ ಪಡೆದ ದೇಶಗಳಲ್ಲಿ ಭಾರತ ಮೊದಲು; 129 ಬಿಲಿಯನ್ ಡಾಲರ್ ರೆಮಿಟೆನ್ಸ್ ಹರಿವು

ನವದೆಹಲಿ, ಡಿಸೆಂಬರ್ 19: ಈ ಕ್ಯಾಲಂಡರ್ ವರ್ಷದಲ್ಲಿ ಅತಿಹೆಚ್ಚು ರಿಮಿಟೆನ್ಸ್ (remittance) ಪಡೆದ ದೇಶಗಳಲ್ಲಿ ಭಾರತ ಮೊದಲ ಸ್ಥಾನ ಪಡೆದಿದೆ. ವಿಶ್ವಬ್ಯಾಂಕ್ ವರದಿಯೊಂದರ (world bank economists blog post) ಪ್ರಕಾರ ಭಾರತಕ್ಕೆ 2024ರಲ್ಲಿ 129 ಬಿಲಿಯನ್ ಡಾಲರ್​ನಷ್ಟು ರಿಮಿಟೆನ್ಸ್ ಬಂದಿದೆ. ಅಂದರೆ, ವಿದೇಶಗಳಲ್ಲಿ ನೆಲಸಿರುವ ಭಾರತೀಯ ಸಮುದಾಯವರು ತಮ್ಮ ತವರೂರುಗಳಿಗೆ ಕಳುಹಿಸಿರುವ ಹಣ 2024ರಲ್ಲಿ ಸುಮಾರು 9-10 ಲಕ್ಷ ಕೋಟಿ ರೂನಷ್ಟಿದೆ. ಮೆಕ್ಸಿಕೋ, ಚೀನಾ, ಫಿಲಿಪ್ಪೈನ್ಸ್ ಮತ್ತು ಪಾಕಿಸ್ತಾನವೂ ಕೂಡ ಹೆಚ್ಚು ರಿಮಿಟೆನ್ಸ್ ಪಡೆದ ದೇಶಗಳ ಸಾಲಿನಲ್ಲಿವೆ.

ಬೇರೆ ಬೇರೆ ದೇಶಗಳಿಗೆ ಹಣ ರವಾನೆಯಾಗುವುದು ಈ ವರ್ಷ ಶೇ. 5.8ರಷ್ಟು ಹೆಚ್ಚಾಗಿದೆ. ಅಧಿಕ ಆದಾಯದ ದೇಶಗಳಲ್ಲಿ ಉದ್ಯೋಗ ಮಾರುಕಟ್ಟೆ ಚೇತರಿಸಿಕೊಂಡಿರುವುದು ಹಣ ರವಾನೆಗೆ ಪುಷ್ಟಿ ಕೊಟ್ಟಿರಬಹುದು ಎಂದು ವಿಶ್ವಬ್ಯಾಂಕ್ ಆರ್ಥಿಕತಜ್ಞರ ಬ್ಲಾಗ್ ಪೋಸ್ಟ್​​ವೊಂದರಲ್ಲಿ ಬರೆಯಲಾಗಿದೆ.

ಇದನ್ನೂ ಓದಿ: ಸಕ್ಕರೆ ಕಾರ್ಖಾನೆಗಳಿಂದ ಕಬ್ಬು ಬೆಳೆಗಾರರಿಗೆ ಈ ಸೀಸನ್​ನಲ್ಲಿ 8,126 ಕೋಟಿ ರೂ ಪಾವತಿ

2024ರಲ್ಲಿ ಕೆಳ ಮತ್ತು ಮಧ್ಯಮ ಆದಾಯದ ದೇಶಗಳಿಗೆ ಅಧಿಕೃತವಾಗಿ ಆಗುವ ಹಣ ರವಾನೆ ಅಥವಾ ರೆಮಿಟೆನ್ಸ್ 685 ಬಿಲಿಯನ್ ಡಾಲರ್ ಮಟ್ಟ ಮುಟ್ಟಬಹುದು ಎಂದು ಅಂದಾಜಿಸಲಾಗಿದೆ. ಈ ದೇಶಗಳಿಗೆ ವಿದೇಶಗಳಿಂದ ಹರಿದುಬರುವ ಹಣದಲ್ಲಿ ರೆಮಿಟೆನ್ಸ್ ಪಾಲು ಅತಿ ಹೆಚ್ಚು ಎನ್ನಲಾಗಿದೆ. ಎಫ್​ಡಿಐಗಿಂತಲೂ ಹೆಚ್ಚು ಮೊತ್ತದ ಹಣ ರೆಮಿಟೆನ್ಸ್ ಮೂಲಕ ಈ ದೇಶಗಳಿಗೆ ಹರಿದುಬರುತ್ತದೆ. ಕಳೆದ ದಶಕದಲ್ಲಿ ರೆಮಿಟನ್ಸ್ ಪ್ರಮಾಣದಲ್ಲಿ ಶೇ. 57ರಷ್ಟು ಹೆಚ್ಚಳ ಆಗಿದೆ. ಅದೇ ವೇಳೆ ಎಫ್​ಡಿಐನಲ್ಲಿ ಶೇ. 41ರಷ್ಟು ಇಳಿಕೆ ಆಗಿದೆ.

ಈ ಕೆಳ ಮತ್ತು ಮಧ್ಯಮ ಆದಾಯದ ದೇಶಗಳಲ್ಲಿ ಜನಸಂಖ್ಯಾ ಬಲ ಇದ್ದು, ಶ್ರೀಮಂತ ದೇಶಗಳಲ್ಲಿ ಕೆಲಸ ಮಾಡಲು ಜನರು ವಲಸೆ ಹೋಗುವುದು ಸಾಮಾನ್ಯ.

ಇದನ್ನೂ ಓದಿ: ಭಾರತ್ ಮಾಲಾ ಯೋಜನೆಯಡಿ ಅ. 31ರವರೆಗೆ 18,714 ಕಿಮೀ ಹೆದ್ದಾರಿಗಳ ನಿರ್ಮಾಣ: ಸರ್ಕಾರದಿಂದ ಮಾಹಿತಿ

2024ರಲ್ಲಿ ಅತಿಹೆಚ್ಚು ರೆಮಿಟೆನ್ಸ್ ಪಡೆದ ದೇಶಗಳು

• ಭಾರತ: 129 ಬಿಲಿಯನ್ ಡಾಲರ್
• ಮೆಕ್ಸಿಕೋ: 68 ಬಿಲಿಯನ್ ಡಾಲರ್
• ಚೀನಾ: 48 ಬಿಲಿಯನ್ ಡಾಲರ್
• ಫಿಲಿಪ್ಪೈನ್ಸ್: 40 ಬಿಲಿಯನ್ ಡಾಲರ್
• ಪಾಕಿಸ್ತಾನ್: 33 ಬಿಲಿಯನ್ ಡಾಲರ್.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ