Jamshetji Tata: ಶತಮಾನದ ಟಾಪ್ 50 ದಾನಿಗಳಲ್ಲಿ ಜಮ್ಷೆಡ್​ ಜೀ ಟಾಟಾ ನಂಬರ್ 1; ನೀಡಿದ ದೇಣಿಗೆ 10,200 ಕೋಟಿ ಯುಎಸ್​ಡಿ

ಜಾಗತಿಕ ಮಟ್ಟದಲ್ಲಿ ಕಳೆದ ನೂರು ವರ್ಷಗಳಲ್ಲಿ ಅತಿ ಹೆಚ್ಚು ದಾನ ಮಾಡಿದ ವ್ಯಕ್ತಿಯ ಪಟ್ಟಿಯಲ್ಲಿ ಯಾರಿದ್ದಾರೆ ಗೊತ್ತಾ? ಭಾರತೀಯರಾದ ಜಮ್ಷೆಡ್​ಜೀ ಟಾಟಾ. ಇವತ್ತಿಗೆ ಉಪ್ಪಿನಿಂದ ಸಾಫ್ಟ್​ವೇರ್ ತನಕ ದೊಡ್ಡದಾಗಿ ಬೆಳೆದುನಿಂತಿರುವ ಟಾಟಾ ಸಾಮ್ರಾಜ್ಯದ ಮೂಲಪುರುಷ ಅವರು. ಜಮ್ಷೆಡ್​ಜೀ ಅವರು ನೀಡಿದ ದಾನದ ಪ್ರಮಾಣ 10,200 ಕೋಟಿ ಅಮೆರಿಕನ್ ಡಾಲರ್. ನಿಮಗೆ ಗೊತ್ತಿರಲಿ, ಜಮ್ಷೆಡ್​ಜೀ ನೌಸ್ಸೆರ್​ವಾನ್​ಜೀ ಟಾಟಾ ಕಾಲಾವಧಿ 1839ರಿಂದ 1904. ಅವರು ಕಾಲವಾದ 117 ವರ್ಷಗಳ ನಂತರವೂ ನಂಬರ್ 1 ಸ್ಥಾನದಲ್ಲಿ ಇರುವವರು ಜಮ್ಷೆಡ್​ಜೀ ಅಂದರೆ ಇದರಲ್ಲೇ ಗೊತ್ತಾಗುತ್ತದೆ ಅವರು ದಾನ ಮಾಡಿದ ಪ್ರಮಾಣ. ಹ್ಯುರನ್ ರಿಪೋರ್ಟ್ ಅಂಡ್​ ಎಡೆಲ್​ಗೀವ್ ಫೌಂಡೇಷನ್ ಸೇರಿ ಟಾಪ್- 50 ದಾನ ಮಾಡಿದವರ ಪಟ್ಟಿ ಬಿಡುಗಡೆ ಮಾಡಲಾಗಿದೆ.

ಟಾಟಾ ನಂತರದ ಸ್ಥಾನದಲ್ಲಿ ಬಿಲ್​ ಗೇಟ್ಸ್​ ಮತ್ತು ಅವರಿಂದ ವಿಚ್ಛೇದಿತರಾದ ಮೆಲಿಂಡಾ ಗೇಟ್ಸ್ 7460 ಕೋಟಿ ಅಮೆರಿಕನ್ ಡಾಲರ್ ದೇಣಿಗೆಯೊಂದಿಗೆ ಎರಡನೇ ಸ್ಥಾನದಲ್ಲಿದ್ದಾರೆ. ವಾರೆನ್ ಬಫೆಟ್ 3740 ಕೋಟಿ ಅಮೆರಿಕನ್ ಡಾಲರ್, ಜಾರ್ಜ್ ಸೊರೊಸ್ 3480 ಕೋಟಿ ಯುಎಸ್​ಡಿ, ಜಾನ್ ಡಿ. ರಾಕೆಫೆಲ್ಲರ್ 2680 ಕೋಟಿ ಡಾಲರ್​ ದೇಣಿಗೆ ನೀಡುವುದರೊಂದಿಗೆ ಪಟ್ಟಿಯಲ್ಲಿ ಸ್ಥಾನ ಪಡೆದುಕೊಂಡಿದ್ದಾರೆ. “ದಾನ- ದೇಣಿಗೆ ವಿಚಾರದಲ್ಲಿ ಕಳೆದ ಶತಮಾನದಲ್ಲಿ ಅಮೆರಿಕನ್ನರು ಮತ್ತು ಯುರೋಪಿಯನ್ನರು ಪಾರಮ್ಯ ಸಾಧಿಸಿರುವುದು ಕಂಡುಬರಬಹುದು. ಆದರೆ ಭಾರತದ ಟಾಟಾ ಸಮೂಹದ ಸ್ಥಾಪಕ ಜಮ್ಷೆಡ್​ ಜೀ ಟಾಟಾ ವಿಶ್ವದ ಅತಿ ದೊಡ್ಡ ದಾನಿ ಎನಿಸಿದ್ದಾರೆ,” ಎಂದು ಹ್ಯುರನ್ ಮುಖ್ಯ ಸಂಶೋಧಕ ಹಾಗೂ ಅಧ್ಯಕ್ಷ ರುಪರ್ಟ್ ಹೂಗೆವರ್ಫ್ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.

ಉತ್ತಮ ಕಾರ್ಯಗಳಿಗಾಗಿ ಮೂರನೇ ಎರಡು ಭಾಗದಷ್ಟು ಮಾಲೀಕತ್ವವನ್ನು ಟ್ಟಸ್ಟ್​ಗಳಿಗಾಗಿ ಎತ್ತಿಟ್ಟಂಥ ಜಮ್ಷೆಡ್​ಜೀ ಟಾಟಾ ಶಿಕ್ಷಣ, ಹೆಲ್ತ್​ಕೇರ್​ ಸೇರಿ ವಿವಿಧ ಕ್ಷೇತ್ರಗಳಲ್ಲಿ ಸಹಾಯ ಮಾಡಿ, ನೀಡುವುದರಲ್ಲಿ ಮೊದಲ ಸ್ಥಾನದಲ್ಲಿ ಇದ್ದಾರೆ ಎಂದಿದ್ದಾರೆ. ಅಂದ ಹಾಗೆ 1892ರಿಂದಲೇ ಜಮ್ಷೆಡ್​ ಜೀ ದಾನ ಕಾರ್ಯಗಳನ್ನು ಆರಂಭಿಸಿದ್ದಾರೆ. ಈ ಪಟ್ಟಿಯಲ್ಲಿ ಮತ್ತೊಬ್ಬರು ಮತ್ತು ಒಬ್ಬೇ ಒಬ್ಬರು ಭಾರತೀಯ ಅಂದರೆ ಅದು ವಿಪ್ರೋ ಕಂಪೆನಿಯ ಅಜೀಂ ಪ್ರೇಮ್​ಜೀ. ವರ್ಚುವಲಿ ತಮ್ಮ ಎಲ್ಲ ಆಸ್ತಿ, 2200 ಕೋಟಿ ಅಮೆರಿಕನ್ ಡಾಲರ್​ ಅನ್ನು ದಾನ ಕಾರ್ಯಗಳಿಗೆ ನೀಡಿದ್ದಾರೆ.

ಆಲ್ಫ್ರೆಡ್ ನೊಬೆಲ್ ಹೆಸರು ಕಳೆದ ಶತಮಾನದಲ್ಲಿನ ಈ ಟಾಪ್- 50 ಪಟ್ಟಿಯಲ್ಲಿ ಕೂಡ ಇಲ್ಲ. ಇನ್ನೂ ಕೆಲವು ಅಚ್ಚರಿಯ ಹೆಸರುಗಳೂ ಇವೆ. 50 ಜನರ ಪಟ್ಟಿಯ ಪೈಕಿ ಅಮೆರಿಕದ 39 ಮಂದಿ, ಆ ನಂತರ ಯುನೈಟೆಡ್ ಕಿಂಗ್​ಡಮ್​ನ 5, ಚೀನಾ 3 ಮಂದಿ ಇದ್ದಾರೆ. ಇನ್ನು ಒಟ್ಟು 50 ಮಂದಿಯ ಪೈಕಿ ಜೀವಂತ ಇರುವವರು 13 ಮಂದಿ ಮಾತ್ರ. ಮೂವರು ವೈಯಕ್ತಿಕವಾಗಿ ಒಂದೇ ವರ್ಷದಲ್ಲಿ 5000 ಕೋಟಿ ಅಮೆರಿಕನ್ ಡಾಲರ್ ಒಂದೇ ವರ್ಷದಲ್ಲಿ ಸೇರ್ಪಡೆ ಮಾಡಿದ್ದಾರೆ. ಅದರಲ್ಲಿ ಎಲಾನ್ ಮಸ್ಕ್ 15,100 ಕೋಟಿ ಯುಎಸ್​ಡಿಯೊಂದಿಗೆ ಮುಂಚೂಣಿಯಲ್ಲಿದ್ದಾರೆ. ಜೆಫ್​ ಬೆಜೋಸ್, ಕಾಲಿನ್ ಹ್ಯುಯಾಂಗ್ ತಲಾ 5000 ಕೋಟಿ ಸೇರ್ಪಡೆ ಮಾಡಿದ್ದಾರೆ.

“ಈ ದರದಲ್ಲಿ, ಐವತ್ತು ಅಥವಾ ಅದಕ್ಕಿಂತ ಹೆಚ್ಚು ಮಂದಿ ಮುಂದಿನ 5 ವರ್ಷಗಳಲ್ಲಿ 10,000 ಕೋಟಿ ದಾಟಬಹುದು,” ಎಂದು ಹೂಗೆವರ್ಫ್ ತಿಳಿಸಿದ್ದಾರೆ. ಕಳೆದ 100 ವರ್ಷಗಳಲ್ಲಿ 83,200 ಕೋಟಿ ಅಮೆರಿಕನ್ ಡಾಲರ್​ ಅನ್ನು ಈ ಐವತ್ತು ಮಂದಿ ನೀಡಿದ್ದಾರೆ. ಆ ಪೈಕಿ 50,300 ಕೋಟಿ ಅಮೆರಿಕನ್ ಡಾಲರ್ ಫೌಂಡೇಷನ್​ ಎಂಡೋಮೆಂಟ್ ಹಾಗೂ 32,900 ಕೋಟಿ ಯುಎಸ್​ಡಿ ದೇಣಿಗೆ ಇಲ್ಲಿ ತನಕ ನೀಡಲಾಗಿದೆ.

ವಾರ್ಷಿಕ ಅನುದಾನವು ಗರಿಷ್ಠ 3000 ಕೋಟಿ ಅಮೆರಿಕನ್ ಡಾಲರ್ ಬಂದಿದೆ ಎಂದು ಹ್ಯುರನ್ ಹೇಳಿದೆ. 850 ಕೋಟಿ ಅಮೆರಿಕನ್ ಡಾಲರ್​ನೊಂದಿಗೆ ಮೆಕ್​ಕೆಂಜಿ ಸ್ಕಾಟ್ ಅತಿದೊಡ್ಡ ವಾರ್ಷಿಕ ಅನುದಾನ ಮಾಡಿರುವವರು ಆಗಿದ್ದಾರೆ. ಹೂಗೆವರ್ಪ್ ಹೇಳುವಂತೆ, ಈಗಿನ ಶತಕೋಟ್ಯಧಿಪತಿಗಳು ದಾನ ನೀಡುವುದಕ್ಕಿಂತ ಹೆಚ್ಚು ವೇಗವಾಗಿ ಗಳಿಕೆ ಮಾಡುತ್ತಾರೆ.

Published On - 6:28 pm, Wed, 23 June 21