ಸೆಪ್ಟೆಂಬರ್‌ನಲ್ಲಿ 121.28ರೂ.ಗೆ ಜಿಗಿದ ಏವಿಯೇಷನ್ ಇಂಧನ ಬೆಲೆ, ಸತತ ಎರಡನೇ ತಿಂಗಳು ಕೂಡ ಏರಿದ ಬೆಲೆ
ಸೆಪ್ಟೆಂಬರ್ 1ರಿಂದ ಏವಿಯೇಷನ್ ಇಂಧನ (ATF) ಬೆಲೆ ಲೀಟರ್‌ಗೆ 6.28 ರೂ. ಹೆಚ್ಚಾಗಿ 121.28 ರೂ. ತಲುಪಿದೆ. ಆಗಸ್ಟ್ ನಂತರ ಇದು ಸತತ ಎರಡನೇ ತಿಂಗಳ ಏರಿಕೆಯಾಗಿದೆ. ವಿಮಾನಯಾನ ಸಂಸ್ಥೆಗಳ ಕಾರ್ಯಚರಣೆ ವೆಚ್ಚದಲ್ಲಿ ಶೇ 35-40ರಷ್ಟು ಇಂಧನದ್ದೇ ಆಗಿದ್ದು, ಈ ಏರಿಕೆಯಿಂದಾಗಿ ವಿಮಾನ ಟಿಕೆಟ್ ದರಗಳು ಹಬ್ಬದ ಋತುವಿನಲ್ಲಿ ದುಬಾರಿಯಾಗುವ ಸಾಧ್ಯತೆ ಇದೆ.
ನವದೆಹಲಿ, ಸೆಪ್ಟೆಂಬರ್ 1: ಸರ್ಕಾರಿ ಸ್ವಾಮ್ಯದ ತೈಲ ಮಾರುಕಟ್ಟೆ ಕಂಪನಿಗಳು (IOCL, BPCL, HPCL) ದೇಶೀಯ ವಿಮಾನಯಾನ ಸಂಸ್ಥೆಗಳಿಗೆ ಪೂರೈಸುವ ಏವಿಯೇಷನ್ ಟರ್ಬೈನ್ ಇಂಧನ (ATF) ದರವನ್ನು ಲೀಟರ್‌ಗೆ 6.28 ರೂ.ನಷ್ಟು ಹೆಚ್ಚಳ ಮಾಡಿವೆ. ಸೆಪ್ಟೆಂಬರ್1 ರಿಂದ ಜಾರಿಗೆ ಬಂದಿರುವ ಈ ಪರಿಷ್ಕರಣೆಯೊಂದಿಗೆ ಜೆಟ್ ಇಂಧನ ದರವು ಪ್ರತಿ ಲೀಟರ್‌ಗೆ 115 ರೂ.ನಿಂದ 121.28 ರೂ.ಗೆ ತಲುಪಿದೆ. ಆಗಸ್ಟ್ ತಿಂಗಳಲ್ಲಿ 5 ರೂ. ಹೆಚ್ಚಳವಾಗಿದ್ದ ಬೆನ್ನಲ್ಲೇ ಇದು ಸತತ ಎರಡನೇ ತಿಂಗಳ ಏರಿಕೆಯಾಗಿದೆ.
ವಿಮಾನ ಪ್ರಯಾಣ ದುಬಾರಿಯಾಗಲಿದೆಯೇ?
ವೆಚ್ಚದ ಮೇಲೆ ಪರಿಣಾಮ: ಭಾರತೀಯ ವಿಮಾನಯಾನ ಸಂಸ್ಥೆಗಳ (Airlines) ಒಟ್ಟು ಕಾರ್ಯಾಚರಣಾ ವೆಚ್ಚದಲ್ಲಿ ಕೇವಲ ಇಂಧನ ವೆಚ್ಚವೇ (ATF) ಶೇಕಡಾ 35 ರಿಂದ 40 ರಷ್ಟು ಇರುತ್ತದೆ.
ದರ ಏರಿಕೆಯ ಸಾಧ್ಯತೆ: ಇಂಧನ ಬೆಲೆ ಸತತವಾಗಿ ಏರುತ್ತಿರುವುದರಿಂದ ವಿಮಾನಯಾನ ಸಂಸ್ಥೆಗಳ ಮೇಲಿನ ಆರ್ಥಿಕ ಹೊರೆ ಹೆಚ್ಚಾಗಲಿದ್ದು, ಮುಂಬರುವ ಹಬ್ಬದ ಋತುವಿನಲ್ಲಿ ವಿಮಾನ ಟಿಕೆಟ್ ದರಗಳು ಹೆಚ್ಚಾಗುವ ಸಾಧ್ಯತೆಯಿದೆ. ಆದಾಗ್ಯೂ, ಸ್ಪರ್ಧೆ ಮತ್ತು ಆಸನಗಳ ಬೇಡಿಕೆಯ ಆಧಾರದ ಮೇಲೆ ಅಂತಿಮ ಟಿಕೆಟ್ ಬೆಲೆ ನಿರ್ಧಾರವಾಗಲಿದೆ.
ಮತ್ತಷ್ಟು ಓದಿ: LPG Price Hike:ಸೆಪ್ಟೆಂಬರ್ ಆರಂಭದಲ್ಲೇ ಬೆಲೆ ಏರಿಕೆ ಬಿಸಿ: ವಾಣಿಜ್ಯ ಬಳಕೆಯ ಎಲ್ಪಿಜಿ ಸಿಲಿಂಡರ್ ದರ 9.50 ರೂ. ಹೆಚ್ಚಳ
ಇಂಧನ ರಫ್ತು ಮೇಲಿನ ವಿಂಡ್‌ಫಾಲ್ ತೆರಿಗೆ ಕಡಿತ
ಕಚ್ಚಾ ತೈಲ ಮತ್ತು ಇಂಧನ ಮಾರುಕಟ್ಟೆಯಲ್ಲಿನ ಸ್ಥಿರತೆ ಕಾಪಾಡಲು ಕೇಂದ್ರ ಸರ್ಕಾರವು ಪೆಟ್ರೋಲ್, ಡೀಸೆಲ್ ಮತ್ತು ಎಟಿಎಫ್ ರಫ್ತಿನ ಮೇಲಿನ ವಿಶೇಷ ಹೆಚ್ಚುವರಿ ಅಬಕಾರಿ ಸುಂಕವನ್ನು ಇತ್ತೀಚೆಗೆ ಕಡಿತಗೊಳಿಸಿತ್ತು.
ಎಟಿಎಫ್ ರಫ್ತು ಸುಂಕವನ್ನು ಪ್ರತಿ ಲೀಟರ್‌ಗೆ 22 ರೂ.ನಿಂದ 19.5 ರೂ.ಗೆ ಹಾಗೂ ಡೀಸೆಲ್ ರಫ್ತು ಸುಂಕವನ್ನು 25.5 ರೂ.ನಿಂದ 24 ರೂ.ಗೆ ಇಳಿಸಲಾಗಿತ್ತು.
ಪಶ್ಚಿಮ ಏಷ್ಯಾ ಬಿಕ್ಕಟ್ಟು: 2026ರ ಆರಂಭದಿಂದಲೂ ಮಧ್ಯಪ್ರಾಚ್ಯದಲ್ಲಿ ಅಮೆರಿಕ-ಇರಾನ್ ಮತ್ತು ಕೆಂಪು ಸಮುದ್ರ ವ್ಯಾಪ್ತಿಯಲ್ಲಿ ಹೆಚ್ಚುತ್ತಿರುವ ಸೇನಾ ಸಂಘರ್ಷಗಳು ಕಚ್ಚಾ ತೈಲ ಪೂರೈಕೆ ಮೇಲೆ ಪರಿಣಾಮ ಬೀರಿದ್ದು, ಜಾಗತಿಕ ಜೆಟ್ ಇಂಧನ ಮಾರುಕಟ್ಟೆಯಲ್ಲಿ ಅಸ್ಥಿರತೆ ಸೃಷ್ಟಿಸಿದೆ.
ವಾಣಿಜ್ಯ ಎಲ್ಪಿಜಿ ದರವೂ ಹೆಚ್ಚಳ: ಜೆಟ್ ಇಂಧನದ ಜೊತೆಗೆ 19 ಕೆಜಿ ವಾಣಿಜ್ಯ ಎಲ್ಪಿಜಿ ಸಿಲಿಂಡರ್ ಬೆಲೆಯೂ 9.50ಯಷ್ಟು ಏರಿಕೆಯಾಗಿದ್ದು, 2,747 ರೂ.ಗೆ ತಲುಪಿದೆ.
ವಾಣಿಜ್ಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ