Lemon Price Surge: ಸೇಬು, ದಾಳಿಂಬೆಗಿಂತ ನಿಂಬೆಹಣ್ಣು ದುಬಾರಿ! ಕೇಜಿಗೆ 200 ರೂಪಾಯಿಯಂತೆ ಗುಜರಾತ್ನಲ್ಲಿ
ಭಾರೀ ಬೇಡಿಕೆ ಹಾಗೂ ಪೂರೈಕೆಯಲ್ಲಿನ ವ್ಯತ್ಯಯದ ಕಾರಣಕ್ಕೆ ಗುಜರಾತ್ನಲ್ಲಿ ನಿಂಬೆಹಣ್ಣಿನ ಬೆಲೆ ಕೇಜಿಗೆ 200 ರೂಪಾಯಿ ತಲುಪಿದೆ. ಇದರ ಜತೆಗೆ ಇತರ ತರಕಾರಿಗಳ ಬೆಲೆಯೂ ಹೆಚ್ಚಾಗಿದೆ.
Updated on: Apr 02, 2022 | 11:38 AM
ಗುಜರಾತ್ನಲ್ಲಿ ನಿಂಬೆಹಣ್ಣಿನ ಬೆಲೆ ಭಾರೀ ಪ್ರಮಾಣದಲ್ಲಿ ಏರಿಕೆ (Price Hike) ಆಗಿದೆ. ಪೂರೈಕೆಯಲ್ಲಿನ ಕೊರತೆ ಮತ್ತು ಬೇಸಿಗೆಯ ಶಾಖದಿಂದಾಗಿ ನಿಂಬೆಹಣ್ಣಿಗೆ ಬೇಡಿಕೆ ವಿಪರೀತ ಆಗಿದೆ. ಸುದ್ದಿ ಸಂಸ್ಥೆ ಎಎನ್ಐ ಪ್ರಕಾರ, ಗುಜರಾತ್ನ ರಾಜ್ಕೋಟ್ನಲ್ಲಿ ನಿಂಬೆಹಣ್ಣು ಕೇಜಿಗೆ 200 ರೂಪಾಯಿಯಂತೆ ಮಾರಾಟ ಆಗುತ್ತಿದ್ದು, ಈ ಹಿಂದಿನ ದರ ಕೇಜಿಗೆ 50ರಿಂದ 60 ರೂಪಾಯಿ ಇತ್ತು. “ನಿಂಬೆಹಣ್ಣಿನ ಬೆಲೆ ಕೇಜಿಗೆ 200 ರೂಪಾಯಿ ಮುಟ್ಟುತ್ತಿದೆ. ಈ ಹಿಂದೆ ಇದು 50ರಿಂದ 60 ರೂಪಾಯ ಇತ್ತು. ಇದರಿಂದಾಗಿ ಅಡುಗೆ ಮನೆಯ ಬಜೆಟ್ ಮೇಲೆ ಪರಿಣಾಮ ಆಗುತ್ತದೆ. ಯಾವಾಗ ಇದರ ಬೆಲೆ ಕಡಿಮೆ ಆಗುತ್ತದೆ ಎಂಬುದು ಸಹ ನಮಗೆ ಗೊತ್ತಿಲ್ಲ,” ಎಂದು ಗ್ರಾಹಕರೊಬ್ಬರು ತಿಳಿಸಿರುವುದಾಗಿ ಸುದ್ದಿ ಸಂಸ್ಥೆಯು ವರದಿ ಮಾಡಿದೆ. ತಾಪಮಾನ ಹೆಚ್ಚಾದಂತೆ ವಿಟಮಿನ್ ಸಿ ಹೆಚ್ಚಾಗಿರುವ ನಿಂಬೆಹಣ್ಣನ್ನು ತಮ್ಮ ಆಹಾರದಲ್ಲಿ ಸೇರಿಸಲು ಬಯಸುತ್ತಾರೆ. ಇದರಿಂದ ದೇಹದಲ್ಲಿ ನೀರಿನ ಅಂಶ ಉಳಿಸಿಕೊಳ್ಳುವುದಕ್ಕೆ ಮತ್ತು ಜೀರ್ಣ ವ್ಯವಸ್ಥೆಯನ್ನು ಹೆಚ್ಚಿಸುವುದಕ್ಕೆ ಸಹಕಾರಿ ಆಗುತ್ತದೆ. ಹೆಚ್ಚುತ್ತಿರುವ ಬಳಕೆ ಮತ್ತು ಪೂರೈಕೆಯಲ್ಲಿನ ಕೊರತೆಯಿಂದಾಗಿ ನಿಂಬೆಹಣ್ಣಿನ ಬೆಲೆ ಗಗನಕ್ಕೆ ಏರಿದೆ.
“ಹತ್ತಿರ ಹತ್ತಿರ ಎಲ್ಲ ತರಕಾರಿಗಳ ಬೆಲೆಯಲ್ಲೂ ಏರಿಕೆ ಆಗಿದೆ. ಆದರೆ ಇದು ನಾವು ನಿರೀಕ್ಷೆ ಮಾಡಿದ್ದಕ್ಕಿಂತ ಹೆಚ್ಚಿನದಾಗಿದೆ. ಇಂಥ ದುಬಾರಿ ತರಕಾರಿಗಳನ್ನು ಖರೀದಿಸುವುದು ಮಧ್ಯಮ ವರ್ಗದವರಿಗೆ ಕಷ್ಟ. ಈ ಹಿಂದೆ ದೊಡ್ಡ ಪ್ರಮಾಣದಲ್ಲಿ ಖರೀದಿಸಿದಂತೆ ಈಗ ನಿಂಬೆಹಣ್ಣನ್ನು ಕೊಳ್ಳಲು ಆಗುವುದಿಲ್ಲ. ಕಳೆದ ವರ್ಷ ಮಾರ್ಚ್ನಲ್ಲಿ ನಾವು ಪಾವತಿಸುತ್ತಿದ್ದ ದರದ ದುಪ್ಪಟ್ಟಾಗಿದೆ. ಏಪ್ರಿಲ್-ಮೇ ತಿಂಗಳಲ್ಲಿ ಏನಾಗುತ್ತದೋ ಎಂದು ನೋಡಬೇಕು,” ಎಂಬುದಾಗಿ ಖರೀದಿದಾರರೊಬ್ಬರು ತಿಳಿಸಿದ್ದಾರೆ.
ಈ ಹಿಂದೆ ನಾವು ವಾರಕ್ಕೆ 1 ಕೇಜಿ ನಿಂಬೆಹಣ್ಣು ಖರೀದಿ ಮಾಡುತ್ತಿದ್ದೆವು. ಆದರೆ ಈಗ 250 ಅಥವಾ 500 ಗ್ರಾಮ್ಗೆ ಇಳಿಕೆ ಮಾಡಿದ್ದೇವೆ. ಅದಕ್ಕೆ ಕಾರಣ ಈ ಬೆಲೆ ಏರಿಕೆ. ಇದರಿಂದಾಗಿ ನಮ್ಮ ಖರ್ಚಿನ ಮೇಲೆ ಪರಿಣಾಮ ಆಗಿದೆ ಎಂದು ಮತ್ತೊಬ್ಬ ಖರೀದಿದಾರರು ಹೇಳಿದ್ದಾರೆ.
ಇದನ್ನೂ ಓದಿ: LPG Cylinder Price Hike: ಬೆಲೆ ಏರಿಕೆ ಶಾಕ್! ಗೃಹ ಬಳಕೆಯ LPG ಸಿಲಿಂಡರ್ ದರ ಹೆಚ್ಚಳ
