ಜೆಟ್ ಏರ್ವೇಸ್ನ ನರೇಶ್ ಗೋಯಲ್ಗೆ ವೈದ್ಯಕೀಯ ಜಾಮೀನು ನೀಡಿದ ಬಾಂಬೆ ಹೈಕೋರ್ಟ್
Bombay HC grants medical bail to Naresh Goyal: ಮನಿ ಲಾಂಡರಿಂಗ್ ಪ್ರಕರಣದಲ್ಲಿ ಸಿಲುಕಿರುವ ಜೆಟ್ ಏರ್ವೇಸ್ ಸಂಸ್ಥಾಪಕ ನರೇಶ್ ಗೋಯಲ್ ಅವರಿಗೆ ವೈದ್ಯಕೀಯ ಜಾಮೀನು ಸಿಕ್ಕಿದೆ. ಮೇ ತಿಂಗಳಲ್ಲಿ ಅವರಿಗೆ ಮಧ್ಯಂತರ ಜಾಮೀನು ನೀಡಲಾಗಿತ್ತು. ಬಾಂಬೆ ಹೈಕೋರ್ಟ್ ಈಗ ಆ ಮಧ್ಯಂತರ ಆದೇಶವನ್ನು ಖಾಯಂ ಮಾಡಿದೆ. 2023ರ ಸೆಪ್ಟೆಂಬರ್ನಲ್ಲಿ ಇಡಿಯಿಂದ ಬಂಧಿತರಾಗಿದ್ದ ಗೋಯಲ್ ಅವರು ಕ್ಯಾನ್ಸರ್ ಕಾಯಿಲೆಯಿಂದ ಬಳಲುತ್ತಿದ್ದಾರೆ.

ಮುಂಬೈ, ನವೆಂಬರ್ 11: ಅಕ್ರಮ ಹಣ ವರ್ಗಾವಣೆ ಪ್ರಕರಣದಲ್ಲಿ ಆರೋಪಿಯಾಗಿರುವ ಜೆಟ್ ಏರ್ವೇಸ್ ಸಂಸ್ಥಾಪಕ ನರೇಶ್ ಗೋಯಲ್ ಅವರಿಗೆ ಬಾಂಬೆ ಹೈಕೋರ್ಟ್ ಮೆಡಿಕಲ್ ಬೇಲ್ ನೀಡಿದೆ. ಕ್ಯಾನ್ಸರ್ ಕಾಯಿಲೆಯಿಂದ ಬಳಲುತ್ತಿರುವ ನರೇಶ್ ಗೋಯಲ್ ಅವರಿಗೆ ಚಿಕಿತ್ಸೆ ಪಡೆಯಲು ಸಾಧ್ಯವಾಗುವಂತೆ ಮೇ ತಿಂಗಳಲ್ಲಿ ನ್ಯಾಯಪೀಠವು ಮಧ್ಯಂತರ ವೈದ್ಯಕೀಯ ಜಾಮೀನು ನೀಡಿತ್ತು. ಇದೀಗ ಈ ಮಧ್ಯಂತರ ಜಾಮೀನು ಆದೇಶವನ್ನು ಪರ್ಮನೆಂಟ್ ಆರ್ಡರ್ ಆಗಿ ಅಪ್ಡೇಟ್ ಮಾಡಲಾಗಿದೆ.
ಮನಿ ಲಾಂಡರಿಂಗ್ ಪ್ರಕರಣದ ತನಿಖೆ ನಡೆಸುತ್ತಿರುವ ಜಾರಿ ನಿರ್ದೇಶನಾಲಯವು ನರೇಶ್ ಗೋಯಲ್ ಅವರ ಖಾಯಂ ಜಾಮೀನು ಅರ್ಜಿಯನ್ನು ವಿರೋಧಿಸಿತ್ತು. ಅವರು ಬೇಕಾದ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯಲಿ. ಆದರೆ, ಕಸ್ಟಡಿಯಲ್ಲಿಯೇ ಇರಬೇಕು ಎಂದು ವಾದಿಸಿತ್ತು. ಆದರೆ, ಹೈಕೋರ್ಟ್ ನ್ಯಾಯಪೀಠವು ಗೋಯಲ್ ಅವರಿಗೆ ಜಾಮೀನು ಒದಗಿಸುವ ತೀರ್ಮಾನಕ್ಕೆ ಬಂದಿತು.
ಇದನ್ನೂ ಓದಿ: ಕ್ರೆಡಿಟ್ ಗ್ಯಾರಂಟಿ: ಎಂಎಸ್ಎಂಇಗಳಿಗೆ 100 ಕೋಟಿ ರೂವರೆಗೂ ಅಡಮಾನರಹಿತ ಸಾಲ: ನಿರ್ಮಲಾ ಸೀತಾರಾಮನ್
ಮೇ ತಿಂಗಳಲ್ಲಿ ನ್ಯಾಯಪೀಠವು ಎರಡು ತಿಂಗಳ ಅವಧಿಗೆ ಮಧ್ಯಂತರ ಜಾಮೀನು ದಯಪಾಲಿಸಿತ್ತು. ಅದು ನಾಲ್ಕು ವಾರಗಳಷ್ಟು ಕಾಲ ವಿಸ್ತರಣೆ ಆಯಿತು. ಅದಾದ ಬಳಿಕ ಮತ್ತೂ ಎರಡು ತಿಂಗಳು ಅವಧಿ ವಿಸ್ತರಣೆ ಆಯಿತು.
ಜೆಟ್ ಏರ್ವೇಸ್ ಸಂಸ್ಥೆಗೆ ಕೆನರಾ ಬ್ಯಾಂಕ್ನಿಂದ ನೀಡಲಾಗಿದ್ದ ಸಾಲದಲ್ಲಿ 538.63 ಕೋಟಿ ರೂ ಮೊತ್ತದ ಹಣವನ್ನು ಅಕ್ರಮವಾಗಿ ಬೇರೆಡೆ ವರ್ಗಾವಣೆ ಮಾಡಲಾಗಿದೆ ಎಂಬುದು ನರೇಶ್ ಗೋಯಲ್ ಹಾಗೂ ಇತರರ ಮೇಲೆ ಇಡಿ ಮಾಡುತ್ತಿರುವ ಆರೋಪ. ನರೇಶ್ ಗೋಯಲ್ ಅವರನ್ನು ಜಾರಿ ನಿರ್ದೇಶನಾಲಯ 2023ರ ಸೆಪ್ಟಂಬರ್ನಲ್ಲಿ ಬಂಧಿಸಿತು. 2023ರ ನವೆಂಬರ್ನಲ್ಲಿ ಅವರ ಪತ್ನಿ ಅನಿತಾ ಗೋಯಲ್ ಅವರನ್ನೂ ಬಂಧಿಸಲಾಯಿತು.
ಇದನ್ನೂ ಓದಿ: ಒಂದು ಬಿಟ್ಕಾಯಿನ್ 68 ಲಕ್ಷ ರೂ; ಕ್ರಿಪ್ಟೋಕರೆನ್ಸಿ ಬೆಲೆ ಈ ಪರಿ ಏರಿಕೆ ಯಾಕೆ? ಭಾರತದಲ್ಲಿ ಹೂಡಿಕೆಗೆ ಅವಕಾಶವಿದೆಯಾ?
ಅನಿತಾ ಗೋಯಲ್ ದೀರ್ಘಕಾಲದಿಂದ ಕ್ಯಾನ್ಸರ್ನಿಂದ ಬಳಲುತ್ತಿದ್ದರು. ಅವರ ರೋಗದ ಮಟ್ಟ ಕೊನೆಯ ಹಂತ ತಲುಪಿತ್ತು. ಇದೇ ಕಾರಣಕ್ಕೆ ಅವರಿಗೆ ಬಂಧನದ ದಿನವೇ ಜಾಮೀನು ಸಿಕ್ಕಿತು. ಇದೇ ಮೇ 16ರಂದು ಅವರು ಅಸು ನೀಗಿದರು. ನರೇಶ್ ಗೋಯಲ್ ಕೂಡ ಕ್ಯಾನ್ಸರ್ ಕಾಯಿಲೆಗೆ ಒಳಗಾಗಿದ್ದಾರೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ