NPS Rule Change: ಪಿಂಚಣಿ ಯೋಜನೆಯಲ್ಲಿ ಮಹತ್ವದ ಬದಲಾವಣೆ ಸಾಧ್ಯತೆ; ನ್ಯಾಷನಲ್ ಪೆನ್ಷನ್ ಸ್ಕೀಮ್ ಸದಸ್ಯರಿಗೆ ಖುಷಿ ಸುದ್ದಿಯಾ?

ನಿವೃತ್ತಿ ನಂತರ ಪಿಂಚಣಿ ರೂಪದಲ್ಲಿ ಲಭ್ಯ ಇರುವ ನ್ಯಾಷನಲ್ ಪೆನ್ಷನ್ ಸಿಸ್ಟಂನಲ್ಲಿ (NPS- National Pension System) ಮಹತ್ವದ ಬದಲಾವಣೆಯೊಂದು ಆಗಲಿದೆ ಎಂಬಂತಹ ಸುದ್ದಿ ಇದೆ. ಎನ್​ಪಿಎಸ್ ಖಾತೆದಾರರು ನಿವೃತ್ತಿ ನಂತರ ಹಂತ ಹಂತವಾಗಿ ಹಣವನ್ನು ಹಿಂಪಡೆಯುವ ಅವಕಾಶ ನೀಡುವಂತೆ ನಿಯಮ ಬದಲಾವಣೆ ಆಗುವ ಸಾಧ್ಯತೆ ಇದೆ. ಮುಂದಿನ ಕ್ವಾರ್ಟರ್​ನೊಳಗೆಯೇ, ಅಂದರೆ ಸೆಪ್ಟಂಬರ್ ತಿಂಗಳೊಳಗೆಯೇ ಈ ಬದಲಾವಣೆ ಆಗಬಹುದು. ಪಿಂಚಣಿ ನಿಧಿಗಳ ಪ್ರಾಧಿಕಾರ ಪಿಎಫ್​ಆರ್​ಡಿಎ ಸಂಸ್ಥೆಯ ಛೇರ್ಮನ್ ದೀಪಕ್ ಮೊಹಾಂತಿ ಇತ್ತೀಚೆಗೆ ಮಾಧ್ಯಮವೊಂದರಲ್ಲಿ ಮಾತನಾಡುತ್ತಾ ಈ ವಿಚಾರವನ್ನು ತಿಳಿಸಿದ್ದಾರೆ. ಈ ಸ್ಕೀಮ್​ನಲ್ಲಿ ಸಿಸ್ಟಮ್ಯಾಟಿಕ್ ಲಂಪ್ಸಮ್ ವಿತ್​ಡ್ರಾಯಲ್ (SLW- Systematic Lumpsum Withdrawal) ಅಂಶವನ್ನು ಸೇರಿಸುವ ಆಲೋಚನೆ ಪ್ರಾಧಿಕಾರದ್ದಾಗಿದೆ. ಇದೇನಾದರೂ ಜಾರಿಯಾದರೆ ನ್ಯಾಷನಲ್ ಪೆನ್ಷನ್ ಸಿಸ್ಟಂ ಹೆಚ್ಚು ಜನಸ್ನೇಹಿ ಮತ್ತು ಜನಪ್ರಿಯವಾಗಬಹುದು.

ಎಸ್​ಎಲ್​ಡಬ್ಲ್ಯೂ ಅವಕಾಶ ಇದ್ದರೆ ನ್ಯಾಷನಲ್ ಪೆನ್ಷನ್ ಸಿಸ್ಟಂ ಸದಸ್ಯರು 60 ವರ್ಷ ದಾಟಿದ ಬಳಿಕ ತಮ್ಮ ನಿಧಿಯಲ್ಲಿರುವ ಹಣವನ್ನು ಹಂತ ಹಂತವಾಗಿ ಹಿಂಪಡೆಯಬಹುದು. ತಿಂಗಳಿಗೊಮ್ಮೆಯೋ, ಮೂರು ತಿಂಗಳಿಗೊಮ್ಮೆಯೋ, ಆರು ತಿಂಗಳಿಗೊಮ್ಮೆಯೋ ಅಥವಾ ವರ್ಷಕ್ಕೊಮ್ಮೆಯೋ ಎನ್​ಪಿಎಸ್ ಖಾತೆಯಲ್ಲಿನ ಹಣವನ್ನು ಹಿಂಪಡೆಯಲು ಸಾಧ್ಯವಾಗುತ್ತದೆ. 60 ವರ್ಷದಿಂದ 75 ವರ್ಷ ವಯಸ್ಸಿನವರೆಗೆ ಈ ಅವಕಾಶ ಕೊಡಲಾಗುತ್ತದೆ. ಈ ಕಾಲಾವಧಿಯಲ್ಲೂ ಎನ್​ಪಿಎಸ್ ನಿಧಿಯಲ್ಲಿರುವ ಹಣಕ್ಕೆ ಯಥಾಪ್ರಕಾರ ಲಾಭಾಂಶ ಜಮೆ ಆಗುವುದು ಮುಂದುವರಿಯುತ್ತಿರುತ್ತದೆ.

ಏನಿದು ನ್ಯಾಷನಲ್ ಪೆನ್ಷನ್ ಸಿಸ್ಟಂ?

ಇದು ರಾಷ್ಟ್ರೀಯ ಪಿಂಚಣಿ ವ್ಯವಸ್ಥೆಯನ್ನು ಪಿಎಫ್​ಆರ್​ಡಿಎ ನಿಭಾಯಿಸುತ್ತದೆ. ನಿವೃತ್ತಿ ನಂತರದ ಜೀವನ ಭದ್ರತೆಗೆಂದು ರೂಪಿಸಲಾದ ಸ್ಕೀಮ್ ಇದು. ಷೇರುಪೇಟೆ ಜೋಡಿತವಾದ ಈ ಯೋಜನೆ ಇಪಿಎಫ್, ಪಿಪಿಎಫ್ ಇತ್ಯಾದಿ ರಿಟೈರ್ಮೆಂಟ್ ಸ್ಕೀಮ್​ಗಿಂತ ಹೆಚ್ಚು ಲಾಭದಾಯಕ ಎನಿಸಿದೆ.

ನ್ಯಾಷನಲ್ ಪೆನ್ಷನ್ ಸಿಸ್ಟಂನಲ್ಲಿ ಎಸ್​ಎಲ್​ಡಬ್ಲ್ಯೂ ಅವಕಾಶವನ್ನು ಸಕ್ರಿಯಗೊಳಿಸಲು ಸದಸ್ಯರು ತಮ್ಮ ಹಣ ವಿತ್​ಡ್ರಾ ಮಾಡುವ ಅವಧಿಯನ್ನು ತಿಳಿಸಿ ಮನವಿ ಮಾಡಿಕೊಳ್ಳಬೇಕು. ಆದರೆ, ಗಮನಿಸಬೇಕಾದ ಸಂಗತಿ ಎಂದರೆ ಒಮ್ಮೆ ನೀವು ಎಸ್​ಎಲ್​ಡಬ್ಲ್ಯೂ ಆಪ್ಷನ್ ಸಕ್ರಿಯಗೊಳಿಸಿದಲ್ಲಿ ಟಯರ್ 1 ಖಾತೆಗೆ ಹಣ ಜಮೆ ಮಾಡಲು ಸಾಧ್ಯವಾಗುವುದಿಲ್ಲ.

ಎನ್​ಪಿಎಸ್​ನಲ್ಲಿ ಎರಡು ರೀತಿಯ ಖಾತೆಗಳಿರುತ್ತವೆ. ಟಯರ್ 1 ಮತ್ತು ಟಯರ್ 2 ಖಾತೆಗಳಿರುತ್ತವೆ. ಟಯರ್ 1 ಖಾತೆಯಲ್ಲಿ ಹಣ ಹಿಂಪಡೆಯುವುದಕ್ಕೆ ನಿರ್ಬಂಧಗಳಿರುತ್ತವೆ. ಟಯರ್ 2 ಖಾತೆಯಲ್ಲಿ ಫಂಡ್​ಗಳನ್ನು ಹಿಂಪಡೆಯುವ ಹಲವು ಅವಕಾಶಗಳಿರುತ್ತವೆ.

ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

Published On - 3:49 pm, Thu, 22 June 23