ಹೊಸ ಯುಪಿಐ ಬಳಕೆದಾರರನ್ನು ಹೊಂದಲು ಪೇಟಿಎಂಗೆ ಎನ್​ಪಿಸಿಐ ಅನುಮತಿ; ಷರತ್ತುಗಳು ಅನ್ವಯ

ನವದೆಹಲಿ, ಅಕ್ಟೋಬರ್ 23: ಭಾರತದಲ್ಲಿ ಪ್ರಮುಖ ಯುಪಿಐ ಆ್ಯಪ್​ಗಳಲ್ಲಿ ಒಂದಾದ ಪೇಟಿಎಂ ಇನ್ಮುಂದೆ ಹೊಸ ಯುಪಿಐ ಬಳಕೆದಾರರನ್ನು ಹೊಂದುವ ಅವಕಾಶ ಪಡೆದಿದೆ. ರಾಷ್ಟ್ರೀಯ ಪೇಮೆಂಟ್ ಕಾರ್ಪೊರೇಶನ್ ಸಂಸ್ಥೆ (ಎನ್​ಪಿಸಿಐ) ಪೇಟಿಎಂಗೆ ಈ ಅನುಮತಿ ದಯಪಾಲಿಸಿದೆ. ಪೇಟಿಎಂ ಪೇಮೆಂಟ್ಸ್ ಬ್ಯಾಂಕ್​ಗೆ ಆರ್​ಬಿಐ ವಿಧಿಸಿದ್ದ ನಿರ್ಬಂಧದಿಂದಾಗಿ ಪೇಟಿಎಂ ಸಂಸ್ಥೆ ಹೊಸ ಯುಪಿಐ ಗ್ರಾಹಕರನ್ನು ಹೊಂದಲು ಅಸಾಧ್ಯವಾಗಿತ್ತು. ಈಗ ಎನ್​ಪಿಸಿಐ ನಿರ್ಧಾರದಿಂದ ಪೇಟಿಎಂ ತುಸು ನಿರಾಳಗೊಂಡಿದೆ.

ಆದರೆ, ಎನ್​ಪಿಸಿಐ ಪೇಟಿಎಂಗೆ ನೀಡಿರುವ ಅನುಮತಿಯಲ್ಲಿ ಹಲವು ಷರತ್ತುಗಳಿವೆ. ಕಾಲಕಾಲಕ್ಕೆ ಹೊರಡಿಸಲಾಗುವ ಎಲ್ಲಾ ನಿಯಮಾವಳಿಗಳಿಗೂ ಪೇಟಿಎಂ ಬದ್ಧವಾಗಿರಬೇಕು ಎಂಬುದು ಎನ್​ಪಿಸಿಐ ವಿಧಿಸಿರುವ ಪ್ರಮುಖ ಷರತ್ತಾಗಿದೆ.

‘ಕಂಪನಿಗೆ ಹೊಸ ಯುಪಿಐ ಬಳಕೆದಾರರನ್ನು ಪಡೆಯಲು ಎನ್​ಪಿಸಿಐ ಅನುಮೋದನೆ ನೀಡಿ ಪತ್ರ ಬರೆದಿದೆ. ಎನ್​ಪಿಸಿಐನ ಎಲ್ಲಾ ವೈಧಾನಿಕ ಮಾರ್ಗಸೂಚಿ ಮತ್ತು ಸುತ್ತೋಲೆಗಳಿಗೆ ಬದ್ಧವಾಗಿರಬೇಕೆಂದು ಸೂಚಿಸಿದೆ,’ ಎಂದು ಪೇಟಿಎಂ ಸಂಸ್ಥೆ ಷೇರು ವಿನಿಮಯ ಕೇಂದ್ರಕ್ಕೆ ಸಲ್ಲಿಸಿದ ಫೈಲಿಂಗ್​ನಲ್ಲಿ ತಿಳಿಸಿದೆ.

ಇದನ್ನೂ ಓದಿ: ನೇಪಾಳದ ಏಕೈಕ ಬಿಲಿಯನೇರ್ ಬಿನೋದ್ ಚೌಧರಿ; ನೂಡಲ್ ಕಂಪನಿ ಕಟ್ಟಿ ಗೆದ್ದ ನೇಪಾಳೀ

ಆಗಸ್ಟ್ 1ರಂದು ಪೇಟಿಎಂ ಸಂಸ್ಥೆ ತನಗೆ ಹೊಸ ಯುಪಿಐ ಯೂಸರ್​ಗಳನ್ನು ಪಡೆಯಲು ಅನುಮತಿ ನೀಡುವಂತೆ ಎನ್​ಪಿಸಿಐಗೆ ಮನವಿ ಮಾಡಿತ್ತು ಎನ್ನಲಾಗಿದೆ.

2023ರ ಜನವರಿ 31ರಂದು ಪೇಟಿಎಂ ಪೇಮೆಂಟ್ಸ್ ಬ್ಯಾಂಕ್ ಮೇಲೆ ಆರ್​ಬಿಐ ನಿರ್ಬಂಧ ವಿಧಿಸಿತ್ತು. ಸರಿಯಾದ ರೀತಿಯಲ್ಲಿ ಕೆವೈಸಿ ನಿಯಮಗಳನ್ನು ಪಾಲಿಸಿಲ್ಲ ಎಂಬುದು ಆರ್​ಬಿಐನ ಪ್ರಮುಖ ಆಕ್ಷೇಪಣೆ. ಯಾವುದೇ ಹೊಸ ಠೇವಣಿ ಪಡೆಯಬಾರದು, ಹೊಸ ಗ್ರಾಹಕರನ್ನು ಪಡೆಯಬಾರದು ಎಂದು ಪೇಮೆಂಟ್ಸ್ ಬ್ಯಾಂಕ್​ಗೆ ನಿರ್ದೇಶನ ನೀಡಿತು. ವ್ಯಾಲಟ್​, ಫಾಸ್​ಟ್ಯಾಗ್ ಇತ್ಯಾದಿ ಸೇವೆಗಳೆಲ್ಲವೂ ನಿಂತವು.

ಇದನ್ನೂ ಓದಿ: ಎಲೆಕ್ಟ್ರಿಕ್ ಬಸ್, ಸೈಕ್ಲಿಂಗ್ ಟ್ರ್ಯಾಕ್, ವಾಕಿಂಗ್… ಹೇಗಿದೆ ನೋಡಿ ಕೇಂದ್ರದ ಅರ್ಬನ್ ಮೊಬಿಲಿಟಿ ಮಿಷನ್

ಪೇಮೆಂಟ್ ಆ್ಯಪ್ ಆದ ಪೇಟಿಎಂ ಕೂಡ ಹೊಸ ಗ್ರಾಹಕರನ್ನು ಹೊಂದುವಂತಿಲ್ಲ. ಪೇಮೆಂಟ್ಸ್ ಬ್ಯಾಂಕ್ (ಪಿಪಿಬಿಎಲ್) ಬದಲು ಬೇರೆ ಬ್ಯಾಂಕ್​ಗಳನ್ನು ಪಾವತಿ ಭಾಗಿದಾರರನ್ನಾಗಿ ಮಾಡಿಕೊಳ್ಳಬೇಕು. ಪೇಟಿಎಂ ಕೇವಲ ಥರ್ಡ್ ಪಾರ್ಟಿ ಅಪ್ಲಿಕೇಶನ್ ಪ್ರೊವೈಡರ್ ಆಗಿ ಮಾತ್ರವೇ ಕಾರ್ಯನಿರ್ವಹಿಸಬೇಕು ಎಂದು ಎನ್​ಪಿಸಿಐ ಸೂಚಿಸಿತು. ಅದರಂತೆ, ಪೇಟಿಎಂ ಸಂಸ್ಥೆ ಎಸ್​ಬಿಐ, ಎಕ್ಸಿಸ್ ಬ್ಯಾಂಕ್, ಎಚ್​ಡಿಎಫ್​ಸಿ ಬ್ಯಾಂಕ್ ಮತ್ತು ಯೆಸ್ ಬ್ಯಾಂಕ್ ಈ ನಾಲ್ಕು ಬ್ಯಾಂಕ್​ಗಳ ಮೂಲಕ ಯುಪಿಐ ವಹಿವಾಟು ಸೇವೆ ನೀಡುತ್ತಾ ಬರುತ್ತಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ