ಮಾರುಕಟ್ಟೆ ಕುಸಿಯುತ್ತಿದೆಯಲ್ಲಾ..! ಮ್ಯೂಚುವಲ್ ಫಂಡ್ ಮೇಲೆ ಹಣ ಹಾಕಿ ಯೋಚಿಸುತ್ತಿದ್ದೀರಾ? ಇಲ್ಲಿದೆ ಟಿಪ್ಸ್

ರೀಟೇಲ್ ಹೂಡಿಕೆದಾರರಿಗೆ ಮ್ಯೂಚುವಲ್ ಫಂಡ್ (Mutual Fund) ಫೇವರಿಟ್ ಸಾಧನವಾಗಿದೆ. ಎಫ್​ಡಿ ಮತ್ತಿತರ ಉಳಿತಾಯ ಯೋಜನೆಗಳಲ್ಲಿ ಸಿಗುವುದಕ್ಕಿಂತ ಬಹಳ ಹೆಚ್ಚಿನ ಮಟ್ಟದಲ್ಲಿ ಆದಾಯ ಕೊಡಬಲ್ಲ ಮ್ಯೂಚುವಲ್ ಫಂಡ್ ತನ್ನ ಆಕರ್ಷಣೆ ಉಳಿಸಿಕೊಳ್ಳಲು ಯಶಸ್ವಿಯಾಗಿದೆ. ದೇಶದಲ್ಲಿ ನೂರಾರು ಮ್ಯೂಚುವಲ್ ಫಂಡ್​ಗಳಿದ್ದು, ಪ್ರತಿಯೊಂದು ಕೂಡ ನಿರ್ದಿಷ್ಟ ವಲಯಗಳ ಕಂಪನಿಗಳ ಷೇರಿನ ಮೇಲೆ ಹೂಡಿಕೆ ಮಾಡುತ್ತವೆ. ಆ ಕಂಪನಿಯ ಷೇರುಗಳು ಬೆಳೆದಂತೆ ನಿಮ್ಮ ಆದಾಯವೂ ವೃದ್ಧಿಸುತ್ತದೆ. ಅವುಗಳ ಷೇರುಗಳು ಕುಸಿತದಂತೆ ನಿಮ್ಮ ಸಂಪತ್ತೂ ಅನುಗುಣವಾಗಿ ಕಡಿಮೆ ಆಗುತ್ತದೆ. ಇದು ಸಿಂಪಲ್ ಸೂತ್ರ. ಹೀಗಾಗಿ, ಮ್ಯೂಚುವಲ್ ಫಂಡ್ ಆದಾಯಕ್ಕೆ ಎಷ್ಟು ಆಕರ್ಷಕವೋ, ನಷ್ಟ ಸಾಧ್ಯತೆಯೂ ಇರುತ್ತದೆ.

ಮ್ಯೂಚುವಲ್ ಫಂಡ್​ನಿಂದ ಹೂಡಿಕೆಯಾದ ಕಂಪನಿಗಳ ಷೇರುಗಳು ಕುಸಿಯತೊಡಗುತ್ತಿರುವಂತೆಯೇ ಆ ಮ್ಯುಚುವಲ್ ಫಂಡ್​ನಲ್ಲಿ ಹಣ ಇರಿಸಿದ ಗ್ರಾಹಕರು ಕಂಗಾಲಾಗುವುದುಂಟು. ಕೆಲವರಂತೂ ತಮ್ಮ ಹಣವನ್ನು ಹಿಂಪಡೆದುಕೊಳ್ಳುವುದುಂಟು. ಇಂಥ ತರಾತುರಿ ಕ್ರಮ ತಪ್ಪು ಎಂಬುದು ತಜ್ಞರ ಅನಿಸಿಕೆ. ಮ್ಯೂಚುವಲ್ ಫಂಡ್ ಕುಸಿಯತೊಡಗಿದಾಗ ನಾವೇನು ಮಾಡಬೇಕು? ತಜ್ಞರು ಕೊಟ್ಟಿರುವ ಕೆಲ ಸಲಹೆಗಳು ಇಲ್ಲಿವೆ…

ಸಂಯಮ ಇರಲಿ: ಸಾಮಾನ್ಯವಾಗಿ ಮ್ಯೂಚುವಲ್ ಫಂಡ್​ಗಳು ದೀರ್ಘಾವಧಿಯಲ್ಲಿ ಉತ್ತಮ ಲಾಭ ತರುತ್ತವೆ. ಒಂದು ಅಥವಾ ಎರಡು ವರ್ಷದ ರಿಟರ್ನ್ ಗಮನಿಸಿ ಮ್ಯೂಚುವಲ್ ಫಂಡ್ ಸಾಧನೆಯನ್ನು ನಿರ್ಧರಿಸಲು ಆಗುವುದಿಲ್ಲ. ಎಂಟತ್ತು ವರ್ಷಗಳಷ್ಟಾದರೂ ನೀವು ಕಾಲಾವಕಾಶ ಕೊಡಬೇಕು. ಅಲ್ಲಿಯವರೆಗೂ ಸಮಾಧಾನದಿಂದ ಇರುವುದು ಉತ್ತಮ.

ಇದನ್ನೂ ಓದಿ: ಫಿಕ್ಸೆಡ್ ಡೆಪಾಸಿಟ್ ಇದೆಯಾ? ಬಹಳ ಸುಲಭವಾಗಿ ಮತ್ತು ತೀರಾ ಕಡಿಮೆ ಬಡ್ಡಿಗೆ ಸಿಗುತ್ತೆ ಸಾಲ

ಆತುರವಾಗಿ ಹಣ ಹಿಂಪಡೆಯದಿರಿ: ಮ್ಯೂಚುವಲ್ ಫಂಡ್​ನ ಮೌಲ್ಯ ಕಡಿಮೆ ಆದಾಗ ಮಾರಿ, ಅದರ ಮೌಲ್ಯ ಏರತೊಡಗಿದಾಗ ಮರಳಿ ಹೂಡಿಕೆ ಮಾಡುವವರಿದ್ದಾರೆ. ಇದು ಮೇಲ್ನೋಟಕ್ಕೆ ಚಾಣಾಕ್ಷ್ಯತನ ಎನಿಸಿದರೂ ವಾಸ್ತವವಾಗಿ ಸರಿಬರುವುದಿಲ್ಲ. ನೀವು ಮಾರಿದ ಬೆಲೆಗಿಂತ ಹೆಚ್ಚಿನ ಬೆಲೆಗೆ ಮರಳಿ ಖರೀದಿಸುವ ಸನ್ನಿವೇಶವೇ ಹೆಚ್ಚಿರುತ್ತದೆ.

ಹೋಲಿಕೆ ಮಾಡಿ: ನೀವು ಹೂಡಿಕೆ ಮಾಡಿದ ಮ್ಯೂಚುವಲ್ ಫಂಡ್ ನಿರೀಕ್ಷಿಸಿದಷ್ಟು ಮಟ್ಟದಲ್ಲಿ ಬೆಳೆಯುತ್ತಿಲ್ಲ ಎಂದರೆ, ಅಂಥದ್ದೇ ರೀತಿಯ ಇತರ ಪ್ರಮುಖ ಮ್ಯುಚುವಲ್ ಫಂಡ್​ನೊಂದಿಗೆ ಹೋಲಿಕೆ ಮಾಡಿ. ನಿಮ್ಮದು ಸ್ಮಾಲ್ ಕ್ಯಾಪ್ ಫಂಡ್ ಆಗಿದ್ದರೆ ಅದೇ ಸ್ಮಾಲ್ ಕ್ಯಾಪ್​ನದ್ದೇ ಬೇರೊಂದು ಮ್ಯುಚುವಲ್ ಫಂಡ್​ನೊಂದಿಗೆ ಹೋಲಿಸಿ. ಎರಡರ ಮಧ್ಯೆ ಅಂಥದ್ದೇನು ವ್ಯತ್ಯಾಸ ಇಲ್ಲವಾದರೆ ಬದಲಾವಣೆ ಮಾಡುವ ಗೋಜಿಗೆ ಹೋಗಬೇಡಿ. ಒಂದು ವೇಳೆ ತೀರಾ ವ್ಯತ್ಯಾಸ ಇದ್ದಲ್ಲಿ ಮಾತ್ರ ಹೂಡಿಕೆ ಬದಲಿಸಲು ಯೋಚಿಸಬಹುದು.

ಹೂಡಿಕೆ ವಲಯದ ಬಗ್ಗೆ ತಿಳಿಯಿರಿ: ನೀವು ಯಾವುದಾದರೂ ವಲಯಕ್ಕೆ ಸೀಮಿತವಾದ ಮ್ಯೂಚುವಲ್ ಫಂಡ್ ಮೇಲೆ ಹೂಡಿಕೆ ಮಾಡಿದ್ದು, ಆ ಫಂಡ್ ನಷ್ಟ ಅನುಭವಿಸುತ್ತಿದ್ದಲ್ಲಿ, ಮೊದಲು ಆ ವಲಯದ ಬಗ್ಗೆ ಸಂಶೋಧನೆ ನಡೆಸಿ. ಪ್ರಸಕ್ತ ಆರ್ಥಿಕ ಸನ್ನಿವೇಶದಲ್ಲಿ ಆ ವಲಯದ ಆರೋಗ್ಯ ಹೇಗಿದೆ? ಭವಿಷ್ಯ ಹೇಗಿದೆ ಎಂಬುದನ್ನು ಅವಲೋಕಿಸಲು ಯತ್ನಿಸಿ. ತಾತ್ಕಾಲಿಕ ಹಿನ್ನಡೆಯ ಹೊರತಾಗಿಯೂ ಆ ವಲಯ ಮುಂದಿನ ದಿನಗಳಲ್ಲಿ ಬೆಳೆಯಬಲ್ಲುದು ಎನಿಸಿದರೆ ನಿಮ್ಮ ಹೂಡಿಕೆಯನ್ನು ಹಿಂಪಡೆಯಬೇಡಿ.

ಇದನ್ನೂ ಓದಿ: ಹೂಡಿಕೆ ಟಿಪ್ಸ್; 1 ಕೋಟಿ ಸಂಪತ್ತು ಸಂಗ್ರಹಕ್ಕೆ 15X15X15 ಸೂತ್ರ

ಹೂಡಿಕೆ ವೈವಿಧ್ಯತೆ: ನಿಮ್ಮ ಹೂಡಿಕೆ ಶ್ರೇಣಿ ವೈವಿಧ್ಯತೆ ಹೊಂದಿರಲಿ. ಅಂದರೆ ವಿವಿಧ ಪ್ರಾಕಾರದ ಹೂಡಿಕೆ ಸಾಧನಗಳಲ್ಲಿ ನಿಮ್ಮ ಹಣ ತೊಡಗಿಸಿರಲಿ. ಉದಾಹರಣೆಗೆ ನೀವು ಈಕ್ವಿಟಿ ಫಂಡ್​ಗಳಿಗೆ ಮಾತ್ರ ಸೀಮಿತರಾಗದೇ ಬೇರೆ ಡೆಟ್ ಫಂಡ್ ಇತ್ಯಾದಿ ಲಿಕ್ವಿಟ್ ಫಂಡ್​ಗಳಲ್ಲೂ ಹೂಡಿಕೆ ಮಾಡಿ. ಈಕ್ವಿಟಿ ಫಂಡ್​ಗಳಲ್ಲೂ ಕೂಡ ಸ್ಮಾಲ್ ಕ್ಯಾಪ್, ಮಿಡ್ ಕ್ಯಾಪ್ ಮತ್ತು ಲಾರ್ಜ್ ಕ್ಯಾಪ್, ಈ ಮೂರೂ ಫಂಡ್​ಗಳಿಗೂ ನಿಮ್ಮ ಹೂಡಿಕೆ ವಿಸ್ತರಣೆ ಆಗಲಿ.

ಹಾಗೆಯೇ, ಚಿನ್ನ, ಎಫ್​ಡಿ, ಪಿಪಿಎಫ್ ಇತ್ಯಾದಿಗಳಲ್ಲೂ ನೀವು ಹೂಡಿಕೆ ಮಾಡಬಹುದು. ಇದರಿಂದ ಷೇರು ಮಾರುಕಟ್ಟೆ ಅಲುಗಾಡಿದರೂ ಒಂದಷ್ಟು ಹೂಡಿಕೆಗಳು ಭದ್ರವಾಗಿರುತ್ತವೆ.

ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ