ಮೂವತ್ತು ವರ್ಷ ಮುಗಿಸಿದ ಮ್ಯೂಚುವಲ್ ಫಂಡ್ಗಳ ಸಾಧನೆ ಹೇಗೆ? ತಿಂಗಳಿಗೆ ಕೇವಲ 1,000 ಹೂಡಿಕೆ ಈಗ ಆಗಿದೆ 2 ಕೋಟಿ ರೂ
SIP of Rs 1,000 for 30 years: ಭಾರತದ 65 ಲಕ್ಷ ಕೋಟಿ ರೂ ಇರುವ ಮ್ಯುಚುವಲ್ ಫಂಡ್ ಉದ್ಯಮ ಬಹಳ ಜನರಿಗೆ ಹಣಕಾಸು ಭದ್ರತೆ ಒದಗಿಸಿದೆ. 14 ಮ್ಯೂಚುವಲ್ ಫಂಡ್ಗಳು 30 ವರ್ಷ ಪೂರ್ಣಗೊಳಿಸಿವೆ. ಕೆಲ ಫಂಡ್ಗಳು ಹಲವು ಪಟ್ಟು ಹೆಚ್ಚು ಲಾಭ ತಂದುಕೊಟ್ಟಿವೆ. ಈ ಫಂಡ್ಗಳತ್ತ ಒಂದು ನೋಟ...
ಭಾರತದಲ್ಲಿ ಷೇರು ಮಾರುಕಟ್ಟೆ ಯಾವತ್ತೂ ಕೂಡ ಹೂಡಿಕೆದಾರರ ನಿರೀಕ್ಷೆ ಹುಸಿಗೊಳಿಸಿದ್ದಿಲ್ಲ. ಹಲವು ಬಾರಿ ನಿರೀಕ್ಷೆ ಮೀರಿ ಫಲ ತಂದುಕೊಟ್ಟಿದೆ. ಜಾಗತೀಕರಣದ ಬಳಿಕ ಮಾರುಕಟ್ಟೆ ಅದ್ವಿತೀಯ ರೀತಿಯಲ್ಲಿ, ಸ್ಥಿರ ರೀತಿಯಲ್ಲಿ ಬೆಳವಣಿಗೆ ಹೊಂದುತ್ತಿದೆ. ಮಾರುಕಟ್ಟೆ ದ್ವಿಗುಣಗೊಳ್ಳುತ್ತಿರುವ ಅವಧಿ ಕಡಿಮೆ ಆಗುತ್ತಲೇ ಹೋಗುತ್ತಿದೆ. ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ವಿನಿಯೋಗಿಸುವ ಮ್ಯೂಚುವಲ್ ಫಂಡ್ಗಳೂ ಕೂಡ ಹೂಡಿಕೆದಾರರ ಕೈಹಿಡಿದಿವೆ. ನಿಯಮಿತವಾಗಿ ಮಾಸಿಕವಾಗಿ ಹಣ ಹೂಡಿಕೆ ಮಾಡಲು ಎಸ್ಐಪಿ ಸ್ಕೀಮ್ಗಳಿವೆ. ಹಣ ಬೆಳವಣಿಗೆಯ ಚಕ್ರ ಮೌಲ್ಯ ಅಥವಾ ಕಾಂಪೌಂಡಿಂಗ್ ಎಫೆಕ್ಟ್ನಿಂದ ಹೂಡಿಕೆಯು ಅಚ್ಚರಿ ಎನಿಸುವ ರೀತಿಯಲ್ಲಿ ಬೆಳೆಯುತ್ತದೆ.
ಭಾರತದಲ್ಲಿ ಮ್ಯೂಚುವಲ್ ಫಂಡ್ ಉದ್ಯಮ ಈಗ 65 ಲಕ್ಷ ಕೋಟಿ ರೂ ಮೊತ್ತದಷ್ಟಾಗಿದೆ. ಈಕ್ವಿಟಿಗೆ ಹೆಚ್ಚು ಜೋಡಿತವಾದ 14 ಮ್ಯುಚುವಲ್ ಫಂಡ್ಗಳು 30 ವರ್ಷ ಪೂರ್ಣಗೊಳಿಸಿವೆ. 30 ವರ್ಷದ ಹಿಂದೆ ಆರಂಭವಾದ ಫ್ರಾಂಕ್ಲಿನ್ ಇಂಡಿಯಾ ಪ್ರೈಮಾ ಫಂಡ್ನಲ್ಲಿ ಒಂದು ಸಾವಿರ ರೂ ಎಸ್ಐಪಿ ಮಾಡಿದವರು ಇವತ್ತಿನವರೆಗೂ ಮುಂದುವರಿಸಿಕೊಂಡು ಬಂದಿದ್ದರೆ ಅವರ ಸಂಪತ್ತು ಎರಡು ಕೋಟಿ ರೂಗೂ ಹೆಚ್ಚಾಗಿರುತ್ತದೆ. ಇದು ನಿಜಕ್ಕೂ ಫಂಡ್ ತಂದ ರಿಟರ್ನ್ ಮತ್ತು ಹಣದ ಕಾಂಪೌಂಡಿಂಗ್ ಎಫೆಕ್ಟ್.
ಇದನ್ನೂ ಓದಿ: ಐದು ವರ್ಷಕ್ಕೆ ಮಾತ್ರ ಹೂಡಿಕೆ ಮಾಡಬೇಕಾ? ಇಲ್ಲಿವೆ ಕೆಲ ಉತ್ತಮ ಆಯ್ಕೆಗಳು
30 ವರ್ಷ ಪೂರ್ಣಗೊಳಿಸಿದ ಕೆಲ ಮ್ಯೂಚುವಲ್ ಫಂಡ್ಗಳು ಹಾಗು 1,000 ಎಸ್ಐಪಿ ತಂದ ರಿಟರ್ನ್ಸ್
- ಫ್ರಾಂಕ್ಲಿನ್ ಇಂಡಿಯಾ ಪ್ರೈಮಾ ಫಂಡ್: 2.1 ಕೋಟಿ ರೂ ಲಾಭ
- ಫ್ರಾಂಕ್ಲಿನ್ ಇಂಡಿಯಾ ಫ್ಲೆಕ್ಸಿ ಕ್ಯಾಪ್ ಫಂಡ್: 1.7 ಕೋಟಿ ರೂ ಲಾಭ
- ಎಸ್ಬಿಐ ಲಾಂಗ್ ಟರ್ಮ್ ಈಕ್ವಿಟಿ ಫಂಡ್: 1.37 ಕೋಟಿ ರೂ
- ಫ್ರಾಂಕ್ಲಿನ್ ಇಂಡಿಯಾ ಬ್ಲೂಚಿಪ್ ಫಂಡ್: 1.2 ಕೋಟಿ ರೂ
- ಐಸಿಐಸಿಐ ಪ್ರುಡೆನ್ಷಿಯಲ್ ಮಲ್ಟಿಕ್ಯಾಪ್ ಫಂಡ್: 1.05 ಕೋಟಿ ರೂ
- ಎಚ್ಡಿಎಫ್ಸಿ ಕ್ಯಾಪಿಟಲ್ ಬಿಲ್ಡರ್ ವ್ಯಾಲ್ಯೂ ಫಂಡ್: 1.04 ಕೋಟಿ ರೂ
- ಎಸ್ಬಿಐ ಲಾರ್ಜ್ ಅಂಡ್ ಮಿಡ್ಕ್ಯಾಪ್ ಫಂಡ್: 93 ಲಕ್ಷ ರೂ ಲಾಭ
- ಕೆನರಾ ರೊಬೇಕೋ ಇಎಲ್ಎಸ್ಎಸ್ ಟ್ಯಾಕ್ಸ್ ಸೇವರ್ ಫಂಡ್: 73.4 ಲಕ್ಷ ರೂ
- ಎಸ್ಬಿಐ ಇಎಸ್ಜಿ ಎಕ್ಸ್ಕ್ಲೂಷನರಿ ಸ್ಟ್ರಾಟಿಜಿ ಫಂಡ್: 66 ಲಕ್ಷ ರ ಲಾಭ
- ಎಚ್ಡಿಎಫ್ಸಿ ಲಾರ್ಜ್ ಅಂಡ್ ಮಿಡ್ ಕ್ಯಾಪ್ ಫಂಡ್: 59.3 ಲಕ್ಷ ರೂ ಲಾಭ
- ಯುಟಿಐ ಫ್ಲೆಕ್ಸಿ ಕ್ಯಾಪ್ ಫಂಡ್: 56.5 ಲಕ್ಷ ರೂ ಲಾಭ
- ಯುಟಿಐ ಲಾರ್ಜ್ ಕ್ಯಾಪ್ ಫಂಡ್: 42 ಲಕ್ಷ ರೂ ಲಾಭ
ಇದನ್ನೂ ಓದಿ: ಸಿಕ್ಕಾಪಟ್ಟೆ ಇರುವ ಮ್ಯೂಚುವಲ್ ಫಂಡ್ಗಳಲ್ಲಿ ಯಾವುದನ್ನು ಆರಿಸುವುದು? ರಾಧಿಕಾ ಗುಪ್ತಾ ಸಲಹೆ ಇದು
ಈ ಮೇಲಿನ ಪಟ್ಟಿಯಲ್ಲಿರುವುದು ಕಳೆದ 30 ವರ್ಷಗಳಿಂದ ತಿಂಗಳಿಗೆ 1,000 ರೂ ಎಸ್ಐಪಿಗೆ ತಂದಿರುವ ಲಾಭದ ವಿವರವಾಗಿದೆ. ಈ ಮೂವತ್ತು ವರ್ಷದಲ್ಲಿ ಎಸ್ಐಪಿ ಮೂಲಕ ಕಟ್ಟಲಾಗುವ ಹಣವೆಲ್ಲವೂ ಸೇರಿಸಿದರೆ 3.6 ಲಕ್ಷ ರೂ ಆಗುತ್ತದೆ. ಫ್ರಾಂಕ್ಲಿನ್ ಇಂಡಿಯಾ ಪ್ರಿಮಾ ಫಂಡ್ ಈ 3.6 ಲಕ್ಷ ರೂ ಹೂಡಿಕೆಗೆ 2.1 ಕೋಟಿ ರೂ ಲಾಭ ತಂದುಕೊಟ್ಟಿರುವುದು ಸಾಮಾನ್ಯ ಸಂಗತಿಯಲ್ಲ. ಅದೂ 30 ವರ್ಷ ಸುದೀರ್ಘ ಅವಧಿಯಲ್ಲಿ ಸ್ಥಿರ ಲಾಭ ತಂದಿದೆ. ಪ್ರತಿ ಐದು ವರ್ಷಕ್ಕೊಮ್ಮೆ ಹೂಡಿಕೆ ಡಬಲ್ ಆಗುತ್ತಾ ಹೋಗಿರುವುದು ಸೋಜಿಗವೇ ಸರಿ.
ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
