ಪೋಸ್ಟ್ ಆಫೀಸ್ನ ಈ ಸ್ಕೀಮ್ನಲ್ಲಿದೆ ನರೇಂದ್ರ ಮೋದಿಯ ಉಳಿತಾಯ ಹಣ; ಎನ್ಎಸ್ಸಿ ಯೋಜನೆ ಬಗ್ಗೆ ತಿಳಿಯಿರಿ
PM Narendra Modi and NSC: ಪ್ರಧಾನಿ ನರೇಂದ್ರ ಮೋದಿ ಅವರು ಕೈಗೊಂಡಿರುವ ಏಕೈಕ ಉಳಿತಾಯ ಯೋಜನೆ ನ್ಯಾಷನಲ್ ಸೇವಿಂಗ್ಸ್ ಸರ್ಟಿಫಿಕೇಟ್. ಇದರಲ್ಲಿ ಅವರು ಹೆಚ್ಚೂಕಡಿಮೆ 9 ಲಕ್ಷ ರೂನಷ್ಟು ಹಣ ಹೊಂದಿದ್ದಾರೆ. ಅಂಚೆ ಕಚೇರಿಯಲ್ಲಿ ಮಾಡಿಸಬಹುದಾದ ಈ ಸ್ಕೀಮ್ನಲ್ಲಿ ಉತ್ತಮ ಎನಿಸುವ ಶೇ. 7.7ರಷ್ಟು ಬಡ್ಡಿ ಸಿಗುತ್ತದೆ.
Updated on:Sep 17, 2023 | 4:02 PM
ಇಂದು ಸೆಪ್ಟೆಂಬರ್ 17, ನರೇಂದ್ರ ಮೋದಿ ಅವರ ಜನ್ಮದಿನ. ಬಹಳ ಸಾಧಾರಣ ಆಸ್ತಿವಂತರಾದ ನರೇಂದ್ರ ಮೋದಿ (PM Narendra Modi) ಅವರ ಬಳಿ ಒಂದು ಚಿರಾಸ್ತಿ ಬಿಟ್ಟರೆ ಬಹುತೇಕ ಹಣ ಸೇವಿಂಗ್ಸ್ ಸ್ಕೀಮ್ ಮತ್ತು ಇನ್ಷೂರೆನ್ಸ್ ಸ್ಕೀಮ್ನದ್ದಾಗಿದೆ. ಪ್ರಧಾನಿಯವರು ನ್ಯಾಷನಲ್ ಸೇವಿಂಗ್ಸ್ ಸರ್ಟಿಫಿಕೇಟ್ ಯೋಜನೆಯಲ್ಲಿ (NSC National Savings Certificate) ಒಂದಷ್ಟು ಉಳಿತಾಯ ಹಣವನ್ನು ತೊಡಗಿಸಿಕೊಂಡಿದ್ದಾರೆ. 2022ರಲ್ಲಿ ಅವರು ಘೋಷಣೆ ಮಾಡಿಕೊಂಡಿರುವ ಆಸ್ತಿವಿವರದ (Declared Assets) ಮಾಹಿತಿ ಪ್ರಕಾರ ಎನ್ಎಸ್ಸಿಯಲ್ಲಿ ಮೋದಿ ಅವರ 9,05,105 ರೂ (9 ಲಕ್ಷ) ಹಣ ಇದೆ. ಅವರ ಒಟ್ಟಾರೆ ಘೋಷಿತ ಆಸ್ತಿ 2.24 ಕೋಟಿ ರೂನಲ್ಲಿ ಇದು ಶೇ. 5ಕ್ಕಿಂತಲೂ ಕಡಿಮೆಯೇ.
ಏನಿದು ನ್ಯಾಷನಲ್ ಸೇವಿಂಗ್ಸ್ ಸರ್ಟಿಫಿಕೇಟ್?
ಎನ್ಎಸ್ಸಿ ಎಂಬುದು ತೆರಿಗೆ ಡಿಡಕ್ಷನ್ಗೆ ಅನುವು ಮಾಡಿಕೊಡುವ ಒಂದು ಉಳಿತಾಯ ಯೋಜನೆ. ಬ್ಯಾಂಕ್ ಅಥವಾ ಅಂಚೆ ಕಚೇರಿಯಲ್ಲಿ ಈ ಸ್ಕೀಮ್ ಪಡೆಯಬಹುದು. ಐದು ವರ್ಷಕ್ಕೆ ಮೆಚ್ಯೂರ್ ಆಗುವ ಈ ಸ್ಕೀಮ್ನಲ್ಲಿ ಕನಿಷ್ಠ ಹೂಡಿಕೆ 1,000 ಇರುತ್ತದೆ. ಗರಿಷ್ಠ ಎಷ್ಟು ಬೇಕಾದರೂ ನೀವು ಹೂಡಿಕೆ ಮಾಡಬಹುದು.
ಇದನ್ನೂ ಓದಿ: PM Vishwakarma: ಪಿಎಂ ವಿಶ್ವಕರ್ಮ ಯೋಜನೆ ಉದ್ಘಾಟನೆ; ಕುಶಲಕರ್ಮಿಗಳಿಗೆಂದಿರುವ ಈ ಸ್ಕೀಮ್ ಪಡೆಯುವುದು ಹೇಗೆ?
ನ್ಯಾಷನಲ್ ಸೇವಿಂಗ್ಸ್ ಸರ್ಟಿಫಿಕೇಟ್ ಬಡ್ಡಿ ಇತ್ಯಾದಿ ವಿವರಗಳು
- ಎನ್ಎಸ್ಸಿಯಲ್ಲಿನ ಹೂಡಿಕೆಗೆ ವರ್ಷಕ್ಕೆ ಶೇ. 7.7ರಷ್ಟು ಬಡ್ಡಿ ಸಿಗುತ್ತದೆ.
- ಯೋಜನೆ ಅವಧಿ 5 ವರ್ಷ, ಲಾಕಿನ್ ಅವಧಿಯೂ 5 ವರ್ಷವೇ.
- ಭಾರತದ ಪ್ರಜೆಗಳು ಮಾತ್ರವೇ ಈ ಸ್ಕೀಮ್ ಪಡೆಯಬಹುದು.
- ಒಬ್ಬ ವ್ಯಕ್ತಿ ಎಷ್ಟು ಬೇಕಾದರೂ ನ್ಯಾಷನಲ್ ಸೇವಿಂಗ್ಸ್ ಸರ್ಟಿಫಿಕೇಟ್ ಪಡೆಯಬಹುದು.
- ಎನ್ಎಸ್ಸಿ ಅನ್ನು ಜಾಮೀನಾಗಿ ಇಟ್ಟು ಯಾವುದೇ ಬ್ಯಾಂಕ್ನಲ್ಲಿ ಸಾಲ ಪಡೆಯಬಹುದು.
ನ್ಯಾಷನಲ್ ಸೇವಿಂಗ್ಸ್ ಸರ್ಟಿಫಿಕೇಟ್ನಿಂದ ತೆರಿಗೆ ಲಾಭಗಳು
ಎನ್ಎಸ್ಸಿಯಲ್ಲಿ ನೀವು ಮಾಡಿರುವ ಹೂಡಿಕೆಗೆ ಟ್ಯಾಕ್ಸ್ ರಿಬೇಟ್ ಪಡೆಯಬಹುದು. ಒಂದು ವರ್ಷದಲ್ಲಿ 1.5 ಲಕ್ಷ ರೂವರೆಗಿನ ಇಂತಹ ಹೂಡಿಕೆಗೆ ತೆರಿಗೆ ವಿನಾಯಿತಿ ಇರುತ್ತದೆ. ಈ ಹೂಡಿಕೆಯಿಂದ ಸಿಗುವ ಬಡ್ಡಿಹಣವೂ ಒಟ್ಟಾರೆ ಮೊತ್ತಕ್ಕೆ ಸೇರ್ಪಡೆಯಾಗಿ, ಅಷ್ಟಕ್ಕೂ ತೆರಿಗೆ ವಿನಾಯಿತಿ ಲಭ್ಯ ಇರುತ್ತದೆ. ಮೆಚ್ಯೂರ್ ಆದ ಬಳಿಕ ಯಾವುದೇ ತೆರಿಗೆ ಕಡಿತ ಇಲ್ಲದೇ ಪೂರ್ಣ ಮೊತ್ತ ಕೈ ಸೇರುತ್ತದೆ.
ಎನ್ಎಸ್ಸಿ ಎಲ್ಲಿ ಪಡೆಯಬಹುದು?
ಅಂಚೆ ಕಚೇರಿ ಅಥವಾ ನಿಗದಿತ ಬ್ಯಾಂಕುಗಳಲ್ಲಿ ನ್ಯಾಷನಲ್ ಸೇವಿಂಗ್ಸ್ ಸರ್ಟಿಫಿಕೇಟ್ ಪಡೆಯಬಹುದು. ಆನ್ಲೈನ್ನಲ್ಲಿ ಇದನ್ನು ತೆರೆಯಲು ಸಾಧ್ಯವಿಲ್ಲ. ಕಚೇರಿಗೆ ಹೋಗಿ ಅರ್ಜಿ ಭರ್ತಿ ಮಾಡಿ ಸಲ್ಲಿಸಬೇಕು. 2016ರಿಂದೀಚೆ ಭೌತಿಕವಾದ ಸರ್ಟಿಫಿಕೇಟ್ ಬದಲು ಎಲೆಕ್ಟ್ರಾನಿಕ್ ಪ್ರತಿಯನ್ನು ಕೊಡಲಾಗುತ್ತದೆ.
ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 4:01 pm, Sun, 17 September 23
