ಪಿಐಡಿ ಫಂಡ್ ಸ್ಕೀಮ್ ಅಡಿಯಲ್ಲಿ ಪಿಎಂ ವಿಶ್ವಕರ್ಮ ಯೋಜನೆ ಒಳಗೊಳ್ಳಲು ಆರ್​ಬಿಐ ನಿರ್ಧಾರ; ಸ್ಕೀಮ್ ಅವಧಿ 2 ವರ್ಷ ವಿಸ್ತರಣೆ

ನವದೆಹಲಿ, ಅಕ್ಟೋಬರ್ 6: ಪಾವತಿ ವ್ಯವಸ್ಥೆಯಲ್ಲಿ ಸುಧಾರಣೆ ತರಲು ಜಾರಿ ಮಾಡಲಾಗಿರುವ ಪೇಮೆಂಟ್ಸ್ ಇನ್​ಫ್ರಾಸ್ಟ್ರಕ್ಚರ್ ಡೆವಲಪ್ಮೆಂಟ್ ಫಂಡ್ ಸ್ಕೀಮ್​ನ (PIDF) ಅವಧಿಯನ್ನು ಎರಡು ವರ್ಷ ವಿಸ್ತರಿಸಲು ಆರ್​ಬಿಐ ನಿರ್ಧರಿಸಿದೆ. 2023ರಕ್ಕೆ ಅಂತ್ಯಗೊಳ್ಳಬೇಕಿದ್ದ ಈ ಸ್ಕೀಮ್ 2025 ಡಿಸೆಂಬರ್ 31ರವರೆಗೂ ಇರಲಿದೆ. ಅಲ್ಲದೇ, ಕೇಂದ್ರ ಸರ್ಕಾರ ಹೊಸದಾಗಿ ಪ್ರಟಿಸಿರುವ ಪಿಎಂ ವಿಶ್ವಕರ್ಮ ಯೋಜನೆಯನ್ನು ಪಿಐಡಿಎಫ್ ಸ್ಕೀಮ್ ವ್ಯಾಪ್ತಿಗೆ ತರಲಾಗಿದೆ. ಇಂದು ಮಾನಿಟರಿ ಪಾಲಿಸಿ ಕಮಿಟಿ ಸಭೆ ಬಳಿಕ ಆರ್​ಬಿಐ ಗವರ್ನರ್ ಶಕ್ತಿಕಾಂತದಾಸ್ ಸುದ್ದಿಗೋಷ್ಠಿಯಲ್ಲಿ ಈ ವಿಚಾರ ತಿಳಿಸಿದ್ದಾರೆ.

ಏನಿದು ಪಿಐಡಿಎಫ್ ಸ್ಕೀಮ್?

ಈಶಾನ್ಯ ಭಾಗದ ರಾಜ್ಯಗಳು, ಜಮ್ಮು ಕಾಶ್ಮೀರ, ಲಡಾಖ್ ಮೊದಲಾದ ಕೇಂದ್ರಾಡಳಿತ ಪ್ರದೇಶಗಳು ಸೇರಿದಂತೆ ಕೆಳ ಸ್ತರದ ಪ್ರದೇಶಗಳಲ್ಲಿ (ಟಯರ್ 3 ಹಾಗು ಕೆಳಗಿನ ಕೇಂದ್ರಗಳು) ಪಾವತಿ ಸ್ವೀಕಾರ ಸಾಧನಗಳ ವ್ಯವಸ್ಥೆಯನ್ನು ಬೆಳೆಸುವುದು ಪಿಐಡಿಎಫ್ ಸ್ಕೀಮ್​ನ ಉದ್ದೇಶ. ಪಿಒಎಸ್, ಎಂಪಿಒಎಸ್ (ಮೊಬೈಲ್ ಪಾಯಿಂಟ್ ಆಫ್ ಸೇಲ್), ಕ್ಯೂಆರ್ ಕೋಡ್ ಆಧಾರಿತ ಪೇಮೆಂಟ್, ಜನರಲ್ ಪ್ಯಾಕೆಟ್ ರೇಡಿಯೋ ಸರ್ವಿಸ್, ಪಿಎಸ್​ಟಿಎನ್ ಇತ್ಯಾದಿ ಕಾರ್ಡ್ ಪೇಮೆಂಟ್ ಡಿವೈಸ್​ಗಳನ್ನು ಅಳವಡಿಸಿಕೊಳ್ಳಲು ಸಾಕಷ್ಟು ಸಬ್ಸಿಡಿಗಳ ಮೂಲಕ ಉತ್ತೇಜನ ನೀಡಲಾಗುತ್ತದೆ.

ಇದನ್ನೂ ಓದಿ: ಸಹಕಾರಿ ಬ್ಯಾಂಕುಗಳಲ್ಲಿ ಚಿನ್ನದ ಮೇಲಿನ ಸಾಲದ ಮಿತಿ 4 ಲಕ್ಷಕ್ಕೆ ಹೆಚ್ಚಳ; ಆರ್​ಬಿಐ ಮಹತ್ವದ ನಿರ್ಧಾರ

ಭೌತಿಕ ಪಿಒಎಸ್ ಸಾಧನಗಳಿಗೆ ಸಬ್ಸಿಡಿ ಶೇ. 30ರಿಂದ 50ರವರೆಗೂ ಇದೆ. ಡಿಜಿಟಲ್ ಪಿಒಎಸ್ ಸಾಧನಗಳಾದರೆ ಶೇ. 75ರವರೆಗೂ ಸಬ್ಸಿಡಿಗಳಿರುತ್ತವೆ. ಈ ಸ್ಕೀಮ್​ನಲ್ಲಿ ಆರ್​ಬಿಐನಿಂದಲೇ ಫಂಡಿಂಗ್ ನಡೆಯುತ್ತದೆ.

2023ರ ಆಗಸ್ಟ್ ತಿಂಗಳ ವೇಳೆಗೆ ಪಿಐಡಿಎಫ್ ಸ್ಕೀಮ್​ನಲ್ಲಿ 2.66 ಕೋಟಿ ಸಾಧನಗಳನ್ನು ಅಳವಡಿಸಲಾಗಿತ್ತು. 2023ರ ಡಿಸೆಂಬರ್ 31ರವರೆಗೂ ಇದ್ದ ಈ ಸ್ಕೀಮ್ ಅನ್ನು 2025ರ ಡಿಸೆಂಬರ್ 31ರವರೆಗೂ ವಿಸ್ತರಿಸಲಾಗಿದೆ.

2021ರ ಆಗಸ್ಟ್ ತಿಂಗಳಲ್ಲಿ ಪಿಎಂ ಸ್ವನಿಧಿ ಯೋಜನೆಯ ಫಲಾನುಭವಿಗಳನ್ನು ಪಿಐಡಿಎಫ್ ಸ್ಕೀಮ್ ವ್ಯಾಪ್ತಿಗೆ ತರಲಾಗಿತ್ತು. ಇದೀಗ ಪಿಎಂ ವಿಶ್ವಕರ್ಮ ಯೋಜನೆಯನ್ನೂ ಒಳಗೊಳ್ಳಲಾಗಿದೆ.

ಇದನ್ನೂ ಓದಿ: ಆರ್​ಬಿಐ ಎಂಪಿಸಿ ಸಭೆ ಹೈಲೈಟ್ಸ್; ರೆಪೋ ದರ ಶೇ. 6.5ರಲ್ಲಿ ಮುಂದುವರಿಕೆ; ಜಿಡಿಪಿ, ಹಣದುಬ್ಬರ ಅಂದಾಜು ವಿವರ ಇಲ್ಲಿದೆ

ಸೆಪ್ಟೆಂಬರ್ ತಿಂಗಳಲ್ಲಿ ಪಿಎಂ ವಿಶ್ವಕರ್ಮ ಯೋಜನೆಯನ್ನು ಜಾರಿಗೆ ತರಲಾಗಿದೆ. ಇದರಲ್ಲಿ ಬಡಗಿ, ಚಮ್ಮಾರ, ಕಮ್ಮಾರ, ಕುಂಬಾರ, ಶಿಲ್ಪಿ, ಕ್ಷೌರಿಕ ಇತ್ಯಾದಿ 18 ವಿವಿಧ ಕುಶಲಕರ್ಮಿಗಳಿಗೆ ತಂದಿರುವ ಯೋಜನೆಯಾಗಿದೆ. ವರ್ಷಕ್ಕೆ ಶೇ. 5ರ ಬಡ್ಡಿದರದಲ್ಲಿ 3 ಲಕ್ಷ ರೂವರೆಗೂ ಅಡಮಾನರಹಿತ ಸಾಲ ನೀಡಲಾಗುತ್ತದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ