ಅಂಬಾನಿ ಸಾಮ್ರಾಜ್ಯಕ್ಕಿಂತಲೂ ಟಾಟಾ ಗ್ರೂಪ್ನದ್ದು ಹೆಚ್ಚು ಮಾರುಕಟ್ಟೆ ಬಂಡವಾಳ; ರತನ್ ಟಾಟಾ ಚಮತ್ಕಾರ
Tata Group vs Reliance Group market cap: ಟಾಟಾ ಗ್ರೂಪ್ನ ಅಡಿಯಲ್ಲಿ ಹೆಚ್ಚೂಕಡಿಮೆ 100 ಕಂಪನಿಗಳಿವೆ. ಈ ಪೈಕಿ 15ರಿಂದ 16 ಕಂಪನಿಗಳು ಷೇರು ಮಾರುಕಟ್ಟೆಯಲ್ಲಿ ಲಿಸ್ಟ್ ಆಗಿವೆ. ಈ ಲಿಸ್ಟೆಡ್ ಕಂಪನಿಗಳ ಒಟ್ಟು ಮಾರುಕಟ್ಟೆ ಬಂಡವಾಳ 31 ಲಕ್ಷ ಕೋಟಿ ರೂ ಆಗುತ್ತದೆ. ಭಾರತದ ಅತೀಶ್ರೀಮಂತ ಎನಿಸಿದ ಮುಕೇಶ್ ಅಂಬಾನಿ ಅವರ ರಿಲಾಯನ್ಸ್ ಗ್ರೂಪ್ನ ಲಿಸ್ಟೆಡ್ ಕಂಪನಿಗಳ ಒಟ್ಟು ಮಾರ್ಕೆಟ್ ಕ್ಯಾಪ್ 22 ಲಕ್ಷ ಕೋಟಿ ರೂ ದಾಟುವುದಿಲ್ಲ.
Updated on: Oct 10, 2024 | 5:46 PM
ಮುಂಬೈ, ಅಕ್ಟೋಬರ್ 10: ರತನ್ ಟಾಟಾ 1991ರಿಂದ ಆರಂಭಿಸಿ 2012ರವರೆಗೂ ಟಾಟಾ ಸನ್ಸ್ ಛೇರ್ಮನ್ ಆಗಿದ್ದರು. ಟಾಟಾ ಸನ್ಸ್ ಎಂಬುದು ಟಾಟಾ ಗ್ರೂಪ್ನ ಮಾಲೀಕ ಸಂಸ್ಥೆ. ಈ ಟಾಟಾ ಗ್ರೂಪ್ ಅಡಿಯಲ್ಲಿ ಹಲವಾರು ಕಂಪನಿಗಳಿವೆ. ಉಪ್ಪು ತಯಾರಿಸುವುದರಿಂದ ಹಿಡಿದು ಏರ್ಲೈನ್ಸ್ವರೆಗೆ ಹಲವು ಉದ್ದಿಮೆಗಳಲ್ಲಿ ಟಾಟಾ ಗ್ರೂಪ್ ಹಿಡಿತ ಹೊಂದಿದೆ. ಷೇರು ಮಾರುಕಟ್ಟೆಯಲ್ಲಿ ಲಿಸ್ಟ್ ಆಗಿರುವ ಕಂಪನಿಗಳೇ 15-16 ಇವೆ. ಇವುಗಳ ಈಗಿನ ಮಾರುಕಟ್ಟೆ ಬಂಡವಾಳ ಒಟ್ಟುಗೂಡಿಸಿ ಎಣಿಸಿದರೆ 31 ಲಕ್ಷ ಕೋಟಿ ರೂ ದಾಟುತ್ತದೆ.
ಭಾರತದ ಮತ್ತೊಂದು ಬಿಸಿನೆಸ್ ಫ್ಯಾಮಿಲಿಯಾದ ಅಂಬಾನಿಯ ರಿಲಾಯನ್ಸ್ ಗ್ರೂಪ್ನ ಎಲ್ಲಾ ಕಂಪನಿಗಳ ಒಟ್ಟು ಮಾರುಕಟ್ಟೆ ಬಂಡವಾಳ 22 ಲಕ್ಷ ಕೋಟಿ ರೂ ದಾಟುವುದಿಲ್ಲ. ಅದಕ್ಕೆ ಹೋಲಿಸಿದರೆ ಟಾಟಾ ಗ್ರೂಪ್ನ ಕಂಪನಿಗಳ ಮಾರ್ಕೆಟ್ ಕ್ಯಾಪ್ ಅಧಿಕವಾಗಿದೆ. ಅತಿಹೆಚ್ಚು ಉದ್ಯೋಗ ನೀಡುವ ಭಾರತೀಯ ಕಂಪನಿಗಳಲ್ಲಿ ಟಿಸಿಎಸ್ ಕೂಡ ಒಂದು.
ಇದನ್ನೂ ಓದಿ: ರತನ್ ಟಾಟಾ ನಿಧನಕ್ಕೆ ಷೇರುಪೇಟೆ ರಿಯಾಕ್ಷನ್ ಹೇಗಿತ್ತು? 15 ಷೇರುಗಳಲ್ಲಿ ಎದ್ದಿದ್ದೆಷ್ಟು, ಬಿದ್ದಿದ್ದೆಷ್ಟು?
ಟಾಟಾ ಗ್ರೂಪ್ನ ಲಿಸ್ಟೆಡ್ ಕಂಪನಿಗಳು ಮತ್ತು ಮಾರುಕಟ್ಟೆ ಬಂಡವಾಳ
- ಟಾಟಾ ಕನ್ಸಲ್ಟೆನ್ಸಿ ಸರ್ವಿಸ್ (ಟಿಸಿಎಸ್): 15.38 ಲಕ್ಷ ಕೋಟಿ ರೂ
- ಟಾಟಾ ಮೋಟಾರ್ಸ್: 3.46 ಲಕ್ಷ ಕೋಟಿ ರೂ
- ಟೈಟಾನ್ ಕಂಪನಿ: 3.10 ಲಕ್ಷ ಕೋಟಿ ರೂ
- ಟ್ರೆಂಟ್ ಲಿ: 2.92 ಲಕ್ಷ ಕೋಟಿ ರೂ
- ಟಾಟಾ ಸ್ಟೀಲ್: 1.98 ಲಕ್ಷ ಕೋಟಿ ರೂ
- ಟಾಟಾ ಪವರ್: 1.47 ಲಕ್ಷ ಕೋಟಿ ರೂ
- ಟಾಟಾ ಕನ್ಸೂಮರ್ ಪ್ರಾಡಕ್ಟ್ಸ್: 1.10 ಲಕ್ಷ ಕೋಟಿ ರೂ
- ಇಂಡಿಯನ್ ಹೋಟೆಲ್ಸ್ ಕಂಪನಿ: 98,729 ಕೋಟಿ ರೂ
- ವೋಲ್ಟಾಸ್ ಲಿ: 59,089 ಕೋಟಿ ರೂ
- ಟಾಟಾ ಕಮ್ಯೂನಿಕೇಶನ್ಸ್: 55,579 ಕೋಟಿ ರೂ
- ಟಾಟಾ ಎಲ್ಕ್ಸಿ: 47,402 ಕೋಟಿ ರೂ
- ಟಾಟಾ ಟೆಕ್ನಾಲಜೀಸ್ ಲಿ: 42,530 ಕೋಟಿ ರೂ
- ಟಾಟಾ ಇನ್ವೆಸ್ಟ್ಮೆಂಟ್ ಕಾರ್ಪೊರೇಶನ್: 33,140 ಕೋಟಿ ರೂ
- ಟಾಟಾ ಕೆಮಿಕಲ್ಸ್: 28,167 ಕೋಟಿ ರೂ
- ನೆಲ್ಕೋ ಲಿಮಿಟೆಡ್: 2,276 ಕೋಟಿ ರೂ
ರಿಲಾಯನ್ಸ್ ಗ್ರೂಪ್ನ 10 ಕಂಪನಿಗಳು ಷೇರುಮಾರುಕಟ್ಟೆಯಲ್ಲಿ ಲಿಸ್ಟ್ ಆಗಿವೆ. ಈ ಪೈಕಿ ರಿಲಾಯನ್ಸ್ ಇಂಡಸ್ಟ್ರೀಸ್ವೊಂದೇ 18 ಲಕ್ಷ ಕೋಟಿ ರೂನಷ್ಟು ಮಾರುಕಟ್ಟೆ ಬಂಡವಾಳ ಹೊಂದಿದೆ. ಅದು ಬಿಟ್ಟರೆ ಗಮನಾರ್ಹ ಮಾರ್ಕೆಟ್ ಕ್ಯಾಪ್ ಹೊಂದಿರುವುದು ಜಿಯೋ ಫೈನಾನ್ಷಿಯಲ್ ಸರ್ವಿಸಸ್. ಉಳಿದವು ಹೆಚ್ಚಿನ ಷೇರು ಸಂಪತ್ತು ಹೊಂದಿಲ್ಲ.
ಇದನ್ನೂ ಓದಿ: Ratan Tata Funeral: ಪಾರ್ಸಿಯಲ್ಲ ಹಿಂದೂ ಸಂಪ್ರದಾಯದಂತೆ ರತನ್ ಟಾಟಾ ಅಂತ್ಯಸಂಸ್ಕಾರ ಏಕೆ?
ಟಾಟಾ ಗ್ರೂಪ್ನ ಕಂಪನಿಗಳು ಸುದೀರ್ಘ ಕಾಲದಿಂದ ಬಿಸಿನೆಸ್ನಲ್ಲಿದ್ದು, ವಿಶ್ವಾಸಾರ್ಹತೆಗೆ ಹೆಸರುವಾಸಿಯಾಗಿವೆ. ರತನ್ ಟಾಟಾ 1991ರಿಂದ 2012ರವರೆಗೂ ಗ್ರೂಪ್ನ ನೇತೃತ್ವ ವಹಿಸಿದ್ದರು. ಈ ಅವಧಿಯಲ್ಲಿ ಟಾಟಾ ಗ್ರೂಪ್ನ ಬಿಸಿನೆಸ್ ಗಣನೀಯವಾಗಿ ವಿಸ್ತರಣೆ ಆಗಿದೆ. ಮಾರುಕಟ್ಟೆ ಬಂಡವಾಳ 33 ಪಟ್ಟು ಹೆಚ್ಚಾಯಿತು. 30,000 ರೂ ಇದ್ದ ಮಾರ್ಕೆಟ್ ಕ್ಯಾಪಿ 5 ಲಕ್ಷ ಕೋಟಿ ರೂ ತಲುಪಿತು. ಗ್ರೂಪ್ನ ಒಟ್ಟಾರೆ ಆದಾಯ 1991ರಲ್ಲಿ 18,000 ಕೋಟಿ ರೂ ಇದ್ದದ್ದು 2012ರಲ್ಲಿ 5.5 ಲಕ್ಷ ಕೋಟಿ ರೂ ತಲುಪಿತು.
ರತನ್ ಟಾಟಾ ಆಡಳಿತ ಚುಕ್ಕಾಣಿ ಹಿಡಿದಾಗ ಗ್ರೂಪ್ನ ಅಡಿಯಲ್ಲಿ 95 ಕಂಪನಿಗಳಿದ್ದವು. ಬಹುತೇಕ ಎಲ್ಲವೂ ಪ್ರತ್ಯೇಕವಾಗಿ ನಿರ್ವಹಿತವಾಗುತ್ತಿದ್ದವು. ರತನ್ ಟಾಟಾ ಎಲ್ಲಾ ಕಂಪನಿಗಳನ್ನೂ ಹಿಡಿತಕ್ಕೆ ತೆಗೆದುಕೊಂಡು, ಒಂದು ಗೊತ್ತು ಗುರಿ ನೀಡಿದ್ದು ವಿಶೇಷ. ಇವರ ಸಮರ್ಪಕ ನಿರ್ವಹಣೆ ಮತ್ತು ದೃಷ್ಟಿಕೋನದ ಕಾರಣದಿಂದ ಗ್ರೂಪ್ನ ಎಲ್ಲಾ ಕಂಪನಿಗಳು ಉತ್ತಮವಾಗಿ ಬೆಳೆದವು.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
