ಸಿಆರ್​ಆರ್ 50 ಮೂಲಾಂಕಗಳಷ್ಟು ಇಳಿಕೆ; ಶೇ. 4ಕ್ಕೆ ಇಳಿದ ಕ್ಯಾಷ್ ರಿಸರ್ವ್ ರೇಶಿಯೋ; ಆರ್ಥಿಕತೆಗೆ ಪುಷ್ಟಿ ಸಿಗುವ ನಿರೀಕ್ಷೆ

ನವದೆಹಲಿ, ಡಿಸೆಂಬರ್ 6: ಆರ್​ಬಿಐನ ಹಣಕಾಸು ನೀತಿ ಸಮಿತಿಯು ರಿಪೋ ದರವನ್ನು ಇಳಿಸದೇ ಹೋದರೂ ನಿರೀಕ್ಷೆಯಂತೆ ಸಿಆರ್​ಆರ್ ಅಥವಾ ಕ್ಯಾಷ್ ರಿಸರ್ವ್ ರೇಶಿಯೋವನ್ನು 50 ಮೂಲಾಂಕಗಳಷ್ಟು ಕಡಿತಗೊಳಿಸಿದೆ. ಶೇ. 4.5ರಷ್ಟಿದ್ದ ಸಿಆರ್​ಆರ್ ಅನ್ನು ಶೇ. 4ಕ್ಕೆ ಇಳಿಸಲಾಗಿದೆ. ಆರ್​ಬಿಐ ಗವರ್ನರ್ ಶಕ್ತಿಕಾಂತ ದಾಸ್ ಅವರು ಇಂದು ಶುಕ್ರವಾರ ಈ ನಿರ್ಧಾರ ಪ್ರಕಟಿಸಿದರು. ಸಿಆರ್​ಆರ್ ಅನ್ನು 50 ಬೇಸಿಸ್ ಪಾಯಿಂಟ್​ಗಳಷ್ಟು ಇಳಿಕೆ ಮಾಡಿದ್ದರಿಂದ ಹಣಕಾಸು ಮಾರುಕಟ್ಟೆಗೆ 1.16 ಲಕ್ಷ ಕೋಟಿ ರೂ ಹಣದ ಹರಿವು ಹೆಚ್ಚಲಿದೆ ಎಂದು ಆರ್​ಬಿಐ ಗವರ್ನರ್ ಈ ಸಂದರ್ಭದಲ್ಲಿ ಹೇಳಿದರು.

ಸಿಆರ್​ಆರ್ ಎಂದರೇನು?

ಸಿಆರ್​ಆರ್ ಎಂದರೆ ಕ್ಯಾಷ್ ರಿಸರ್ವ್ ರೇಶಿಯೋ. ಅಂದರೆ, ಮೀಸಲು ಹಣ ಪ್ರಮಾಣ. ಒಂದು ಬ್ಯಾಂಕ್ ತನ್ನ ಗ್ರಾಹಕರು ಇಡುವ ಒಟ್ಟು ಠೇವಣಿಗಳಲ್ಲಿ ನಿರ್ದಿಷ್ಟ ಭಾಗದ ಹಣವನ್ನು ಮೀಸಲು ನಿಧಿಯಾಗಿ ಇಟ್ಟುಕೊಳ್ಳಬೇಕು. ಈ ಹಣವನ್ನು ಬ್ಯಾಂಕ್​ನ ಸಂಗ್ರಹದಲ್ಲಿ ಇಡಬಹುದು ಅಥವಾ ರಿಸರ್ವ್ ಬ್ಯಾಂಕ್​ನಲ್ಲಿ ಇರಿಸಬಹುದು. ಠೇವಣಿದಾರರಿಗೆ ತುರ್ತಾಗಿ ಹಣ ಮರಳಿಸುವ ಸ್ಥಿತಿ ಬಂದಾಗ ಬ್ಯಾಂಕು ಈ ನಿಧಿಯನ್ನು ಬಳಸಿಕೊಳ್ಳಬಹುದು. ಗ್ರಾಹಕರ ಹಿತದೃಷ್ಟಿಯಿಂದ ಆರ್​ಬಿಐ ಸಿಆರ್​ಆರ್ ನಿಯಮವನ್ನು ರೂಪಿಸಿದೆ.

ಇದನ್ನೂ ಓದಿ: RBI MPC Updates: ರಿಪೋ ದರ ಇಳಿಸದ ಆರ್​ಬಿಐ; ಶೇ. 6.50ರಲ್ಲೇ ಬಡ್ಡಿದರ ಮುಂದುವರಿಕೆ

ಉದಾಹರಣೆಗೆ, ಬ್ಯಾಂಕ್​ನ ಗ್ರಾಹಕರು ಇಟ್ಟಿರುವ ಒಟ್ಟು ಠೇವಣಿ 10 ಲಕ್ಷ ಕೋಟಿ ರೂ ಎಂದಿದೆ ಎಂದು ಭಾವಿಸೋಣ. ಈಗ ಸಿಆರ್​​ಆರ್ ದರ ಶೇ. 4ಕ್ಕೆ ನಿಗದಿ ಮಾಡಲಾಗಿದೆ. ಈ ನಿಯಮದ ಪ್ರಕಾರ ಬ್ಯಾಂಕು 40,000 ಕೋಟಿ ರೂ ಹಣವನ್ನು ರಿಸರ್ವ್ ಆಗಿ ಎತ್ತಿ ಇಡಬೇಕಾಗುತ್ತದೆ.

ಈ ಮೊದಲಿನ ಸಿಆರ್​ಆರ್ ದರವನ್ನು ಇದೇ ನಿದರ್ಶನದಲ್ಲಿ ಪರಿಗಣಿಸಿದಲ್ಲಿ ಬ್ಯಾಂಕು 45,000 ಕೋಟಿ ರೂ ಎತ್ತಿಡಬೇಕಿತ್ತು. ಈಗ ಅದು 40,000 ಕೋಟಿ ರೂಗೆ ಇಳಿದಿದೆ. ಈ ಬ್ಯಾಂಕಿಗೆ 5,000 ಕೋಟಿ ರೂ ಹಣವನ್ನು ಸಾಲ ನೀಡಲು ಬಳಸಿಕೊಳ್ಳಬಹುದು.

ಇದನ್ನೂ ಓದಿ: ಮನೆಮನೆಗೆ ಸೌರಶಕ್ತಿ; ಪಿಎಂ ಸೂರ್ಯಘರ್ ಯೋಜನೆಯಲ್ಲಿ 1.45 ಲಕ್ಷ ನೊಂದಣಿ; ಅರ್ಜಿ ಸಲ್ಲಿಸುವ ಕ್ರಮಗಳ ವಿವರ

ಆರ್​ಬಿಐ ಕೊನೆಯದಾಗಿ ಸಿಆರ್​ಆರ್ ಅನ್ನು ಕಡಿಮೆ ಮಾಡಿದ್ದು ಕೋವಿಡ್ ಸಂದರ್ಭದಲ್ಲಿ. 2020ರ ಮಾರ್ಚ್​ನಲ್ಲಿ ಕ್ಯಾಷ್ ರಿಸರ್ವ್ ರೇಶಿಯೋವನ್ನು ಶೇ. 4.5ಕ್ಕೆ ಇಳಿಸಲಾಗಿತ್ತು. ನಾಲ್ಕು ವರ್ಷಗಳ ಬಳಿಕ ಈಗ ಮತ್ತೊಂದು ಸುತ್ತಿನ ಇಳಿಕೆ ಆಗಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ