ಎಎಂಸಿಎ ಪ್ರಾಜೆಕ್ಟ್ ರೇಸ್​ನಿಂದ ಎಚ್​ಎಎಲ್ ಔಟ್; ಈ ಯೋಜನೆಯಿಂದ ನಿರ್ಗಮಿಸಲು ಕಾರಣವಾಯಿತಾ ಈ ಸಂಗತಿ?

ಬೆಂಗಳೂರು, ಫೆಬ್ರುವರಿ 5: ಸ್ವಂತವಾಗಿ ಐದನೇ ತಲೆಮಾರಿನ ಫೈಟರ್ ಜೆಟ್ ತಯಾರಿಸುವ ಅತ್ಯಂತ ಮಹತ್ವಾಕಾಂಕ್ಷೆಯ ಎಎಂಸಿಎ ಯೋಜನೆಯ (AMCA project) ರೇಸ್​ನಿಂದ ಎಚ್​ಎಎಲ್ ಹೊರಬಿದ್ದಿದೆ. ಟಾಟಾ ಗ್ರೂಪ್, ಕಲ್ಯಾಣಿ ಗ್ರೂಪ್ ಮತ್ತು ಎಲ್ ಅಂಡ್ ಟಿ ನೇತೃತ್ವದ ಗುಂಪುಗಳು (Consortium) ಈಗ ಈ ರೇಸ್​ನಲ್ಲಿ ಉಳಿದಿವೆ. ಮುಂದಿನ ದಿನಗಳಲ್ಲಿ ಒಂದು ಸಂಸ್ಥೆಗೆ ಎಎಂಸಿಎ ಅಭಿವೃದ್ಧಿಪಡಿಸುವ ಮಹತ್ವದ ಪ್ರಾಜೆಕ್ಟ್ ಸಿಗಲಿದೆ. ಬಿಇಎಂಎಲ್, ಬಿಇಎಲ್, ಡಾಟಾ ಪ್ಯಾಟರ್ನ್ಸ್ ಇತ್ಯಾದಿ ಕಂಪನಿಗಳು ಕಲ್ಯಾಣಿ ಗ್ರೂಪ್ ಮತ್ತು ಎಲ್ ಅಂಡ್ ಟಿ ನೇತೃತ್ವದ ಕನ್ಸಾರ್ಟಿಯಂಗಳಲ್ಲಿ ಇವೆ.

ಎಎಂಸಿಎ ಪ್ರಾಜೆಕ್ಟ್​ಗೆ ಆಯ್ಕೆಯಾದ ಸಂಸ್ಥೆಯು ಪ್ರೋಟೊಟೈಪ್​ಗಳನ್ನು ಮೊದಲು ನಿರ್ಮಿಸಬೇಕಾಗುತ್ತದೆ. ಈ ಪ್ರೋಟೋಟೈಪ್ ನಿರ್ಮಾಣ ಯೋಜನೆಯೇ 16,000 ಕೋಟಿ ರೂ ಆಗಿರುತ್ತದೆ. ಇವುಗಳ ಪ್ರಯೋಗಗಳು ಯಶಸ್ವಿಯಾದ ಬಳಿಕ ಫೈಟರ್ ಜೆಟ್​ಗಳ ಉತ್ಪಾದನೆ ಶುರುವಾಗುತ್ತದೆ. ಇದಕ್ಕೆ ಸುಮಾರು 10 ವರ್ಷಗಳಾಗುವ ನಿರೀಕ್ಷೆ ಇದೆ. ಪ್ರೋಟೋಟೈಪ್​ನ ಮೊದಲ ಫ್ಲೈಟ್ 2028 ಅಥವಾ 2029ರಲ್ಲಿ ನಡೆಯಬಹುದು. ಇದಕ್ಕೆ ಹಸಿರು ನಿಶಾನೆ ಸಿಕ್ಕರೆ ಜೆಟ್​ಗಳ ಪ್ರೊಡಕ್ಷನ್ 2035ರಲ್ಲಿ ಆರಂಭವಾಗಬಹುದು.

ಸದ್ಯ ಎಎಂಸಿಎ ಪ್ರಾಜೆಕ್ಟ್ ರೇಸ್​ನಲ್ಲಿ ಕಣಕ್ಕಿಳಿದಿರುವುವೆಲ್ಲಾ ಖಾಸಗಿ ಸಂಸ್ಥೆಗಳೇ ಎನ್ನುವುದು ವಿಶೇಷ. ಭಾರತೀಯ ವಾಯುಪಡೆಗೆ ನೂರಕ್ಕೂ ಅಧಿಕ ಫೈಟರ್​ಗಳ ಅಗತ್ಯ ಇದೆ. ಹೀಗಾಗಿ, ಈ ಎಎಂಸಿಎ ಪ್ರಾಜೆಕ್ಟ್​ನ ಮೌಲ್ಯ ಹಲವು ಲಕ್ಷ ಕೋಟಿ ರೂಗಳಿಗೂ ಅಧಿಕ ಇರಬಹುದು.

ಇದನ್ನೂ ಓದಿ: ನಾಲ್ಕೈದು ದಿನದಲ್ಲಿ ವ್ಯಾಪಾರ ಒಪ್ಪಂದ ಸಂಬಂಧ ಭಾರತ-ಅಮೆರಿಕ ಜಂಟಿ ಹೇಳಿಕೆ: ಪೀಯೂಶ್ ಗೋಯಲ್

ಎಚ್​ಎಎಲ್ ಈ ರೇಸ್​ನಿಂದ ಹೊರಬಿದ್ದಿದ್ದು ಯಾಕೆ?

ಫೈಟರ್ ಜೆಟ್ ತಯಾರಿಕೆ ಎಂದರೆ ಡೀಫಾಲ್ಟ್ ಆಗಿ ಎಲ್ಲರ ಕಣ್ಣು ಎಚ್​ಎಎಲ್​ನತ್ತಲ್ಲೇ ನೆಟ್ಟಿರುತ್ತದೆ. ಆದರೆ, ಎಎಂಸಿಎ ಪ್ರೋಗ್ರಾಮ್​ಗೆ ಸರ್ಕಾರ ಖಾಸಗಿಯವರಿಗೂ ಅವಕಾಶ ಕೊಡಲು ನಿರ್ಧರಿಸಿತು. ಪ್ರಾಜೆಕ್ಟ್​ಗೆ ಇಒಐ ಸಲ್ಲಿಸಲು ಕೆಲ ಮಾನದಂಡಗಳನ್ನು ಸರ್ಕಾರ ನಿಗದಿ ಮಾಡಿತು. ಅಂಥ ಒಂದು ಮಾನದಂಡದಲ್ಲಿ ಎಚ್​ಎಎಲ್ ವಿಫಲವಾಯತು ಎನ್ನಲಾಗಿದೆ.

ಎಚ್​ಎಎಲ್​ಗೆ ಮುಳುವಾದ ಆ ಮಾನದಂಡ ಯಾವುದು?

ಒಂದು ಕಂಪನಿಯ ಟರ್ನೋವರ್​ಗಿಂತ ಅದರ ಆರ್ಡರ್ ಬುಕ್ ಮೂರು ಪಟ್ಟು ಹೆಚ್ಚಾಗಿದ್ದರೆ ಪ್ರಾಜೆಕ್ಟ್ ಪರಿಗಣನೆಗೆ ಆದ್ಯತೆ ಕೊಡಲಾಗುವುದಿಲ್ಲ ಎನ್ನುವುದು ಒಂದು ನಿಯಮ. ಈ ವಿಚಾರವು ಎಚ್​ಎಎಲ್​ಗೆ ಮುಳುವಾಯಿತು. ಎಚ್​​​ಎಎಲ್​ನ ಟರ್ವೋವರ್​ಗಿಂತ ಅದರ ಆರ್ಡರ್ ಬುಕ್ ಎಂಟು ಪಟ್ಟು ಹೆಚ್ಚಿದೆ.

ಇದನ್ನೂ ಓದಿ: ಅಮೆರಿಕ, ಯೂರೋಪ್ ಜೊತೆ ಭಾರತದ ವ್ಯಾಪಾರ ಸಂಬಂಧ, 1991ರ ಉದಾರ ನೀತಿಗಿಂತಲೂ ದೊಡ್ಡದು: ಅರವಿಂದ್ ಪಣಗರಿಯಾ

ಎಎಂಸಿಎ ಪ್ರಾಜೆಕ್ಟ್ ಯಾಕೆ ಮುಖ್ಯ?

ಎಎಂಸಿಎ ಪ್ರಾಜೆಕ್ಟ್ ಭಾರತಕ್ಕೆ ಬಹಳ ಮಹತ್ವದ್ದಾಗಿದೆ. ದೇಶೀಯವಾಗಿ ಐದನೇ ತಲೆಮಾರಿನ ಸ್ಟೀಲ್ತ್ ಜೆಟ್ ತಯಾರಿಸುವ ಯೋಜನೆ ಇದು. ಅಮೆರಿಕ, ರಷ್ಯಾ ಮತ್ತು ಚೀನಾ ದೇಶಗಳು ಮಾತ್ರವೇ ಐದನೇ ತಲೆಮಾರಿನ ಜೆಟ್ ತಯಾರಿಸಿವೆ. ಫ್ರಾನ್ಸ್​ನ ರಫೇಲ್ ಜೆಟ್ 4.5 ತಲೆಮಾರಿನ ಜೆಟ್ ಎನಿಸಿದೆ. ಸ್ವಂತವಾಗಿ ಐದನೇ ತಲೆಮಾರಿನ ಜೆಟ್ ತಯಾರಿಕೆ ಎಂದರೆ ಅದರ ಎಂಜಿನ್ ಸೇರಿದಂತೆ ಪ್ರತಿಯೊಂದನ್ನೂ ದೆಶೀಯವಾಗಿ ಅಭಿವೃದ್ಧಿಪಡಿಸಿ ತಯಾರಿಸಬೇಕು. ಸ್ವಾವಲಂಬಿ ಭಾರತಕ್ಕೆ ಇದು ತಾಜಾ ನಿದರ್ಶನವಾಗುತ್ತದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ