AQI
TV9 Network
User
Sign In

By signing in or creating an account, you agree with Associated Broadcasting Company's Terms & Conditions and Privacy Policy.

ಇಪಿಎಫ್ ನಿಯಮ ಇನ್ನಷ್ಟು ಸರಳ; ಸಿಸ್ಟಮ್ಯಾಟಿಕ್ ವಿತ್​ಡ್ರಾಯಲ್ ಪ್ಲಾನ್​ಗೆ ಅನುಮೋದನೆ; 55 ವರ್ಷ ನಿರ್ಬಂಧ, ನಿರುದ್ಯೋಗ ನಿಯಮ ಸಡಿಲ

ಉದ್ಯೋಗಿಗಳ ಭವಿಷ್ಯ ನಿಧಿ (EPF) ನಿಯಮಗಳನ್ನು ಮತ್ತಷ್ಟು ಸರಳೀಕರಿಸಲಾಗಿದೆ. ನಿವೃತ್ತಿ ನಂತರ ಒಟ್ಟಿಗೆ ಇಪಿಎಫ್ ಹಣ ಪಡೆಯಬಹುದು. ಇಲ್ಲದಿದ್ದರೆ ಎಸ್​ಡಬ್ಲ್ಯುಪಿ ಪ್ಲಾನ್​ನಂತೆ ಹಂತ ಹಂತವಾಗಿ ಹಿಂಪಡೆಯಬಹುದು. 55 ವರ್ಷ ವಯಸ್ಸಿಗಿಂತ ಮುಂಚೆಯೇ ಶೇ. 90ರಷ್ಟು ಹಣ ಹಿಂಪಡೆಯಬಹುದು. ಜೊತೆಗೆ ನಿರುದ್ಯೋಗ ಅವಧಿಯಲ್ಲಿ ಹಣ ಹಿಂಪಡೆಯಲು ಇದ್ದ ಕಾಯುವಿಕೆಯ ಅವಧಿಯನ್ನು 2 ತಿಂಗಳಿಗೆ ಇಳಿಸಲಾಗಿದೆ.

ಇಪಿಎಫ್ ನಿಯಮ ಇನ್ನಷ್ಟು ಸರಳ; ಸಿಸ್ಟಮ್ಯಾಟಿಕ್ ವಿತ್​ಡ್ರಾಯಲ್ ಪ್ಲಾನ್​ಗೆ ಅನುಮೋದನೆ; 55 ವರ್ಷ ನಿರ್ಬಂಧ, ನಿರುದ್ಯೋಗ ನಿಯಮ ಸಡಿಲ
ಇಪಿಎಫ್​ಒImage Credit source: Getty Images
ಸುಗ್ಗನಹಳ್ಳಿ ವಿಜಯಸಾರಥಿ
|

Updated on: Nov 19, 2026 | 4:13 PM

Share

ನವದೆಹಲಿ, ನವೆಂಬರ್ 19: ಉದ್ಯೋಗಿಗಳ ಭವಿಷ್ಯ ನಿಧಿ (EPF) ಹಣವನ್ನು ಹಿಂಪಡೆಯುವ ಪ್ರಕ್ರಿಯೆಯನ್ನು ಮತ್ತಷ್ಟು ಸುಲಭ ಮತ್ತು ಗ್ರಾಹಕಸ್ನೇಹಿಯಾಗಿಸಲು ನಿಯಮಗಳಲ್ಲಿ ಪ್ರಮುಖ ಬದಲಾವಣೆಗಳನ್ನು ತರಲಾಗಿದೆ. ಹೊಸ ಸರಳೀಕೃತ ನಿಯಮಗಳ ಪ್ರಕಾರ, 55 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಇಪಿಎಫ್ ಸದಸ್ಯರು ತಮ್ಮ ಭವಿಷ್ಯ ನಿಧಿಯಲ್ಲಿರುವ ಒಟ್ಟು ಮೊತ್ತದ ಶೇ. 90ರಷ್ಟು ಹಣವನ್ನು ಹಿಂಪಡೆಯಲು ಅರ್ಹರಾಗಿದ್ದಾರೆ.

ಹಣಕಾಸಿನ ತುರ್ತು ಪರಿಸ್ಥಿತಿ, ಮನೆ ಖರೀದಿ, ವೈದ್ಯಕೀಯ ಅಗತ್ಯಗಳು ಅಥವಾ ಕುಟುಂಬದ ಪ್ರಮುಖ ಜವಾಬ್ದಾರಿಗಳನ್ನು ನಿಭಾಯಿಸಲು ಉದ್ಯೋಗಿಗಳಿಗೆ ತಮ್ಮ ಉಳಿತಾಯದ ಹೆಚ್ಚಿನ ಭಾಗವನ್ನು ಸುಲಭವಾಗಿ ಬಳಸಿಕೊಳ್ಳಲು ಈ ಕ್ರಮವು ನೆರವಾಗಲಿದೆ. ಈ ಹಿಂದೆ ಇದ್ದ ಕಠಿಣ ಷರತ್ತುಗಳು ಮತ್ತು ವಿವಿಧ ಹಂತಗಳ ಮಿತಿಗಳು ದೀರ್ಘಕಾಲದ ಉಳಿತಾಯದ ಬಳಕೆಗೆ ಅಡ್ಡಿಯಾಗಿದ್ದವು; ಈಗಿನ ನಿಯಮ ಬದಲಾವಣೆಯು ಸದಸ್ಯರಿಗೆ ಹೆಚ್ಚಿನ ಆರ್ಥಿಕ ನಮ್ಯತೆಯನ್ನು ನೀಡುತ್ತದೆ.

ನಿರುದ್ಯೋಗಿಗಳಿಗೆ ರಿಲೀಫ್; ಕಾಯುವಿಕೆ ಅವಧಿ 2 ತಿಂಗಳಿಗೆ ಇಳಿಕೆ

ಇದರ ಜೊತೆಗೆ, ಉದ್ಯೋಗ ಕಳೆದುಕೊಂಡ ಅಥವಾ ನಿರುದ್ಯೋಗ ಅವಧಿಯಲ್ಲಿ ಇರುವ ಸದಸ್ಯರಿಗೆ ದೊಡ್ಡ ಮಟ್ಟದ ರಿಲೀಫ್ ನೀಡಲಾಗಿದೆ. ನಿರುದ್ಯೋಗದ ಕಾರಣದಿಂದ ಇಪಿಎಫ್ ಖಾತೆಯಿಂದ ಹಣ ಹಿಂಪಡೆಯಲು ಈ ಹಿಂದೆ ಕನಿಷ್ಠ 12 ತಿಂಗಳ (ಒಂದು ವರ್ಷ) ಕಾಯುವಿಕೆಯ ಅವಧಿ ಇತ್ತು. ಆದರೆ ಇದೀಗ ಆ ಕಾಯುವಿಕೆಯ ಅವಧಿಯನ್ನು ಕೇವಲ 2 ತಿಂಗಳಿಗೆ ಕಡಿತಗೊಳಿಸಲಾಗಿದೆ. ಹೊಸ ಉದ್ಯೋಗ ಹುಡುಕುವ ನಡುವಿನ ಸಂಕ್ರಮಣ ಕಾಲದಲ್ಲಿ ಕುಟುಂಬ ನಿರ್ವಹಣೆ ಮತ್ತು ದೈನಂದಿನ ಖರ್ಚುಗಳಿಗೆ ಈ ಬದಲಾವಣೆಯು ತಕ್ಷಣದ ಆರ್ಥಿಕ ಆಸರೆಯಾಗಲಿದೆ.

ಇದನ್ನೂ ಓದಿ: ನಾನು ಆದಾಯ ಕರದಲ್ಲಿ 12 ಲಕ್ಷ ಬಿಟ್ಟೆ..ನೀವು ಉದ್ಯೋಗಿಗಳ ತಿಂಗಳ ಪಗಾರು ಏರಿಸಿದ್ರಾ? ನರೇಂದ್ರ ಮೋದಿ ಪ್ರಶ್ನೆ

ಸುದೀರ್ಘ ಕಾಯುವಿಕೆ ಮತ್ತು ಸಂಕೀರ್ಣ ದಾಖಲೆಗಳ ಪ್ರಕ್ರಿಯೆಯಿಂದ ಉದ್ಯೋಗಿಗಳು ಪಡುತ್ತಿದ್ದ ತೊಂದರೆಗಳನ್ನು ತಪ್ಪಿಸುವುದು ಈ ಸುಧಾರಣೆಯ ಪ್ರಮುಖ ಉದ್ದೇಶವಾಗಿದೆ. ಆದರೆ, ನಿವೃತ್ತಿ ಅಥವಾ ದೀರ್ಘಕಾಲೀನ ಭವಿಷ್ಯಕ್ಕಾಗಿ ಇರುವ ನಿಧಿಯಿಂದ ಹೆಚ್ಚಿನ ಮೊತ್ತವನ್ನು ಮೊದಲೇ ಹಿಂಪಡೆಯುವಾಗ ಸದಸ್ಯರು ತಮ್ಮ ನಿವೃತ್ತಿ ಯೋಜನೆ ಮತ್ತು ಬಡ್ಡಿಯ ಲಾಭದ ಮೇಲಾಗುವ ಪರಿಣಾಮವನ್ನೂ ಗಮನದಲ್ಲಿಟ್ಟುಕೊಳ್ಳುವುದು ಸೂಕ್ತವಾಗಿದೆ.

ಎಸ್​ಡಬ್ಲ್ಯುಪಿಗೆ ಅನುಮೋದನೆ; ಕಂತುಗಳಲ್ಲಿ ಪಿಎಫ್ ಹಣ ಪಡೆಯುವ ಅವಕಾಶ

ನೌಕರರ ಭವಿಷ್ಯ ನಿಧಿ ಸಂಸ್ಥೆಯು (EPFO) ನಿವೃತ್ತಿ ಹೊಂದುವ ಸದಸ್ಯರಿಗಾಗಿ ವ್ಯವಸ್ಥಿತ ಹಿಂಪಡೆಯುವಿಕೆ ಯೋಜನೆಗೆ (SWP) ಅನುಮೋದನೆ ನೀಡಿದ್ದು, ಇನ್ನು ಮುಂದೆ ಒಮ್ಮೆಲೇ ಹಣ ತೆಗೆಯುವ ಬದಲು ನಿಗದಿತ ಕಂತುಗಳಲ್ಲಿ ಉಳಿತಾಯದ ಮೊತ್ತವನ್ನು ಪಡೆಯಬಹುದಾಗಿದೆ.

ಕಾರ್ಮಿಕ ಸಚಿವ ಮನ್‌ಸುಖ್ ಮಾಂಡವೀಯ ಅವರ ಅಧ್ಯಕ್ಷತೆಯಲ್ಲಿ ಗುರುವಾರ ನಡೆದ ಕೇಂದ್ರೀಯ ಟ್ರಸ್ಟಿಗಳ ಮಂಡಳಿ (CBT) ಸಭೆಯಲ್ಲಿ ಈ ಪ್ರಸ್ತಾವನೆಗೆ ಅನುಮೋದನೆ ನೀಡಲಾಗಿದೆ.

ಇದರಿಂದ ತಮ್ಮ ಮೂಲ ನಿಧಿಯ ಮಾಲೀಕತ್ವವನ್ನು ಉಳಿಸಿಕೊಂಡೇ, ನಿವೃತ್ತಿಯ ನಂತರ ನಿಯಮಿತ ಮತ್ತು ನಿರೀಕ್ಷಿತ ಆದಾಯದ ಮೂಲವಾಗಿ ಭವಿಷ್ಯ ನಿಧಿ ಉಳಿತಾಯವನ್ನು ಬಳಸಿಕೊಳ್ಳಲು ಸದಸ್ಯರಿಗೆ ಅನುವಾಗುತ್ತದೆ.

ಇದನ್ನೂ ಓದಿ: ಯುಪಿಐ ಬಳಕೆದಾರರಿಗೆ ಗುಡ್‌ನ್ಯೂಸ್, 2027ರ ಚುನಾವಣೆವರೆಗೆ ಪಾವತಿ ಶುಲ್ಕ ಜಾರಿ ವಿಳಂಬ ಸಾಧ್ಯತೆ

ಪ್ರಸ್ತುತ ಇರುವ ನಿಯಮಗಳೇನು?

ಪ್ರಸ್ತುತ ಇರುವ ನಿಯಮದ ಪ್ರಕಾರ, ನಿವೃತ್ತಿಯಾದ ಮೂರು ವರ್ಷಗಳ ಒಳಗೆ ಸಂಪೂರ್ಣ ಪಿಎಫ್ ಮೊತ್ತವನ್ನು ಹಿಂಪಡೆಯಬೇಕಾಗುತ್ತದೆ. ಇಲ್ಲದಿದ್ದರೆ ಆ ಖಾತೆಗೆ ಬಡ್ಡಿ ಸಂದಾಯವಾಗುವುದು ನಿಂತುಹೋಗುತ್ತದೆ.

ಕಂತುಗಳಲ್ಲಿ ಹಣ ಪಡೆಯುತ್ತಿರುವ ಸಂದರ್ಭದಲ್ಲಿ ಸದಸ್ಯರು ನಿಧನರಾದರೆ, ನಾಮನಿರ್ದೇಶಿತರು (Nominee) ಅಥವಾ ಅವಲಂಬಿತರು ಉಳಿದ ಮೊತ್ತವನ್ನು ಹಿಂಪಡೆಯುವ ಅಥವಾ ನಿಯಮಿತ ಕಂತುಗಳನ್ನು ಮುಂದುವರಿಸುವ ಆಯ್ಕೆಯನ್ನು ಹೊಂದಿರುತ್ತಾರೆ.

ಮೊದಲ ಹಂತದಲ್ಲಿ ಯಾರಿಗೆ ಲಾಭ?

ಈ ಸ್ವಯಂಪ್ರೇರಿತ ಯೋಜನೆಯು ಆರಂಭಿಕ ಹಂತದಲ್ಲಿ ಹಾಲಿ ಇಪಿಎಫ್ ಚಂದಾದಾರರ ಮೇಲೆ ಗಮನ ಕೇಂದ್ರೀಕರಿಸಲಿದ್ದು, 55 ವರ್ಷಕ್ಕಿಂತ ಮೇಲ್ಪಟ್ಟ ಸುಮಾರು 6.3 ಲಕ್ಷ ಸದಸ್ಯರು ಆರಂಭದಲ್ಲಿ ಇದರ ಪ್ರಯೋಜನ ಪಡೆಯುವ ಅವಕಾಶ ಹೊಂದಿರುತ್ತಾರೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

Follow Us
ಸುಗ್ಗನಹಳ್ಳಿ ವಿಜಯಸಾರಥಿ
ಸುಗ್ಗನಹಳ್ಳಿ ವಿಜಯಸಾರಥಿ

ಹುಟ್ಟೂರು ಹಾಸನ ಜಿಲ್ಲೆಯ ಶ್ರವಣಬೆಳಗೊಳ ಸಮೀಪದ ಒಂದು ಪುಟ್ಟ ಹಳ್ಳಿ. ಬೆಳದದ್ದು ಬೆಂಗಳೂರು ನಗರದಲ್ಲಿ. ಹಲವು ವರ್ಷಗಳಿಂದ ಪತ್ರಿಕಾ ರಂಗದಲ್ಲಿ ನೆಲೆ. ಬರವಣಿಗೆಯ ಆಸಕ್ತಿ ಮತ್ತು ಪರಿಣಿತಿಯ ಕ್ಷೇತ್ರಗಳು ಆರ್ಥಿಕತೆ, ಹಣಕಾಸು, ಅಂತರರಾಷ್ಟ್ರೀಯ ವಿದ್ಯಮಾನ, ಜನಕ್ರಾಂತಿ, ರಾಷ್ಟ್ರೀಯತೆ, ಸಂಸ್ಕೃತಿ, ಮಾನವ ಸಂಬಂಧ, ಕ್ರೀಡೆ ಮೊದಲಾದವು ಇವೆ. ಓದುಗರಿಗೆ ಸುಲಭವಾಗಿ ಅರ್ಥವಾಗುವಂತೆ ಸಾಧ್ಯವಾದಷ್ಟೂ ಸ್ಫುಟವಾಗಿ, ಸರಳವಾಗಿ ಬರೆಯುವ ಇಚ್ಛೆ.

Read More