ಚಿನ್ನ, ಬೆಳ್ಳಿ ಬೆಲೆ ಸತತವಾಗಿ ಏರಿಕೆ ಆಗುತ್ತಿರುವುದು ಯಾಕೆ? ಅಮೆರಿಕದಲ್ಲಿನ ಈ ವಿದ್ಯಮಾನ ಕಾರಣವಾ?

ನವದೆಹಲಿ, ಜುಲೈ 18: ಕಳೆದ ಕೆಲ ದಿನಗಳಿಂದ ಚಿನ್ನದ ಬೆಲೆ ಮತ್ತೊಮ್ಮೆ ಗಣನೀಯ ಏರಿಕೆಯ ಹಾದಿಗೆ ಬಂದಿದೆ. ಚಿನ್ನದ ಬೆಲೆ ಸತತ ಮೂರು ದಿನಗಳ ಕಾಲ ಏರುಗತಿಯಲ್ಲಿದೆ. ಅಂತಾರಾಷ್ಟ್ರೀಯ ವಿದ್ಯಮಾನಗಳಿಗೆ ಚಿನಿವಾರ ಪೇಟೆ ಸೂಕ್ಷ್ಮವಾಗಿ ಸ್ಪಂದಿಸುತ್ತದೆ. ಅದರಲ್ಲೂ ಅಮೆರಿಕದದ ವಿದ್ಯಮಾನಗಳ ಪ್ರಭಾವ ಈ ಮಾರುಕಟ್ಟೆ ಮೇಲೆ ಬಹಳ ಇದೆ. ಈಗ ಚಿನ್ನ ಮತ್ತು ಬೆಳ್ಳಿ ಬೆಲೆ ಏರಿಕೆ ಟ್ರೆಂಡ್​ಗೆ ಇದೇ ಅಮೆರಿಕವೇ ಮೂಲವಾಗಿದೆ.

ಅಮೆರಿಕದ ಫೆಡರಲ್ ರಿಸರ್ವ್ ಮುಖ್ಯಸ್ಥರು ಇತ್ತೀಚೆಗೆ ಬಡ್ಡಿದರ ಇಳಿಸುವ ಸುಳಿವು ನೀಡಿದ್ದರು. ಹಣದುಬ್ಬರ ಏರಿಕೆ ಆಗಲಿ ಬಿಡಲಿ ಆರ್ಥಿಕ ಬೆಳವಣಿಗೆಗೆ ಅನುವು ಮಾಡಿಕೊಡುವ ಸಲುವಾಗಿ ಬಡ್ಡಿದರ ಕಡಿಮೆ ಮಾಡುವ ಬಗ್ಗೆ ಆಲೋಚಿಸುತ್ತಿರುವುದಾಗಿ ಪೋವೆಲ್ ಅವರು ಹೇಳಿದ್ದರು. ಅಮೆರಿಕದಲ್ಲಿ ಸದ್ಯ ಬಡ್ಡಿದರ ಗರಿಷ್ಠ ಮಟ್ಟದಲ್ಲಿ ಇದೆ. ಈ ವರ್ಷದೊಳಗೆ ದರ ಕಡಿಮೆ ಮಾಡುವುದು ಖಚಿತವಾಗಿದೆ. ಇದು ಚಿನ್ನದ ಬೆಲೆ ಹೆಚ್ಚಳಕ್ಕೆ ಕಾರಣವಾಗಿದೆ.

ಇದನ್ನೂ ಓದಿ: Gold Silver Price on 18th July: ಚಿನ್ನ ಮತ್ತು ಬೆಳ್ಳಿ ಬೆಲೆ ಎರಡೂ ಭರ್ಜರಿ ಹೆಚ್ಚಳ

ಬಡ್ಡಿದರ ಕಡಿಮೆ ಆದರೆ ಚಿನ್ನದ ಬೆಲೆ ಹೆಚ್ಚಳ ಯಾಕೆ?

ಚಿನ್ನ, ಬೆಳ್ಳಿ ಇತ್ಯಾದಿ ಅಮೂಲ್ಯ ವಸ್ತುಗಳು ಅನಿಶ್ಚಿತ ಪರಿಸ್ಥಿತಿಯಲ್ಲಿ ಬೇಡಿಕೆ ಪಡೆಯುತ್ತವೆ. ಹಣದುಬ್ಬರ ಹೆಚ್ಚಾದಾಗ, ಯುದ್ಧ ವಾತಾವರಣ ಇದ್ದಾಗ, ಆರ್ಥಿಕ ತುಮುಲಗಳಿದ್ದಾಗ ಇತ್ಯಾದಿ ಬಿಕ್ಕಟ್ಟುಗಳಲ್ಲಿ ಹೂಡಿಕೆದಾರರು ಚಿನ್ನದತ್ತ ಎಡೆತಾಕುತ್ತಾರೆ.

ಅಮೆರಿಕದಲ್ಲಿ ಬಡ್ಡಿದರ ಕಡಿಮೆ ಮಾಡಲಾಗುತ್ತದೆ ಎಂದರೆ ಅಲ್ಲಿನ ಡೆಟ್ ಫಂಡ್​ಗಳಲ್ಲಿನ ಇಳುವರಿ (ರಿಟರ್ನ್ಸ್) ಕಡಿಮೆ ಆಗುತ್ತದೆ. ಹೀಗಾಗಿ, ಅಲ್ಲಿ ಹೂಡಿಕೆ ಮಾಡಿದ್ದವರು ಹೆಚ್ಚಿನ ರಿಟರ್ನ್ ನಿರೀಕ್ಷೆಯಲ್ಲಿ ಷೇರು ಮಾರುಕಟ್ಟೆಗೋ, ಚಿನಿವಾರಪೇಟೆಗೋ ವಲಸೆ ಹೋಗಬಹುದು.

ಇದನ್ನೂ ಓದಿ: ಆಭರಣಕ್ಕೆ ಮೇಕಿಂಗ್ ಚಾರ್ಜಸ್, ವೇಸ್ಟೇಜ್ ಚಾರ್ಜಸ್ ಲೆಕ್ಕಾಚಾರ ಹೇಗಿರುತ್ತೆ? ಒಡವೆ ಖರೀದಿಸುವ ಮುನ್ನ ಈ ಸಂಗತಿ ತಿಳಿದಿರಿ

ಮತ್ತೊಂದು ಕಾರಣ ಎಂದರೆ ಡಾಲರ್ ಮೌಲ್ಯ ತುಸು ಕುಂದಿರುವುದು. ಇವೆಲ್ಲಾ ಸಂದರ್ಭಗಳಲ್ಲಿ ಹೂಡಿಕೆದಾರರಿಗೆ ಚಿನ್ನ ಸುರಕ್ಷಿತ ಆಯ್ಕೆಯಾಗಿ ಕಾಣುತ್ತದೆ. ಅಂತೆಯೇ, ಚಿನ್ನ, ಬೆಳ್ಳಿ ಇತ್ಯಾದಿ ಲೋಹಗಳ ಬೆಲೆ ಹೆಚ್ಚತೊಡಗಿದೆ. ಇದೇ ಜುಲೈ ಕೊನೆಯಲ್ಲಿ ಫೆಡರಲ್ ರಿಸರ್ವ್ ಸಭೆ ಇದ್ದು, ಹೊಸ ದರಗಳ ಘೋಷಣೆ ಮಾಡುವ ಸಾಧ್ಯತೆ ಇದೆ. ದರ ಕಡಿಮೆ ಮಾಡಿದರೆ ಚಿನ್ನದ ಬೆಲೆ ಇನ್ನಷ್ಟು ಹೆಚ್ಚಳ ಆಗುವ ಸಾಧ್ಯತೆ ಇದೆ. ಒಂದು ವೇಳೆ ದರ ಕಡಿಮೆ ಮಾಡದೇ ಇದ್ದರೆ ಚಿನ್ನ, ಬೆಳ್ಳಿ ಬೆಲೆ ಇಳಿಕೆ ಆಗಬಹುದು.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

Published On - 12:30 pm, Thu, 18 July 24