ಹಲೋ ಯುಪಿಐ, ಬಿಲ್​ಪೇ ಕನೆಕ್ಟ್, ಕ್ರೆಡಿಟ್ ಲೈನ್, ಲೈಟ್ ಎಕ್ಸ್ ಸೇರಿ ಆರು ಪೇಮೆಂಟ್ ಉತ್ಪನ್ನಗಳನ್ನು ಬಿಡುಗಡೆ ಮಾಡಿದ ಆರ್​ಬಿಐ ಗವರ್ನರ್

ನವದೆಹಲಿ, ಸೆಪ್ಟೆಂಬರ್ 7: ಗ್ಲೋಬಲ್ ಫಿನ್​ಟೆಕ್ ಫೆಸ್ಟ್ 2023 ಕಾರ್ಯಕ್ರಮದ ವೇಳೆ ಆರ್​ಬಿಐ ಗವರ್ನರ್ ಶಕ್ತಿಕಾಂತ ದಾಸ್ ಅವರು ಆರು ಯುಪಿಐ ಪೇಮೆಂಟ್ ಉತ್ಪನ್ನಗಳನ್ನು ಬಿಡುಗಡೆ ಮಾಡಿದ್ದಾರೆ. ನ್ಯಾಷನಲ್ ಪೇಮೆಂಟ್ ಕಾರ್ಪೊರೇಶನ್ (NPCI) ಸಂಸ್ಥೆ ಈ ಉತ್ಪನ್ನಗಳನ್ನು ಅಭಿವೃದ್ಧಿಪಡಿಸಿದೆ. ಯುಪಿಐಗೆ ಕ್ರೆಡಿಟ್ ಲೈನ್, ಯುಪಿಐ ಲೈಟ್ ಎಕ್ಸ್, ಟ್ಯಾಪ್ ಮಾಡಿ ಹಣ ಪಾವತಿಸುವುದು, ಹಲೋ ಯುಪಿಐ ಇತ್ಯಾದಿ ಆರು ಫೀಚರ್​ಗಳು ಯುಪಿಐ ಬಳಕೆದಾರರಿಗೆ ಅನುಕೂಲವಾಗಬಹುದು. ಈ ಆರು ಫೀಚರ್​ಗಳ ಬಗ್ಗೆ ಪರಿಚಯ ಇಲ್ಲಿದೆ.

ಯುಪಿಐ ಕ್ರೆಡಿಟ್ ಲೈನ್

ಕ್ರೆಡಿಟ್ ಕಾರ್ಡ್​ಗಳಿಗೆ ನೀಡುವ ಮಿತಿ ಸಾಲ ಸೌಲಭ್ಯವನ್ನು ಯುಪಿಐ ಖಾತೆಗಳಿಗೆ ಕೊಡಲಾಗುತ್ತದೆ. ಯಾವ ಯುಪಿಐ ಖಾತೆಗೆ ಎಷ್ಟು ಕ್ರೆಡಿಟ್ ಮಿತಿ ಎಂಬುದನ್ನು ಆಯಾ ಬ್ಯಾಂಕ್​ನವರು ನಿರ್ಧರಿಸುತ್ತಾರೆ.

ಯುಪಿಐ ಲೈಟ್ ಎಕ್ಸ್

ಇದರಲ್ಲಿ ಇಂಟರ್ನೆಟ್ ಕನೆಕ್ಟಿವಿಟಿ ಇಲ್ಲದ ಅಥವಾ ಸಿಗ್ನಲ್ ದುರ್ಬಲ ಇರುವ ಸ್ಥಳಗಳಲ್ಲಿ ಆಫ್​ಲೈನ್ ಮೂಲಕ ಹಣವನ್ನು ಕಳುಹಿಸಲು ಇಂಟರ್ನೆಟ್ ಲೈಟ್ ಎಕ್ಸ್ ಫೀಚರ್ ಸಹಾಯವಾಗುತ್ತದೆ.

ಇದನ್ನೂ ಓದಿ: ವಂಚಕ ಜಾಹೀರಾತುಗಳ ವಿರುದ್ಧ ಕೇಂದ್ರ ಕರಡು ನಿಯಮಾವಳಿ; ಸಾರ್ವಜನಿಕ ಅಭಿಪ್ರಾಯಕ್ಕೆ ಆಹ್ವಾನ; ಡಾರ್ಕ್ ಪ್ಯಾಟರ್ನ್ಸ್ ಎಂದರೇನು?

ಯುಪಿಐ ಟ್ಯಾಪ್ ಅಂಡ್ ಪೇ

ಕ್ಯೂಆರ್ ಕೋಡ್ ಅನ್ನು ಯುಪಿಐ ಆ್ಯಪ್​ನಿಂದ ಸ್ಕ್ಯಾನ್ ಮಾಡಿ ಹಣ ಪಾವತಿಸುವುದು ಸಾಮಾನ್ಯ ವಿಧಾನ. ಈಗ ಹೊಸ ಫೀಚರ್ ತರಲಾಗಿದ್ದು, ವರ್ತಕರ ಬಳಿ ಇರುವ ಎನ್​ಎಫ್​ಸಿ ಚಾಲಿತ ಕ್ಯುಅರ್ ಕೋಡ್​ಗಳನ್ನು ಸ್ಕ್ಯಾನ್ ಮಾಡುವ ಅವಶ್ಯಕತೆ ಇಲ್ಲದೇ ಕೇವಲ ಒತ್ತಿದರೂ ಸಾಕು ಹಣ ಪಾವತಿಯಾಗುತ್ತದೆ. ನಿಯರ್ ಫೀಲ್ಡ್ ಕಮ್ಯೂನಿಕೇಶನ್ ಟೆಕ್ನಾಲಜಿಯನ್ನು ಇಲ್ಲಿ ಬಳಸಲಾಗಿದೆ.

ಹಲೋ ಯುಪಿಐ

ಧ್ವನಿ ಮೂಲಕ ಯುಪಿಐ ಪೇಮೆಂಟ್ ಮಾಡಲು ಈ ಫೀಚರ್ ಸಹಾಯವಾಗುತ್ತದೆ. ಸದ್ಯ ಇಂಗ್ಲೀಷ್ ಮತ್ತು ಹಿಂದಿಯಲ್ಲಿ ಈ ಸೌಲಭ್ಯ ಇದೆ. ಮುಂದೆ ಕನ್ನಡ ಸೇರಿದಂತೆ ಇತರ ಪ್ರಾದೇಶಿಕ ಭಾಷೆಗಳಲ್ಲಿ ಇದನ್ನು ನೀಡಬಹುದು.

ಇದನ್ನೂ ಓದಿ: ಹಲ್ದಿರಾಮ್ಸ್ ಖರೀದಿಸಲು ಟಾಟಾ ಯತ್ನ; ದುಬಾರಿ ಬೆಲೆ ಕೇಳಿ ಹಿಂದೇಟು; ಆದರೆ, ಮಾತುಕತೆಯೇ ಆಗಿಲ್ಲ ಎನ್ನುತ್ತಿದೆ ಸ್ನ್ಯಾಕ್ಸ್ ಕಂಪನಿ

ಬಿಲ್​ಪೇ ಕನೆಕ್ಟ್

ಭಾರತದಾದ್ಯಂತ ಬಿಲ್ ಪೇಮೆಂಟ್ಸ್​ಗಾಗಿ ರಾಷ್ಟ್ರೀಕೃತ ಸಂಖ್ಯೆಯನ್ನು ನೀಡಲಾಗುತ್ತದೆ. ಈ ಸಂಖ್ಯೆಗೆ ಗ್ರಾಹಕರು ‘Hi’ ಎಂದು ಮೆಸೇಜ್ ಕಳುಹಿಸಿದರೆ ಬಿಲ್ ಪೇಮೆಂಟ್ ವ್ಯವಸ್ಥೆ ಪಡೆಯಬಹುದು. ಫೀಚರ್ ಫೋನ್ ಹೊಂದಿರುವವರು ಆ ನಂಬರ್​ಗೆ ಮಿಸ್ಡ್ ಕಾಲ್ ಕೊಟ್ಟರೂ ಕೂಡ ಬಿಲ್ ಪೇಮೆಂಟ್ ಮಾಡುವ ಅವಕಾಶ ಸಿಗುತ್ತದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ