RBI: 2,000 ರೂ ನೋಟು ವಿನಿಮಯ: ಬ್ಯಾಂಕುಗಳಿಗೆ ಆರ್​ಬಿಐ ಮಾರ್ಗಸೂಚಿ ಬಿಡುಗಡೆ; ಗವರ್ನರ್ ಶಕ್ತಿಕಾಂತ ದಾಸ್ ಹೇಳಿದ್ದಿದು

ನವದೆಹಲಿ: 2,000 ರೂ ಮುಖಬೆಲೆಯ ನೋಟುಗಳನ್ನು ಚಲಾವಣೆಯಿಂದ ಆರ್​ಬಿಐ (Reserve Bank of India) ಹಿಂಪಡೆದುಕೊಂಡಿದ್ದು, ಮೇ 23ರಿಂದ ಇವುಗಳನ್ನು ವಿನಿಮಯ ಮಾಡಿಕೊಳ್ಳಲು ಸಾರ್ವಜನಿಕರಿಗೆ ಅವಕಾಶ ಮಾಡಿಕೊಡಲಾಗಿದೆ. ಈ ವಿನಿಮಯದ ಬಾಗಿಲು ಸೆಪ್ಟಂಬರ್ 30ರವರೆಗೂ ಇರಲಿದೆ. ಇದೀಗ ಒಂದು ದಿನ ಮುನ್ನ ಆರ್​ಬಿಐ 2,000 ರೂ ನೋಟುಗಳ ವಿನಿಮಯ ವಿಚಾರದಲ್ಲಿ ಎಲ್ಲಾ ಬ್ಯಾಂಕುಗಳಿಗೂ ಮಾರ್ಗಸೂಚಿ ಬಿಡುಗಡೆ ಮಾಡಿದೆ. ಇದರ ಬೆನ್ನಲ್ಲೇ ಆರ್​ಬಿಐ ಗವರ್ನರ್ ಶಕ್ತಿಕಾಂತ ದಾಸ್ ಅವರು ಸಾರ್ವಜನಿಕರಿಗೆ ಕಿವಿಮಾತು ಕೂಡ ಹೇಳಿದ್ದಾರೆ.

‘ನೀವು ಬ್ಯಾಂಕುಗಳಿಗೆ ಮುಗಿಬಿದ್ದು ಹೋಗುವ ಅವಶ್ಯಕತೆ ಇಲ್ಲ. ಸೆಪ್ಟಂಬರ್ 30ರವರೆಗೆ, 4 ತಿಂಗಳು ನಿಮಗೆ ಕಾಲಾವಕಾಶ ಇದೆ. ಸೆಪ್ಟಂಬರ್ 30ರ ಬಳಿಕವೂ ಈ 2,000 ರೂ ನೋಟು ಮಾನ್ಯವಾಗಿಯೇ ಇರುತ್ತದೆ’ ಎಂದು ಆರ್​ಬಿಐ ಗವರ್ನರ್ ಶಕ್ತಿಕಾಂತ ದಾಸ್ ಹೇಳಿದ್ದಾರೆ.

ಹಾಗಾದರೆ, 2,000 ರೂ ನೋಟು ವಿನಿಮಯಕ್ಕೆ ಸಾರ್ವಜನಿಕರಿಗೆ ಸೆಪ್ಟಂಬರ್ 30ಕ್ಕೆ ಡೆಡ್​ಲೈನ್ ಕೊಟ್ಟಿರುವುದು ಯಾಕೆ? ಇದಕ್ಕೆ ಆರ್​ಬಿಐ ಗವರ್ನರ್ ಉತ್ತರ ಕೊಟ್ಟಿದ್ದಾರೆ. ಅವರ ಪ್ರಕಾರ, ಡೆಡ್​ಲೈನ್ ನಿಗದಿ ಮಾಡಿದಾಗ ಜನರು ಅದನ್ನು ಗಂಭೀರವಾಗಿ ಪರಿಗಣಿಸಿ ತಮ್ಮಲ್ಲಿ 2,000 ರೂ ನೋಟಿದ್ದರೆ ಅದನ್ನು ಹಿಂದಿರುಗಿಸಲು ಯತ್ನಿಸುವ ಸಾಧ್ಯತೆ ಹೆಚ್ಚು.

ಇದನ್ನೂ ಓದಿ: RBI: 2,000 ರೂ ನೋಟು ಹಿಂಪಡೆದದ್ದರಿಂದ ಯಾರಿಗೆ ಲಾಭ? ಇಲ್ಲಿದೆ ಒಂದು ರಿಪೋರ್ಟ್

2,000 ರೂ ನೋಟು ವಿನಿಮಯಕ್ಕೆ ಆರ್​ಬಿಐನಿಂದ ಬ್ಯಾಂಕುಗಳಿಗೆ ಮಾರ್ಗಸೂಚಿ ಬಿಡುಗಡೆ

2,000 ರೂ ಮುಖಬೆಲೆಯ ನೋಟುಗಳನ್ನು ಚಲಾವಣೆಯಿಂದ ಹಿಂಪಡೆದಿರುವುದರಿಂದ ಈ ನೋಟುಗಳನ್ನು ವಿನಿಮಯ ಮಾಡಿಕೊಳ್ಳಲು ಸೆಪ್ಟಂಬರ್ 30ರವರೆಗೆ ಕಾಲಾವಕಾಶ ಇದೆ. ಯಾವುದೇ ಬ್ಯಾಂಕಿನಲ್ಲೂ ವಿನಿಮಯಕ್ಕೆ ಅವಕಾಶ ಇರುತ್ತದೆ. ಮೇ 23ರಿಂದಲೇ ಈ ಕಾರ್ಯ ಆರಂಭವಾಗುತ್ತದೆ. ಇಂದು ಆರ್​ಬಿಐ ಎಲ್ಲಾ ಬ್ಯಾಂಕುಗಳಿಗೆ ಮಾರ್ಗಸೂಚಿ ಪ್ರಕಟಿಸಿದೆ.

• ಈಗ ಬೇಸಿಗೆ ಇರುವುದರಿಂದ ಬ್ಯಾಂಕುಗಳಲ್ಲಿ 2,000 ರೂ ವಿನಿಮಯಕ್ಕೆ ಬರುವ ಸಾರ್ವಜನಿಕರಿಗಾಗಿ ನೆರಳಿನ ಸ್ಥಳ ಇರಬೇಕು. ಕುಡಿಯುವ ನೀರಿನ ಸೌಲಭ್ಯ ಇರಬೇಕು
• ಬ್ಯಾಂಕಿನಲ್ಲಿ 2,000 ರೂ ನೋಟುಗಳ ಠೇವಣಿ ಮತ್ತು ವಿನಿಮಯ ಎಷ್ಟಾಗಿದೆ ಎಂಬುದನ್ನು ಆರ್​ಬಿಐ ನೀಡಿದ ಮಾದರಿಯಲ್ಲಿ ದಿನವೂ ಮಾಹಿತಿ ದಾಖಲಿಸಬೇಕು. ಆರ್​ಬಿಐ ಕೇಳಿದಾಗ ಬ್ಯಾಂಕುಗಳು ಈ ಮಾಹಿತಿ ಒದಗಿಸಬೇಕು.
• ಎಲ್ಲಾ ಬ್ಯಾಂಕುಗಳು ತತ್​ಕ್ಷಣದಿಂದಲೇ 2,000 ರೂ ನೋಟು ನೀಡುವುದನ್ನು ನಿಲ್ಲಿಸಬೇಕು.

ಈ ಮೇಲಿನ ಎರಡು ಮಾರ್ಗಸೂಚಿಯನ್ನು ಮೇ 22ರಂದು ಆರ್​ಬಿಐ ಬಿಡುಗಡೆ ಮಾಡಿದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ